Salluliorfigitinnikuuit?

TATIGISAMIT salluliorfigitinneq annernarnerpaat ilagaat. Nikanarsagaasutut mittatigineqartutullu misigisinnaavutit kamassinnaallutillu. Salluliuutit ikinngutigiinneq aappariinnerlu aserortarpaat. Aamma salluliuutit koruunit millionilippassuit peqquserluutigineqartarnerannut pissutaapput.

Taava takorlooruk qanoq misigissanerlutit Guuti pillugu ilinniarsimasavit salluliuutaanerat paasilerukku. Upperluartuuguit tamanna tupannarsinnaavoq. Naalagiartartut uku taama misigipput:

● “Oqaluffimmit salloqittarneqarsimavunga.” — DEANNE.

● “Kamaammeqaanga. Soorlu tassa nakutitaasimallunga — sunaaffa neriuutigisakka siunertarisakkalu tamarmik asuliinnaasut.” — LUIS.

Guuti pillugu kukkusumik ilinniartinneqarsimanissat immaqa takorlooruminaatsippat. Immaqa tatigisappit, piaaraluni ilinnik ajoquseerusunngitsup — assersuutigalugu angajoqqaappit, palasip qanimulluunniit ikinngutippit — paasissutissippaatit. Immaqa ajoqersuut aalajangersimasoq inuunerit naallugu upperisimavat. Isuma inuppassuarnit upperineqaraluaruniluunniit eqqortuusariaqanngilaq. Taama isumaqarpoq Franklin D. Roosevelt, USA-mi præsidentiusimasoq, ima oqarami: “Salluliuut uteqattaarneqaraluaruniluunniit eqqortunngornavianngilaq.”

Salluliorfigineqarsimanerlutit qanoq paasisinnaaviuk? Ilaanni Jiisusi Guutimut qinunermini ima oqarpoq: “Oqaatsitit sallusuissutaapput.” (Johannesi 17:17) Aap, Guutip oqaasia, Biibili, ilumoortup salluliuutinit immikkoortinnissaanut pisariaqartumik imaqarpoq.

Guuti pillugu salluliuutit tallimat Biibilimi qulaarneqartut misissoriartigik. Paasissavat sallusuissutip inuunerit allanngortissinnaagaa pitsaanerulersillugu.