Pingaaruteqarpa ilisimasaqarnissaq Biibilimi qanoq allassimasoqarneranik?

“Qulinik ukioqarlunga peeraqartalerpunga. Aallaqqaammut tasiortarpugut kunissuuttarlutalu. Sivitsorianngitsorli attuualaaqatigiittalerpugut atoqatigiinnermillu misiligaalaartalerluta. 15-inik ukioqarlunga sulisalerama suliffinni angutinit, uannik atoqatiginnikkusuttunit, qaninniarneqartalerpunga. Suleqatinnit ajornerorusunngilanga. Ikinngutinnit akuerineqarusukkama atoqatigiinnerup tungaatigut inuunerlukkiartuinnavippunga” — SARAH, * AUSTRALIA.

SARAH uppertunik angajoqqaaqarluni peroriartorpoq. Angajoqqaavisa ileqqussatigut najoqqutassat Biibilimiittut naapertorlugit perorsarniarsimavaat. Kisianni Sarah-p aqqut alla qinerpaa.

Inuppassuit Sarah taamatut qinersimmat isumaqatigissavaat. Taakkua oqassapput Biibilimi atoqatigiinneq pillugu allassimasut itsangavallaartut. Allat uppertuujutigaluni atoqatigiinnerup tungaatigut piumasaarsorluni inuuneq ajoquteqarsorinngilaat.

Pingaaruteqarpa Biibilimi atoqatigiinnerup qanoq eqqartorneqarneranik ilisimasaqarnissat, tamannalu malillugu inuunissat? Biibili imminut ima allaaseraaq: “Allakkat Guutimit anersaarfigineqartut tamarmik iluaqutaapput ajoqersuinermut.” (2 Timotheusi 3:16) Upperigukku Guutip inuit uagut pinngortissimagaatigut aamma Biibili taassuma uatsinnut oqaaserigaa, taava pingaaruteqarpoq Biibilimi atoqatigiinneq pillugu qanoq allassimasoqarneranik ilisimasaqarnissat.

Ajoraluartumik Biibilimi atoqatigiinneq pillugu qanoq allassimasoqarnera paatsuungassutaasorujussuuvoq. Upperisarsiornikkut siuttuusut tamarmik immikkut Biibilimik ataqqinninnerartut isummanik assigiinngitsorujussuarnik saqqummiussisarput. Tamanna oqaluffippassuarni angisuuni avissaartuutaavoq.

Inuit allat oqaasiinik tatiginninnissamut taarsiullugu kajumissaarusuppatsigit nammineerlutit minutsialuit atorlugit tamatuminnga misissueqqullutit. Allaaserisami tulliuttumi sammineqassapput Biibilimi atoqatigiinnermut isiginnittaaserineqartoq pillugu apeqqutigineqarnerpaasartut qulit. Biibilimi sorpiaat ajoqersuutigineqarnerat tunngavigalugu akissutit erseqqissut takusinnaassavatit. Allaaserisami kingullermi takutinneqassaaq qinersinitta pingaaruteqassusia.

[Quppernerup ataani ilanngussaq]