‘Aliasuttut tamaasa tuppallersarsigit’

‘Jehovap aallartippaanga aliasuttut tamaasa tuppallersaqqullugit.’ — ESAJA 61:1, 2.

1. Jiisusip aliasuttut qanoq pivai, aamma sooq?

JIISUSI KRISTUSI ima oqarpoq: “Uanga nerisassara tassaavoq aallartitsisima piumasaa malillugu iliornissaq suliassarititaatalu naammassinissaa.” (Johannesi 4:34) Suliassaminik Guutimeersumik naammassinninniarnermini Ataatami inunnik asannissuseqarneratut Jiisusip inuit asannittuliorfigisarpai. (1 Johannesi 4:7-10) Apustilip Paulusip Jehovap asannittuliorfiginneriaasiisa ilaat eqqartoramiuk ‘Guutitut tuppallersaajuartutut’ eqqartorpaa. (2 Korinthimiut 1:3) Jiisusi nunarsuarmi kiffartornermini taamatut asannittuliortarpoq, Esajap siulittuineratut. (Atuakkit Esaja 61:1, 2). Esajap siulittuutaa imminut tunnganerarpaa. (Lukasi 4: 16-21) Kiffartornermini aliasuttut tuppallersartarpai qiimmassartarlugillu qamuuna eqqissisillugit.

2, 3. Sooq Jiisusip ajoqersugai aliasuttunik tuppallersaasariaqarpat?

² Jiisusip ajoqersugai tamarmik aliasuttunik tuppallersaasariaqarput. (1 Korinthimiut 11:1) Paulusi ima oqarpoq: “Tuppallersaqatigiigitsi ineriartorteqatigiigitsilu.” (1 Thessalonikamiut 5:11) ‘Ulluni atugarliungaarfiusuni’ inuugatta inuit tuppallersarneqarnissartik pisariaqartippaat.  (2 Timotheusi 3:1) Nunarsuaq tamakkerlugu inuit eqqortuliorusuttut inuit amerliartuinnartut oqaatsimikkut iliuutsimikkullu naalliutsitsisartut aliasutsitsisartullu akornanniittariaqarput.

³ Biibilimi siulittuummi allassimasutut pissutsit aaqqissuussaanerata ajortup matuma ulluini kingullerni makkunani inuppassuit ‘namminissarsiortuupput, aningaaserituujupput, usorsitsaartuupput, anneruniartuupput, asissuingaartuupput, angajoqqaaminnut naalanngitsuupput, qujasuitsuupput, mitalliisuupput, asanniuitsuupput, saammartitassaanngitsuupput, mamarliisuupput, naammatsiuitsuupput, qiningasuupput, ajunngitsunut akeraapput, killuussisuupput, puffajasuupput, makitaniartuupput, inuulluarniutit Guutimit pingaarnerutillugit.’ Biibilimilu allassimasutorluinnaq inuit ajortut eqqarsartaatsimikkut iliuutsimikkullu ‘ajortumut nakkaakkiartuinnarput’. — 2 Timotheusi 3:2-4, 13.

4. Nalitsinni nunarsuarmi pissutsit qanoq ippat?

⁴ Tamanna tupigisuutiginngilarput, Guutimmi oqaasiani allassimavoq ‘silarsuaq tamarmi Ajortumut naalatsigitittoq’. (1 Johannesi 5:19) ‘Silarsuaq tamarmi’ tassaavoq silarsuarmi politikkikkut, upperisarsiornikkut niuernikkullu aaqqissuussinerit Saatanillu isummaminik siammarterinermini atortagai. Qularutissaanngilaq Saatani tassaasoq “silarsuup naalagaanera” aamma ‘silarsuup matuma guutia’. (Johannesi 14:30; 2 Korinthimiut 4:4) Maanna Saatani kamattorsuummat nunarsuarmi pissutsit ajorsigaluttuinnarput. Taassuma nalunngilaa piffissakilluni. (Saqqummersitat 12:12) Tuppallernaqaaq nalunagu Guutip Saatani taassumalu silarsuaa ajortoq qanittukkut suujunnaarsikkumaarai Jehovallu qilammi nunamilu kisimi oqartussaanera akerleriissutaajunnaassasoq! — Mosesimik allakkat siulliit kapitali 3; Jobimik allakkat kapitali 2.

Nutaarsiassaq nuannersoq nunarsuarmi tamarmi oqaluussissutigineqartoq

5. Oqaluussinissaq pillugu siulittuut ulluni kingullerni makkunani qanoq eqquuppa?

⁵ Jiisusi ima siulittuivoq: “[Naalagaaffimmik] iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.” (Matthæusi 24:14) Jiisusip oqarneratut Jehovap innuttaasa nunarsuaq tamakkerlugu Guutip naalagaaffia pillugu nutaarsiassaq nuannersoq oqaluussissutigaat. Ullumikkut Jehovap Nalunaajaasui 7,5 millioninit amerlanerusut ilagiinni 107.000-init amerlanerusuniittut Jiisusi ilaarlugu oqaluussisarlutillu ilinniartitsisarput. (Matthæusi 4:17) Taamaaliornermikkut aliasuutilippassuarnik tuppallersaasarput. Siornaak siornalu 570.601-it Jehovamut Nalunaajaasunngorlutik kuisipput.

6. Oqaluussinitsinni siaruarterinerput qanoq isumaqarfigaajuk?

⁶ Maanna Jehovap Nalunaajaasui atuagassianik atuakkanillu Biibililersaarutinik oqaatsinut 500-nit amerlanerusunut  nutserisarlutillu agguaasarput. Siornatigut oqaatsinut taama amerlatigisunut taamatut nutserisoqarsimanngisaannarlunilu siaruarterisoqarsimanngisaannarpoq! Jehovap innuttai silarsuarmi Saatanimit naalakkersorneqartumi najugaqaraluarlutik Jehovamut kiffartornerminni aallussilluarlutillu amerliartuinnarput. Guutip anersaava illernartoq ikiuisimanngitsuuppat siulersuisimanngitsuuppallu taama iliortoqarsimasinnaassanngikkaluarpoq. Nutaarsiassaq nuannersoq nunarsuarmi tamarmi oqaluussissutigineqarmat Guutip naalagaaffianik tusarliussamik nuannarinnittut Jehovap innuttaasa tuppallersarneqarnerattut tuppallersarneqarsinnaapput.

Uppeqatitsinnit tuppallersarneqarsinnaavugut

7. (a) Sooq naatsorsuutigisinnaanngilarput Guutip aliasuutitsinnut pissutaasut tamaasa maanna piissagai? (b) Sooq malersugaanitsinni annikilliuuteqarnitsinnilu nikallujuitsuunissarput qularutiginngilluinnarparput?

⁷ Silarsuarmi ajortoqaqisumi inuugatta tamatta arlaatigut naalliuuteqartarpugut. Naatsorsuutigisinnaanngilarput Guutip aliasuutitsinnut pissutaasut maannakkorpiaq piissagai, pissutsit aaqqissuussaanerannik matuminnga aseruinissaa utaqqisariaqaratsigu. Utaqqinitsinni malersorneqarnermi Jehovamut aalajaannerlutalu taassuma kisimi oqartussaaneranik tapersersuinersugut paasineqassaaq. (2 Timotheusi 3:12) Qinugineqarnitsinnili annikilliuuteqarnitsinnilu Ataatatsinnit qilammiusumit ikiorneqartarlutalu tuppallersarneqartaratta itsaq kristumiut tanitat Thessalonikamiittut pisimanerattut ‘nikallujuissinnaallutalu uppersuseqarsinnaavugut’. — Atuakkit 2 Thessalonikamiut 1:3-5.

8. Jehovap kiffaminik tuppallersaasarnera Biibilimi qanoq ersersinneqarpa?

⁸ Jehovap kiffami pisariaqartitaannik tuppallersaasarnera qularnanngivippoq. Assersuuteqariarta. Elia dronningimit Jezabelimit ajortumit toqunniarneqarami annilaangalerluni qimaavoq. Allaat toquinnarusulernerarpoq. Jehovalli Elia assuarinagu tuppallersarlugulu sapiissuseqalersippaa pruffiititut suliani ingerlatiinnarniassammagu. (Kunnginik allakkat siulliit kapitali 19) Jehovap innuttaminik tuppallersaasarneranut assersuutissaq alla apustilit nalaanni ilagiinnik ikiuineranut tunngavoq. Biibilimi allassimavoq ‘ilagiit Judæami tamarmi Galilæamilu Samariamilu eqqissisimalerlutillu ineriartortinneqartut’. Aamma Jehova ‘mianeralugu inuusut Anersaallu Illernartup oqaaqqissaarineratigut [tuppallersaaneratigut, NV] amerliartortut.’ (Apustilit Suliaat 9:31) Uaguttaaq anersaamit illernartumit tuppallersarneqarnerput qujamasuutigingaarparput!

9. Sooq Jiisusi pillugu ilinniartarnerput tuppallersaatigisarparput?

⁹ Kristumiuugatta Jiisusi Kristusi pillugu ilinniartarnerput taassumalu maligassiaanik malinninnerput tuppallersaatigisarparput. Jiisusi ima oqarpoq: “Ornissinga tamassi suleruluttusi nanertugaasusilu, qasuertissavassi. Nammaatara ilissinnut pisissiuk, ilinniarfigisingalu qanilaarama uummatikkullu makitajuikkama; taava qasuerfissarsiumaarpusi tarnissinnut. Nammaatarami iluaqaaq, nammakkiussaralu oqeqaluni.” (Matthæusi 11:28-30) Nanertuutigisaqartilluta Jiisusip allanik inussiarnisaarfiginnittarneranik asannittuliorfiginnittarneranillu ilinniarnerput taassuminngalu ilaarsisarnerput oqiliallaatigisinnaavarput.

10, 11. Ilagiinniittut kikkut tuppallersaasinnaappat?

¹⁰ Aamma ilagiinniittunit tuppallersarneqarsinnaavugut. Assersuutigalugu eqqarsaatigeriaruk utoqqaanertat uppernermikkut sanngiillisimasunik ikiuisarnerat. Jaaku ima allappoq: ‘Akornassinni [anersaakkut] napparsimasoqaruni taassuma ilagiit utoqqaanertaat qaaqqussavai, taakkualu qinnutissavaat.’ Taakkualu ikiuinerat qanoq kinguneqarpa? “Uppernikkut qinnutaasup napparsimasoq annaatissavaa, [Jehovallu] ajorunnaarsissavaa; ajortulisimagunilu isumakkeerfigineqassaaq.” (Jaaku 5:14, 15) Utoqqaanertaannaanngitsulli ilagiinniittunik tuppallersaasinnaapput.

¹¹ Arnat ajornartorsiutitik pillugit arnaqatiminnik oqaloqateqarnissartik ajornannginnerutittarpaat.  Ingammik qatanngutit arnat utoqqaanerusut misilittagaqarnerusullu qatanngutinut arnanut inuusunnerusunut iluaqutaasunik siunnersuisinnaapput. Arnat utoqqaanerusut kristumiut taakku arnat inuusunnerusut ajornartorsiutaannut assingusunik namminneq ajornartorsiuteqarsimasinnaapput. Qatanngutit arnat utoqqaanerusut tusarnaartarnermikkut isumassuisarnermikkullu qatanngutinut arnanut inuusunnerusunut iluaqutaangaarsinnaapput. (Atuakkit Titusi 2: 3-5). Aap, ilagiinniittut tamarmik, utoqqaanertat allallu, ‘ernumasunik’ tuppallersaasinnaallutillu tuppallersaasariaqarput. (1 Thessalonikamiut 5:14, 15) Aamma eqqaamassallugu pitsaassaaq Guuti “annikilliuuteqarnitsinni tamani uatsinnik tuppallersaasartoq annikilliuuteqartut tamaasa uatsinnut tuppallersarsinnaaqqullugit.” — 2 Korinthimiut 1:4.

12. Sooq ataatsimiinnerni najuuttarneq pingaaruteqarpa?

¹² Tuppallersarneqarfigisagarput pingaaruteqarluinnartoq tassaavoq kristumiut ataatsimiinnerinut najuuttarneq. Ataatsimiinnerni eqqartorneqartut Biibilimik tunngavillit qiimmassaatigisarpavut. Biibilimi allassimavoq Judasip Silasillu ‘qatanngutigiit oqaatsinik amerlasuunik kajumissaaraat nakussatsillugillu’. (Apustilit Suliaat 15:32, 1936) Ataatsimiinnerit aallartinnginneranni kingornalu ineriartornartunik oqaloqatigiissuteqartarnitsigut kajumissaaqatigiittarpugut. Taamaattumik annikilliuuteqaraluarluta uppeqatitsinnik peqateqartarnerput iluaqutigissavarput. Kisimiikkaannimi pissutsit ajorneruliinnartarput. (Ussatit 18:1) Aap, silatusaarnerungaassaagut apustilip Paulusip oqaasii uku malikkutsigit: “Immitsinnut isumageqatigiinniarta asaqatigiinnermut ajunngitsuliornermullu kajumissaaqatigiittarluta, ilagiittut katisimasarnivut tamatigut peqataanngitsoorfigisarnatigit, soorlu ilaat taama ileqqoqartut, oqaaqqissaaqatigiittarniartali taamaaliornissaq suli pisariaqarnerulermat nalunnginnassiuk ullussaq qanillisoq.” — Hebræerit 10:24, 25.

Biibili tuppallersaatigaarput

13, 14. Allakkat qanoq tuppallersaatigisinnaavavut?

¹³ Kristumiuugaluarutta kuisimasut aatsaalluunniit Guuti taassumalu siunertai pillugit ilinnialeqqaajugaluarutta Biibili tuppallersaatigingaarsinnaavarput. Paulusi ima allappoq: “[Siornatigut] allagaasut tamarmik allassimapput uatsinnut ilinniutissaallutik, nikallujuilluta Allakkallu tunissutaat tuppallersaatigalugit neriuuterput aalajangiussinnaaqqullugu.” (Romamiut 15:4) Biibili tuppallersaatigalugulu iluaqutigisinnaavarput ‘inerilluinnarnissamut ajunngitsuliornernullu tamanut piginnaanngorsagaanissamut’. (2 Timotheusi 3:16, 17) Biibilimik aamma atuagassiaatitsinnik atuagaatitsinnillu Biibililersaarutinik atuartarnitsigut atuaqqissaartarnitsigullu Guutip siunertai pillugit ilumoortunik ilisimasaqalersinnaallutalu siunissamut piviusumik neriuuteqalersinnaavugut. Atuartarutta  atuaqqissaartaruttalu neriuut Biibilimeersoq assigiinngitsorpassuartigut tuppallersaatigisinnaallugulu iluaqutigisinnaavarput.

¹⁴ Jiisusi Allakkat tunngavigalugit ilinniartitsisarnermigut tuppallersaasarnermigullu maligassaalluarpoq. Toqusunit makititaanermi kingorna ajoqersukkaminut marlunnut saqqummerami Allakkanik nassuiaappai, tamannalu tuppallersaatigingaarsimassavaat. (Lukasi 24:32) Apustilip Paulusip Jiisusip maligassiuilluarnera ilaarlugu Allakkat najoqqutaralugit inuit oqaloqatigisarpai. Berøamiut Paulusimut tusarnaartut “oqaaseq kajumeqalutik ilassivaat, ullullu tamaasa Allakkat misissuiffigisarpaat”. (Apustilit Suliaat 17:2, 10, 11) Taamaammat pingaaruteqartupilussuuvoq ullut tamaasa Biibilimik Biibililersaarutinillu atuartarnissarput, iluaqutigisinnaaniassagatsigit! Taakkumi ullutsinni ajornartorsiorfiusuni uagutsinnut tuppallersaataallutillu neriuuteqalersitsipput.

Tuppallersaanissamut periarfissat allat

15, 16. Qatanngutivut ikiorniarlugit tuppallersarniarlugillu iliuuserisinnaasatta ilaat suuppat?

¹⁵ Qatanngutitsinnik ikiuinissamut tuppallersaanissamullu periarfissarpassuaqarpugut. Assersuutigalugu utoqqaat napparsimasulluunniit pisiniussinnaavavut, illumiluunniit suliassanik ikiorsinnaavavut. Taamaaliornitsigut ersersissavarput soqutigalugit. (Filippimiut 2:4) Qatanngutivut nersualaarsinnaavavut pisinnaasaat pissusiilu ajunngitsut, soorlu asanninnerat, sapiissusiat uppernerallu, pillugit.

¹⁶ Utoqqaat tuppallersarniarlugit iliuuserisinnaasatta ilagaat taakkununnga pulaarneq Jehovamullu kiffartornerminni misigisimasaminnik pilluaqquneqarnerminnillu oqaluttuarneranni tusarnaarneq. Tamannalu uagutsinnut qiimmassaataallunilu tuppallersaataassaaq! Pulaakkavut Biibilimik aamma atuagassiaatitsinnik atuagaatitsinnillu Biibililersaarutinik atuaqatigisinnaavavut, soorlu sapaatip-akunnerani Napasuliaq Alapernaarsuiffik-mi atuaqatigiissutissamik imaluunniit Ilagiit Biibilimik atuaqqissaaqatigiissutissaannik. Dvd-utittaluunniit ilaannik isiginnaaqatigisinnaavavut. Atuagassiaatitsinniluunniit misigisalikkersaarutinik nuannersunik atuffallugilluunniit oqaluttuussinnaavavut.

17, 18. Sooq qularutiginngilluinnarsinnaavarput Jehovap kiffani imminik ilumoorfiginnittut ikiorlugillu tuppallersassagai?

¹⁷ Nalunngikkutsigu qatanngutitta ilaat tuppallersarneqartariaqartoq qinnutissavarput. (Romamiut 15:30; Kolossemiut 4:12) Nammineq ajornartorsiuteqarnitsinni allanillu tuppallersaaniarnitsinni Daavip tatiginninneratut tatiginnissinnaavugut: “Nanertuutigisat [Jehovamut] tunniuguk, taava isumagiumaarpaatit. Iluartoq patajatinngisaannassavaa.” (Tussiaat 55:23) Jehovap tuppallersartuassallutalu ikiortuassavaatigut. Kiffani imminik ilumoorfiginnittut pakatsisinngisaannassavai.

¹⁸ Guutip itsaq pallorfiginnitsini ima oqarfigai: ‘Uanga, uangaana ilissinnik tuppallersaasoq.’ (Esaja 51:12, 1900) Jehovap uagut aamma taamatut tuppallersassavaatigut allanillu tuppallersaaniarnitsinni pilluaqqussalluta. Qilaliarnissamik nunamiluunniit inuunissamik neriuuteqaraluarutta tamatta Paulusip kristumiunut tanitanut nalimini inuusunut oqaasii uku tuppallersaatigisinnaavavut: “Naalakkatta Jiisusi-Kristusip Guutillu Ataatatta uatsinnik asannittup saammaannerminillu tuppallersaatissamik soraajuitsumik neriunnermillu ajunngitsumik uatsinnut tunniussisup uummatisi tuppallersarligit nakussatsillusilu suliasi oqaatsisilu tamarmik ajunngitsooqqullugit!” — 2 Thessalonikamiut 2:16, 17.  (w11 10/15-E)

Eqqaamavigit?

• Oqaluussinerput qanoq siammarsimatigaa?

• Allat tuppallersarniarlugit iliuuserisinnaasatta ilaat suuppat?

• Jehovap innuttaminik tuppallersaasarnera Biibilimi qanoq ersersinneqarpa?

[Atuaqqissaarnermi apeqqutit]

[Qupp. 29-mi assiliartaq]

Aliasuttunik tuppallersaasarpit?

[Qupp. 31-mi assiliartaq]

Utoqqaat inuusuttullu qiimmassaasinnaapput