4 Guuti naapertuilluartuunngilaq — Ilumoorpa?

Immaqa ima tusagaqarsimavutit: “Guutip silarsuaq manna aquppaa, pisullu tamarmik taassuma piumasarai. Taamaattumik naapertuilluanngitsuliornerit, naqisimanninnerit assigiinngisitsinerillu tamaasa akisussaaffigai.”

Biibilimi ajoqersuutigineqartoq: Guuti silarsuarmi naapertuilluanngitsunut pisuunngilaq. Jehova pillugu Biibilimi ima allassimavoq: “Naammalluinnartuupput suliai, innarluitsuupput aqqutigisai tamarmik.” — 5 Mosesi 32:4.

Guuti tamanut tukkortuuvoq, aamma tukkorfigineqartariaqanngikkaluanut. Assersuutigalugu taassuma “seqerni ajortunut ajunngitsunullu nueqqusarpaa siallersitsisarlunilu iluartunut iluaatsunullu”. (Matthæusi 5:45) Inuiaqatigiinnikkut kulturikkullu kikkunnilluunniit assigiinngisitsineq ajorpoq. Apustilit Suliaat 10:34, 35-mi ima allassimavoq: ‘Guuti kinaassusersiortuunngilaq, tassaavorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq.’

Taavami naapertuilluanngitsuliornerit sumit pilerpat? Inuppassuit Guutip naapertuilluarnera ilaarnagu naapertuilluanngitsuliorniarlutik aalajangertarput. (5 Mosesi 32:5) Aamma Biibili malillugu Guutip imminut akeraasup, Diaavulup, silarsuarmut matumunnga oqartussaassuseqarnissaa akueraa. * (1 Johannesi 5:19) Aqutsinermut naapertuilluanngitsumut tamatumunnga Guutip piffissarititaa naangajalerpoq. ‘Diaavulup suliai suujunnaarsissavai’, taamaaliornissaminullu piareereerpoq. — 1 Johannesi 3:8.

Ilumoortup ilisimanera qanoq iluaqutigissagit: Peqquserlunnerpassuit, naqisimanninnerpassuit naapertuilluanngitsuliornerpassuillu naaffeqanngippasittut eqqarsaatigigaanni neriuutaarutivittoqariaannaasinnaavoq. Ajortunulli tamakkununnga pissutaasoq nalunngikkaanni nalunartanngilaq sooq pissutsit taamaannersut, aamma sooq inuit silarsuarmik pitsaanerulersitsiniarnerigalui iluatsinngitsut. (Tussiaat 146:3) Piffissaq nukillu iluaqutaanerpaaguni sivikitsuinnarmik iluaqutaasussamut atornagit siunissamut neriuut qularnaatsoq Guutip neriorsuutaanik upperinninnermik tunngaveqartoq aalajangiusimasinnaavat. — Saqqummersitat 21:3, 4.

Naapertuilluanngitsuliornernut pissutiviusup paasinera iluaqutaassaaq ingammik nammineq taamatut eqqugaagaanni. Taama eqqorneqaraangatta Guutip kiffaata Habakkukip iliorneratut Guutimut torlorsinnaavugut ima: “Inatsisit kimeerupput, naapertuilluarneq atuutinngisaannarpoq.” (Habakkuki 1:4) Guutip Habakkuki taama oqarmat naqqinnagu kiffani tuppallersarpaa uppernarsaavigalugulu pissutsinik aaqqiinissaminut piffissaleereerluni, Habakkukilu naak ajornartorsiuteqaraluartoq ikiorpaa nuannaarsinnaalersillugu. (Habakkuki 2:2-4; 3:17, 18) Taamatulli Guutip naapertuilluanngitsunik aaqqiinissamik neriorsuutaanik upperinninneq iluaqutigissavat silarsuarmi naapertuilluanngiffiusumi maani toqqissinissannut.

[Quppernerup ataani ilanngussaq]

[Issuagaq 7-mi assiliartaq]

Guuti naalliunnartunut naapertuilluanngitsunullu akisussaava?

[Suminngaanneernera 7-mi assiliartaq]

© Sven Torfinn/Panos Pictures