‘Guutip savaataanik ilissinniittunik paarsisuugitsi’

“Guutip savaataanik ilissinniittunik paarsisuuniaritsi, paarisigit tamatumunnga pinngitsaalisaasutut pinnasi namminerli kajumissutsissinnit.” — 1 PETRUSI 5:2.

1. Petrusip allakkani siulliit allakkamigit kristumiut qanoq atugaqarpat?

KAASARIP Nerop kristumiunik Romamiittunik malersuinngitsiarnerani apustilip Petrusip allakkani siulliit allappai. Uppeqatini anersaakkut nakussatsikkusuppai. Diaavulu “angalasarpoq” kristumiunik “iisassarsiorluni”. Aalajaattuarumallutik ‘silatusaartariaqarlutillu’ ‘Guutip assaata pissarsuup ataani qanilaartuusariaqarput’. (1 Petrusi 5:6, 8) Aamma ataasiussuseqartuartariaqarput. Pingaaruteqarluinnarpoq ‘kimmaatinnginnissaat imminnullu mikkaatinnginnissaat’ taamaaliorunimmi ‘imminnut nungutissagamik’. — Galatiamiut 5:15.

2, 3. Kina akiussavarput, allaaserisanilu suut sammissavavut?

² Ullumikkut uaguttaaq tamatumunnga assingusunik atugaqarpugut. Diaavulu ‘iiniarsaraluta’ periarfissarsiorpoq. (Saqqummersitat 12:12) Qanittukkullu “naalliunnartoqangaassaaq silarsuup pileqqaarneraniit maannamut asseqanngitsumik”. (Matthæusi 24:21) Soorlu kristumiut ukiuni hundredelinni siullerni saqitsaannaveersaarsimasut taamatuttaaq uagut tamanna eqqumaffigisariaqarparput. Taamaattumik ilaannikkut utoqqaanertanit piumasaqaatinik eqqortitsisunit ikiorneqartariaqarpugut.

³ Utoqqaanertat “Guutip savaataanik” paarsisuunermik immikkut pisinnaatitaaffimmik qanoq pingaartitsinerulersinnaanersut sammeriartigu. (1 Petrusi 5:2) Aamma savanik pitsaanerpaamik qanoq paarsisinnaanersut sammissavarput. Allaaserisami tulliuttumi ilagiit ilagiinni ‘ilungersorlutik sulisut siulersuisullu qujamasuutigisinnaagaat’ sammissavarput. (1 Thessalonikamiut 5:12) Tamanna uagutsinnut akeraanerpaasumut aalajaattuarnissatsinnut iluaqutigisinnaavarput nalunnginnatsigu taannarpiaq akiugassaralugu. — Efesosimiut 6:12.

Guutip savaataanik paarsisut

4, 5. Utoqqaanertat savaatit qanoq pisassavaat? Assersuuteqarit.

⁴ Petrusip ukiuni hundredelinni siullerni kristumiut akornanni utoqqaanertaasut kajumissaarpai savaatinut paarisaminnut Guutip isiginnittaaseqarneratut isiginnittaaseqaqqullugit. (Atuakkit 1 Petrusi 5:1, 2). Petrusi ilagiinni sukarsuartut isigineqaraluarluni utoqqaanertat nikassanngilai. Aap, utoqqaanertaqatimisut oqaaqqissaarpai. (Galatiamiut 2:9) Petrusip kajumissaarineratut ullumikkut Siulersuisoqatigiit ilagiinni utoqqaanertat kajumissaarpaat Guutip savaataanik paarsisuunermik akisussaaffimminnik angisuumik eqqortitseqqullugit.

⁵ Apustili allappoq utoqqaanertat “Guutip savaataanik” paarsisuussasut. Utoqqaanertat savat Jehovamit erneranillu, Jiisusimit Kristusimit, pigineqarnerannik paasinninnissaat pingaaruteqarluinnarpoq. Utoqqaanertat Guutip savaataanik qanoq paarsinertik pillugu akisussaatinneqarumaarput. Takorlooriartigu ikinngutigilluakkavit ilaata aallaqqanermini meeqqani ilinnut paareqqugai. Paarilluassavatit nerisassiuuttarlugillu, ilaa? Meeqqat ilaat napparsimaleraluarpat nakorsiaatissagaluarpat, ilaa? Tamatumunnga assingusumik ilagiinni utoqqaanertat Guutip ilagiissai “nammineq ernermi aavanik pissarsiai” paarisarpaat. (Apustilit Suliaat 20:28, NV) Eqqarsaatigisarpaat savaatit tamarmik Jiisusip Kristusip aavanik naleqangaartumik pisiarineqarsimasut. Savaatit paarinissaannik akisussaaffeqaramik taakku paarilluartarlugit nerisittarlugillu illersortarpaat.

6. Itsaq savanik paarsisut sumik akisussaaffeqarpat?

 ⁶ Biibilip nalaani savanik paarsisut akisussaaffiat eqqarsaatigeriaruk. Taakkua savaatinik paarsiniarlutik ullukkut kiattarnera unnuakkullu nillertarnera naammagalugit atortariaqartarpaat. (1 Mosesi 31:40) Allaat inuunertik savaatit pillugit navianartorsiortittarpaat. Daavip savanik paarsisup inuusuttup savaatini uumasunit qaasuttunit, assersuutigalugu løvimit nannumillu, annaattarpai. Daavip oqaluttuaraa løvimik nannumilluunniit takkuttoqaraangat ‘pukusuatigut meqqorsuisigullu tigoriarlugu toquttarlugu’. (1 Samueli 17:34, 35) Ila sapiingaarami! Kiitingajattarsimassaaq, taamaattorli sava annaanniarlugu sapinngisani tamaat iliuuseqartarpoq.

7. Utoqqaanertat sava Diaavulup qarnanillusooq qanoq annaanniarsinnaavaat?

⁷ Ullumikkut utoqqaanertat Diaavulup løvitut saassussisarneri eqqumaffigisariaqarpaat. Immaqa sapiillutik sava Diaavulup qarnanillusooq annaanniarlugu iliuuseqapallattariaqartarput. Imaassinnaavoq utoqqaanertat qatanngutit mianersuaalliortut, Saatanip napiaaniutaanit napitissimasut, eqqarsalersinniarlugit oqaloqatigisariaqaraat. (Atuakkit Judasi 22, 23). Soorunami utoqqaanertat Jehovamit ikiorneqarnatik taamaaliorsinnaanngillat. Sava ajoqusersimasoq qajassuartumik pisarpaat; mattuserlugulu uuliamik Guutip oqaasianik ilorraallaataasumik tanittarpaat.

8. Utoqqaanertat savaatit sumut siulersortarpaat, qanorlu taamaaliortarpat?

⁸ Savanik paarsisup savaatini ivigartorfissamut pitsaasumut imertitsisarfissamullu siulersortarpai. Tamatumunnga assingusumik utoqqaanertat savaatit ilagiinnut siulersortarpaat kajumissaartarlugillu ataatsimiigiartaqqullugit “piffissaq eqqorlugu” nerisassanik pisinnaaniassammata. (Matthæusi 24:45) Utoqqaanertat immaqa piffissaq sivisooq atorlugu anersaakkut napparsimasut inuussutissanik Guutip oqaasianiittunik iluaqutiginninnissaannut ikiortarpaat. Immaqa sava tammartoq savaatinut uterusuppoq. Utoqqaanertat anersaakkut qatanngutertik tunuarsimaarneruleqqunagu asannippaluttumik nassuiaatissavaat inuunermini najoqqutassiat Biibilimiittut qanoq maleruarsinnaanerai.

9, 10. Utoqqaanertat anersaakkut napparsimasunik qanoq isumassuisariaqarpat?

⁹ Napparsimaguit nakorsaq sivikitsumik ilinnik tusarnaartoq nakorsiamik allamik passussiniassagami nakorsaatissamik aasassannik allagartamik tunniussipallattoq nakorsiarfigerusussaviuk? Imaluunniit nakorsaq ilinnik tusarnaaqqissaartoq sumillu nappaateqarninnik qanorlu katsorsartissinnaaninnik nassuiaasoq nakorsiarfigerusussaviuk?

¹⁰ Tamatumunnga assingusumik utoqqaanertat anersaakkut napparsimasoq tusarnaaqqissaartarlugulu ikiortarpaat ‘Jehovap aqqani uuliamik tanillugulusooq’ napparsimajunnaarniassammat. (Atuakkit Jaaku 5:14, 15). Soorlu Gileadimi balsami, Guutip oqaasia napparsimasumut katsorsaataasinnaavoq. (Jeremia 8:22; Ezekieli 34:16) Anersaakkut orloqqajaasup najoqqutassiat Biibilimiittut maleruarunigit orloqqajaannginnissaminut taakku iluaqutigisinnaavai. Aap, utoqqaanertat savamut napparsimasumut tusarnaarnermikkut taassumalu qinoqatigineratigut ikiuutaalluartarput.

Pinngitsaalineqaratik namminerli kajumissutsiminnit paarsisut

11. Utoqqaanertat savaatinik paarsisuunissaminnut suna kajumississutigaat?

¹¹ Taava Petrusip utoqqaanertat savanik qanoq paarsisuusariaqarnerannik eqqaasippai. Utoqqaanertat Guutip savaataanik ‘pinngitsaalineqaratik namminerli kajumissutsiminnit’ paarsisuusariaqarput. Utoqqaanertat qatanngutiminnut kajumillutik kiffartornissaminnut suna kajumississutigaat? Sunaana Petrusip Jiisusip savaataanik paarsisuunissaminut kajumississutigigaa? Naalakkaminut asanninnini tunniusimaninilu. (Johannesi 21:15-17) Asanninnertik pissutigalugu utoqqaanertat ‘imminnik pillutik inuujunnaarput, imminnilli toqqutiginnittoq makissimasorlu pillugu inuupput’. (2 Korinthimiut 5:14, 15) Jiisusimut — aamma Guutimut qatanngutiminnullu — asanninnertik savaatinut kiffartornissaminnut kajumississutigaat. (Matthæusi 22:37-39) Piffissartik, nukitik periarfissatillu atorlugit pinngitsaalineqaratik kajumillutilli imminut pilliutigipput.

12. Paulusi imminut qanoq pilliutigitigerusuppa?

¹² Utoqqaanertat imminut qanoq pilliutigitigissappat?  Savanik paarsisuunerminni apustili Paulusi ilaarpaat, soorlu taassuma Jiisusi ilaaraa. (1 Korinthimiut 11:1) Paulusip angalaqataasalu qatanngutitik Thessalonikamiut ima tunniusimaffigitigaat ‘Guutip iivangkiiliuanik tuniinnarnagit aammattaaq inuunertik taakkununnga tunniukkusullugu’. Taamaaliornermikkut qajassuussipput, “soorlu anaanap qitornani paaqqisarai”. (1 Thessalonikamiut 2:7, 8) Paulusip anaanaasup qitornaminik milutsitsisup qanoq misigissuseqarnera nalunngilaa. Anaanaasoq meeqqani pillugit qanorluunniit iliorumasarpoq — allaat unnuakkut milutsitsiniarluni makikkumasarpoq.

13. Utoqqaanertat qanoq oqimaaqatigiissaariuartariaqarpat?

¹³ Utoqqaanertat paarsisutut akisussaaffimminnut ilaquttaminnullu pisussaaffimminnut tunngatillugu oqimaaqatigiissaariuartariaqarput. (1 Timotheusi 5:8) Piffissaq utoqqaanertap ilagiinnut atortagaa naleqangaarpoq, ilaquttamimi ilaginissaannut atortarsinnaagaluaramiuk. Utoqqaanertat akisussaaffimminnik taakkuninnga marlunnik oqimaaqatigiissaariumallutik unnummi ilaqutariittut anersaakkut ittunik sammisaqarfimminni ilagiinneersut ilaannik ilaannikkut qaaqqusisarsinnaapput. Ukiorpassuarni Japanimi utoqqaanertaq Masanaomik atilik aappaqanngitsunik anersaakkullu iliarsunnik nammineq ilaquttamilu atuaqqissaaqatigiinnerminni atuaqqissaaqataaqqusisarsimavoq. Ikiorsimasaasa ilaat piffissap ingerlanerani utoqqaanertanngorsimapput Masanaollu maligassiuilluarnera malillugu.

Iluanaarniaratik kajumillutilli savaatinik paarsisut

14, 15. Sooq utoqqaanertat “iluanaarniapilunneq siunertarinagu” paarsisuusariaqarpat, tamatumunngalu tunngatillugu Paulusi qanoq ilaarsinnaavaat?

¹⁴ Petrusip utoqqaanertat ‘iluanaarniapilunneq siunertarinagu nuannaarlutilli kajumillutillu’ savaatinik paarseqqullugit kajumissaarpai. Utoqqaanertat ilagiinni suliaminnut piffissangaatsiaq atortarpaat, naatsorsuutiginngilaalli aningaasatigut iluanaaruteqarnissartik. Petrusip paasivaa utoqqaanertaqatini “iluanaarniapilunneq siunertarinagu” savaatinik paarsisuunissap qanoq pingaaruteqartiginera. Iluanaarniarneq siunertaralugu paarsisuunerup qanoq navianartiginera ‘Babylonersuarmi’ takuneqarsinnaavoq, upperisarsiornikkummi siuttorpassuit  piisaarlutik inuupput, uffa inuppassuit pissakilliortut. (Saqqummersitat 18:2, 3) Ullumikkut utoqqaanertat iluanaarniapiloqqajaaleqqunatik mianersornissaminnut pissutissaqarluarput.

¹⁵ Paulusi utoqqaanertanut kristumiunut maligassiuilluarpoq. Apustiliugaluarluni kristumiunullu Thessalonikamiunut nanertuutaasinnaagaluarluni ‘nerisassat akilernagit kikkunnilluunniit pinngisaannarpai’, imminulli pilersorniarluni ‘tamaviaaqaluni ullukkut unnuakkullu’ sulisarpoq. (2 Thessalonikamiut 3:8) Ullumikkut utoqqaanertarpassuit, aamma nakkutilliisut angalasartut, tamatumunnga tunngatillugu maligassiuilluarput. Inoroorsaarfigineqaraluarlutik kikkunnulluunniit ‘nanertuutaanaveersaartarput’. — 1 Thessalonikamiut 2:9.

16. ‘Kajumilluni’ savaatinik paarsisuunermut suna ilaava?

¹⁶ Utoqqaanertat ‘kajumillutik’ savaatinik paarsisuunerat imminut pilliutigeriaannaanerannit erserpoq. Utoqqaanertat asannittut savaatit Jehovamut kiffartornissaannut pinngitsaalinngilaat, aamma taakku unammillerpalaartuunissaannut kajumissaanngilaat. (Galatiamiut 5:26) Utoqqaanertat nalunngilaat savat tamarmik immikkut asseqanngilluinnartuusut. Qatanngutitik nuannaarlutik Jehovamut kiffartornissaannut ikiorusungaartarpaat.

Savaatinut naalagaaniarnatik maligassaasussat

17, 18. (a) Sooq apustilit Jiisusip maniguunnissamik ilinniartitsissutaa ilaannikkut paasiuminaatittarpaat? (b) Apustilit sanngiiffiat sumik ilinniutigisinnaavarput?

¹⁷ Eqqaaneqareersutut utoqqaanertat eqqaamassavaat “Guutip savaataanik” paarsisuullutik. ‘Akisussaaffigisaminnut naalagaaniannginnissartik’ eqqumaffigissavaat. (Atuaruk 1 Petrusi 5:3). Ilaannikkut Jiisusip apustilii eqqunngitsumik pissutiginiagaqarlutik akisussaaffeqarumasarput. Inuiaqatigiinni naalagaanertat assigalugit nuimasoorusupput. — Atuakkit Markusi 10:42-45.

¹⁸ Ullumikkuttaaq qatanngutit angutit ‘nakkutilliisuujumasut’ imminut misissortariaqarput sooq nakkutilliisuujumanerlutik. (1 Timotheusi 3:1) Maannakkut utoqqaanertaasut unneqqarillutik imminut aperisariaqarput oqartussaassuseqarumanertik nuimasumilluunniit inissisimaffeqarumanertik piinnarlugu utoqqaanertaanerlutik, soorlu apustilit ilaat taamaassimasut. Apustilit tamanna sanngiiffigisimammassuk paasinarpoq ullumikkut utoqqaanertat allanut naalagaaniarnaveersaarnissaq ilungersuutigisariaqaraat.

19. Utoqqaanertat savaatit illersorniarlugit iliuuseqaraangamik suna eqqaamasariaqarpaat?

¹⁹ Utoqqaanertat ilaannikkut aalajangersimalluinnarlutik iliuuseqartariaqartarput, assersuutigalugu savaatit ‘amaqqunit qaasuttunit’ illersussagaangamikkit. (Apustilit Suliaat 20:28-30) Paulusip Titusi ‘oqaaqqissaariuaqqullugulu naqqissuiuaqquaa, naalattariaqartumillu taamaaliortuaqquaa’. (Titusi 2:15) Utoqqaanertalli oqaaqqissaarisariaqaraluaraangamilluunniit oqaaqqissaakkatik ataqqinnittumik pisarpaat. Paasivaat asannittumik siunnersuineq assuarinninnerminngarnit pitsaanerusoq. Asannittumik siunnersuinermikkut unioqqutitsisup uummataa angusinnaanerusarpaat, unioqqutitsisullu aqqutikkut eqqortukkooqqilernissaminut killinneqaatiginerussavaa.

20. Utoqqaanertat Jiisusi ilaarlugu qanoq maligassiuilluarsinnaappat?

²⁰ Utoqqaanertat Jiisusip maligassiuilluarnera savaatinik asanninnissamut kajumississutigaat. (Johannesi 13:12-15) Taassuma ajoqersukkami qanoq oqaluussinissaannik ajoqersuganngortitsiortornissaannillu ilinniartitsinera pillugu atuaraangatta qamuuna attortittarpugut. Ajoqersugaasa taassuma maniguunnera killinneqaatigaat ‘makitajuitsuunermikkullu allanik imminnit annerutitsinissaminnut’  kajumississutigalugu. (Filippimiut 2:3) Ullumikkut utoqqaanertat Jiisusip maligassiaanik malinninnissaminnut kajumissisinneqarput, ‘savaatinullu maligassiuerusupput’.

21. Utoqqaanertat akissarsiassaq suna qilanaarisinnaavaat?

²¹ Petrusip utoqqaanertanik oqaaqqissaarinini naggaseramiuk taakkua siunissamut neriuutaat eqqartorpaa. (Atuaruk 1 Petrusi 5:4). Nakkutilliisut tanitat Kristusi ilagalugu qilammi “niaqorusiussassaq naalannaat toquliortussaanngitsoq” piumaarpaat. Nakkutilliisullu ‘savanut allanut’ ilaasut nunarsuarmi ‘savaatinut paarsisuunerpaamit’ siulersorneqarlutik Guutip savaataanut paarsisuunissaq pisinnaatitaaffigissavaat. (Johannesi 10:16) Allaaserisami tulliuttumi ilagiinniittut siulersuisutut toqqarneqarsimasut qanoq tapersersorsinnaaneraat sammissavarput.

Uteqqiineq

• Sooq naleqquppa Petrusip utoqqaanertaqatini Guutip savaataanik paarsisooqqullugit kajumissaarmagit?

• Utoqqaanertat anersaakkut napparsimasunik qanoq isumassuisariaqarpat?

• Utoqqaanertat Guutip savaataanik paarsisuunissaminnut suna kajumississutigaat?

[Atuaqqissaarnermi apeqqutit]

[Qupp. 23-mi assiliartaq]

Itsaq savanik paarsisutut ullumikkut utoqqaanertat ‘savat’ paarisatik illersortariaqarpaat