Inuuneq siunertaqarpa?

“INUUNEQ siunertaqarpa?” Inuppassuit taama aperisimapput. Ajoraluartumik taakkua ilarpassui, inuunermut qanorluunniit isiginnittaaseqaraluaraangamik, misigisimanngitsoorsinnaasanngillat ‘inuuneq siunertaqanngitsoq inuunerminnilu arlaannik amigaateqarlutik’, soorlu neurologi Østrigimiu Viktor E. Frankl taama allattoq.

Sooq inuppassuit taama misigisimasarpat? Siullermik, silarsuaq tamakkerlugu inuit millionillit sussaanngilluinnartunik alianarluinnartunillu atugaqarput. Piitsuussuseq, nappaatit, nakuuserfigineqarneq naqisimaneqarnerlu ulluinnaraat. Taakku inuunerminni ilumut ‘eqqissinaatsorsiortaqaat’, soorlu Jobi inuiaat naalliutaat pillugit taama oqartoq. (Jobi 14:1) Taakku inuusinnaajumallutik ullut tamaasa akiuuttarput.

Inuit millionillit allat pigissaakannersuupput. Nalerisimaarnartumik inuusinnaajumallutik pisariaqartitatik tamaasa pigerpasippaat. Taamaakkaluartorli taakkua ilarpassui nalerisimaanngillat. Sooq? ‘Naalliunnartut ajunaarnerillu’ nalaattuartakkatik — assersuutigalugu ilimaginngisaminnik aningaasatigut ajornartorsiulernertik qitornamilluunniit toqusoornertik — pissutigalugit neriuutaarutivittaramik takorluugaallu qammuinnartarmata. — Tussiaat 90:10.

‘Inuunerup siunertaqanngitsutut’ isigineqarneruleraluttuinnarneranut ‘inuunermilu arlaannik amigaateqartutut’ misigisimasoqaleraluttuinnarneranut pissutaasoq alla tassaavoq inuunerup sivikissusia. Inuppassuit paasisinnaanngilaat inuit taama angusaqarsinnaatigigaluarlutik taama inuunikitsigisarnerat. Piviusoq nuanniitsoq manna tamatta nalaatassarput paasiuminaatsippaat: Inuunitsinni alianartunit eqqugaanngikkaluarluta, toqugutta qaqugu pinerpoq sunik tamanik annaasaqassaagut. — Oqaluussisartup oqaasii 3:19, 20.

Inuuneq siunertaqanngitsutut misinnartuaannassava?

Itsaq Israelimi kunngip Salomop pissutsit torrallaalluni naatsukullammik allaatigai. Takuaa inuit nalimini inuusut, inuit ullumikkut iliortarnerattut, suleruloortartut aamma  piginnaanitik atorlugit naasorissaallutillu illuliorlutillu ilaquttaminnik isumassuisut. Ima oqarporlusooq: ‘Tamakku tamarmik naggataatigut sumut iluaqutaassagamik?’ Isummerpoq inuit iliuuserisaat tamarmik ‘piunngitsuullutillu anorimik tigusiniarsarinerusut’. — Oqaluussisartup oqaasii 2:17.

Kunngili Salomo isumaqarpa inuit iliuuserisaat tamarmik ‘piunngitsuujuarlutillu anorimik tigusiniarsarinerujuassasut’? Naamik. Silarsuarmi naammalluinnanngitsumi inuunermut piviusorsiortumik isiginnittaaseqaannarpoq. Biibilili iluaqutigalugu illit qularutigiunnaarsinnaavat pissutsit taamaattuassanngitsut!

Qanoq ilillutit tamanna qularutigiunnaarsinnaaviuk? Allaaserisat tulliuttut marluk iluaqutigalugit paasisinnaavat inuunerup sooq siunertaqanngitsutut misinnartarnera, pissutsit qanoq aaqqinneqarumaarnerat illillu inuunerit maannangaaq qanoq ilillutit siunertaqarlualersissinnaagit.