Kinarpiaq silarsuarmi aqutsisuua?

ILIMANANNGILAQ pinerlunniaqatigiit naalagaannik naapitsisimanissat. Taava imaappa piunngitsut? Pinerlunniat naalagaat kinaassutsiminnik isertuillaqqipput allaallu parnaarussivimmiit aqutsisinnaallutik. Aviisilli qulequtaanni atuarneqarsinnaasarput ikiaroornartoq pillugu akersuunnerit, atortittartuunermik inunnillu iluanaarniuteqarnerit il. il. Tamakku tamarmik ersersippaat pinerluttut naalagaat piusut taakkulu sunniutipiloqartunik kingunipiloqartunillu iliuuseqartartut. Innuttaaqatigiinni sunniuteqarnerannit taakkua piunerat uppernarsineqarpoq.

Biibilimi qulaarneqarpoq Saatani ilumut anersaajusoq kinaassusilik pinerluttut naalagaanerattut pissaanilittut piumasaminik “salluliuutaasunik nalunaaqutiliaqarluni” ‘peqquserluffiginnillunilu’ piviusunngortitsisoq. Allaat Biibilimi allassimavoq taanna ‘nammineq qaamasumut inngiliunerartoq’. (2 Thessalonikamiut 2:9, 10; 2 Korinthimiut 11:14) Saatanip piunera sunniutaanit erseqqippoq. Taamaakkaluartoq inuit amerlanerit ajortumik ersinngitsumillu kinaassusileqarnera upperiuminaatsippaat. Diaavulu pillugu Biibilimi allassimasut misissortinnagit sammeqqaariartigik isummat kukkusut inuppassuit Diaavulup kinaassusiliviuneranik akuerinninnissaminnut akornutigisaat.

▪ “Sooq Guutip asannittup Diaavulu pinngortippaa?” Biibilimi Guuti ajunngitsuullunilu asannittuusoq allassimammat kinaassusilimmik ajortumik peqqarniitsumillu pinngortitsisimasinnaaneranik eqqarsaat paasiuminaappoq. Biibilimili allassimanngilaq Guuti kinaassusilimmik taamaattumik pinngortitsisimasoq. Guutimi pillugu ima allassimavoq: “Qaarsuuvoq [Jehova], naammalluinnartuupput suliai, innarluitsuupput aqqutigisai tamarmik. Guutiuvoq aalajaatsoq, salloqittaanngisaannartoq; naapertuilluartuuvoq peqqusersuitsuullunilu.” — 5 Mosesi 32:4; Tussiaat 5:5.

Eqqarsaatigineqartariaqarpoq kinaassusilik naammalluinnartoq Guutip pinngortitaa eqqortuliunngitsoorsinnaanersoq. Guutip pinngortitani silassorissut robottitut pinngortinnagit namminneq piumasamittut iliorsinnaatippai, namminneq aalajangiisinnaatillugit. Tassa pinngortitap naammalluinnartup silassorissusillip ajunngitsuliussanerluni ajortuliussanerluniluunniit nammineq aalajangersinnaavaa. Aap, pinngortitap silassorissusillip, inuugaluaruni anersaajugaluaruniluunniit, iliuusii ileqqussat tungaatigut eqqortuusutut eqqunngitsuusutulluunniit isigineqarsinnaapput aatsaat pineqartoq piumasamisut iliorsinnaatitaappat.

Taamaattumik Guutip pinngortitani piumasamittut iliorsinnaatiitigalugit ajortuliorusuppata ajortuliornaveersaartinnavianngikkai paasinarpoq. Nammineq piumasatut iliorsinnaatitaanermik tamatuminnga atornerluineq Jiisusip eqqaavaa Diaavulu pillugu ima oqarami: ‘Sallusuissut aalajangiutinngilaa.’ (Johannesi 8:44, 1936) Oqaatsinit taakkunannga erseqqippoq anersaaq pinngortitaq Diaavulunngortoq aallaqqaammut naammalluinnartuusoq ‘sallusuissullu aalajangiusimagaa’. * Jehovap Guutip pinngortitani asagamigit tatigigamigillu piumasamittut iliorsinnaatippai.  — Takuuk qupperneq 6-imi ungalusaq “Naammalluinnartoq naammalluinnartuujunnaarsinnaava?”

▪ “Diaavulu Guutimut kiffaavoq.” Isumaqartoqarpoq tamanna Biibilimi Jobimik allakkani oqaatigineqamisaartoq, allassimavormi Saatanip ‘nunarsuaq angalaffigeqqissaaraa’. (Jobi 1:7) Biibilimullu tunngasumik oqaaseqaat naapertorlugu tamanna Persiami kilitsissiat, kunngimut kiffartorlutik angalaartarnerannut takusaminnillu kunngimut nalunaarutiginnittarnerannut pasitsassaarineruvoq. Diaavululi ilumut Guutimut kilitsissiaaguni, taava sooq Guuti oqarfigisariaqarpaa ‘nunarsuaq angalaffigeqqissaaqqammerlugu’? Jobimik allakkani Guutimut kiffartortutut allaatigineqanngilluinnarluni Saatanimik taaneqarpoq isumaqartoq “akerlilersuisoq”, taamatut paasinarsisinneqarpoq taanna Guutimut akeraasoq, aap ilumut, akeraanerpaajusoq. (Jobi 1:6) Taavami Diaavulup Guutimut kiffaaneranik eqqarsaat suminngaanneerpa?

Ukiuni hundredelinni siullerni juutit allagaataanni Biibilip atuagartaannut ilaanngitsuni Diaavulu Guutimik niueqatiginninniartartuuneragaagaluarluni Guutip piumasaanut naalatsigitittutut allaatigineqarsimavoq. Oqaluttuarisaanermik ilisimatooq J.B. Russell atuakkiamini Mephistopheles-imi allappoq naaggaartup iluarsaaqqittup Martin Lutherip Diaavulu Guutip sakkuatut, “killuutitut naasupiluiaatitulluunniit naatsiivimmi atortakkatut,” isigigaa.  Nangipporlu isumaqartoqartoq “naasupiluiaatip naasupiluiaanini nuannarigaa”, “naasupiluiaalli” taanna suli Guutip assaaniittoq piumasaanillu naammassinnittoq. Lutherip ajoqersuutaanit, kingusinnerusukkut teologip franskip Johannes Calvinip ajoqersuutigiligaanit, uppertorpassuit naapertuilluarnermik misigissusaat innarlerneqarput. Guutip asannittup qanoq ililluni ajussutsimik akuerinniinnarnani aamma taamaattoqarnissaa kissaatigisinnaavaa? (Jaaku 1:13) Ajoqersuut tamanna amiilaarnartorpassuillu 1900-kkunni pisut pissutigalugit inuppassuit Guutimik Diaavulumillu upperinnissinnaasimanngillat.

▪ “Diaavulu ajortumut assersuutaaginnarpoq.” Diaavulu ajortumut assersuutaaginnarneraraanni Biibilimi versit ilaat paasiuminaatsorujussuussapput. Assersuutigalugu Jobi 2:3-6-mi Guutip kina oqaluuppaa? Ajortumut assersuutaaginnartoq Jobimiittoq oqaluuppaa, immaqaluunniit imminut oqaluuppa? Aammami Guutip Jobip ajunngitsunik pissuseqarnera pillugu nersualaariarlugu ajortumik Jobip nammineq iluaniittumik misilinneqarnissaa akuerissagaluarpaa? Guutimik taamaattuuneraaneq taassuminnga ajorluinnartumik isiginnilersitsivoq, ‘assuarnartoqanngitsutut’ isigineqalersinnagu. (Tussiaat 92:16) Aap, Guutip Jobi ajoquserniarlugu ‘assani isatsikkusunngilaa’. Erseqqippoq Diaavulu tassaanngitsoq assersuutaaginnartoq Guutimiittoq Guutilluunniit pissusiisa ilaat nuanniitsoq. Diaavulu kinaassusiliuvoq ersinngitsoq imminut Guutimut akerlilersuisunngortittoq.

Kinarpiaq silarsuarmi aqutsisuua?

Ullumikkut inuppassuit isumaqarput Diaavulumik upperinninneq qangarnisaavallaartoq. Ullumikkulli ajussuseqarnera naammaginartumik nassuiarneqarsinnaanngilaq Diaavulup piunera nassuerutigiumanngikkaanni. Piunngitsutut nassuiarniarneqarnera pissutaalluni inuppassuit Guutimik upperinnikkunnaarsimapput ileqqussatigullu killeerussimallutik.

“Diaavulup nakutitsissutiginerpaasaa tassaavoq isumaqalersikkamisigut nammineq piunani,” taama allappoq 1800-kkunni taalliortoq franskeq Charles Baudelaire. Diaavulup piunerminik isertuussinermigut Guutip piuneranik qulalersitsivoq. Diaavulu piunngippat Guuti ajussutsimut pisuusimassaaq, ilaa? Tamannarpiaq Diaavulup kissaatiginnginnerpaa?

Pinerlunniat naalagaattut Diaavulup piumasani angujumallugu kinaassutsini isertorpaa. Suniarami? Biibilimi ima allassimavoq: ‘Silarsuup matuma guutiata uppinngitsut eqqarsaataat tappiillisippai qaamaneq iivangkiiliumit Kristusip Guutip assingata naalannassusianik nalunaaruteqartumit pisoq taakkununnga takoqqunagu.’ — 2 Korinthimiut 4:4.

Apeqqut pingaarutilik suli akineqanngilaq: Guutip ajussutsimut naalliuutinullu pisuusoq ersinngitsoq qanoq iliuuseqarfigissavaa? Tamanna allaaserisami tulliuttumi sammineqarpoq.

[Quppernerup ataani ilanngussaq]

[Qupp. 5-mi issuagaq]

Diaavulu Guutimut kiffaava imaluunniit akeraava?

[Qupp. 6-mi ungalusaq]

Naammalluinnartoq naammalluinnartuujunnaarsinnaava?

Naammalluinnassuseq Guutip pinngortitaminut silassorissusilinnut atugarititaa killeqarpoq. Adamip naammalluinnartuugaluarluni Pinngortitsisup timikkut killigititai akuerisariaqarpai. Assersuutigalugu ajoquserani issoq, sioqqat qisuilluunniit nerisinnaanngilai. Aamma nunarsuup nutsuinera sumiginnarlugu innaarsukkut pissikkuni toqussaaq ajoquserujussuarluniluunniit.

Taamatuttaaq naammalluinnartup kialuunniit — inuugaluaruni inngiliugaluaruniluunniit — Guutip ileqqussatigut killigititai unioqqutissinnaanngilai kingunerlutsitsinani. Pinngortitap silassorissusillip nammineq piumasatut iliorsinnaatitaaneq atornerlukkaangamiuk tammartitaariaannaallunilu ajortulioriaannaasarpoq. — 1 Mosesi 1:29; Matthæusi 4:4.