Jehovap asannittumik siulersuinera naapertorlugu iliussavit?

“Uumigaakka aqqutit eqqortuunngitsut tamaasa.” — TUSSIAAT 119:128.

1, 2. (a) Sukkuussanerlutit ikinngutinnut ilitsersuuteqquguit sunut mianersoqquneqarnissat nuannaarutigissaviuk, aamma sooq? (b) Jehovap sunut mianersoqquaatigut, aamma sooq?

TAKORLOORIARUK sumiiffimmut aalajangersimasumut angalaniartutit, sukkuussanerlutilli nalornigavit ikiorneqarnissat pisariaqartippat. Ikinnguteqarputit aqqutaanik ilisimannittumik. Taanna tatigigakku taassumunnga ikioqquvutit. Taassuma ilitsersuuppaatit aqqutaanilu navianartut mianersorfigisassatit eqqumaffigeqqullugit. Assersuutigalugu mianersoqqullutit oqarfigaatit allagartaqartoq paatsiveerunnartumik. Inuppassuit taanna malikkamikku tammarsimapput. Illit taassumannga mianersoqquneqarnerit nuannaarutigissaviuk mianersoqqussullu eqqumaffigalugu? Uaguttaaq angalavugullusooq. Inuuneq naassaanngitsoq toraarlugu angalavugut. Jehova ikinngutigaarput, taassumalu siulersorpaatigut naassaanngitsumik inuusinnaalerumalluta pisariaqartitatsinnik. Aamma navianartunut taassumunnga naalakkunnaassutigisinnaasatsinnut mianersoqquaatigut. — 5 Mosesi 5:32; Esaja 30:21.

² Allaaserisami matumani tulliuttumilu navianartut, imaluunniit mianersorfissat, taakkua ilaat sammissavavut. Eqqaamajuk ikinngutitta, Jehovap Guutip, taakkununnga mianersoqqugaatigut asagamisigut. Naassaanngitsumik inuunissarput kissaatigaa. Inuit aalajangiinerlukkaangata imminullu kiffartorunnaaraangata tamanna aliasuutigisarpaa. (Ezekieli 33:11) Allaaserisami matumani mianersorfissat pingasut sammissavavut. Mianersorfissat sammisassatta siulliat inunnit allaneersuuvoq. Aappaat uatsinnit pisuuvoq. Pingajuallu piunngitsunit pivoq. Mianersorfissat taakkua sorpiaanerat taakkuninngalu ingalassimanninnissatsinnut Jehovap uagutsinnik qanoq ikiuisarnera paasisariaqarparput. Biibilimik allattut ilaata mianersorfissat, imaluunniit navianartut, taakku suunersut nalunngilaa imalu allalluni: “Uumigaakka aqqutit eqqortuunngitsut tamaasa.” (Tussiaat 119:128) Aamma illit taakku uumigaagit? ‘Aqqutinik eqqortuunngitsunik’ tamanik ingalassimanninnissatsinnik qanoq ililluta aalajangiusimanninnerulersinnaanersugut sammeriartigu.

‘Amerlanerusut iliornerannut maleruutiinnassanngilatit’

3. (a) Angalatilluni sukkuussanerluni naluleraanni sooq allanik malinniinnarnissaq navianarsinnaava? (b) Najoqqutassiaq pingaarutilik suna Mosesimik allakkat aappaanni 23:2-miippa?

³ Takorlooriaruk ungasissumut angalasutit sukkoornissallu nalornilerit. Takuat inuppassuit aqqut aalajangersimasoq ingerlavigigaat, taakkualu maliinnarnissaat ajornannginnerorpasippoq. Allanilli malinniinnarneq navianarpoq. Immaqa taakku illit ornikkavit tungaanut ingerlanngillat, immaqaluunniit ilittut tammartajaarput. Assersuut tamanna najoqqutassiamik inatsisit Jehovap Israelikkunnut tunniussaasa ilaanniittumik paasinninnissamut iluaqutigissavarput. Taamanikkut Jehovap eqqartuussinermi eqqartuussisuusartut ilisimannittullu saaffigai. Amerlanerussuteqartut iliornerattut iliornerup — allanit iluarineqarniaannarluni aalajangiinerlunnerup — navianaataa mianersoqqussutigaa. (Atuaruk 2 Mosesi 23:2). Inuit naammalluinnanngitsut amerlanerussuteqartut iliornerattut ilioqqajaasarput. ‘Amerlanerusulli iliornerannut maleruutiinnannginnissaq’ pillugu najoqqutassiaq eqqartuussinermi eqqartuussisuusartunuinnaq ilisimannittunuinnarlu atuuppa? Naamerluinnaq.

4, 5. Josva Kalebilu amerlanerusut iliornerannut maleruutiinnarnissamut qanoq tatineqarpat, qunusuisaarnissaminnullu suna iluaqutigaat?

⁴ Pissutsini qanorluunniit ittuni amerlanerussuteqartut  iliornerannut maleruutiinnarnissamut tatineqartoqarsinnaavoq. Taamatut tatineqaleriataartoqarsinnaavoq, tamannalu akioruminaassinnaavoq. Assersuutigalugu Josvamut Kalebimullu pisimasut eqqarsaatigeriakkit. Israelikkuusut marluk taakku angutit qulit allat peqatigalugit nunamut neriorsuutigisamut alapernaarsuiartorput. Uteramik angutit qulit taakku isumalluarunnaarnartumik nalunaaruteqarput. Assersuutigalugu inuit tassaniittut inorujussuunerarpaat nefilimit, inngilinit pikitsitsisunit taakkualu nuliaannit kingoqqisut. (1 Mosesi 6:4) * Taamaassinnaanngilarli, ukiummi hundredellit tamatuma siorna nefilimit tamarmik Noap nalaani ulersuarmi kinguaaqarnatik toqupput. Israelikkulli uppernikikkamik angutit qulit taakkua oqaasii tunngavissaqanngikkaluartut upperaat. Uppernikitsoq Guutimik tatiginnikkunnaartarpoq inuillu ajoqersuutaannik eqqunngitsunik upperinnilertarluni. Sivitsunngitsoq Israelikkut amerlanersaat eqqarsalerput Jehovap nunamut neriorsuutigisamut iseqqusinera malillugu iliortariaqarnatik. Josva Kalebilu qanoq pippat? — 4 Mosesi 13:25-33.

⁵ Josva Kalebilu amerlanerussuteqartut iliornerattut iliunngillat. Israelikkut tusaarusunngikkaluartut angutit taakkua marluk pissutsit piviusut sapiillutik oqaluttuaraat. Taakku Israelikkunnit toqunniarneqaraluarlutik eqqortuliorput! Qanoq ilillutik taamatut qunusuisaarsinnaappat? Jehovamut upperamik. Jehovamut upperluartup inuit ajoqersuutaat eqqunngitsut upperinagit Jehovap Guutip oqaasii upperisarpai. Kingusinnerusukkut Josvap Kalebillu Jehovamut uppernertik eqqartoramikku kikkut tamaasa paasitippaat taanna neriorsuutiminik tamatigut eqqortitsisartoq. (Atuakkit Josva 14:6, 8; 23:2, 14). Josvap Kalebillu Guutertik asallugulu tatigaat, aamma allanit iluarineqarniaannarlutik Guutiminnik aliasutsitsinissartik takorloorsinnaanngilaat. Tassa amerlanerusut iliornerannut maleruutiinnanngillat, taamaammallu ullumikkut uagutsinnut maligassaalluarput. — 4 Mosesi 14:1-10.

6. Sunut tunngatillugu amerlanerusut iliornerannut maleruutiinnarnissamut tatineqarsinnaavugut?

⁶ Ilaannikkut illit amerlanerusut iliornerannut maleruutiinnarusuttarpit? Inuit amerlanersaasa Jehova ataqqinngilaat. Taassuma eqqortuuneragai eqqunngitsuuneragaalu mitaatigisarpaat. Namminneq eqqortuusorisatik eqqunngitsuusorisatillu uagutsinnut sunniiniutigisarpaat. Assersuutigalugu tv-kkut aallakaatitassiat, filmit qarasaasiakkullu pinnguaatit kinguaassiuutitigut inuunerlunnermik, nakuusernermik anersaarsiornermillu isiginnaagassartallit ajoqutaasinnaannginnerarpaat. (2 Timotheusi 3:1-5) Illit ilaquttatillu sunik aliikkutaqarnissarsi suut tunngavigalugit aalajangertarpisiuk? Allat eqqortuusorisaat eqqunngitsuusorisaallu tunngavigalugit aalajangiisarpisi? Taamaappat amerlanerusut iliornerannut maleruutiinnarsimassaasi.

7, 8. (a) Eqqortumik eqqunngitsumillu immikkoortitsisinnaassuserput qanoq sungiusartarparput, aamma sooq tamanna allattorsimaffinnik atuinermit pitsaanerua? (b) Sooq kristumiut inuusuttut maligassiuilluarnerat nuannaajallannaraajuk?

 ⁷ Jehovap aalajangigassaqaraangatta iluaqutigisinnaasatsinnik erlinnartumik tunissuteqarfigaatigut — tassa eqqarsaatiginneqqissaariarluni eqqortumik eqqunngitsumillu immikkoortitsisinnaassutsimik. Piginnaassuseq tamanna ‘atortuinnarneratigut’ sungiusartarparput. (Hebræerit 5:14) Sungiusarsinnaanngilarput inuit allat iliuuserisartagaat iliuusereqqusaalluunniit iliuuseriinnartarutsigit. Nalunngeqatiginnissuterput atorlugu nammineq aalajangiisartussaavugut. Tamanna pissutigalugu Jehovap innuttai filminik isiginnaarnaveersaartariaqakkanik, atuakkanik atuarnaveersaartariaqakkanik internettimilu nittartakkanik iserfiginaveersaartariaqakkanik allattorsimaffimmik tunineqarneq ajorput. Allattorsimaffiit taama ittut nutartertuartariaqassagaluarput. Allattorsimaffinnik taama ittunik atuisannginnitsinnut pissutaasoq pingaarnerpaaq tassaavoq aalajangiisinnaassuseq Jehovap uagutsinnut tunniussaa atorusukkatsigu. Jehovap kissaatigaa ‘imminut suut iluarinartuunersut qulakkeertuartassagipput’. Taamaaliorsinnaavugut Biibilimi allassimasunik eqqarsaatiginneqqissaartarluta, taanna siulersoqqulluta qinnuigisarlugu, taavalu taassuma iluarisaanik aalajangiilluta. — Efesosimiut 5:10, NV.

⁸ Biibilimut naapertuuttumik aalajangiinerput inuit ilaannit iluarineqartarnavianngilaq. Assersuutigalugu inuusuttortatsinnut atuartuusunut ilungersunartarpoq allanit sunnerniarneqartaramik kikkut tamarmik iliuuserisartagaannik iliuuseqarnissamut. (1 Petrusi 4:4) Taamaattumik nuannerpoq takullugu kristumiut inuusuttut utoqqaallu Josvap Kalebillu maligassiaannik malinnillutik ‘amerlanerusut iliornerannut maleruutiinnannginnerat’.

“Uummatissi kajungerisaannit isissilu takusaannit” usserteqinasi

9. (a) Angalatilluni aqqutit nuannerunartitaannaat ingerlaviginissaat sooq navianarsinnaava? (b) Sooq inatsit Mosesimik allakkat sisamaanni 15:37-39-miittoq Israelikkunnut pingaaruteqarpa?

⁹ Mianersorfissat sammisassatta aappaat uatsinnit pisuuvoq. Manna takorlooriaruk: Sumiiffimmut aalajangersimasumut angalavutit, nunallu assinganik peqarputit tassunga apuunnissannut iluaqutissannik. Nunap assinga atorniarnagu aqqulli isikkivigissoq sunaluunniit ingerlaviginiarlugu aalajangeruit qanoq pisoqassava? Ornikkannut apuunnavianngilatit. Assersuut tamanna inatsimmik Jehovap Israelikkunnut tunniussaanik allamik paasinninnissamut iluaqutigissavarput. Inatsit tamanna pillugu Mosesimik allakkat sisamaanni 15:37-39-mi allassimasoqarpoq. (Atuakkit). Ullumikkut inuppassuit nivingatat allunaasallu tungutsorissut pillugit inatsit paasisinnaanngilaat. Illit inatsit tamanna sooq pingaaruteqarnersoq paasiviuk? Pingaaruteqarneranut pissutaasut ilagaat Guutip innuttaasa taakku pissutigalugit inuiannit eqqaamiorisaminnit allanit tamanit allaanerulernerat. Jehovamillu ilumut iluarisaajumagunik inuiannit allanit allaanerusariaqarput. (3 Mosesi 18:24, 25) Inatsisilli tamatuma atuunneranut suli allamik pissutaasoqarpoq. Pissutaasoq taanna Jehovamut naalakkunnaassutigisinnaasarput sammeriartigu.

10. Jehovap qanoq ersersippaa qanoq pinngortitaasugut nalunngilluarlugu?

¹⁰ Maluginiaruk Jehovap inatsimmik tamatuminnga innuttaminut tunniussinerminut pissutigisaa: ‘Usserteqinasi uummatissi kajungerisaannit isissilu takusaannit.’ Jehova taama oqarpoq qanoq pinngortitaanersugut nalunngilluaramiuk. Nalunngilaa uummatitta, ilorlikkut pissutsitta, isitsinnik takusavut pilerigileriaannaagai. Taamaattumik Jehovap uummatitta nakutitsisinnaanera nalunnginnamiuk ima mianersoqquaatigut: “Tamanit annerusumik uummat tatigisassaanngitsuuvoq.” (Jeremia 17:9) Taamaattuminguna Jehovap Israelikkut peqqugai uummatimik kajungerisaannit isimillu takusaannit usserteqqunagit. Nalunngilaa Israelikkut inuiaat imminik pallorfiginninngitsut qimerloorpatigit taakkunatut ikkusulersinnaasut. Taakkunatut isikkoqarusulersinnaapput taavalu taakkunatut eqqarsarlutillu pissusilersorusulersinnaallutik. — Ussatit 13:20.

11. Sumut tunngatillugu uummatitta kajungerisaanit isittalu takusaannit usserteriaannaasinnaavugut?

¹¹ Ullumikkut uummatitsinnut ajornannginneruvoq isitta takusaannik pileriginninnissaq. Silarsuarmi pilerissusipiluit malillugit iliornerup nalinginnaaffiani inuuvugut. Tamatumunnga tunngatillugu najoqqutassiaq Mosesimik allakkat sisamaanni 15:39-miittoq qanoq iluaqutigisinnaavarput? Atisalersoriaatsitsigut uummatitta kajungerisaanit isittalu takusaannit usserteriaannaavugut. Inuit peqqusaarpasissumik atisalersoriaaseqartartut akornanniittarpugut  — atuarfimmi, suliffimmi najukkatsinniluunniit. Taakku takujuartaratsigit taakkunatut isikkoqarusuleraluttuinnarsinnaavugut. Taava taakkunatut atisalersoriaaseqaleriartuaalersinnaavugut kristumiutullu atisalersoriaaseqarunnaariartuaarluta. — Romamiut 12:1, 2.

12, 13. (a) Isigisariaqanngikkaluakkatsinnik isigeqqajaasarutta susariaqarpugut? (b) Allat kissaatipiloqalernerannut pissutaaqqunata Biibili naapertorlugu susariaqarpugut?

¹² Imminut naalakkersinnaanermik ineriartortitsinissarput pingaaruteqangaarpoq. Isigisariaqanngikkaluakkatsinnik isigeqqajaasarutta eqqaasartigu Jobip aalajaatsup, isiminut isumaqatigiissuteqarsimasup, maligassiaa. Taassuma aalajangiusimavaa arnamik nuliarinngisaminik ajuutiginninniakujulluni isigisaqannginnissani. (Jobi 31:1) Kunngi Daavi tamatumunnga assingusumik aalajangiusimannippoq. Ima allappoq: “Iluanngitsuliungaarnermik takusaqarumanngilanga.” (Tussiaat 101:3) Daavip pisimaneratut, uaguttaaq aalajangertariaqarpugut “iluanngitsuliungaarnermik” isigisaqarumanata. ‘Iluanngitsuliungaarneq’ tassaavoq Jehovamut attaveqarunnaassutigisinnaasarput sunaluunniit. Aamma isigisatsinnut uummatitsinni kissaatipiloqalissutigisinnaasatsinnut naggataatigullu eqqunngitsuliussutigisinnaasatsinnut sunulluunniit tunngassuteqarpoq.

¹³ Allaat uagut allat Jehovamut attaveqarunnaassutigisinnaavaatigut iliuuseqartarutta taakkua kissaatipiloqalissutigisaannik. Ilaatigut atisalersoriaaserput tamatumunnga pissutaasinnaavoq. Taamaattumik “isornaatsunik perroorniutaanngitsunillu” atisaqartarnissarput pillugu Biibilimi allassimasut malillugit iliorusuppugut. (1 Timotheusi 2:9) Taamatut atisalersoriaaseqarutta uagut nammineq nuannarisavut kisiisa eqqarsaatigisarnavianngilavut. Allat isumaat ataqqissavavut. Nammineq iluarusunnissarput pinnagu allanit iluarisaanissarput pingaarnerutipparput. (Romamiut 15:1, 2) Inuusuttut ilagiinni kristumiuniittut tusindilippassuit atisalersoriaatsimikkut maligassaalluarput. Nuannaarutigingaartarparput takullugu taakkua uummatimik kajungerisaannit isimillu takusaannit ussertinnginnerat. Inuunerminni sutigut tamatigut Jehovamit iluarisaarusupput.

‘Guutipiluit piunngitsut’ maleqinasigit

14. Piviusuunngitsut pillugit Samueli qanoq mianersoqqusiva?

¹⁴ Maanna takorlooriaruk inoqajuitsukkut angalallutit. Isumaqalerputit imermik takusaqarlutit. Takusuusivutilli. Ilumoortumik imeqanngilaq! Aqqutigisat qimallugu imeqarfiusorisavit tungaanukaruit qanoq pisoqarsinnaava? Inoqajuitsumi tammarsinnaavutit toqullutillu. Tamatumunnga assingusumik Jehovap nalunngilaa piviusuunngitsumik upperinninneq qanoq navianartigisoq. Ilaanni taassuma Israelikkut tamanna pillugu mianersoqqusariaqarpai. Israelikkut inuiaat eqqaamiorisatik assigalugit nunamiusumik kunngeqarusupput. Tamatuminnga kissaateqaramik ingasattumik ajortuliorput tamatumuuna erserami Jehova kunngigerusunngikkaat. Naggataatigut Jehovap taakkua nunamiusumik kunngeqarnissaat akueraa, pruffiitinili  Samueli aqqutigalugu mianersoqquai ‘guutipilunnik piunngitsunik’, imaluunniit piviusuunngitsunik, noqqaassutiginneqqunagit. — Atuaruk 1 Samueli 12:21.

15. Israelikkut qanoq ilillutik piviusuunngitsunik noqqaassutiginnippat?

¹⁵ Israelikkut immaqa isumaqarput kunngi nunamiusoq Jehovaminngarnit tatiginarnerusoq. Taamatut isumaqarsimagunik piviusuunngitsunik noqqaassutiginnissimassapput. Piviusuunngitsumik ataatsimik upperinnikkamik piviusuunngitsunik Saatanimeersunik allarpassuarnik upperinnileriaannaapput. Assersuutigalugu kunngip nunamiusup taakku guutipilunnik pallorfiginnilersissinnaavai. Guutipilussiortut isumaqarput qisunnik ujaqqanilluunniit guutiliat taakku Guutimit takussaanngitsumit tamanik pinngortitsisumit, Jehovaminngarnit, tutsuigisinnaanerullugit taakku takusinnaallugillu attorsinnaagamikkit. Apustilili Paulusi allappoq guutipiluit ‘suunngitsuusut’. (1 Korinthimiut 8:4, 1936) Guutipiluit takusaqarsinnaanatillu tusaasinnaanatillu oqalussinnaanatillu iliuuseqarsinnaanatillu ikiuisinnaanngillat. Taamaattumik takussaallutillu tigussaanerat pissutigiinnarlugu taakku pallorfigisarutsigit sianiilliussaagut. Piviusuunngillat, taakkuninngalu tutsuiginnittut “taakku assigilissavaat”. — Tussiaat 115:4-8.

16. (a) Ullumikkut Saatani qanoq ililluni piviusuunngitsunik noqqaassutiginnitsitsiniaasarpa? (b) Sooq oqartoqarsinnaava aningaasat pigisallu Jehovamut naleqqiullugit piviusuunngitsuusut?

¹⁶ Saatani suli piviusuunngitsunik noqqaassutiginnitsitsiniaanermini peqqusersusaallaqqissupilussuuvoq. Assersuutigalugu inuppassuit isumaqalersittarpai aningaasaateqarlutillu suliffigissaarlutillu perpassuaqarunik pilluarlutillu toqqissisimassallutik. Tamakku tamaasa ajornartorsiutiminnut aaqqiissutaasinnaasoraat. Napparsimalerunilli imaluunniit aningaasatigut ingerlanerliulerunik ajunaarnersuaqarpalluunniit tamakku qanoq iluaqutigitigisinnaavaat? Misigilerunik inuunertik siunertaqanngitsoq, tamakku sumut iluaqutigissavaat? Inuunermi apeqqutinut pingaarutilinnut akissutissartaqarpat? Toqungajalertilluni pigisat qanoq iluaqutaasinnaagamik? Aningaasat pigisallu tutsuigigutsigit pakatsissaagut. Taakku pillualissutigisinnaanngilavut, aamma nappaatinut toqumullu illersuutigisinnaanngilavut. Piunngitsuupput. (Ussatit 23:4, 5) Jehovali piviusuuvoq! Guutiuvoq ilumoortoq. Aatsaat taassumunnga attaveqarluarutta pilluavillutalu toqqissisimavissinnaavugut. Taassuma kisimi ajornartorsiornitsinni ikiorsinnaavaatigut. Taassumunnga ikinngutaanerput pilluaqqussutaangaarpoq. Taanna qimanngisaannarisigu piviusuunngitsunik noqqaassutiginninnata.

17. Mianersoqqussutigineqartut sammereerlugit illit suna aalajangiusimaviuk?

¹⁷ Jehovamut ikinngutaanerput inuunerlu naassaanngitsoq toraarlugu angalanitsinni taassumannga siulersorneqarnerput nuannaarutigaarput. Taassuma mianersoqqussutai eqqumaffigiuarutsigit naassaanngitsumik inuulersinnaavugut. Allaaserisami matumani mianersorfissat pingasut uku sammineqarput: amerlanerussuteqartut iliornerat, nammineq uummaterput piviusuunngitsullu. Allaaserisami tulliuttumi Jehovap uagutsinnut mianersoqqussutigisai allat pingasut ‘aqqutinik eqqortuunngitsunik’ tamanik uumiginnillutalu ingalassimanninnissatsinnut iluaqutissavut sammissavavut. — Tussiaat 119:128.

[Quppernerup ataani ilanngussaq]

Qanoq isumaqarpit?

Najoqqutassiat allassimaffinni ukunaniittut illit qanoq atorsinnaavigit?

• 2 Mosesi 23:2

• 4 Mosesi 15:37-39

• 1 Samueli 12:21

• Tussiaat 119:128

[Atuaqqissaarnermi apeqqutit]

[Qupp. 13-mi assiliartaq]

Amerlanerussuteqartut iliornerannut maleruutiinnarnissannut ussernartorsiortarpit?

[Qupp. 15-mi assiliartaq]

Uummatip kajungerisaanit isillu takusaannit ussertinnissaq sooq navianarpa?

[Qupp. 16-mi assiliartaq]

Piviusuunngitsunik noqqaassutiginnippit?