Eqqisseqateqartuarumallutit iliuuseqarit

“Eqqissinartut . . . noqqaassutiginiartigit.” — ROMAMIUT 14:19.

1, 2. Sooq Jehovap Nalunaajaasui eqqisseqatigiippat?

ULLUMIKKUT silarsuarmi piviusumik eqqissineqanngilaq. Allaat inuit nunaqqatigiikkaluarlutillu oqaaseqatigiikkaluartut upperisarsiorneq, politikki, aningaasaqarniarneq ilinniagaqarniarnerlu pissutigalugit avissaaqqasarput. Jehovalli Nalunaajaasui 7 millionit sinnillit silarsuaq tamakkerlugu eqqisseqatigiipput allaat “inuiaqatigiinnit naggueqatigiinnillu inuiannillu immikkullu oqaasilinnit” tamaninngaanneeraluarlutik. — Saqqummersitat 7:9.

² Eqqisseqatigiinnitsinnut pissutissaqarluarpoq. Tamatumunnga pissutaasoq pingaarnerpaaq tassaavoq ‘Guuti eqqisseqatigigatsigu’. Guutip ernerata uagut pilluta pilliutaa upperigatsigu Guuti eqqisseqatigisinnaavarput. (Romamiut 5:1; Efesosimiut 1:7) Aamma Jehovap kiffani aalajaatsut anersaaminik illernartumik tunisarpai, anersaallu taassuma inerititaraa eqqissineq. (Galatiamiut 5:22) Eqqisseqatigiinnitsinnut ataasiussuseqarnitsinnullu pissutaasoq alla tassaavoq ‘silarsuarmut ilaannginnerput’. (Johannesi 15:19, NV) Tamanna paasisariaqarpoq politikkimut sorsunnermullu akuliunneq ajortugut. Soorlu Biibilimi allassimasoq Jehovap innuttaasa “[saffiortarpaat] panatik assallatserummut savissaliaralugit”. — Esaja 2:4.

3. Eqqisseqatigiikkatta susinnaavugut, allaaserisami matumani suna sammineqassava?

³ Ilagiinni nunanit assigiinngitsuneersuugaluarluta assigiinngitsunillu ileqqoqaraluarluta assigiinngitsunillu eqqarsartaaseqaraluarluta ‘asaqatigiippugut’. (Johannesi 15:17) Eqqisseqatigiinnerput tassaaginnanngilaq qatanngutitsinnik ajortumeererusunnginnerput. Eqqisseqatigiikkatta ‘tamanut ajunngitsuliorsinnaavugut, pingaartumik uppeqatitsinnut’. (Galatiamiut 6:10) Jehovamik qatanngutitsinnillu eqqisseqateqarnerput naleqangaarpoq, tamannalu  eriagisariaqarparput. Maanna sammissavarput ilagiinni ajornartorsiuteqaraangat qanoq eqqisseqateqartuarsinnaasugut.

‘Kukkussuteqaraangatta’

4. Allamik ajuallatsitsisimagutta eqqisseqateqartuarumalluta sussaagut?

⁴ Ajoqersugaq Jaaku ima allappoq: “Tamatta amerlasuunik kukkussuteqartarpugut. Oqalunnermigut kukkussuteqartanngitsoq naammalluinnartuuvoq.” (Jaaku 3:2) Ilaannikkut qatanngutit marluk isumaqatigiinngissuteqarsinnaasarput. (Filippimiut 4:2, 3) Ajornartorsiutilli taamaattut ilagiinni eqqissineq akornusernagu aaqqinneqarsinnaapput. Assersuutigalugu eqqarsaatigeriaruk Jiisusip allanik ajuallatsitsisimagutta iliuusereqqusaa. — Atuakkit Matthæusi 5:23, 24.

5. Eqqunngitsuliorfigineqarutta eqqisseqateqarumalluta susinnaavugut?

⁵ Eqqunngitsuliorfigineqaruttami? Utoqqatseriartornissaa utaqqissavarput? Korinthimiunut allakkani siullerni 13:5-imi allassimavoq asanninneq puttarsisaqartanngitsoq. Ajuallatsinneqaraangatta eqqisseqateqartuarusunnerput ersersissinnaavarput uagutsinnik ajuallatsitsisoq isumakkeerfigalugu ajornartorsiullu puiorlugu. (Atuaruk Kolossemiut 3:13). Taamaaliorneq pitsaanerpaavoq ajornartorsiut annikikkaangat. Taamaalioraangattalu qatanngutigiittut ataasiussuseqartuassaagut qamuunalu eqqississalluta. Imaattumik ussateqarpoq: “[Inuup] pingaartittaqaa unioqqutitsisimasut asattuunneqarnissaat.” — Ussatit 19:11.

6. Eqqunngitsuliorfigineqarsimanerput puigoruminaatsikkutsigu susariaqarpugut?

⁶ Taavami eqqunngitsuliorfigineqarsimanerput puigoruminaatsikkutsigu? Allat tamatuminnga oqaluttuunnissaat silatusaarnerussanngilaq. Oqaatissuaagaanni ilagiinni eqqissineq navianartorsiortinneqassaaq. Ajornartorsiut aaqqinniarlugu susinnaavugut? Matthæusi 18:15-imi ima allassimavoq: “Qatanngutivit ajortuliorfigippatit orniguk marluinnaatillusilu naqqissorlugu oqaloqatigiuk. Paasippatit taava qatanngutit utertissimassavat.” Matthæusi 18:15-17-imi allassimasoq ingasattumik ajortuliorneq pineqaraluartoq najoqqutassiaq versi 15-imiittoq allanut tunngatillugu atorluarsinnaavarput. Taamaattumik uagutsinnik ajuallatsitsisoq eqqisseqatigilerniarlugu taanna kisiat inussiarnersumik oqaloqatigisariaqarparput. *

7. Sooq ajornartorsiutit aaqqinniapallattariaqarpavut?

⁷ Apustili Paulusi ima allappoq: “Kamassimariannguaritsi, kisiannili ajortuliornasi. Seqineq tarrisinaveersiuk narrutsassimanissinni. Diaavululu inissaqarteqinasiuk.” (Efesosimiut 4:26, 27) Jiisusilu ima oqarpoq: “Akerlerisat . . . isumaqatigilipallanniaruk.” (Matthæusi 5:25) Taava eqqisseqateqartuarumalluta ajornartorsiut aaqqinniapallattariaqarparput. Taamaaliunngikkutta ajornartorsiut ajornartorsiuterujussuanngorsinnaavoq, soorlu kilerneq aseruussinnaasoq passunneqapallanngikkuni. Ajornartorsiutip aaqqinnissaanut makitaneq, sinnganeq, aningaaseritunerluunniit akornutigissanngilavut. — Jaaku 4:1-6.

Ajornartorsiut inunnik arlalinnik attuigaangat

8, 9. (a) Ukiuni hundredelinni siullerni Romami ilagiinniittut suna isumaqatigiinngissutigaat? (b) Paulusip kristumiut Romamiut isumaqatigiinngitsut qanoq siunnersorpai?

⁸ Ajornartorsiutit ilaat ilagiinniittunik arlalinnik attuisinnaapput. Tamanna kristumiut Romamiut misigisimavaat. Kristumiut juutiusut juutiunngitsullu akornanni isumaqatiginngittoqarpoq. Ilagiinniittut ilaasa sanngiinnerusumik, imaluunniit killeqarnerusumik, nalunngeqatiginnissutillit nikagisarunarpaat. Allat namminneq aalajangigassaat eqqunngitsumik tunngaveqarlutik isorisarpaat. Paulusip ilagiit qanoq siunnersorpai? — Romamiut 14:1-6.

⁹ Paulusip kristumiut isumaqatigiinngitsut tamaasa siunnersorpai. Mosesip inatsisaanik maleruaasussaajunnaarnerminnik paasinnissimasut  allaffigai tamatuminnga paasinninngitsut nikageqqunagit. (Romamiut 14:2, 10) Nikagiuarunikkit nerisassanik Inatsisit naapertorlugit inerteqqutaasunik nererusunngitsut sallusuissummiikkumajunnaarsissinnaavaat. Paulusip ima oqaaqqissaarpai: “Guutip suliaa aserortinnaveersiuk nerisassaannaat pillugit. . . . Eqqortuliussaatilli neqitunngikkuit viinnisunngikkuilluunniit allamilluunniit qatanngutinnut naakkiussutaasinnaasumik iliuuseqanngikkuit.” (Romamiut 14:14, 15, 20, 21) Paulusilli aamma killeqarnerusumik nalunngeqatiginnissutillit allaffigai akaarinninnerusut Guutimut aalajaakkunnaartutut isigeqqunagit. (Romamiut 14:13) Paulusi ima allappoq: “Immissinnik pingaarteqinasi pisariaqartumit annerusumik.” (Romamiut 12:3) Paulusip kristumiut isumaqatigiinngitsut tamaasa siunnersoreeramigit ima allappoq: “Taamaattumik eqqissinartut ineriartorteqatigiinnerlu noqqaassutiginiartigit.” — Romamiut 14:19.

10. Ullumikkut ilagiinniittut isumaqatigiinngissuteqartut isumaqatigiinngissutertik aaqqinniarlugu susariaqarpat?

¹⁰ Qularutiginngilluinnarsinnaavarput Romami ilagiinniittut Paulusip siunnersuutaa maleruarsimassagaat. Ullumikkuttaaq ilagiinniittut ilaat isumaqatigiinngissuteqarfigigutsigu siunnersuutit Biibilimeersut maleruarusuppavut, ilaa? Taamaalilluta ajornartorsiutaasoq sunaluunniit eqqissisimasumik aaqqissinnaavarput. Romami ilagiinniittut pisimanerattut, ullumikkuttaaq isumaqatigiinngissuteqartut isiginnittaatsiminnik allannguisariaqarput ‘eqqisseqatigiittuarniarlutik’. — Markusi 9:50.

Utoqqaanertat ikiuussinnaasut

11. Utoqqaanertap qatanngummit uppeqatiminik isumaqatiginngissuteqartumit saaffigineqaruni suna eqqaamasariaqarpaa?

¹¹ Taavami qatanngutip ilaquttaminik uppeqatiminilluunniit ajornartorsiuteqarnini  pillugu utoqqaanertaq oqaloqatiginiarlugu saaffigippagu? Ussatit 21:13-imi ima allassimavoq: “Piitsut nillianerannik tusaajumanngitsoq nammineq suaartaraluaruni akineqassanngilaq.” Soorunami utoqqaanertaq ‘tusaajumassaaq’. Ussalli alla imaappoq: “Eqqartuussivimmi siulliulluni oqaluttoq ilumoortuutinneqarallartarpoq, akerlerisaatali tikiulluni qanoq ittuunera ersersissinnaasarpaa.” (Ussatit 18:17) Utoqqaanertaq tusarnaaqqissaartariaqarpoq, aalajangernaveersaartariaqarporli ajornartorsiut pillugu paasisaqarluartinnani. Tusarnaarluareeruni naammagittaalliortoq aperisinnaavaa isumaqatigiinngissuteqarfigisani oqaloqatigisimaneraa. Aamma utoqqaanertap eqqaasissinnaavaa siunnersuutinik Biibilimeersunik qatanngutinik eqqisseqateqarniarluni iliuuserineqartussanik.

12. Oqaluttuat Biibilimeersut pingasut suut ersersippaat isumaqatigiinngitsut aappaannaat tusarnaareerlugu iliuuseqajaarpallaarneq navianartoq?

¹² Oqaluttuanit Biibilimeersunit pingasunit erserpoq isumaqatigiinngitsut aappaannaat tusarnaareerlugu iliuuseqajaarpallaarneq navianartoq. Potifarip nuliani sallulluni Josefimit pinngitsaaleriaraluarneqarluni oqarmat upperaa. Kamangaarami Josefi parnaarussaatippaa. (1 Mosesi 39:19, 20) Sibap kunngi Daavi oqaluttuuppaa Mefiboshetip Daavip akerai tapersersorsimagai. Daavip Siba upperaa, oqaasiilu ilumoornersut paasiniaqqaarnagit ima oqarpoq: “Mefiboshetip pigisai tamaasa illit pigilissavatit.” (2 Samueli 16:4; 19:26-28) Kunngi Artaxerxesi paasitinneqarpoq juutit kunngimut pikitsitsiniarlutik Jerusalemip qarmarsuinik qarmaqqiisut. Kunngip eqqunngitsumik oqalunneq tamanna upperaa, peqqusillunilu juutit qarmaqqiinerat unitsinneqassasoq. Tamanna pissutigalugu naalaffiliorneq unitsinneqarpoq. (Ezra 4:11-13, 23, 24) Utoqqaanertat kristumiut Paulusip Timotheusimut tuaviorpallaarluni aalajangiisannginnissamik siunnersuutaa malikkunikku silatusaassapput. — Atuaruk 1 Timotheusi 5:21.

13, 14. (a) Isumaqatigiinngissuteqartoqaraangat suna eqqaamasariaqarparput? (b) Utoqqaanertat eqqortumik aalajangiinissaminnut suna iluaqutigisinnaavaat?

¹³ Biibilimi ima allassimavoq: “Kialuunniit sumik ilisimannissorisup suli taanna ilisimasariaqarneratut ilisimanngilaa.” (1 Korinthimiut 8:2) Immaqa isumaqarpugut isumaqatigiinngitsut isumaqatigiinngissutaat nalunagu. Eqqaamasariaqarparput pisimasumut tunngatillugu annikitsualuit tamaasa ilisimanagit. Aamma imaassinnaavoq isumaqatigiinngissuteqartut ilisarisimalluinnanngikkivut. Taamatut pisoqartillugu utoqqaanertat naliliissagaangamik mianersortariaqarput salloqittarneqaqqunatik. Aamma kinaluunniit pisuujunera piinnarlugu upperissanngilaat. Jiisusi, Guutip eqqartuussisutut toqqagaa, “eqqartuussissanngilaq isimi isigisaat najoqqutariinnarlugu, aalajangiissananilu siutimi tusagaat maliinnarlugu.” (Esaja 11:3, 4) Jiisusi Guutip anersaavanit siulersortippoq. Utoqqaanertat kristumiut aamma Guutip anersaavanit siulersortittariaqarput.

¹⁴ Utoqqaanertat naliliinnginnerminni Jehovap anersaava qinnutigisariaqarpaat. Biibilimik Biibililersaarutinillu ‘inussiamit aalajaallunilu silatuumit’ saqqummiunneqartunik atuinermikkut Guutip anersaavanit siulersorneqarsinnaapput. — Matthæusi 24:45, NV.

Guutimik eqqisseqateqartuartariaqarpugut

15. Kristumiup ingasattumik ajortuliorneq ilisimaguniuk qaqugukkut utoqqaanertat ilisimatittariaqarpai?

¹⁵ Biibilimi allassimavoq allanik eqqisseqateqartuassasugut. Aamma ima allassimavoq: “[Ilisimassuseq] pavannga pisoq pingaarnerpaamik minguitsuuvoq, tamatumalu saniatigut eqqissinermik nuannarisaqartuuvoq.” (Jaaku 3:17) Biibilimi allassimavoq pingaarnerpaamik minguitsuusariaqartugut. Minguitsuujumalluta Guutip ileqqussatigut najoqqutassiai aalajanngiusimasariaqarlugillu piumasaqaatai naapertuilluartut malittariaqarpavut. Kristumiup qatanngutimi ingasattumik ajortuliornera ilisimaguniuk taanna kajumissaartariaqarpaa ajortuliani utoqqaanertanut  nassuerutigeqqullugu. (1 Korinthimiut 6:9, 10; Jaaku 5:14-16) Unioqqutitsisoq taamaaliunngippat kristumiup ajortuliamik ilisimannittup utoqqaanertanut tamanna ilisimatitsissutigisariaqarpaa. Kristumiuli ajortuliortumik eqqisseqateqartuarumalluni utoqqaanertanut saaffiginninngikkuni aamma nammineq ajortuliussaaq. — 3 Mosesi 5:1; atuaruk Ussatit 29:24.

16. Jehup kunngimut Joramimut iliuusia qanoq ilinniarfigisinnaavarput?

¹⁶ Jehu pillugu oqaluttuamit erserpoq eqqortuliorneq ajortuliortumik eqqisseqateqartuarnermit pingaaruteqarnerusoq. Guutip Jehu aallartippaa kunngip Akabip ilaqutai pillaqqullugit. Kunngip ajortup Joramip, Akabip Jezabelillu ernerata, hestinik qimuttoqarluni Jehu naapikkamiuk ima aperivaa: “Eqqissinartumik siunertaqarlusi aggerpisi? “ Jehup ima akivaa: “Qanoq ililluta eqqissinartumik siunertaqarsinnaavugut anaanat [Jezabeli] guutipilussiornermigut allasiortuartillugu angakkuarnittuartillugulu?” (2 Kunngit 9:21, 22, 1990). Taava Jehup piseriarami Jorami uummataatigut qarsumik eqqorpaa. Jehu ingerlaannaq iliuuseqarpoq. Aamma utoqqaanertat ingerlaannaq iliuuseqartariaqarput. Ilagiinni qatanngut piaaraluni peqqissiminani ajortuliortuarpat utoqqaanertat qatanngut taanna ilagiinnut ilaajunnaarsittariaqarpaat. Taamaaliorput ilagiit Guutimik eqqisseqateqartuarsinnaaniassammata. — 1 Korinthimiut 5:1, 2, 11-13.

17. Tamatta eqqisseqatigiittuarumalluta susariaqarpugut?

¹⁷ Qatanngutit isumaqatigiinngissutaat amerlanerpaat ingasattumik ajortuliornermut tunngassuteqartanngillat. Taamaattumik qatanngutitta kukkussutaannik asannilluta isumakkeerfiginnittarnissarput pitsaanerussaaq. Guutip oqaasiani ima allassimavoq: “Unioqqutitsinermik isertuisoq ikinngutissarsiortuuvoq, oqaaserisanilli ingerlatitseqqittoq ikinngutigiinnik avissaartitsisuuvoq.” (Ussatit 17:9) Najoqqutassiat Biibilimeersut maleruarutsigit ilagiinniittunik eqqisseqateqartuarsinnaallutalu Jehovamut attaveqarluartuarsinnaavugut. — Matthæusi 6:14, 15.

Guutip eqqisseqateqartuarniartut pilluaqquai

18, 19. Eqqisseqateqartuarumalluta iliuuseqarnerput qanoq iluaqutigisinnaavarput?

¹⁸ Jehovap pilluaqqungaassavaatigut ‘eqqissinartut noqqaassutiginiarutsigit’. Jehovamut attaveqarluarnerput nuannaarutigaarput, ilagiinnilu eqqissinermik ataasiussusermillu siuarsaaqataasinnaavugut. Ilagiinniittunik eqqisseqatiginnikkaangatta “eqqissinerup iivangkiiliuanik” oqaluussiffigisatsinnik eqqisseqatiginnittuarnissaq ilinniartarparput. (Efesosimiut 6:15) Taava ‘tamanut inussiarnersuusinnaavugut, ajoqersuilluartuulluta naammaginnillutalu atukkatsinni ajortumi’. — 2 Timotheusi 2:24.

¹⁹ Ullumikkut eqqisseqateqartuarniarnerput siunissamut sungiusaataavoq. Biibilimi allassimavoq Jehovap ‘iluartut iluaatsullu’ toqusunit makitikkumaarai. (Apustilit Suliaat 24:15) Tamanna ima paasisariaqarpoq Jehovap inuit millionillit assigiinngitsunik inuttut pissuseqarlutillu periaasillit, aamma silarsuup ilaanit assigiinngitsumeersut piffissanilu assigiinngitsuni, aap, allaat ‘silarsuup tunngavilerneqarnerani’, inuusimasut makitikkumaarai. (Lukasi 11:50, 51) Taakkua eqqissinermik nuannarisaqalernissaannik ilinniartinnissaat immikkut pisinnaatitaaffiussaaq angisooq. Ullumikkut eqqisseqatigiinnissamik ilinniartinneqarnerput taamanikkussamut iluaqataangaassaaq! (w11 08/15-E)

[Quppernerup ataani ilanngussaq]

Suna ilikkarpiuk?

• Allamik ajuallatsitsisimagutta eqqisseqateqartuarumalluta sussaagut?

• Eqqunngitsuliorfigineqarutta eqqisseqateqarumalluta susinnaavugut?

• Isumaqatigiinngissuteqartoqaraangat suna eqqaamasariaqarparput?

• Sooq eqqortuliortuarneq ajortuliortumik eqqisseqateqartuarnermit pingaaruteqarnerua?

[Atuaqqissaarnermi apeqqutit]

[Qupp. 25-mi assiliartat]

Jehovap allanik isumakkeerfiginneriaannaasartut asavai