Pinertusaarlutit arpagit

‘Angusassamut siunitsinniittumut arpannitsinni tamatumani nikallujuitta.’ — HEBRÆERIT 12:1.

1, 2. Kristumiut inuunerat apustilip Paulusip sumut assersuuppaa?

UKIUT TAMAASA silarsuarmi sumiluunniit maratonertoqartarpoq. Arpallaqqissut arpaqataasarput ajugaajumallutik. Arpaqataasulli allat amerlanersaasa naluneq ajorpaat ajugaasinnaanatik. Apuuffissaminnut apuunnissartik pingaarnerpaatiinnartarpaat.

² Biibilimi kristumiup inuunera arpannermut assersuunneqarpoq. Kristumiutut inuuniarlutik Jehovamillu ilumoorfiginnittuarniarlutik ilungersortut arpattartutut apuuffissaminnut apuukkumasutut ipput. Apustilip Paulusip itsaq Korinthimi kristumiunut allakkamini taamatut arpanneq eqqaavaa. Ima allappoq: “Nalugassiuk arpaliuttarfimmi unammisut tamarmik arpattaraluartut, ataasiinnaalli ajugaasup pisassaa pissarsiarisaraa? Arpagitsi pissarsiariniarlugu!” — 1 Korinthimiut 9:24.

3. Paulusip suna pivaa allakkami ataasiinnaap ajugaasup pisassaa pissarsiarisaraa?

³ Paulusip una pivaa kristumiu ataasiinnaq inuunermik akissarsiassamik pissarsissasoq? Soorunami naamik. Arpattartut sooq arpaqataanerat eqqartorpaa. Kristumiut Korinthimiittut nalunngilaat arpattartoq ataasiinnaq ajugaasup pisassaanik pissarsisussaagaluartoq arpaqataasut tamarmik ajugaanissartik aalajangiusimasaraat. Taamaattuminguna arpattartut tamarmik sungiusarluartartut ajugaajumallutillu sapinngisartik tamaat iliuuseqartartut. Paulusip kissaatigaa qatanngutimi kristumiut Jehovamik ilumoorfiginnittuarumallutik apuuffissaminnullu apuukkumallutik sapinngisartik tamaat iliuuseqarnissaat. Kristumiut taama iliortut tamarmik ajugaasup pisassaa, inuuneq naassaanngitsoq, pissarsiarissavaat.

4. Kristumiut arpannerat pillugu suut ilisimasariaqarpavut?

⁴ Paulusip oqaasii taakku uagutsinnut qiimmassaataapput, aammali qanoq inuunitsinnik pimoorussilluta eqqarsaatiginninnissatsinnut kajumississutigaavut. Jehovap iluarisaanik inooriaaseqarutta qilammi nunarsuarmiluunniit paratiisiusumi naassaanngitsumik inuunissarput neriuutigisinnaavarput. Kristumiutulli inuuneq aqqusinermi navianartortaqangaartumi sivisuumik arpannertut ippoq. (Matthæusi 7:13, 14) Ajoraluartumik ilaat tamaviaarussiunnaarsimapput Jehovamulluunniit kiffartorunnaarsimallutik. Inuunermut arpannermi mianersorfissat suuppat? Qanoq ilillutit mianersorsinnaavit? Apuuffissannut apuukkumallutit taamaalillutillu arpannermi ajugaajumallutit qanoq iliorsinnaavit?

Ajugaajumalluta pinertusaartariaqarpugut

5. Paulusip Hebræerit 12:1-imi suut nassuiarpai?

⁵ Paulusip kristumiut hebræeriusut Jerusalemimiittut Judæamiittullu allaffigigamigit arpanneq eqqaaqqippaa. (Atuaruk Hebræerit 12:1). Nassuiarpaa sooq kristumiut arpaqataajuartariaqartut aamma apuuffissaminnut apuukkumallutik susariaqartut. Siullermik sammissavarput Paulusip hebræerit sooq allaffigigai aamma taakku sunissaannut kajumissaarnerai. Taava allagai sumik ilinniarfigisinnaanerlugit misissussavarput.

6. Kristumiut upperisarsiornikkut siuttunit qanoq tatineqarpat?

⁶ Ukiuni hundredelinni siullerni kristumiut, ingammik Jerusalemimiittut Judæamiittullu, misilinneqangaarlutillu annikilliuuterpassuaqarput. Juutit upperisarsiornikkut siuttuinit, inunnut sunniuteqartupilussuarnit, tatineqangaarput. Ukiut 30-t tamatuma siorna upperisarsiornikkut siuttut taakkua inuit isumaqalersissimavaat Jiisusi Kristusi naalagaaffimmik akerlilersuisuusoq pinerluttuusorlu toqunneqartariaqartoq. Upperisarsiornikkut siuttut taakkua Jiisusi Kristusi toquppaat, akerlilersuiunnaannginnissartillu aalajangiusimavaat. Ukiumi 33-mi piinsip ulluata kingorna pisimasut Apustilit Suliaanni allaatigineqarput. Taakkua kristumiunik  saassusseqattaarput oqaluussiunnaartinniarsaralugit. Taamaammat inuuneq kristumiunut aalajaatsunut artornartoqaqaaq. — Apustilit Suliaat 4:1-3; 5:17, 18; 6:8-12; 7:59; 8:1, 3.

7. Suna pissutigalugu piffissaq kristumiut taakkua inuuffigisaat ajornartorsiorfiungaarpa?

⁷ Aamma kristumiut taakku juutit pissutsinik aaqqissuussaanerata naggatissaata nalliutingajalernerani inuupput. Jiisusip taakku Jerusalemip piuneerussaanissaa pillugu mianersoqquai. Tamatuma pinngitsiarnerani qanoq pisoqarnissaanik aamma inuuinnarumagunik qanorpiaq iliornissaannik paasitippai. (Atuakkit Lukasi 21: 20-22). Jiisusip ima mianersoqquai: “Mianersoritsi uummatisi malussarlersitaaqqunagit aalakoornermit [nerrersuallaarnermit, NV] imerajunnermillu inuunerullu matuma piinik isumakuluutinit, pakasarteqqunasi ullup taassuma tassanngaannaq tikiunneranit.” — Lukasi 21:34.

8. Kristumiut ilaasa suut anersaakkut siumukarunnaassutigalugillu Jehovamut attaveqarluarunnaassutigisimasinnaavaat?

⁸ Paulusip kristumiut hebræeriusut allaffigai ukiut 30-ngajaat Jiisusip taama oqarnerata kingorna. Ukiut 30-t taakkua ingerlaneranni kristumiut taakku suppat? Ajornartorsiutitik imaluunniit ulluinnarni isumakuluutitik pissutigalugit ilaat anersaakkut siumukarunnaarput Jehovamullu attaveqarluarunnaarlutik. (Hebræerit 5:11-14) Kristumiut ilaasa juutit amerlanersaasa iliornerattut iliornissaq ajornannginnerutissimagunarpaat. Eqqarsarsimasinnaapput taamaaliornissaq ajorpallaanngitsoq juutit taakku suli Guutimik upperinnimmata Mosesillu inatsisaasa amerlanersaannik maleruaammata. Aamma ilagiinniittut ilaasa uppeqatitik piumaffigisarpaat Mosesip inatsisai juutillu ileqqutoqaat malillugit inooqqullugit. Kristumiut ilaasa taakkua peqqusinerat malillugu iliorput qunugigamikkit. Paulusi qanoq allappa qatanngutini kristumiut anersaakkut eqqumajuarnissaannut arpannermilu pinertusaarnissaannut ikiorniarlugit?

9, 10. (a) Hebræerinut allakkani kapitali 10-p naanerani Paulusi qanoq kajumissaariva? (b) Sooq Paulusip itsaq Jehovamut kiffaasut uppernikkut suliaat allaatigai?

⁹ Jehovap Paulusi isumassarsisippaa kristumiunut hebræeriusunut nakussatsissutaasumik allannissaanut. Siullermik kapitalit qulinganni nassuiaavoq Mosesip inatsisai ‘ajunngitsuutit nalliuttussat tarraannarigaat’ ajortuliallu taamaallaat Jiisusip pilliutaatigut isumakkeerfigineqarsinnaasut. Kapitalip tamatuma naggataatungaani Paulusi allappoq pilliut tamanna iluaqutigissagunikku nikallujuittariaqartut, imaluunniit pinertusaartariaqartut. Ima allappoq: “[Nikallujuissuseq] atorfissaqartipparsi Guutip piumasaa iliuuserisinnaajumallugu neriorsuutigisaalu pissarsiaralugu. Qanittoralaannguanngorpormi tikiuttussap tikiuffissaa, tikiutinngitsuussanngilarlu.” — Hebræerit 10:1, 36, 37.

¹⁰ Hebræerinut allakkani kapitalit aqqarnganni Paulusip nassuiarpaa Guutimik ilumoorluni upperinninneq qanoq paasisariaqarnersoq. Tamanna erseqqissarpaa ilumoorlutik uppertut maligassiaannik allaatiginninnermigut. Kapitali 12-imi kristumiut kajumissaaqqippai ‘arpannerminni nikallujueqqullugit’, imaluunniit pinertusaaqqullugit. Sooq pinertusaarnissap eqqartoqqinnginnerani upperneq eqqartorpaa? Kristumiut taakku paasitikkusukkamigit Jehovamut ilumoorlutik uppernertik pissutigalugu pinertusaartariaqarlutillu qunusuisaartariaqartut. Misilinneqaraluarlutik annikillioraluarlutillu Jehovamik ilumoorfiginnittuarsimasut maligassiaat eqqaavaa. Taakkua maligassiaat kristumiut hebræeriusut misilinneqarnerminni pinertusaarnissaminnut iluaqutigissavaat. Jehovamut kiffaasut taakkua uppernikkut suliaat eqqaareerlugit Paulusip hebræerit ima allaffigai: “Nalunaajaasunik taama amerlatigisunik avatangerneqartugut nanertuisitsinnit tamanit ajortimillu uagutsinnik tigumminninniartumit peerniarta, angusassamullu siunitsinniittumut arpannitsinni tamatumani nikallujuilluta.” — Hebræerit 12:1.

‘Nalunaajaasut amerlasuut’

11. ‘Nalunaajaasut amerlasuut’ maligassiaannik eqqarsaatiginninnerput uagutsinnut qanoq sunniuteqarsinnaava?

¹¹ Paulusi allappoq Jehovamut kiffaasut kristumiut sioqqullugit inuusut ‘nalunaajaasuusut amerlasuut’ uagutsinnik ‘avatangiisullusooq’. Inuunertik tamaat Jehovamik ilumoorfiginnittuarsimapput, taakkualu maligassiaannit erserpoq  kristumiut pissutsini artornartupilussuugaluartuniluunniit Jehovamik ilumoorfiginnittuarsinnaasut. ‘Nalunaajaasut amerlasuut’, imaluunniit itsaq Jehovamut kiffaasut, taakku arpattartutut misilittagaqarluartutut apuuffissaminnullu apuutereersimasutut ipput. Taakkua maligassiaat kristumiut hebræerit arpaqataajuarnissaminnut apuukkumallutillu sapinngisartik tamaat iliuuseqarnissaminnut kajumississutigisussaavaat. Sapiissuseqalissutigisinnaavaat, aamma maligassiaannik eqqarsaatiginninnermikkut eqqaasarsinnaavaat ‘arpannerminni nikallujuissinnaallutik’ apuuffissaminnullu apuussinnaallutik. Uaguttaaq taakkua maligassiaat taamatut iluaqutigisinnaavavut.

12. Inuit Paulusip eqqaasaasa aalajaannerat sumik ilinniarfigisinnaavarput?

¹² Pissutsit inuit aalajaatsut Paulusip eqqaasaasa taakkua atugaat pissutsinut uagut atukkatsinnut assingupput. Assersuutigalugu Noa Jehovap taamanikkut ulersuartitsinngitsiarnerani inuuvoq. Uagullu Jehovap Saatanip silarsuaanik suujunnaarsitsingajalernerata nalaani inuuvugut. Jehovap Aaperaat Saralu peqquai angerlarsimaffitsik qimaqqullugu. Neriorsorpai inuiassuanngortikkumaarlugit imminut kiffartortussat, Aaperaakkullu Jehovap neriorsuutiminik eqqortitsinissaa utaqqivaat. Jehovap uagut kajumissaarpaatigut imminut naaggaaqqulluta. Neriorsorpaatigut taamaaliorutta ikinngutigiumaarluta akissarsisikkumaarlutalu. Mosesi nunamut neriorsuutigisamut piumalluni inoqajuitsukkut navianartukkut sivisuumik angalavoq. Uagut silarsuarmi ajortumi inuuvugut silarsuassarlu nutaaq Jehovap uagutsinnut neriorsuutigisaa toraarlugulusooq ingerlalluta. Pingaaruteqarpoq inuit aalajaatsut taakkua nukittuffiinik sanngiiffiinillu eqqarsaatiginninnissarput. Jehovamit iluarisaajumallutik iliuuserisimasaat ilinniarfigisinnaavavut kukkussutigisimasaallu iliuuserinaveersaarsinnaallutigit. — Romamiut 15:4; 1 Korinthimiut 10:11.

Apuuffissaminnut apuupput — qanoq ilillutik?

13. Noa sunik unamminiagaqarpa, peqquneqarnermisullu iliornissamut suna iluaqutigaa?

¹³ Jehovamut kiffaasut taakkua arpannermi pinertusaarnissamut apuuffissamullu apuunnissamut suna iluaqutigaat? Maluginiariakkit Paulusip Noa pillugu allagai. (Atuaruk Hebræerit 11:7). Noa ulersuarmik inunnik uumasunillu tamanik nungutitsisumik takusimanngisaannarpoq. (1 Mosesi 6:17) Siornatigut ulersuaqarsimanngisaannaraluartoq Noa eqqarsanngilaq ulersuaqarsinnaanngitsoq. Sooq? Upperigamiuk Jehovap oqarnermisut iliortuaannarnera. Noap Jehovamut naalannissaq sapernarpallaartutut isiginngilaa. Jehovap “peqqusineratorluinnaq iliorpoq”. (1 Mosesi 6:22) Noap iliuuserisassarpassui — umiarsualiornissaa, uumasunik katersuinissaa, ilaquttami uumasullu nerisassaannik peqqumaatissarsiornissaa, ulersuassaq pillugu mianersoqqusinissaa ilaquttaminillu anersaakkut nukittujuartitsinissaa — eqqarsaatigalugit Jehovap ‘peqqusineratorluinnaq iliornissaq’ Noamut imaannaajuaannarsimanngilaq. Jehovamulli upperami suliarisariaqakkani pinertusaarluni naammassisinnaavai, tamannalu nammineq ilaqutaasalu annaanneqarnerannik pilluaqqusaanerannillu kinguneqarpoq.

14. Pissutsini qanoq ittuni Aaperaat Saralu Guutimut uppernermik ersersitsippat, taakkualu maligassiaat sumik ilinniarfigisinnaavarput?

¹⁴ Paulusip Aaperaat Saralu ‘nalunaajaasunut amerlasuunut’ uagutsinnik ‘avatangiisunullusooq’ ilaanerarpai. Taakkua inuunerat allanngorpoq angerlarsimaffitsik Urimiittoq qimallugu aallaqquneqaramik. Siunissap qanoq ikkumaarnera nalugaluarlugu Jehovamut upperluarput pissutsinilu unamminiarnaraluartuniluunniit taassumunnga naalattarlutik. Aaperaat Biibilimi ‘uppertunut tamanut ataataasutut’ eqqaaneqarpoq pallorfiginninneq ilumoortoq pillugu pilliuterpassuaqarmat. (Romamiut 4:11) Paulusip Aaperaap inuunerani pisimasut pingaarnerit ilaannaat allaatigai allaffigisami Aaperaap inuunera ilisimasaqarfigilluareermassuk. Aaperaat taassumalu ilaqutai ima allaatigai: “Taaneqartut tamakku tamarmik uppersuseqarnertik pigalugu toqupput neriorsuutit suli eqquutinngitsut. Eqquunnissaat kisiat ungasianit takusinnaasimavaat ilassisimallugulu, nassuerpullu nunami takornartaallutik allamiuullutillu.” (Hebræerit 11:13) Taakkua Guutimut uppernertik  taassumunngalu attaveqarnertik arpannermi pinertusaarnissaminnut iluaqutigaat.

15. Mosesip allatut inooriaaseqalernissaminut suna kajumississutigaa?

¹⁵ Mosesi Jehovamut kiffaavoq ‘nalunaajaasunut amerlasuunut’ ilaasoq suli alla. Mosesip kunngip illussaarsua pigissaarfiusoq angerlarsimaffigisani qimappaa, ‘Guutip innuttai naallioqatigiumanerungaaramigit’. Sooq taamatut aalajangerpa? Paulusi ima allappoq: “Akissarsiassartaa isumagigamiuk [Akissarsiassap tunniunneqarnissaa qilanaaralugu utaqqiuarpaa, NV]. . . . Takussaanngitsumimmi isigisaqarlunilusooq pinertusaarpoq.” (Atuakkit Hebræerit 11:24-27). Mosesip nalunngilaa “sivikitsuinnarmik ajortimi inuulluataarnissaminngarnit” pingaaruteqarnerusoqartoq. Taassuma Guuti piviusutut isigaa, aamma nalunngilaa Guutip neriorsuutai tamarmik eqquukkumaartut. Taamaammat pissutsini unamminiarnartuni sapiillisaangaarsinnaallunilu pinertusaarsinnaasimavoq. Israelikkut Egyptenimiit nunamut neriorsuutigisamut siulersorniarlugit ilungersorpoq.

16. Qanoq ililluta nalunngilarput Mosesip nunamut neriorsuutigisamut isersinnaannginnini uniinnassutiginngikkaa?

¹⁶ Aaperaat Mosesilu Guutip imminnut neriorsuutai suli eqquutinngitsut toqupput. Israelikkut nunamut neriorsuutigisamut isinngitsiartut Guutip Mosesi ima oqarfigaa: “Nuna ungasianit isiginnaarumaarpat, isissanngilatilli nunamut tassunga Israelikkunnut tunniukkumaakkannut.” Mosesip Aronillu iseqqusaannginnerannut pissutaavoq taakkua Israelikkut pikitsitsiumatunerannik puffaatiginnillutik Guutimik ‘unneqqaserluffiginninnerat Israelikkut akornanni puilasumi Meribat-Kadeshimiittumi’. (5 Mosesi 32:51, 52) Mosesip nunamut neriorsuutigisamut isersinnaannginnini uniinnassutiginngilaa. Guutip aalajangigaa naapertuilluanngitsutut isiginngilaa. Jehovami qinnuigaa Israelikkut pilluaqqoqqullugit, naggataatigullu ima oqarpoq: “Pilluarputit Israeli! Kina ilittut ippa? Inuiaavusi [Jehovap] ajugaasartitai, tassaalluni eqqortinnaveeqqutersi ikiuutaasoq, ataqqinangaarsutsivit panarisaa.” — 5 Mosesi 33:29.

 Ilinniarfigisinnaasavut

17, 18. (a) ‘Nalunaajaasut amerlasuut’ sumik ilinniarfigisinnaavavut? (b) Allaaserisami tulliuttumi suna sammissavarput?

¹⁷ ‘Nalunaajaasunut amerlasuunut’ uagutsinnik ‘avatangiisunullusooq’ ilaasut inuunerannik misissuinitsinnit paasivarput apuuffissatsinnut apuukkumalluta Guuti taassumalu neriorsuutai upperilluinnartariaqarivut. (Hebræerit 11:6) Taamatut uppernerput massakkut inooriaatsitsinnut sunniuteqartariaqarpoq. Nalunngilarput siunissaq pitsaanerusoq Guutip uagutsinnut neriorsuutigigaa. Uagut ‘Takussaanngitsoq isigisinnaavarpullusooq’, taamaattumillu arpannermi pinertusaarsinnaavugut. — 2 Korinthimiut 5:7.

¹⁸ Kristumiutut arpanneq imaannaanngilaq. Apuuffissatsinnulli apuussinnaavugut. Allaaserisami tulliuttumi apuuffissatsinnut apuunnissamut iluaqutigisinnaasavut allat sammissavavut.

Nassuiarsinnaavigit?

• Sooq Paulusi itsaq ‘nalunaajaasut’ uppernikkut suliaannik allaatiginnippa?

• ‘Nalunaajaasut amerlasuut’ uagutsinnik ‘avatangiisullusooq’ maligassiaat arpannermi pinertusaarnissamut qanoq iluaqutigissavavut?

• Noap, Aaperaap, Sarap Mosesillu maligassiaat sumik ilinniarfigaagit?

[Atuaqqissaarnermi apeqqutit]

[Assiliartaq 22-mi assiliartaq]

Aaperaat Saralu Urimi ilorrisimaarnartut qimannissaannut piumassuseqarput