Jehova tassa agguagarsiara

“Israelikkut akornanni illit kingornussarsiarissavarma pissarsiaralungalu.” — 4 MOSESI 18:20.

1, 2. (a) Jehovap Israelip naggueqatigiissortai tamaasa nunaammik kingornuttaqattaagassamik tunimmagit qanoq pisoqarpa? (b) Jehovap Levikkut qanoq neriorsorpai?

ISRAELIKKUT nunap neriorsuutigisap annerpaartaa tiguareermassuk Josva, palasiuneq Eleazari naggueqatigiissortallu naalagaat nunaatinik kingornuttaqattaagassanik agguaassipput. (4 Mosesi 34:13-29) Jehovap naggueqatigiissortat nunaammik kingornuttaqattaagassamik tunivai, Levikkulli agguagarsinngillat. (Josva 14: 1-5) Sooq Levikkut nunami neriorsuutigisami agguagarsisinneqanngillat? Jehovap taakku puiorpai?

² Apeqqutinut tamakkununnga akissut Jehovap Levikkunnut oqaasiinit erserpoq. Taakku Jehovap neriorsorpai imminiiginnarniarnagit ima oqarami: “Israelikkut akornanni illit kingornussarsiarissavarma pissarsiaralungalu.” (4 Mosesi 18:20) Jehovap Levikkut nuanningaartumik neriorsorpai ima oqarami: ‘Illit pissarsiarissavarma’! Jehovap taamatut neriorsoraluarpatit qanoq misigissagaluarpit? Immaqa ima eqqarsaqqaarputit: “Ajugaqanngitsumit taamatut neriorsorneqarnissamut uanga naleqquppunga?” Immaqa aamma ima eqqarsarputit: “Ullumikkut kristumiut naammalluinnanngitsut kikkulluunniit Jehova agguagarsiarisinnaavaat?” * Apeqqutit taakku pingaaruteqarput illit asasatillu pineqarassi. Taamaattumik Jehovamik agguagarsiarinninneq qanoq paasisariaqarnersoq sammissavarput. Taava paasilissavarput ullumikkut kristumiut Jehova qanoq agguagarsiarisinnaaneraat. Aamma qanoq illit Jehova agguagarsiarisinnaanerlugu paasilissavat, qilaliarnissamik neriugisaqaraluaruit nunamiluunniit paratiisiusumi inuunissamik neriugisaqaraluaruit.

Jehovap Levikkut isumassorpai

3. Guutip Levikkut illernartumik kiffartornissaannut qanoq toqqarpai?

³ Jehovap Israelikkut Mosesip inatsisaanik tuninngikkallarmagit ilaqutariinni ittuusut ilaquttaminnut palasitut kiffartortarput. Jehovalli Israelikkunnut Inatsisit tunniukkamigit Levip naggueqatigiissortaaneersut palaseqatigiittut ikiuisussatullu toqqarpai. Qanoq toqqarneqarpat? Jehovap Egyptenimi angajulliliat toqukkamigit Israelikkunni angajulliliat imminut ‘pigisassanngortippai’. Kingusinnerusukkulli aalajangerpaa ‘Levikkut Israelikkut akornanni pigisassamisut immikkoortinniarlugit Israelikkunni erneqqaatinut taarsiullugit’. Israelikkunni angajulliliat Levikkunnit amerlanerummata angajullilianut “utertitsissutissatut” akiliutissaq akilerneqartarpoq. (4 Mosesi 3:11-13, 41, 46, 47) Taamaalillutik Levikkut Israelip  Guutianut immikkut ittumik kiffartorsinnaalerput.

4, 5. (a) Levikkut Guutimik pissarsiaqarnerat qanoq paasisariaqarpa? (b) Guutip Levikkut qanoq isumassortarpai?

⁴ Jehova Levikkunnik immikkut ittumik kiffartulersitsimmat taakkua Jehova qanoq pissarsiarissavaat? Jehovap Levikkut nunaammik kingornuttaqattaagassamik tuninagit naleqangaartumik pingaaruteqartumillu suliassippai. Taakkua ‘pissarsiassaat tassaavoq palasitut Jehovamut kiffartornissaq’. (Josva 18:7) Mosesimik allakkat sisamaanni kapitalimi 18-imi allassimasunit erserpoq nunap piinut tunngasunik isumassorneqassasut. (Atuakkit 4 Mosesi 18:19, 21, 24). Levikkut sulinerminnut akissarsiatut “Israelikkunni akileraarutit pissarsiat qulingi tamaasa” pisarpaat. Tamanna ima paasisariaqarpoq nunap inerititaasa Israelikkullu nersutaataasa amerlissutaasa qulingi pisaraat. Levikkullu tunniuttakkamik qulingi, ‘pitsaanersat’, palaseqatigiinnut tunniuttarpaat. * (4 Mosesi 18:25-29) Palasit aamma “akiliutit illernartuusut” Israelikkunnit Guutimik pallorfiginnittarfimmi taassumunnga sassaanneqartut tamaasa pisarpaat. Taamaattumik palasit Jehova tatigisinnaavaat naammattumik isumassormatik.

⁵ Mosesip inatsisai naapertorlugit Israelikkut pissarsiamik qulingi marloriarlutik akilertartussaasimagunarpaat. Ukiumoortumik nalliuttorsiornerni illernartuni ilaqutariit pissarsiamik qulingisa aappaat nerisassanut allanullu atortarpaat. (5 Mosesi 14:22-27) Pissarsialli qulingi aamma allanut iluaqutaasarput. Israelikkunnut ukiut arfineq-aappaat tassaasarpoq ukioq sabbatisiorfik. Ukiut arfineq-marluk ingerlaneranni ukiut pingasut qaangiutilerneranni ukiullu arfinillit qaangiutilerneranni Israelikkut pissarsiamik qulingi piitsunut Levikkunnullu tunniuttarpaat. Sooq Levikkut aamma tunineqartarpat? ‘Levikkut Israelimi kingornussassanik agguagarseqataasimanngimmata’. — 5 Mosesi 14:28, 29.

6. Levikkut nunamik agguagarsiaqanngikkaluarlutik sumi najugaqarpat?

⁶ Levikkut nunamik agguagarsiassaqannginnamik sumi najugaqarpat? Guutip isumassortarpai. Levikkunnut illoqarfiit 48-t ivigaqarfittaalu tunniuppai. Illoqarfiit taakkua ilaat arfinillit qimarnguffiupput. (4 Mosesi 35:6-8) Taamaattumik Levikkut Guutip illernartuutaani kiffartunnginnerminni najugassaaruttanngillat. Jehovap imminut kiffartornermik ulapputiginnittut naammangaartunik isumassortarpai. Levikkut Jehovamik pissarsiaqarnertik qanoq ersersissinnaavaat? Jehovap pisariaqartitaminnik pilersuisinnaaneranik imminnillu isumassuiumaneranik qularutiginninnginnermikkut.

7. Levikkut Jehova pissarsiariniarlugu susariaqarpat?

⁷ Inatsisini allassimanngilaq pissarsiat qulinginik tunniussinngikkaanni pillarneqaataassasoq. Israelikkulli pissarsiat qulinginik inatsit malinngikkaangassuk palasit Levikkullu eqqugaasarput. Nehemiap nalaani taamatut pisoqarpoq. Tamatuma kingunerisaanik Levikkut narsaatini sulisariaqarput, taamaattumillu kiffartornertik sumiginnarpaat. (Atuaruk Nehemia 13:10). Israelikkut Jehovap inatsisaanik aatsaat maleruaagaangata Levikkut inuussutissaqartarput. Palasillu Levikkullu Jehova tatigisariaqarpaat taassumalu imminnik isumassueriaasia qularutiginagu.

Levikkut inuttut ataasiakkaatut Jehovamik pissarsiaqartut

8. Levikkuusoq Asafi qanoruna misigisimasoq?

⁸ Levikkut naggueqatigiittut Jehova pissarsiaraat. Levikkulli ilaasa inuttut ataasiakkaatut  namminneq Guutimik ikinnguteqarnerarlutillu tatiginninnerarnermikkut Jehova ‘agguagarsiarinerarpaat’. (Upputit 3:24) Assersuutigalugu Levikkuusoq erinarsortartoq tussiaasiortorlu Biibilimi eqqartorneqarpoq. Matumani Asafitut eqqartorparput Asafip, kunngip Daavip nalaani erinarsortartunut siuttuusup, ilaqutarisimasinnaammagu. (1 Nalunaarsuutit 6:16-28) Tussiaat 73 atuarlugu paasivarput Asafip iluaatsut sinngagigai taakku iluatsilluarpasimmata. Allaat ima allappoq: “Uummatiga minguitsuutinniarsimavara asuliinnaasumik, pinngitsuutinniarlungalu assakka asattarsimallugit.” Asafip puiorsimagunarpaa Jehovap suliassiissutigisaata immikkut ittuunera. Jehovamik agguagarsiaqarsimanini pingaartinngilaa. ‘Guutip illernartuutaanut pitserluni’ paatsiveerusimaarsimavoq. — Tussiaat 73:2, 3, 12, 13, 17.

9, 10. Sooq Asafip Guuti pissarsiariuarnerarsinnaavaa?

⁹ Asafi Illernartuummiilerami Guutip isiginnittaasiatut isiginnittaaseqalerpoq. Tamatumunnga assingusumik misigisaqarnikuuit? Immaqa Jehovamut kiffartornerpit immikkut ittuunera puiorlugu pigisat suut pisinnaanerlugit eqqarsaatiginerusalerpatit. Guutilli oqaasianik atuaqqissaartarnikkut kristumiullu ataatsimiinnerinut najuuttalernikkut Jehovap isiginnittaasiatut isiginnittaaseqaleqqipputit. Asafip paasivaa iluaatsut naggataatigut qanoq pineqarumaarnerat. Guutimut kiffartornermi ajunngitsortai eqqarsaatigai. Allappoq Jehovap talerpini tigummigaa siulersorniarluni. Taamaattumik Jehovamut ima oqarsinnaavoq: “Ilinniikkuma nunamiittumik sumilluunniit kissaatigisassaqanngilanga.” (Tussiaat 73:23, 25) Taava Jehova imminut ‘pissarititaasutut’ eqqartorpaa. (Atuaruk Tussiaat 73:26). Asafip ‘timini uummatinilu suujunnaaraluarpataluunniit’ Guuti pissarsiariuarumaarpaa. Nalunngilaa Jehovap ikinngutimisut eqqaamassagaani. Aalajaallunilu kiffartornera puiorneqanngisaannassaaq. (Oqaluussisartup oqaasii 7:1) Qularnanngitsumik Asafimut tamanna tuppallersaataangaarsimassaaq! Ima erinarsorpoq: “Guuti qanillugu inuuneq tassa pilluarnartora. Qimarnguffigaara Guuti [Jehova].” — Tussiaat 73:28.

¹⁰ Asafip Guuti pissarsiarineraramiuk Levikkuusutut nunap piisigut taassumannga pilersorneqarnini kisiat eqqarsaatiginngilaa. Asafip pissarsiaa Jehovamut kiffartorneranut Ajugaqanngitsumullu ikinngutaaneranut pingaarnerpaamik tunngavoq. (Jaaku 2:21-23) Jehovamut ikinngutaajuarumalluni taanna upperiuarlugulu tatigiuartariaqarpaa. Qularutiginngilluinnartariaqarpaa naalakkuni Jehovap siunissamik pilluarnartumik akissarsisissagaani. Aamma illit qularutiginngilluinnarsinnaaavat Jehovap akissarsisissagaatit.

11. Jeremiap Jehova qanoq aperivaa, Jehovalu qanoq akiva?

¹¹ Levikkuusoq Jehovamik pissarsiarinninnerartoq alla tassaavoq pruffiiti Jeremia. Jeremiap Guuti qanoq pissarsiarineraa sammilaartigu. Anatotimi Levikkut illoqarfiata ilaanni Jerusalemip eqqaanniittumi najugaqarpoq. (Jeremia 1:1) Ilaanni Jeremia paatsiveerusimaarsimavoq: Sooq iluaatsut ingerlalluarpat, eqqortuliortulli naalliuppat? (Jeremia 12:1) Jeremiap Jerusalemimi Judamilu pisut takusani Jehovamut ‘oqaatigai’ (1900) nalunnginnamiuk naapertuilluartuusoq. Jehovap Jeremiap apeqqutaa akivaa: Aseruinissaq  pillugu siulittuummik tusarliusseqquaa, siulittuutinilu tamanna eqquutitippaa. Jehovamut naalattut aniguisinneqarput, iluaatsulli mianersoqqussut eqqumaffiginnginnamikku toqupput. — Jeremia 21:9.

12, 13. (a) Sooq Jeremia oqarpa: ‘Jehova tassa agguagarsiara’, qanorlu isiginnittaaseqarpa? (b) Sooq Israelip naggueqatigiissortai tamarmik Jeremiatut ‘utaqqisariaqarpat’?

¹² Kingusinnerusukkut Jeremiap nunani piuneerunneqartoq takugamiuk taartuinnarmiittutut misigivoq. Jeremia ‘qangarsuarli toqusimasut assigitillugit Jehovamit ineqartinneqartutut’ misigivoq. (Upputit 1:1, 16; 3:6) Jeremiap Israelikkut uteriitsut Ataataannut qilammiusumut uteqqullugit kajumissaarpai, imali ajortigisimapput Jehovap Jerusalemi Judalu aserorneqartittariaqarlugit. Eqqortulioraluarluni Jeremiap tamanna aliasuutigaa. Aliasunnermini Jeremiap Guutip nallittuinera eqqaallugu ima oqarpoq: “Ullaat tamaasa nutaavoq saammaannera.” Taava Jeremia ima oqarpoq: “[Jehova] tassa agguagarsiara.” Jehovamut pruffiititut kiffartornini immikkut pisinnaatitaaffigiuarpaa. — Atuakkit Upputit 3:22-24.

¹³ Ukiuni 70-ini Israelikkut nunaat illukuinnaallunilu inuilaajussaaq. (Jeremia 25:11) Jeremiali oqarami ‘Jehova agguagarsiaralugu’ Jehovamik tatiginnilluinnarnera erserpoq. Jehovalu tatigamiuk akuliunnissaa naammagittarluni ‘utaqqivaa’. Israelip naggueqatigiissortaasa tamarmik nunaatit kingornuttaqattaakkatik annaavaat, taamaattumillu Jeremiap isiginnittaasiatut isiginnittaaseqartariaqarput. Jehova kisiat neriuffigisinnaavaat. Ukiut 70-it qaangiuttut nunagisaminnut uterput, tassanilu Jehovamut kiffartornissamut periarfissaqalerput. — 2 Nalunaarsuutit 36:20-23.

Allat Jehova agguagarsiarisinnaavaat

14, 15. Levikkuunngitsup kia Jehova agguagarsiaraa, aamma sooq?

¹⁴ Asafi Jeremialu Levikkuupput, Levikkuinnaalli Jehovamut kiffartornermik immikkut pisinnaatitaaffeqarsinnaappat? Naamerluinnaq. Daavip inuusuttup, kingusinnerusukkut Israelimi kunnginngortup, Guuti ‘inuusut nunaanni agguagarsiamisut’ taasarpaa. (Atuakkit Tussiaat 142:1, 2, 6). Daavi taamatut tussiaasiorami illussaarsuamiinnaniluunniit illumiinngilaq. Akeqqaminit qimaalluni qaarusummiippoq. Daavi minnerpaamik marloriarluni qaarusummut qimaasariaqartarpoq — Adullamip eqqaaniittumut inoqajuitsumilu En-Gedimiittumut. Imaassinnaavoq qaarusuit taakkua arlaanni Daavip Tussiaat 142 allakkaa.

¹⁵ Qaarusuit taakkua arlaanniissimaguni Daavi kunngimit Saulimit qimaalluni tassaniissimassaaq. Saulip Daavi toqunniarpaa, taamaattumillu Daavi qaarusummut tikikkuminaatsumut qimaavoq. (1 Samueli 22:1, 4) Daavi qaarusummiitilluni kiserliorsimasinnaavoq ikinnguteqannginnami imminik illersuisinnaasunik. (Tussiaat 142:5) Taava Daavi Guutimut ikioqqulluni qinuvoq.

16, 17. (a) Sooq Daavi ikiortissaqanngitsutut misigisimasinnaava? (b) Daavip ikioqqulluni kina saaffigisinnaavaa?

¹⁶ Daavip Tussiaat 142 allakkamiuk palasiunermut Akimelekimut pisimasoq tusarsimasinnaavaa. Akimelekip Daavi Saulimit qimaasimasoq nalullugu ikiorpaa. Saulip sinngasup Akimeleki ilaqutaalu toqutsippai. (1 Samueli 22:11, 18, 19) Daavi taakkua toqunerannut pisuusutut misigisimavoq; soorlu palasi imminik ikiuisoq toqukkaa. Illit Daaviugaluaruit pisuusutut misigisimasimassagaluarpit? Sulilu Daavimut ajornerusumik, Saulip Daavi malersortuaannarpaa.

¹⁷ Akimelekip toqunerata kinguninngua pruffiiti Samueli toquvoq. Taassuma Daavi Israelimi kunnginngortussatut tanippaa. (1 Samueli 25:1)  Toqunera pissutigalugu Daavi kiserliornerusutut qimagaasutullu misigisimasinnaavoq. Nalunngilaali Jehovap ikiorumagaani. Levikkut immikkut ittumik pisinnaatitaaffeqarnerattut kiffartunngilaq, immikkulli ittumik kiffartornermut allamut taninneqarsimavoq. Guutip innuttaanut kunnginngortussaavoq. (1 Samueli 16:1, 13) Daavip uummammiugisani Jehovamut aniatittarlugillu taanna tatigiuarpaa. Aamma illit Jehova agguagarsiarisinnaavat. Illit taassumunnga kiffartornermi sapinngisat tamaat iliuuseqarninni Jehova tatigisariaqarpat.

18. Jehovamut kiffartortut allaaserisami matumani sammisatta Jehova qanoq agguagarsiarisimavaat?

¹⁸ Jehovamut kiffartortut allaaserisami matumani sammisatta Jehova qanoq agguagarsiarisimavaat? Jehovamut kiffartornermik suliassinneqarsimapput. Aamma Jehovap imminnik isumassuinera qularutiginngilaat. Levikkuusut aamma Israelip naggueqatigiissortaanut allanut ilaasut, assersuutigalugu Daavip, Guuti agguagarsiarisinnaavaat. Uagummi taakkununnga assingusumik qanoq Jehova agguagarsiarisinnaavarput? Allaaserisami tulliuttumi tamanna sammissavarput.

[Quppernerup ataani ilanngussat]

Qanoq akissavit?

• Levikkut Jehova qanoq pissarsiaraat?

• Asafip, Jeremiap Daavillu Jehova pissarsiaralugu qanoq ersersippaat?

• Illit Guuti agguagarsiariumallugu qanoq isiginnittaaseqartariaqarpit?

[Atuaqqissaarnermi apeqqutit]

[Issuagaq 11-mi assiliartaq]

Levikkut nunaammik kingornuttaqattaagassamik agguagarsisinneqanngillat. Jehovali agguagarsiaraat, imaluunniit pissarsiaraat, Jehovap immikkut ittumik suliassimmatik

[Assiliartaq 10-mi assiliartaq]

Palasit Levikkullu qanoq Jehova pissarsiaraat?

[Assiliartaq 12-mi assiliartaq]

Asafip Jehova pissarsiariuarumallugu suna iluaqutigaa?