Piitsuungaangaarluni inuuneq

PIITSUUNGAANGAARNEQ toqussutaasinnaavoq. Piitsuungaangaartut inuussutissanik, imermik ikummatissanillu amigaateqartarput. Aamma iluamik inissaqaratillu nakorsartissinnaanatillu atuartitaasinnaasanngillat. Taamatut eqqorneqartut 1 milliardinit amerlanerupput — Amerikami najugaqartut tamarmik amerlaqatingajaat. Europap Kippasissuani Amerikamilu Avannarlermi najugallit amerlanerit taama piitsuutigisunik naapitaqarnikuunngillat. Taamatut atugaqartunik tusagaqariarta.

Mbarushimana nulianilu qitornatillu tallimat Rwandami najugaqarput. Arfinilinnik qitornaqaraluarput ataatsilli malaria toqqutigaa. Ima oqarpoq: “Ataatama nunaatini arfinilinngorlugu avittariaqarpaa. Uanga pissara mikingaarmat ilaquttakka illoqarfimmut nuutsittariaqarpakka. Nuliaralu inuussutissarsiutigalugu ujaqqanik sioqqanillu puumiittunik nammalluta assartuisarpugut. Illorput igalaaqanngilaq, politeeqarfiullu eqqaanut imertartarpugut. Ullormut ataaseriarluta nerisarpugut, suliffeqanngikkaangattali ullormut nerisaqanngivittarpugut. Taamaakkaangat silamut anisarpunga — qitornakka kaallutik qiasut tusaaneq saperakkit.”

Victor Carmenilu kamippannik ilaartuisartuupput. Qitornatillu tallimat Boliviami najugaqarput. Illup marrarmik sanaap aserfallassimasup initaa ataaseq attartorpaat. Innaallagiaqanngilaq qalialu ussiilluni. Atuarfeqarpoq atuartulli amerlangaarmata Victorip panini atualissappat nerriveeraliuuttariaqarpaa. Aappariit nerisassiornermut imermillu imigassaminnik qalatitsinermut qisussaminnik aallerlutik 10 kilometerit pisuttariaqartarput. Carmen ima oqarpoq: “Anartarfeqannginnatta kuummut, aamma eqqaaviusumut, perusuersariartortariaqartarpugut. Aammali kuuk uffarfiusarmat qitornavut napparsimakulasarput.”

Francisco Ilídialu Mocambiquemi najugaqarput. Qitornaat sisamat ajunngillat, ataatsilli napparsimmavimmit katsorsarneqarumaneqannginnerata kingorna malaria toqqutigaa. Aappariit qaammatini pingasuni inuussutigisinnaasaminnik qaqorteqqasunik naatsiianillu nunaatimininnguaminni naatitsisarput. Francisco ima oqarpoq: “Ilaannikkut siallinngitsoortarpoq naatitavulluunniit tillinneqarlutik. Taava bambusit sanaartornermi atorneqartartut amitsukujuunngorlugit aggorlugit aningaasarsiutigilaarniarlugit  tuniniartarpakka. Aamma nalunaaquttap-akunneri marluk pisulluta qisussatsinnik orpigaqarfissuarmut aallertarpugut. Nuliaralu immikkut nammattarpugut nammaap aappaa sapaatip-akunneranut iganermut atugassaq aappaalu tuniniagassaq.”

Inuppassuit aatsaat taama pisuujutigitillugit nunarsuarmi inuit arfineq-marluugaangata ataaseq Mbarushimanatut, Victoritut Franciscotullu inuummat ajorluinnartoqarnera inuppassuit isumaqatigiissutigaat. Aammami pissutsit iliuuseqarfiginiarneqartarput. Allaaserisami tulliuttumi ilungersuutigineqartartut sammineqarput.

 [Qupp. 2, 3-mi assiliartaq]

Carmen qitornanilu kuummut imertartut