Akisussaaffeqarusulersinnaaqqullugit ikiukkit

“Kinaluunniit ilinniarnermini inersimasoq ajoqersortimisut issaaq.” — LUKASI 6:40.

1. Jiisusi kiffartornermini ilagiinnik qanoq tunngaviliiva?

JOHANNESIP Jiisusi pillugu iivangkiiliuni naggaseramiuk ima allappoq: “Jiisusi aamma allarpassuarnik naammassisaqarpoq; ataasiakkaat tamaasa allaatigissagaluaraanni isumaqarpunga mappersakkat allanneqartussat silarsuarmi tamarmi inissaqarnavianngikkaluartut.” (Johannesi 21:25) Jiisusi sivikitsumik nunamiinnermini eqiasuilluni oqaluussivoq. Angutinik ilinniartitassarsiortariaqarpoq qilaliaruni suliaminik suliaqartuartussanik. Ukiumi 33-mi ikittuinnaat ilinniartissimavai, taakkuli amerliartupallapput ilagiinngorlutik tusindilikkuutaanik oqaluussisartullit. — Apustilit Suliaat 2:41, 42; 4:4; 6:7.

2, 3. (a) Sooq ilagiinni qatanngutit angutit kiffartorusuttut pisariaqartinneqarpat? (b) Allaaserisami matumani suut sammissavavut?

² Ullumikkut silarsuaq tamakkerlugu 7 millioninit amerlanerusunik ilagiinni 100.000-init amerlanerusuniittunik oqaluussisartoqarpoq nutaarsiassamik nuannersumik oqaluussissutiginnittunik. Taamaattumik ilagiinni qatanngutinik angutinik siulersuisinnaasunik, soorlu utoqqaanertanik, assut pisariaqartitsisoqarpoq. Tamannami qatanngutinut angutinut akisussaaffeqarusuttunut, tassa ilagiinniittut allat kiffartuunniarlugit iliuuseqarnerorusuttunut, ‘suliassaavoq kajungernartoq pingaaruteqartorujussuaq’. — 1 Timotheusi 3:1.

 ³ Qatanngut angut ilagiinni akisussaaffeqalernissamut piukkunnarsiumalluni iliuuseqaqqaartariaqarpoq. Akisussaaffeqalernissamulli ilinniagaqarsimaneq, inuunermi misilittagaqarneq piginnaasaqarnerlu piareersaataanngillat. Qatanngutinut angutinut ilagiinni kiffartortussanut najoqqutassianik Biibilimiittunik eqqortitsisariaqarpoq. Qatanngutit angutit sallusuissummi siumukarsinnaaqqullugit akisussaaffeqalernissamullu piukkunnarsarsinnaaqqullugit qanoq ikiorneqarsinnaappat? Jiisusi ima oqarpoq: “Kinaluunniit ilinniarnermini inersimasoq ajoqersortimisut issaaq.” (Lukasi 6:40) Allaaserisami matumani Jiisusip ajoqersukkani qanoq ilinniartinnerai aamma ilinniartitsinermini periaasii qanoq ilinniarfigisinnaanerivut sammissavavut.

“Ikinngutinik taavassi”

4. Jiisusi ajoqersukkaminut qanoq ikinngutaava ilumoortoq?

⁴ Jiisusi ajoqersukkaminit pitsaanerusutut imminut isiginngilaq. Ikinngutigaami aamma tatigai ilagalugillu nuannaraa. Ima oqarfigai: “Ataatannit tusarsimasakka tamaasa ilissinnut [ilisimalersippakka].” (Atuaruk Johannesi 15:15). Takorlooriaruk ajoqersukkat Jiisusi taassuma najuunnissaanut pissutsillu aaqqissuussaanerata naggataatungaanut suna nalunaaqutaassanersoq aperigamikku Jiisusip akimmatik qanoq nuannaartigisimassasut. (Matthæusi 24:3, 4) Aamma Jiisusip eqqarsaatini misigissutsinilu taakkununnga paasiterusuttarpai. Assersuutigalugu unnuami tigusarineqarfissamini Jiisusip Petrusi, Jaaku Johannesilu Naatsiivimmut Getsemanemukaqatigai. Tassanilu Ataataminut qamannga pisumik qinuvoq. Imaassinnaavoq apustilit pingasut Jiisusi qanoq qinunersoq tusaasimanngikkaat, nalunngilaalli annilaangasorujussuusoq. (Markusi 14:33-38) Aamma siusinnerusukkut Jiisusip nakussatsippai qaqqami naalannarsisitaanerminik takunnittuutillugit. (Markusi 9:2-8; 2 Petrusi 1:16-18) Ajoqersukkat Jiisusimik qanittumik ikinnguteqarnertik akisussaaffinnik annerusunik nakkutiginnissinnaanissaminnut nakussatsissutigaat.

5. Utoqqaanertat qanoq ikiuisarpat?

⁵ Jiisusip pisimaneratut ullumikkut utoqqaanertat qatanngutitik ikinngutigilertarlugillu ikiortarpaat. Asagamikkit ilumoorlutik soqutigisarpaat. Utoqqaanertat allanut oqaatigeqqusaanngitsut oqaatiginnginnissaata pingaaruteqarnera nalunngilaat. Ilikkakkatilli Biibilimeersut qatanngutiminnut eqqartortarpaat. Qatanngutitik tatigaat. Utoqqaanertat ilagiinni kiffartortunit inuusunnerusunit pingaarnerusutut imminnut isiginngisaannarput. Nalunngilaat ilagiinni kiffartortut inuusuttut sallusuissummi siumukartut siumukartuarsinnaasullu. Aamma nalunngilaat angutit inuusuttut taakkua Jehova asagaat ilagiinnillu isumassuiniarlutik kiffartoqatigigaatik.

“Maligassippassi”

6, 7. Jiisusi ajoqersukkaminut qanoq maligassaalluarpa, tamannalu taakkua qanoq iluaqutigaat?

⁶ Jiisusip ajoqersugai Guutip oqaasianik nuannarinnikkaluarput, eqqarsartaasialli peroriartornerannit inooriaaserisimasaannillu sunnerneqarsimasarpoq. (Matthæusi 19:9, 10; Lukasi 9:46-48; Johannesi 4:27) Jiisusilli isornartorsiunngisaannarlugillu kamaatinngisaannarpai. Ingasattumik piumaffiginngisaannarlugillu nammineq iliuuserinianngisaminik iliuuseqaqqunngisaannarpai. Aap, Jiisusip maligassaalluarnermigut ajoqersukkani ilinniartittarpai. — Atuaruk Johannesi 13:15.

⁷ Qanoq maligassaalluarami? (1 Petrusi 2:21) Allanik kiffartuussinissamut piffissani atorniassagamiuk pilimanianngitsumik inuuvoq. (Lukasi 9:58) Nammineq isummani pinnagu ilikkakkani Jehovameersut tunngavigalugit ilinniartitsisarpoq. (Johannesi 5:19; 17:14, 17) Inussiarnersuullunilu saaffigiuminartuuvoq. Iliuusiinit erserpoq inunnik allanik asannittuusoq. (Matthæusi 19:13-15; Johannesi 15:12) Jiisusip maligassaalluarnera apustilit iluaqutigaat. Jaakumi tamanna iluaqutigalugu sapiissuseqalerpoq, Guutimullu kiffartorpoq toqutaanissami tungaanut. (Apustilit Suliaat 12:1, 2) Johannesilu ukiut 60-t sinnerlugit aalajaappoq. — Saqqummersitat 1:1, 2, 9.

8. Utoqqaanertat angutinut inuusunnerusunut allanullu qanoq maligassiuisinnaappat?

⁸ Utoqqaanertat angutinut inuusunnerusunut maligassaalluarsinnaapput maniguuttuunermikkut, asannittuunermikkut allanillu ikiuisarnermikkut. (1 Petrusi 5:2, 3) Aamma utoqqaanertat upperluartuunermikkut, ilinniartitsinermikkut,  kristumiutut inooriaatsimikkut oqaluussisarnermikkullu allanik maligassiuisarsinnaanertik nuannaarutigisarpaat. — Hebræerit 13:7.

Jiisusip ajoqersukkani ilinniartereeramigit oqaluussiartortippai

9. Qanoq nalunngilarput Jiisusip ajoqersukkaminik oqaluussinissamik ilinniartitsisimanera?

⁹ Ukiut marluk oqaluussereerluni apustilini aqqaneq-marluk oqaluussiartortillugit aallartippai. Ilitsersoqqaarpaali. (Matthæusi 10:5-14) Ulloq alla inuppassuarnik tupinnartuliornikkut nerisitsinnginnermini Jiisusip inuit tamarmik nerisinnaaniassammata ajoqersukkani ilitsersuuppai qanoq iliussanersut. (Lukasi 9:12-17) Erseqqippoq Jiisusip ajoqersukkani ilinniartittarai qanorlu iliussanersut ilitsersoqqissaartarai. Apustilit taamatut Jiisusimit ilinniartinneqaramik anersaamillu illernartumit ikiorneqaramik oqaluussinissarsuaq ukiumi 33-mi aallartittoq piareersarsinnaasimavaat.

10, 11. Angutit ilagiinni kiffartulersinnaaqqullugit utoqqaanertat allallu qanoq ilinniartissinnaavaat?

¹⁰ Ullumikkut angut Biibilimik atuaqqissaaqatigineqartaleraangami anersaakkut ittunik ilinniartinneqalertarpoq. Imaassinnaavoq atuffarinnerulernissaminut ikiorneqartariaqartoq. Biibilimik atuaqqissaarnermini siumukartillugu assigiinngitsutigut ikiortarparput. Ataatsimiigiartaleraangami Teokratiimik Ilinniarfimmut ilanngutissaguni aamma oqaluussisartunngussaguni kuisimanngitsoq qanoq iliussanerluni paasitinneqartarpoq. Kuisinnermilu kingorna suli assigiinngitsutigut ilinniartinneqartarlunilu sungiusarneqartarpoq, soorlu naalagaaffilersaarfimmik aserfallatsaaliueqataatillugu. Aamma utoqqaanertanit paasitinneqarsinnaavoq ilagiinni kiffartortunngorniarluni qanoq iliussanerluni.

¹¹ Utoqqaanertat qatanngut angut kuisimasoq ilagiinni akisussaaffileraangamikku suliassani iluamik suliariniassammagit ikiorusuttarpaat. Taamaattumik suliassap qanoq ingerlanneqartarneranik nassuiaattarpaat. Suliassami suliarinissaa sapernartippagu utoqqaanertat ingerlaannaq aalajangissanngillat suliassaminut piukkunnanngitsoq. Inussiarnersumik nassuiaateqqissavaat suliassaminik qanoq suliaqarsinnaanersoq. Utoqqaanertat qatanngut angut akisussaaffimminik isumaginninnerani ikiorsinnaagaangamikku nuannaarutigisarpaat nalunnginnamikku taassuma ilagiinniittunik kiffartuussinini nuannaarutigissagaa. — Apustilit Suliaat 20:35.

‘Ilisimasoq siunnersuutinik tusarnaarumasarpoq’

12. Sooq Jiisusip siunnersuutai iluaqutaasarpat?

¹² Jiisusip ajoqersukkani aamma pisariaqartitaannik piffissaq eqqorlugu siunnersuinermigut ilinniartittarpai. Assersuutigalugu Jaakup Johannesillu innermik qilammit pisumik Samariamiut nakkarfigitinneqarnissaat nungutinneqarnissaallu kissaatigimmassuk Jiisusip avoqqaarai. (Lukasi 9:52-55) Ilaanni Jaakup Johannesillu anaanartik Jiisusimut saaffiginnitippaat naalagaaffimmi qaffasissumik inissisimaffeqarsinnaanerlutik. Jiisusilli ima oqarfigai: “[Talerpimma] tungaani saamimmalu tungaani issianissamik uanga aalajangiisussaatitaanngilanga; Ataatamali issiasussanngortitaasa pissavaat.” (Matthæusi 20:20-23) Siunnersuuteqaraangami Jiisusi tamatigut Guutip oqaasia tunngavigalugu paasiuminartunik atoriaannaasunillu siunnersuuteqartarpoq. Ajoqersukkani ilinniartittarpai Guutip oqaasia tunngavigalugu eqqarsartarlutillu iliuuseqartarnissaannik. (Matthæusi 17:24-27) Jiisusip nalunngilaa ajoqersukkani naammalluinnanngitsuusut pisinnaasaallu killeqartut. Qamannga pisumik asagamigit siunnersortarpai. — Johannesi 13:1.

13, 14. (a) Kikkut siunnersorneqartariaqartarpat? (b) Utoqqaanertat qatanngummut angummut siunnersuutigisinnaasaasa ilaannik eqqaasaqarit.

¹³ Qatanngutit angutit ilagiinni akisussaaffeqalerusuttut tamarmik ilaannikkut Biibili tunngavigalugu siunnersorneqartariaqartarput. Ussatit 12:15-imi ima allassimavoq: ‘Ilisimasoq siunnersuutinik tusarnaarumasarpoq.’ Qatanngut angut inuusuttoq oqarsimavoq kiffartortunngornissaminut sapiuttarluni. Utoqqaanertamilli paasitinneqarpoq kiffartortunngussagaanni naammalluinnartuusariaqanngitsoq.

¹⁴ Utoqqaanertat qatanngutip angutip pissusilersornini anersaakkut siumukarnissaminut akornutigigaa malugigunikku saamallutik ingerlaannaq ikiorniassavaat. Kissaatigaammi ilagiinniittunik allanik ikiuisinnaanngornissaa. (Galatiamiut 6:1) Aamma ilaannikkut utoqqaanertat qatanngut  angut pissusiinik allanngueqqullugu siunnersortariaqartarpaat. Assersuutigalugu qatanngut angut iliuuseqarnerusinnaagaluarluni iliuuseqarniarpasinngippat utoqqaanertat kajumissaarsinnaavaat Jiisusip maligassiaanik eqqarsaatiginneqqullugu. Jiisusimi eqiasuilluni oqaluussiuarpoq ajoqersukkanilu oqarfigai maligassiani maleqqullugu. (Matthæusi 28:19, 20; Lukasi 8:1, 2) Imaassinnaavoq qatanngut angut isumaqartoq allanit pingaaruteqarnerulluni. Taava utoqqaanertat taassumunnga eqqaasinnaavaat Jiisusip ajoqersukkaminut imminut pingaarnerutinnginnissaq pillugu ilinniartitsissutigisaa. (Lukasi 22:24-27) Immaqaluunniit qatanngutip angutip allanik isumakkeerfiginninnissani sapernartippaa. Utoqqaanertat kiffaq isumakkeerfigineqangaaraluarluni kiffaqatiminik isumakkeerfiginnikkumanngitsoq pillugu assersuusiaq atorlugu ikiorsinnaavaat. (Matthæusi 18:21-35) Siunnersorneqarnissamik pisariaqartitsisoqaraangat utoqqaanertat piaarnerpaamik siunnersuisartussaapput. — Atuaruk Ussatit 27:9, 1900. *

‘Imminut sungiusarniarit’

15. Qatanngut angut allanik kiffartuussisinnaaqqullugu inoqutai qanoq ikiuutaasinnaappat?

¹⁵ Qatanngutit angutit ilagiinni akisussaaffeqalersinnaaqqullugit taakkuninnga ilinniartitsisuusussat tassaapput utoqqaanertat. Aammali allat, soorlu nuliaasoq taakkualu qitornaat, ikiuutaasinnaapput. Qatanngulli angut utoqqaanertanngoreersimaguni nuliami qitornamilu asannillutik tapersersuinerat iluaqutigingaarsinnaavaa. Taakkua paasisimavaat piffissaminik nukimminillu ilagiinniittunut atuisariaqarnera. Akisussaaffimminik isumaginnissinnaaniassagami ilaquttami imminnut pilliutigeriaannaanerat nuannaarutigaa. Uaguttaaq taakkua pilliutigeriaannaanerat qujamasuutigaarput. — Ussatit 15:20; 31:10, 23.

16. (a) Kikkut allanik kiffartuusserusunnertik ersersittariaqarpaat? (b) Qatanngut angut ilagiinni kiffartortunngorusulluniluunniit utoqqaanertanngorusukkuni susariaqarpa?

¹⁶ Allanit ikiorneqarsinnaagaluarluni qatanngutip angutip allanik kiffartuusserusunnini nammineq ersersittariaqarpaa. (Atuaruk Galatiamiut 6:5). Soorunami qatanngut angut allanik ikiuiumalluni sapinngisanilu tamaat oqaluussiumalluni ilagiinni kiffartortuusariaqarnanilu utoqqaanertaasariaqanngilaq. Ilagiinnili immikkut pisinnaatitaaffeqalerumalluni piumasaqaatit Biibilimeersut eqqortinniaqqaartariaqarpai. (1 Timotheusi 3:1-10, 12, 13; Titusi 1:5-9; 1 Petrusi 5:1-3) Taamaattumik qatanngut angut ilagiinni kiffartortunngorusukkaluarluni utoqqaanertanngorusukkaluarluniluunniit suli toqqarneqarsimanngikkuni, eqqarsaatigisariaqarpaa anersaakkut siumukarumalluni qanoq iliuuseqarsinnaanerluni. Biibili atuarlugulu atuaqqissaartariaqarpaa, atuakkaminillu eqqarsaatiginneqqissaartariaqarpoq qinusariaqarlunilu. Aamma sapinngisani tamaat oqaluussisariaqarpoq.  Taamaalioruni Paulusip Timotheusimut oqaaqqissaarutaa una maleruassavaa: “[Imminut] sungiusarniarit Guutimut tunniusimaneq anguniarlugu.” — 1 Timotheusi 4:7, NV.

17, 18. Qatanngut angut sapiukkuni kiffartorusussuseqanngikkuniluunniit qanoq iliorsinnaava?

¹⁷ Taavami qatanngut angut kiffartortunngornissaminut utoqqaanertanngornissaminulluunniit sapiuppat? Pitsaassaaq Jehovap Jiisusillu uagutsinnik ikiuisarnerannik eqqarsaatiginnikkuni. Jehova tassaavoq ‘kissumiarterput’. (Tussiaat 68:20) Taamaattumik Jehovap qatanngut angut ilagiinni akisussaaffeqalersinnaaqqullugu ikiorsinnaavaa. Qatanngut angut ilagiinni kiffartortunngorsimanngikkuni utoqqaanertanngorsimananiluunniit pitsaassaaq taassuma eqqarsaatigippagu qatanngutinik angutinik ilagiinnik isumassuisinnaasunik assut pisariaqartitsisoqartoq. Aamma Jehovap anersaavanik illernartumik qinusarnini eqqissisimanissaminut imminullu naalakkersinnaanissaminut iluaqutigisinnaavaa. Taamaalilluni sapiukkunnaarsinnaavoq. (Lukasi 11:13; Galatiamiut 5:22, 23) Qularutiginngilluinnarsinnaavarput Jehovap qatanngutit angutit namminissarsioratik allanik kiffartuusserusuttut pilluaqqujumaarai.

¹⁸ Taavami qatanngut angut kiffartorusussuseqanngippat? Apustili Paulusi ima allappoq: “[Guuti] tassaavoq ilissinni sunniisoq piumassuseqartittarlusi naammassisaqartittarlusilu piumasani ajunngitsoq naapertorlugu.” (Filippimiut 2:13) Guutiuna kiffartorusussuseqalersitsisarlunilu nakussatsitsisarlunilu piumasani naapertorlugu iliuuseqarusulersitsisartoq. (Filippimiut 4:13) Kristumiu aamma eqqortumik iliornissaminut ikioqqulluni Guutimut qinusinnaavoq. — Tussiaat 25:4, 5.

19. Jehovap “savanik paarsisut arfineq-marluk, ilami inunnut naalagaanerit arfineq-pingasut” isumassuisussanngortikkumaarai qanoq paasisariaqarpa?

¹⁹ Jehovap utoqqaanertat allanik ilinniartitsiniarlutik iliuuseqarnerat pilluaqqujumaarpaa. Aamma qatanngutit angutit ilagiinniittunik kiffartuusserusussuseqartut pilluaqqusarpai. Biibilimi neriorsoqqissaarneqarpugut Guutip innuttani qatanngutinik angutinik ilagiinnik isumassuisussanik amigaateqartissanngikkai. Allassimavoq Jehovap “savanik paarsisut arfineq-marluk, ilami inunnut naalagaanerit arfineq-pingasut” isumassuisussanngortikkumaarai. (Mika 5:4) Ullumikkut qatannguterpassuaqarpoq angutinik maniguuttunik kiffartuusserusussuseqartunik ilagiinnilu akisussaaffeqalernissaminnut ilinniartinneqartunik. Tamanna Jehovamut nersornaataavoq uagutsinnullu pilluaqquneqaataalluni. (w11 11/15-E)

[Quppernerup ataani ilanngussaq]

Qanoq akissavit?

• Jiisusip ajoqersukkani qanoq ilinniartittarpai?

• Utoqqaanertat qatanngutinik angutinik ilagiinniittunik kiffartuusserusussuseqartunik ikiuigaangamik Jiisusi qanoq ilaarsinnaavaat?

• Qatanngut angut ilagiinniittunik kiffartuussisinnaaqqullugu inoqutai qanoq ikiuutaasinnaappat?

• Qatanngut angut ilagiinniittunik kiffartuusserusunnini ersersinniarlugu qanoq iliortariaqarpa?

[Atuaqqissaarnermi apeqqutit]

[Qupp. 31-mi assiliartat]

Biibilimik atuaqqissaaqatigisartakkat anersaakkut siumukarsinnaaqqullugu qanoq ikiorsinnaaviuk?

[Qupp. 32-mi assiliartaq]

Qatanngutit angutit akisussaaffeqarusunnertik qanoq ersersissinnaavaat?