Guutip qasuersaarfianut illit isereerpit?

“Guutip oqaasia uumavoq sunniisinnaassuseqarlunilu.” — HEBRÆERIT 4:12.

1. Guutip qasuersaarfianut qanoq isersinnaavugut, aamma sooq tamanna ajornakusoorsinnaava?

ILIKKAREERPARPUT aatsaat Jehova naalakkutsigu taassumalu peqatigiissortai suleqatigigutsigit Guutip qasuersaarfianut isersinnaalluta. Naalannitsigut ersersittarparput Jehovap piumasaata naammassinissaa kissaatigalugu. Ilaannikkulli — assersuutigalugu arlaannik nuannarisatsinnik Jehovap taamaatitseqquppatigut — naalannissarput ajornakusoortissinnaavarput. Taamaattumik naalakkumanissarput sulissutigisariaqarparput. (Apustilit Suliaat 5:29) Allaaserisami matumani sutigut tamatigut naalannissamik ersersitsinissatsinnut periarfissat ilaat sammissavavut.

2, 3. Jehova nuannaartinniarlugu sujuartariaqarpugut?

² Biibili tunngavigalugu paasigaangakku allannguisariaqarlutit, taava allannguiumasarpit? Una eqqarsaatigiuk: Biibilimi allassimavoq Jehovap inuit peqatigiissortaminut katersorumasai tassaasut ‘inuiaat erlinnartuutaat’. (Haggaji 2:7) Tamanna ima paasisariaqarpoq Guutip inuit eqqortuliornermik nuannarisaqartut toqqarlugillu erlinnartutut isigigai. Ilumoorpoq Biibilimik atuaqqissaartaleratta amerlanersavut eqqunngitsuliortartut. Kisianni Guuti erneralu asagatsigit Guutilu nuannaartikkusukkatsigu eqqarsartaatitsinnik iliuutsitsinnillu allannguerujussuarusussimavugut. Jehova ikioqqulluta qinnuigaarput inuunitsinnilu allanngortittaqariakkavut allanngortinniarlugit tamaviaarluta. Naggataatigullu kuisissinnaanngorpugut Jehovamillu iluarisaalerluta. — Atuakkit Kolossemiut 1:9, 10.

³ Sulili naammalluinnanngitsuuvugut. Inuunitsinni suli allannguisariaqartarpugut eqqortuliornissarlu suli ilungersuutigisariaqartarlugu.  Jehovalli ikiorniarluta neriorsorpaatigut taanna nuannaartinniarlugu sapinngisarput tamaat iliuuseqarutta.

Inuunitsinni allannguisariaqaraangatta

4. Jehovap allannguisariaqarnerput ersersinniarlugu periaatsit pingasut suut atortarpai?

⁴ Inuunitsinni allannguinnginnitsinni sumik allannguisariaqarnerluta paaseqqaartariaqarparput. Jehovap assigiinngitsutigut ikiorsinnaavaatigut. Naalagaaffilersaarfimmi oqalugiaat atuagassiaatitsinniluunniit allaaserisaq iluaqutigalugu Jehovap paasitittarpaatigut eqqarsartaatsitsigut iliuutsitsigulluunniit suut kukkussutigisarnerivut. Oqalugiaalli tusareeraluarlugu allaaserisarluunniit atuareeraluarlugu allannguisariaqarnerput ilaannikkut paasineq ajorparput, taava Jehovap ilagiinni qatanngut aqqutigalugu inussiarnerluni siunnersorsinnaavaatigut. — Atuaruk Galatiamiut 6:1. *

5. Naqqinneqaraangatta ilaatigut susarpugut, aamma sooq utoqqaanertat kristumiut ikiorniartuartariaqarpaatigut?

⁵ Inoqatitsinnit naammalluinnanngitsuusumit naqqinneqarnerput akueriuminaatsissinnaavarput, taassuma inussiarnersumik oqaluukkaluarpatigulluunniit. Jehovalli utoqqaanertat piumaffigai ‘qanilaarlutik’, imaluunniit saamallutik, uagutsinnik ‘ikiuissasut’. (Galatiamiut 6:1) Taakkua ikiuinerat akuerigutsigu Jehovap isaani suli ‘erlinnarnerulissaagut’. Soorunami qinugaangatta naammalluinnanngitsuunerput kukkusaqattaartarnerpullu Jehovamut eqqaakulasarpavut. Utoqqaanertalli kukkusimanerput pillugu oqarfigippatigut sooq taamatut iliuuseqarnerput immaqa nassuiarniartarparput kukkusimanerpulluunniit ajorpallaannginnerartarlugu. Immaqaluunniit siunnersuisup pissutiginiagaa siunnersueriaasialuunniit apeqqusertarparput. (2 Kunngit 5:11) Imaluunniit utoqqaanertap tusarusunngisatsinnik oqarfigippatigut assut kamalersinnaavugut. Assersuutigalugu taassuma ilaquttatta ilaata eqqunngitsuliornera eqqaavaa, atisalersoriaaserpulluunniit naleqqutinngitsuunerarpaa. Immaqa oqarfigaatigut eqqiluisaarnerussasugut imaluunniit Jehovap aliikkutarisavut iluarinngikkai. Kamannerput pissutigalugu oqaatigerusunngisatsinnik oqartoorsinnaavugut. Tamannalu peqqissimissutigisinnaavarput, utoqqaanertallu uagutsinnik ikiuiniaraluartup oqaatsivut pakatsissutigisinnaavai. Kamakkunnaaraangatta amerlanertigut paasilertarparput siunnersuutaa uagutsinnut iluaqutaasoq.

6. Guutip oqaasiata qanoq ililluni ‘uummatip eqqarsaatai isumaalu eqqartuuttarsinnaavai’?

⁶ Allaaserisamut matumunnga allassimaffimmi najoqqutarineqartumi, Hebræerit 4:12-imi, eqqaasinneqarpugut Guutip oqaasia ‘sunniisinnaassuseqartoq’. Aap, Guutip oqaasia inuit inuunerannik allannguisinnaavoq. Soorlu taassuma oqaasia kuisinnginnitsinni inuunitsinni allanngortittariaqakkatta allanngortinnissaannut iluaqutigisimagipput, taamatuttaaq kuisinnitta kingorna inuunitsinni allannguinissatsinnut iluaqutigisinnaavarput. Paulusi kristumiunut hebræeriusunut allappoq Guutip oqaasia ‘magguttartoq avissaartillugu tarneq anersaamit’ aamma ‘uummatip eqqarsaatai isumaalu eqqartuuttarai’. (Hebræerit 4:12) Matumani oqaaseq “tarneq” qallikkut pissutsitsinnut tunngassuteqarpoq oqaaserlu ‘anersaaq’ ilorlikkut pissutsitsinnut tunngassuteqarluni. Tassa Paulusip oqaasii ima paasisariaqarput Guutip uagutsinnut piumasaqaatai paasigaangatsigit iliuutsitsigut ersersittaripput qanorpiaq ittuunerput. Qallikkut pissuserput ilorlikkullu pissuserput assigiinngissuteqartarpat? (Atuakkit Matthæusi 23:27, 28). Pisuni sammisassatsinni illit qanoq periarnissat eqqarsaatigilaariaruk.

Jehovap peqatigiissortaanut malinnaajuarit

7, 8. (a) Sooq hebræerit kristumiut ilaasa Mosesip inatsisaasa ilaannik maleruaajuarusuppat? (b) Sooq oqarsinnaavugut taakku Jehovap siunertaanut naapertuutinngitsumik iliuuseqartut?

⁷ Amerlanersatta Ussatit 4:18-imi allassimasoq una ilisimalluarpaat: “Iluartup aqqusininnguata assigaa ullaap qaammalernera qaammarissiartortoq ulloqeqqaaneratut qaamatigilerserluni.” Tamanna isumaqarpoq piffissap ingerlanerani  Guutip piumasaanik paasinnikkiartuaarumaartugut pissusilersornerpullu pitsanngoriartuaarumaartoq.

⁸ Soorlu sammereeripput, Jiisusip toqunerata kingorna hebræererpassuit kristumiut Mosesip inatsisaanik suli maleruaarusupput. (Apustilit Suliaat 21:20) Paulusip paasiuminartumik nassuiarpaa kristumiut Mosesip inatsisaanik maleruaasariaqanngitsut, taamaakkaluartorli ilaasa Jehovap taakkununnga piumasaqaatai akueriumanngilaat. (Kolossemiut 2:13-15) Immaqa isumaqarput Mosesip inatsisaasa ilaannik maleruaajuarunik juutit upperisaannik maleruaasunit malersorneqassanatik. Paulusilli erseqqissarpaa hebræerit kristumiut Guutip siunertaanut naapertuutinngitsumik iliuuseqartuarunik Guutip qasuersaarfianut isersinnaanavianngitsut. * (Hebræerit 4:1, 2, 6; atuaruk Hebræerit 4:11). Jehovamit iluarineqassagunik akuerisariaqarpaat maannakkut Jehovap innuttaminit allatut pallorfigineqarnissani piumasarigaa.

9. Inussiaq aalajaallunilu silatooq Biibilimi paasinnittaatsitsinnik allannguigaangat qanoq isiginnittaaseqartariaqartarpugut?

⁹ Ullumikkut inussiap aalajaallunilu silatuup Biibilimut tunngasunik eqqornerusumik paasinninnissatsinnut ikiortarpaatigut. Taamatut paasinnittaatsinik allannguinerit nuannaarutigisariaqarpavut. Taakkunuuna erserpoq Jehovap inussiaq aalajaallunilu silatooq aqqutigalugu sallusuissummik ilinniartittaraatigut. Ilaannikkut Siulersuisoqatigiit, inussiamut sinniisuusut, sallusuissutinik aalajangersimasunik paasinnittaatsinik misissueqqittarput. Qatanngutit taakku aalajangeraangamik paasinnittaatsinik allannguisoqartariaqartoq taakkuninnga nassuiaariaatsinik naqqiinissartik paasiuminarnerulersitsinissartilluunniit tunuarsimaarfigineq ajorpaat. Inussiaqatigiit nalunngilaat allannguinerit taakku pissutigalugit assuarineqassallutik, pingaarnerutippaalli Guutip piumasaanut naapertuuttumik iliuuseqarnissartik. Illit qanoq eqqarsartarpit inussiaq aalajaallunilu silatooq Biibilimi paasinnittaatsitsinnik allannguigaangat? — Atuaruk Lukasi 5:39.

10, 11. Oqaluusseriaaseq nutaaq atoqquneqarmat Biibilimik Atuaqqissaartartut ilaat qanoq pippat, tamannalu qanoq ilinniarfigisinnaavarput?

¹⁰ Allamik assersuuteqariarta. Ukiut hundredit missaat matuma siorna Biibilimik Atuaqqissaartartut ilaat oqalugiallaqqissut isumaqarput oqalugiartarnertik oqaluusseriaasiusoq pitsaanerpaaq. Tamanut oqalugiarneq nuannaraat. Taakkua ilaasa nuannarilluinnartarpaat oqalugiarnertik pillugu inunnit nersualaarneqartarnertik. Kingusinnerusukkut Jehovap innuttaasa paasilluarnerulerpaat Jehovap oqalugiarnerinnaq piumasarinngikkaa, piumasarigaali illumiit illumut oqaluussineq oqaluusseriaatsillu allat atussagaat. Oqalugiallaqqissut ilaat taamaaliorusunngillat. Oqalugiaraangamik anersaakkut ittunik pingaartitsisoorpasittaraluarput, oqaluussiumannginnerannilli erserpoq taamaanngitsoq. Nalunngilarput Jehovap tamanna iluarinngikkaa. Jehovallu peqatigiissortaanit qimagupput. — Matthæusi 10:1-6; Apustilit Suliaat 5:42; 20:20. *

¹¹ Aamma Biibilimik Atuaqqissaartartut amerlanersaasa illumiit illumut oqaluussineq, ingammik aallaqqaammut, sapernartissimavaat. Naalappulli Jehovallu peqatigiissortaanik ilumoorfiginnillutik. Piffissap ingerlanerani illumiit illumut oqaluussinertik sapernartikkunnaarpaat. Jehovallu taakku pilluaqqungaarpai. Inussiap aalajaallunilu silatuup oqaluusseriaaseq alla misilissimanngisat misileqqullugu kajumissaraangatit illit susarpit? Oqaluusseriaaseq tamanna sapernartikkaluarlugu naalakkusuttarpit?

Asasatta ilaasa Jehova qimakkaangassuk

12, 13. (a) Sooq Jehovap peqquaatigut ‘ajortoq akornatsinnit peeqqullugu’? (b) Kristumiut angajoqqaat suna ajornakusoortissinnaavaat?

¹² Qularnanngitsumik tamatta nalunngilarput Jehova nuannaartikkumallugu sutigut tamatigut minguitsuusariaqarluta. (Atuaruk Titusi 2:14). Ilaannikkulli peqqussutip tamatuma naalannissaa  ajornakusoortittarsinnaavarput. Assersuuteqariarta: Kristumiut aappariit ilumoorfiginnittut ernituaat sallusuissummit qimaguppoq. Jehovamut angajoqqaaminullu ikinngutaanissamininngarnit ‘sivikitsuinnarmik ajortimi inuulluataarusunneruvoq’. Angutip inuusuttup iliuusii pissutigalugit ilagiinnut ilaajunnaarsinneqarpoq. — Hebræerit 11:25.

¹³ Angajoqqaavisa tamanna qamuuna anniaatigingaarpaat! Nalunngilaat Biibilimi ima allassimasoqartoq: “Qatanngummik taaneqartoq kinguaassiuutitigut inuunerluttuuppat piumatuujulluniluunniit, guutipilussiortuulluni mittatilliisuulluniluunniit, imerajuttuulluni ujajaasuulluniluunniit, taanna ilagisassannginnassiuk. Taamaattoq nereqatigissanngilarsiluunniit.” Aamma ima allassimavoq: “Ajortoq akornassinnit piissavarsi.” (1 Korinthimiut 5:11, 13) Paasivaat “qatanngummik taaneqartoq” ilaqutaasinnaasoq najugaqatiginngisartik. Ernerminnulli asanningaaramik immaqa ima eqqarsarput: “Ernerput oqaloqatigissallugu pisariaqartipparput. Jehovamut uteqqinniassammat oqaloqatigisariaqarparput.” *

14, 15. Angajoqqaat qitornartik ilagiinnit ilaajunnaarsinneqarsimasoq oqaloqatiginiarlugu aalajangeraangamik suna eqqaamasariaqarpaat?

¹⁴ Angajoqqaat aliasungaarnerat paasilluarsinnaavarput. Ernerat allamik isumataarnissaminut periarfissaqaraluarpoq. Ilagiinnilli angajoqqaaminillu peqateqarusunnermininngarnit ajortuliorusunneruvoq. Angajoqqaat ernertik ikiorusukkaluarpaat, taassumali aalajangigaanut sunniuteqarsinnaanngillat. Isumatsassimanerat paasinarluarpoq!

¹⁵ Angajoqqaat taakku qanoq iliussappat? Jehovap peqqussutaa erseqqissoq maleruarumassavaat? Ilumoorpoq ilaqutariinnut tunngassuteqartut pillugit ernerminnik oqaloqateqarnissartik qaqutigoortumik pisariaqartissinnaagaat. Isumaqassappalli ernerminnik oqaloqateqarnissaminnut pissutissarpassuaqarlutik? Tamatumunnga tunngatillugu aalajangiigaangamik Jehovap tamanna qanoq isumaqarfigineraa eqqaamasariaqarpaat. Jehovap innuttami minguitsuujuarnissaat kissaatigaa. Taamaattuminguna inuup ‘ajortup’ ilagiinnit peersinneqarnissaa peqqussutigigaa. Aamma inuk ajortuliortoq ajortuliaminik soraarussinissaanut ilagiinnullu uteqqinnissaanut ikiorusuppaa. Kristumiut angajoqqaat Jehovap kissaataatut kissaateqarnertik qanoq ersersissinnaavaat?

16, 17. Aronimut ilaqutaanullu pisoq qanoq ilinniutigisinnaavarput?

¹⁶ Mosesip qatanngutaa, Aroni, ernimi ilaasa marluk iliuusai pillugit ajornakusoortitsisupilussuuvoq. Erneri Nadabi Abihulu Jehovap iluarinngisaanik pilliuteqarput. Taava innermit Jehovamit pisumit toqutaapput. Takorlooriaruk Aroni qanoq aliasutsigisimassasoq. Aronip ernimi toqunerat pissutigalugu taakku oqaloqatigisinnaajunnaarpai. Aronimulli taassumalu ilaqutaanut pissutsit suli ajornakusoornerulerput. Mosesip Aroni ernerilu aalajaatsut oqarfigai Jehovap piumasarigaa aliasunnerminnik  ersersitsissanngitsut. Mosesi ima oqarpoq: “Ilissi nutsasi isivissimatiinnassanngilasi atisasilu alittussanagit, peqqussutima taassuma akerlianik ilioraluarussi toqusussaassagassi [Jehovallu] ilagiit tamaasa kamaatissammagit.” (3 Mosesi 10:1-6) Ilinniutissartaa erseqqippoq. Jehova ilaquttatsinnit Jehovamik ilumoorfiginninngitsunit asanerusariaqarparput.

¹⁷ Ullumikkut Jehovap peqqussutiminik unioqqutitsisut ingerlaannaq toqunneq ajorpai. Jehovap taakku asannittuliorfigisarpai eqqunngitsuliorunnaarnissaannut periarfissinnerisigut. Angajoqqaalli ernertik panitsilluunniit ilagiinnut ilaajunnaarsitaasimasoq pisariaqanngitsumik ilagisarpassuk Jehova qanoq misigisassava?

18, 19. Ilaqutariit Jehovamut ilumoorfiginnittuarunik qanoq pilluaqquneqarsinnaappat?

¹⁸ Ilagiinnut uteqqittorpassuit oqartarput ikinngutimik ilaquttamillu aalajaannerat silattuaqinerminnut iluaqutigisimallugu. Assersuutigalugu arnaq inuusuttoq utoqqaanertanut oqarsimavoq animi Jehovamut ilumoorfiginninnera taassumalu peqqussutaanik maleruaanera inooriaatsiminik allannguinissaminut ilagiinnullu uternissaminut pissutaaqataasoq.

¹⁹ Qanoq iliussanersugut erseqqippoq: Inuunitsinni sutigut tamatigut Jehova naalattariaqarparput. Naammalluinnanngissuserput pissutigalugu naalannissarput sapernartissinnaavarput. Qularutiginngilluinnartariaqarparpulli Jehovap uagutsinnut peqqussutai iluaqutigiuaannarlutigit.

“Guutip oqaasia uumavoq”

20. Hebræerit 4:12-imi allassimasut qanoq paasisariaqarpat? (Aamma takuuk quppernerup ataani ilanngussaq).

²⁰ Paulusip Hebræerit 4:12-imi ‘Guutip oqaasia uumasoq’ allakkamiuk Biibili pinngilaa. * Versit ataqatigiinnerinit erserpoq Guutip neriorsuutai eqqartorai. Taamaalilluni Paulusip erseqqissarpaa Guutip neriorsuutai eqquuttuaannartut. Tamanna Jehovap aamma ima erseqqissarpaa: “Oqaasera . . . susaarluni uannut utissanngilaq, kisianni suliareqqusakka suliarissavai naammasseqqusakkalu naammassissallugit.” (Esaja 55:11) Guutip neriorsuutini kissaatigisatsitut eqquutitinngippagit erinitsajuittariaqarpugut. Qularutiginngilluinnarsinnaavarput Jehova siunertani naammassiniarlugu ‘suliuartoq’. — Johannesi 5:17.

21. Ukiorpassuarni Jehovamut kiffartortuusimasut Hebræerit 4:12-imi allassimasut qanoq qiimmassaatigisinnaavaat?

²¹ Inuppassuit ‘amerlangaartunut’ ilaasut ukiorpassuarni Jehova kiffartorfigisimavaat. (Saqqummersitat 7:9) Silarsuarmi matumani ajortumi utoqqalinissartik ilimagisimanngilaat. Sapinngisartilli tamaat Jehova kiffartorfigiuarpaat. (Tussiaat 92:15) Nalunngilaat Guutip oqaasia uumasoq Jehovallu neriorsuutini eqquutitikkumaarai. Nalunngilaat taanna nunarsuarmut inunnullu piumasani naammassiniarlugu suliuartoq. Guutip siunertani pingaartimmagu taassuma siunertaanik pingaartitsinerput ersersikkaangatsigu taanna nuannaartittarparput. Ullut arfineq-aappaanni qasuersaarfimmini Jehova siunertaminik naammassinninnissaminik akornuserneqarsinnaanngilaq. Jehovallu nalunngilaa innuttani ataatsimut isigalugit siunertaminut naapertuuttumik iliuuseqartuarumaartut. Illimmi? Illit Guutip qasuersaarfianut isereerpit? (w11 07/15-E)

[Quppernerup ataani ilanngussat]

Eqqaamavigit?

• Ullumikkut Guutip qasuersaarfianut iserumalluta susariaqarpugut?

• Guutip uagutsinnut piumasaqaataanik paasinnikkaangatta qanoq ersersissinnaavarput Guuti nuannaartikkusullutigu?

• Jehovap peqqussutaanut naalannissarput qaqugukkut ajornakusoortissinnaavarput, naalannissarpullu sooq taama pingaaruteqartigaa?

• Hebræerit 4:12-imi allassimasut qanoq paasisariaqarpat?

[Atuaqqissaarnermi apeqqutit]

[Qupp. 29-mi assiliartaq]

Angajoqqaat aliasungaarput!