Guutip qasuersaarfia suua?
Guutip qasuersaarfia suua?
“Guutip innuttaanut suli sabbatimik qasuersaarfissamik ilimagisassaqarpoq.” — HEBRÆERIT 4:9.
1, 2. Mosesimik allakkat siulliit 2:3 sumik ilinniarfigisinnaavarput, apeqqutillu suut sammissavavut?
MOSESIMIK allakkat siulliit naapertorlugit Guutip ulluni arfinilinni nunarsuaq piareersarpaa inuit najugaqarfiginiassammassuk. Ullut taakku nalunaaquttap-akunnerinik 24-nik sivisussuseqanngillat, piffissaallutilli sivisunerusut. Piffissat taakku naagaangata Biibilimi ima allaatigineqartarput: “Taava unnunngorpoq ullaanngorlunilu.” (1 Mosesi 1:5, 8, 13, 19, 23, 31) Ullulli arfineq-aappaat allaaneruvoq, Biibilimimi ima allaatigineqarpoq: “Guutip ullut arfineq-aappaat pilluaqquaa illernartillugulu, pinngortitsilluni suliani naammassereerlugit qasuersaarfigigamiuk.” — 1 Mosesi 2:3.
2 Maluginiaruk versi 3-mi ima allassimanngimmat: “Taava unnunngorpoq ullaanngorlunilu.” Taamaattumik erseqqippoq Mosesip allakkani siulliit ukiumi 1513-imi Kr.in.si. allammagit ullut arfineq-aappaat suli atuuttoq. Kingusinnerusukkut Guuti oqarpoq innuttani qasuersaarfimminut isersinnaasut, tassa taassuma qasuersaarfia iluaqutigisinnaagaat. Ullumikkut Guuti suli qasuersaarpa? Taamaappat qanoq ililluta qasuersaarfianut isersinnaavugut? Apeqqutinut taakkununnga akissutit ilisimanissaat uagutsinnut pingaaruteqangaarpoq.
Jehova suli ‘qasuersaarpa’?
3. Jiisusip oqaasiinit Johannesi 5:16, 17-imiittumit qanoq erserpa ullut arfineq-aappaat Jiisusip nalaani suli atuuttoq?
3 Ullut arfineq-aappaat Jiisusip kristumiullu siulliit nalaanni suli atuunneranik isummernissatsinnut marlunnik pissutissaqarpoq. Siullermik, Jiisusip akeqqaminut oqaasii maluginiarsinnaavavut. Akeraasa Jiisusi sabbatimi inunnik ajorunnaarsitsimmat kamaatigaat. Isumaqarput sabbatimi ajorunnaarsitsineq eqqunngitsuliornerusoq, Mosesimmi inatsisai naapertorlugit sabbati qasuersaarfiuvoq. Jiisusip taakku ima akivai: “Ataataga suliuarmat uangattaaq sulivunga.” (Johannesi 5:16, 17) Qanoq paasisariaqarami? Jiisusi ima oqarporlusooq: “Ataatagalu suliavut assigiipput. Ataataga sabbatimi ukiut tusindilinni sivisussuseqartumi sulivoq, suliuarporlu. Taamaattumik sabbatimi sulisinnaavunga.” Jiisusip oqaasiinit erserpoq nunarsuarmut tunngatillugu ullut arfineq-aappaat, Guutip qasuersaarfia, Jiisusip nalaani suli atuuttoq. *
4. Paulusip oqaasii naapertorlugit qanoq nalunngissinnaavarput ullut arfineq-aappaat kristumiut siulliit nalaanni suli atuuttoq?
4 Ullut arfineq-aappaat Jiisusip kristumiullu siulliit nalaanni suli atuunneranut allamik pissutissaqarpoq. Apustilip Paulusip Guutip qasuersaarfia Hebræerinut allakkamini allaatigaa. Allakkamini kapitalimi 4-mi, Mosesimik allakkat siulliit 2:2-p issuannginnerani, Paulusi ima allappoq: “[Uagut] qasuersaarfissamut isersinnaavugut uppersuseqaratta.” (Hebræerit 4:3, 4, 6, 9) Tamatumani erserpoq ullut arfineq-aappaat Paulusip nalaani suli atuuttoq. Ullut arfineq-aappaat qaqugu naassava?
5. Jehovap ullut arfineq-aappaat sumut immikkoortippaa, qaqugulu siunertani naammassissavaa?
5 Apeqqut tamanna akissutissarsiniarlugu eqqaamasariaqarparput Jehovap ullut arfineq-aappaat immikkut ittumut immikkoortikkaa. Mosesimik allakkani siullerni 2:3-mi ima allassimavoq: “Guutip ullut arfineq-aappaat pilluaqquaa illernartillugulu.” Jehovap ulloq taanna illernartippaa nunarsuarmut siunertami naammassinissaanut toqqaramiuk. Siunertaraa nunarsuaq angutinit arnanillu naalattunit najugarineqassasoq taakkualu nunarsuaq uumassusillillu tassaniittut paarissagaat. (1 Mosesi 1:28) Taamaattuminguna siunertaq tamanna piviusunngortinniarlugu Jehova Guuti Jiisusilu Kristusi, ‘sabbatimut naalagaasoq’, suliuartut. (Matthæusi 12:8) Ulloq Guutip qasuersaarfia aatsaat siunertaa naammassineqarpat naassaaq. Siunertaa Kristusip ukiuni tusindini naalakkersuinissaata naanerani naammassineqarumaarpoq.
Taakkua ‘naalasseriinnerattut’ naalasseriinnaveerit
6. Kikkut maligassiuinerlunnerat uagutsinnut mianersoqqussutaava, qanorlu tamanna ilinniutigisinnaavarput?
6 Guutip nunarsuarmut siunertani Adamimut Evamullu erseqqissumik eqqaavaa, taakkuli siunertaanut naapertuutinngitsumik iliuuseqarput. Tamatuma kingorna inuit millionillit aamma naalanngipput. Allaat Guutip innuttaasa, Israelikkut, taanna naalasseriiffigeqattaartarpaat. Paulusillu kristumiut nalimini inuusut ilaasa Israelikkutut naalasseriitsunngoriasaarsinnaanerat isumakuluutigaa. Imami allappoq: “Taamaattumik qasuersaarfissamut isernissarput ilungersuutiginiartigu orlusoqaqqunagu naalasseriinnerit taakkua assingi pissutigalugit.” (Hebræerit 4:11) Paulusip oqaasiinit erserpoq inuit naalasseriitsut Guutip qasuersaarfianut isernavianngitsut. Uagummi? Imaappa uagut Guutip siunertaanut naapertuutinngitsumik iliuuseqarutta Guutip qasuersaarfianut isersinnaanngitsugut? Apeqqutip tamatuma akissutissarsinissaa uagutsinnut pingaaruteqangaarpoq, allaaserisamilu matumani akissut sammissavarput. Siullermilli Israelikkut maligassiuinerlunnerat Guutillu qasuersaarfianut isersimannginnerat sammissavarput.
“Uanga qasuersaarfissarititannut isinngisaannassapput”
7. Jehovap Israelikkut Egyptenimit aniguisikkamigit suna siunertaraa, Israelikkullu qanoq iliortussaappat?
7 Ukiumi 1513-imi Kr.in.si. Jehovap Israelikkunnut tunngatillugu siunertani kiffaminut Mosesimut oqaluttuaraa. Ima oqarpoq: “Aqqarpunga Egyptenimiut assaannit aniguisikkumallugit nunamillu taassumannga majuartikkumallugit nunamut ajunngitsumut aallariarfittuumut, nunamut immummik tungusunnitsuummillu kuuttumut.” (2 Mosesi 3:8) Jehovap Israelikkut Egyptenimiit aniguisippai innuttarilerumallugit, Aaperaamut neriorsuisimanermisut. (1 Mosesi 22:17) Guutip Israelikkut inatsisinik tunivai Guutimik eqqisseqateqarniassammata taassumunngalu ikinngutaalerniassammata. (Esaja 48:17, 18) Israelikkut ima oqarfigai: “Naalakkussinga angeruseralu aalajangiullugu inuiaqatigiinnit tamanit immikkoortillusi pigisassarsiariumaarpassi, nunarsuaq tamaat uanga pigigakku.” (2 Mosesi 19:5, 6) Taamaattumik Israelikkut Guutimut immikkut ittumik attaveqarsinnaapput aatsaat inassutai maleruarunikkit.
8. Israelikkut Guutimut naalakkunik sumut periarfissaqarsinnaappat?
8 Ila Israelikkut periarfissarissaangaaramik! Jehovap neriorsorpai naalappanni narsaataat, viinnequtaataat uumasuutaallu pilluaqqujumaarlugit. Aamma neriorsorpai akeraannit illersorumaarlugit. (Atuakkit 1 Kunngit 10:23-27). Israelikkut inuiaqatigiinnit allanit naalakkersorneqannginnissaminnut periarfissaqarput. Allaat Jiisusip nalaani Romamiut nunarpassuarnik naalakkersuimmata taakkunannga naalakkersorneqannginnissaminnut periarfissaqaraluarput. Jehovap kissaatigaa inuiaqatigiit Israelikkut inuiaqatigiinnut allanut maligassiuilluarnissaat. Taamaalillutik inuit tamarmik paasilissavaat Guutimut ilumoortumut naalattut taassumannga pilluaqquneqarumaartut.
9, 10. (a) Sooq Israelikkut Egyptenimut uterusunnerat eqqunngitsuliornerua? (b) Israelikkut Egyptenimut uteraluarunik Jehova pallorfigineqarusunneratut pallorfigisinnaavaat?
9 Israelikkut immikkut pisinnaatitaaffeqarput Jehovap siunertaanik naammassisitseqataasinnaagamik. Taamaalillutik Israelikkuinnaanngitsut aammali inuiaat tamarmik Jehovamit pilluaqquneqarsinnaapput. (1 Mosesi 22:18) Israelikkulli amerlanersaat Guutimut innuttaanertik inuiaqatigiinnullu allanut maligassiuilluarnissartik pingaartinngilaat. Allaat oqarput Egyptenimut uterusullutik! (Atuakkit 4 Mosesi 14:2-4). Egyptenimut uteraluarunik Jehova pallorfigineqarusunneratut pallorfigisinnaanagulu inuiaqatigiinnut allanut maligassiuilluarsinnaanngillat. Egyptenimi inussiaaqqileraluarunik Guutip inassutai naalassinnaanagillu ajortiminnik isumakkeerfigineqarsinnaanavianngillat. Egyptenimut uterusullutik oqaramik imminnuinnaq eqqarsaatigipput. Guuti taassumalu siunertaa eqqarsaatiginngilaat. Taamaattumik Jehova taakku pillugit ima oqarpoq: “Narrutsaappakka eqqarleriit taakku, oqarpungalu: ‘Tammartuaannarput uummatiminni, aqqutigisakkalu naluaat.’ Taamaattumik kamanninni uppernarsaavunga: ‘Uanga qasuersaarfissarititannut isinngisaannassapput.’” — Hebræerit 3:10, 11; Tussiaat 95:10, 11.
10 Israelikkut Egyptenimut uterusunnermikkut ersersippaat pilluaqqussutit Jehovamit pisatik pingaartinnagit. Israelikkut naalanngitsut taakku agurkit, melonit, uanitsut nerisassallu mamartut allat Egyptenimiittut piumaneruaat. (4 Mosesi 11:5) Taakku Esauitut ipput, taassuma angajulliussutsi pingaartinnagu nerisassanut akigimmagu. — 1 Mosesi 25:30-32; Hebræerit 12:16.
11. Jehovap Israelikkut Egyptenimit aallartut upperinngimmanni siunertani allanngortippaa?
11 Israelikkut Egyptenimit aallartut Jehova upperinngikkaluaraat taassuma Israelimut tunngatillugu siunertani allanngortinngilaa. Taakkua meeraat angajoqqaaminnit naalannerupput. Jehovap nunamut neriorsuutigisamik tiguaaqqusineranut naalapput. Josvamik allakkani 24:31-mi ima allassimavoq: “Israelikkut [Jehova] kiffartuuppaat Josva inuutillugu utoqqaallu Josvamit inuummersornerusut [Jehovallu] Israelimut qanoq iliornerinik tamanik ilisimasut suli inuutillugit.”
12. Qanoq nalunngissinnaavarput ullumikkut kristumiut Guutip qasuersaarfianut isersinnaasut?
12 Israelikkulli naalattut taakku utoqqalillutillu toqupput. Taakkua kinguaavi ‘Jehovap Israelikkunni naammassisaanik ilisimasaqanngillat’. Taavalu “Israelikkut [Jehovap] isaani ajortumik iliulerput Ba’alillu guutisiorfigilerlugit.” (Eqqartuussisut 2:10, 11) Israelikkut naalannginnamik Guutimik eqqisseqateqarunnaarput. Taamaattumik taakkununnga nuna neriorsuutigisaq tassaanngilaq ‘qasuersaarfik’. Paulusip Israelikkut taakku ima allaatigai: “[Josvap] qasuersaarfissamut isertissimasuuppagit tamatuma kingorna Guuti ullormik allamik taasaqarsimanavianngikkaluarpoq. Tassa Guutip innuttaanut suli sabbatimik qasuersaarfissamik ilimagisassaqarpoq.” (Hebræerit 4:8, 9) ‘Guutip innuttai’ Paulusip eqqaasai tassaapput kristumiut. Kristumiunut taakkununnga ilaapput kristumiunngunnginnerminni Mosesip inatsisaanik maleruaasimasut aamma Mosesip inatsisaanik maleruaanngisaannarsimasut. Paulusip oqaasiinit erserpoq aamma ullumikkut kristumiut Guutip qasuersaarfianut isersinnaasut.
Kristumiut ilaat Guutip qasuersaarfianut isinngillat
13, 14. (a) Mosesip nalaani Israelikkut Guutip qasuersaarfianut iserniarlutik susariaqarpat? (b) Paulusip nalaani kristumiut Guutip qasuersaarfianut iserniarlutik susariaqarpat?
13 Paulusip kristumiut hebræeriusut allaffigai taakkua ilaat Guutip siunertaanut naapertuutinngitsumik iliuuseqarsimammata. (Atuaruk Hebræerit 4:1). Sugamik? Mosesip inatsisaasa ilaannik suli maleruaagamik. Ilumoorpoq ukiut 1500-t missiliorlugit ingerlaneranni Guutip innuttai Guutimit iluarisaajumallutik Mosesip inatsisai maleruartariaqarsimagaat. Jiisusilli toqunerata kingorna Mosesip inatsisai pisariaqartikkunnaarpaat. Kristumiut ilaasa tamanna paasinngilaat, taamaattumillu isumaqarput Mosesip inatsisaasa ilaannik suli maleruaasariaqarlutik. *
14 Paulusip kristumiunut hebræeriusunut nassuiarpaa Jiisusip palasiunerunera palasiunernit naammalluinnanngitsunit pitsaanerusoq. Eqqaavaa angeruseq nutaaq Israelikkunnut angerutsimit pitsaanerusoq. Aamma nassuiarpaa Jehovap naalaffissua anersaakkut ittoq naalaffimmit assannik sanaajusumit naleqarnerungaartoq. (Hebræerit 7:26-28; 8:7-10; 9:11, 12) Paulusip Mosesip inatsisaani sabbatimut tunngatillugu inassut iluaqutigalugu nassuiarpaa kristumiut ullormut Jehovap qasuersaarfianut qanoq isersinnaasut. Ima allappoq: “Guutip innuttaanut suli sabbatimik qasuersaarfissamik ilimagisassaqarpoq. Qasuersaarfissarititaanummi isertoq aamma suliani naammassereerlugit nammineq qasuersaarpoq soorlu Guuti suliani naammassereeramigit taamaaliorsimasoq.” (Hebræerit 4:8-10) Kristumiut hebræeriusut eqqarsaatigiunnaartariaqarpaat inuk nammineq “suliani”, tassa Mosesip inatsisaanik maleruaanini, pissutigalugu Guutimit iluarisaasinnaasoq. Ukiumi 33-mi piinsip ulluata kingornali Jiisusimik Kristusimik upperinnittut Jehovamit iluarisaapput.
15. Sooq Jehovap qasuersaarfianut iserniarutta taanna naalattariaqarparput?
15 Sooq Mosesip nalaani Israelikkut nunamut neriorsuutigisamut isinngitsoorpat? Jehovamut naalanngikkamik. Sooq Paulusip nalaani kristumiut ilaat Guutip qasuersaarfianut isinngillat? Aamma taakku Jehovamut naalanngikkamik. Jehovap innuttaminit maannakkut allatut pallorfigineqarnissani piumasarigaa aamma Mosesip inatsisaanik maleruaaqqusiunnaarnera paasinngilaat.
Ullumikkut uagut Guutip qasuersaarfianut qanoq isersinnaasugut
16, 17. (a) Ullumikkut kristumiut Guutip qasuersaarfianut qanoq ilillutik isersinnaappat? (b) Allaaserisami tulliuttumi suut sammissavavut?
16 Ullumikkut kristumiut annaanneqarumallutik Mosesip inatsisaasa ilaannik maleruaasariaqarsorinngillat. Paulusip Efesosimiunut oqaasii uku paasiuminarput: “[Saammaannermik] taassuminnga annatsitaavusi uppernikkut. Tamanna nammineq pilersitarinngilarsi, Guutimuna tunissutaa. Suliat tamatumunnga pissutaanngillat.” (Efesosimiut 2:8, 9) Ullumikkut kristumiut Guutip qasuersaarfianut qanoq ilillutik isersinnaappat, tassa Guutip qasuersaarfia qanoq iluaqutigisinnaavaat? Eqqaamajuk Jehovap ulloq qasuersaarfini nunarsuarmut inunnullu naalattunut siunertami naammassinissaanut immikkoortimmagu. Jehovap siunertani uagutsinnullu piumasaqaatini pillugit peqatigiissortani aqqutigalugu ilinniartippaatigut. Jehovap qasuersaarfianut isersinnaavugut taanna naalakkutsigu peqatigiissortaalu suleqatigigutsigit.
17 Jehovap siunertaanut naapertuutinngitsumik iliuuseqassaagut inussiaq aalajaallunilu silatooq naalanngikkutsigu imaluunniit nammineq eqqortuusorisarput kisiat naapertorlugu iliuuseqarutta. Jehovap siunertaanut naapertuutinngitsumik iliuuseqartarutta taassumunnga ikinngutaasinnaanngilagut. Allaaserisami tulliuttumi naalannitsinnik ersersitsinissamut periarfissat assigiinngitsut sammissavavut. Periarfissani taakkunani assigiinngitsuni aalajangersimasatsinnit takuneqarsinnaassaaq Guutip qasuersaarfianut isersimanersugut.
[Quppernerup ataani ilanngussat]
^ imm. 3 Palasit Levikkullu naalaffimmi sabbatimi sulisarput, tamannalu Mosesip inatsisaanik unioqqutitsinerunngilaq. Guutip Jiisusi uagutsinnut palasiunerusussanngorlugu toqqarpaa. Taamaattumik Jiisusi sabbatimi Jehovap suliareqqusaa naammassigamiuk unioqqutitsinngilaq. — Matthæusi 12:5, 6.
^ imm. 13 Naluarput kristumiut hebræeriusut ilaat ullormi saammaannartitsivimmi, allaat ukiumi 33-mi piinsip ulluata kingorna, pilliisarsimanersut. Pilliisarsimagunik Jiisusip pilliutaanik ataqqinninngitsuliorput. Nalunngilarpulli kristumiut hebræeriusut ilaat Mosesip inatsisaasa ilaannik suli maleruaasut. — Galatiamiut 4:9-11.
Apeqqutit eqqarsaatigilluagassat
• Jehovap ullut arfineq-aappaat sumut atorusuppaa?
• Qanoq nalunngissinnaavarput ullut arfineq-aappaat ullumikkut suli atuuttoq?
• Sooq Israelikkut ilaat Mosesip nalaani kristumiullu ilaat Paulusip nalaani Guutip qasuersaarfianut isinngillat?
• Ullumikkut Guutip qasuersaarfianut qanoq ililluta isersinnaavugut?
[Atuaqqissaarnermi apeqqutit]
[Qupp. 25-mi Issuagaq]
Jehovap qasuersaarfianut isersinnaavugut taanna naalakkutsigu peqatigiissortaalu suleqatigigutsigit
[Qupp. 24, 25-mi assiliartat]
Guutip innuttai taassuma qasuersaarfianut iserumallutik susariaqarpat?
