Angutit anersaakkut siumukarsinnaaqqullugit ikiukkit

“Maannamiit inunnik pisaqartalerumaarputit.” — LUKASI 5:10.

1, 2. (a) Anguterpassuit Jiisusip ilinniartitsissutigisai tusaramikkit qanoq pippat? (b) Allaaserisami matumani suut sammissavavut?

GALILÆAMI Jiisusi ajoqersugaalu oqaluussillutik ulapereersimallutik umiatsiamik eqqissisimanartumukarput. Inuppassuilli taseq sinerlugu pisuinnaq malippaat. “Angutit 5.000-it missaanniipput arnat meeqqallu ilanngunnagit.” (Matthæusi 14:21) Ulloq alla inuppassuit Jiisusi ornippaat ajorunnaarsinneqarumallutik ilinniartinneqarumallutillu. “Angutit 4.000-it missaanniipput arnat meeqqallu ilanngunnagit.” (Matthæusi 15:38) Tassa anguterpassuit Jiisusi ornippaat ilinniartitsissutigisai soqutigigamikkit. Jiisusilli nalunngilaa inuit amerlanerusut sallusuissummik upperinnilerumaartut, tupinnartuliornikkummi aalisakkanik pisaqartitsereerluni ajoqersukkani Siimuut-Petrusi ima oqarfigaa: “Maannamiit inunnik pisaqartalerumaarputit.” (Lukasi 5:10) Taamaalilluni Jiisusip oqaluussinerat aalisarnermut assersuuppaa. Sallusuissummik upperinnilerumaartorpassuarnik — aamma anguterpassuarnik — nanisisinnaaqqullugit ikiorsinnaavai.

² Ullumikkuttaaq anguteqarpoq tusarliussatsinnik nuannarinnittunik. Taakkua uagutsinnit Biibilimik atuaqqissaaqatigineqartarnertik nuannaarutigaat. (Tussiaat 1:1-3) Angutilli ilaat tunuarsimaartuullutillu anersaakkut siumukanngillat. Qanoq ikiorsinnaavavut? Jiisusi angutit soqutiginnilersinniarlugit immikkut iliuuseqanngilaq, taamanikkulli angutit soqutigisaat eqqartortarpai. Allaaserisami matumani Jiisusip angutinik ikiuisarnera qanorlu ilaarsinnaaneripput sammissavavut. Assigiinngitsut pingasut uku sammissavavut: (1) Angut aningaasaqarniarneq pillugu isumakuluuteqarpat, (2) angut inunnut qunuppat aamma (3) angut sapiuppat.

Aningaasaqarniarnikkut isumakuluuteqaraanni

3, 4. (a) Anguterpassuit suna pingaarnerusoraat? (b) Sooq angutit ilaat isumaqartarpat aningaasaqarniarneq anersaakkut sammisassanit pingaarnerusoq?

³ Mosesip allagaanik ilisimasup Jiisusi ima oqarfigaa: “Ajoqersuisoq, sumunnassagaluaruilluunniit malissavakkit.” Jiisusilli oqarfigaa ‘Inuup Ernera niaqquminut iigarfissaqanngitsorluunniit’. Biibilimili allassimanngilaq taanna Jiisusimut ajoqersuganngornersoq. Immaqa angutip sumi najugaqassanerluni nerisassaqassanerluniluunniit isumakuluutigaa. — Matthæusi 8:19, 20.

⁴ Anguterpassuit isumaqartarput aningaasaqarniarneq anersaakkut sammisassanit pingaarnerusoq. Qaffasinnerusumik ilinniagaqarniarnissaq aningaasarsiorluarnartumillu suliffeqarnissaq pingaartippaat. Nalunngilaat inuussutissaqassagunik aningaasat pisariaqartillugit. Taamaattumik aningaasat suliffillu Biibilimik atuaqqissaarnermit Guutimullu ikinngutaalernermit iluaqutaanerussasoraat. Immaqa Biibilimi ajoqersuutigineqartut nuannarigaluarpaat, ‘silarsuarmili matumani isumakuluutit pisuussutillu nakutitsineri’ pissutigalugit Guutimik ilinniarunnaartarlutillu Guutip oqaasianik maleruaajunnaartarput. (Markusi 4:18, 19) Jiisusip ajoqersukkani eqqortumik pingaarnersiuinissaannut qanoq ikiornerai sammilaariartigu.

5, 6. Andreasip, Petrusip, Jaakup Johannesillu oqaluussinissamut eqqortumik isiginnittaaseqalernissaminnut suna kajumississutigaat?

⁵ Siimuut-Petrusi qatanngutaalu Andreasi aalisartuupput.  Taakkua Johannesi qatanngutaalu, Jaaku, taakkualu ataataat, Zebedæusi, suleqatigisarpaat. Aalisartuunerat ingerlalluarpoq, angutinillu allanik sulisitaqarput. (Markusi 1:16-20) Andreasi Johannesilu Johannesimit Kuisisumit Jiisusi pillugu tusagaqaqqaaramik qularinngilaat Jiisusi Missiarsiusoq. Taava Andreasi qatanngutiminut Siimuut-Petrusimut Jiisusi pillugu oqaluttuarpoq, Johannesillu qatanngutini Jaaku aamma oqaluttuussimagunarpaa. (Johannesi 1:29, 35-41) Qaammatini tulliuttuni Jiisusi Galilæami, Judæami Samariamilu oqaluussivoq, ajoqersukkallu sisamat taakkua Jiisusi ilagaat. Tamatumalu kingorna aalisarnertik ingerlateqqilerpaat. Jiisusip ilinniartitsinera nuannarigaluarlugu oqaluussineq pingaarnerpaasutut isiginngilaat.

⁶ Kingusinnerusukkut Jiisusip Petrusi Andreasilu kajumissaarpai maleqqulluni ‘inunnillu aalisartunngoqqullugit’. Petrusi Andreasilu qanoq pippat? “Erniinnarlu qassutitik ilaginnaannarlugit malippaat.” Aamma Jaaku Johannesilu taamaaliorput. “Erniinnarlu umiatsiaq ataatartillu qimallugit malilerpaat.” (Matthæusi 4:18-22) Angutit taakkua piffissaq tamaat oqaluussinissaminnut suna kajumississutigaat? Aalajanginnginnerminni eqqarsaatigilluarsimavaat. Qaammatialunni taakkua Jiisusi angalaqatigereersimavaat ilinniartitsinerani tupinnartuliortarneranilu najuuttareersimallutik. Naapertuilluarnerlu pissutigalugu ilungersuussinera inuillu ilinniartitsinera nuannarigaat maluginiarsimavaat. Tamanna Jehovamik upperinninnerminnut taassuminngalu tatiginninnerminnut nakussatsissutigaat.

7. Biibilimik atuaqqissaaqatigisartakkavut Jehovamik tatiginnilersinnaaqqullugit qanoq ikiorsinnaavavut?

⁷ Jiisusi qanoq ilaarsinnaavarput, Biibilimillu atuaqqissaaqatigisartakkavut Jehovamik tatiginnilersinnaaqqullugit qanoq ikiorsinnaavavut? (Ussatit 3:5, 6) Ilinniartitseriaaserput pingaaruteqarpoq. Atuaqqissaaqatiginerini ilinniartissinnaavavut Guutip naalagaaffia salliukkutsigu Jehovap pilluaqqujumaaraatigut. (Atuakkit Malaki 3:10; Matthæusi 6:33). Biibili atorlugu takutissinnaavarput Jehovap innuttani isumassortuaannarai. Aamma eqqaamassavarput atuaqqissaaqatigisartakkavut maligassiunitsigut ilinniartissinnaagatsigit. Jehovamit ikiorneqarsimanerput pillugu oqaluttuukkutsigit Jehovamik tatiginnilersissinnaavavut. Aamma atuagaatitsinni atuagassiaatitsinnilu misigisalikkersaarutinik oqaluttuussinnaavavut. *

8. (a) Sooq atuaqqissaaqatigisartakkatta nammineq ‘usissallugulu takussavaa Jehova ajunngitsuusoq’? (b) Atuaqqissaaqatigisartagarput Jehovap ajunngitsuuneranik misigisaqarsinnaaqqullugu qanoq ikiorsinnaavarput?

⁸ Upperlualerumalluni allat Jehovamit pilluaqquneqarnerannik atuarneq oqaluttuunneqarnerlu naammanngilaq. Biibilimik atuaqqissaaqatigisartakkatta Jehovap ajunngissusia nammineq misigisariaqarpaa. Tussiaat 34:9-mi ima allassimavoq: “Ussersiuk takusiullu [Jehova] ajunngitsuusoq. Pilluarpoq taassumani qimarnguffissarsiortoq.” Atuaqqissaaqatigisarput Jehovap ajunngitsuuneranik misigisaqarsinnaaqqullugu qanoq ikiorsinnaavarput? Aningaasatigummi ajornartorsiuteqarpat? Aamma imaassinnaavoq ileqqut ajortut taamaatinniarai, assersuutigalugu pujortassaarniartoq, aningaasanuussaarniartoq imigassartorpallaarunnaarniartorluunniit. (Ussatit 23:20, 21; 2 Korinthimiut 7:1;  1 Timotheusi 6:10) Ileqqumik ajortumik taamaatitsiniarnermini Guutimut ikioqqulluni qinunissaanut ilinnartissinnaavarput. Ajunnginnerusumik inuuleruni nammineq misigissavaa Jehova ajunngitsuusoq. Taava kajumisaarsinnaavarput sapaatit-akunneri tamaasa Biibilimik atuaqqissaartarnermigut, ataatsimiinnernut piareersartarnermigut najuuttarnermigullu Jehovamik pallorfiginninnermik inuunermini salliutitseqqullugu. Iliuuserisami Jehovamit pilluaqquneqarnerat misigiguniuk upperluarnerulissaaq, aningaasaqarniarninilu isumakuluutigivallaarunnaassavaa.

Angut inunnut qunuppat

9, 10. (a) Sooq Nikodemusip Josefillu Arimatæamiup Jiisusimut ajoqersugaanertik isertuuppaat? (b) Sooq ullumikkut angutit ilaat Jiisusimut ajoqersuganngornissaminnut nangaasarpat?

⁹ Angutit ilaasa inuit allat namminneq pillutik qanoq isumaqarnerat annilaangagigamikku Jiisusimut ajoqersuganngornissaminnut nangaasarput. Assersuutigalugu Nikodemusip Josefillu Arimatæamiup juutit allat qunugigamikkit Jiisusimut ajoqersugaanertik pillugu inuit allat oqaluttuutinngilaat. (Johannesi 3:1, 2; 19:38) Annilaanganerat pissutissaqarpoq. Upperisarsiornikkummi siuttut Jiisusimik ima uumissuitigaat taassuminnga upperinnittoq kinaluunniit synagogimukaqqujunnaartarlugu. — Johannesi 9:22.

¹⁰ Ullumikkut sumiiffinni assigiinngitsuni angut Guutimik, Biibilimik, upperisamilluunniit soqutiginnileraangami suleqatiminit, ikinngutiminit, ilaquttaminilluunniit mitaatigineqarsinnaasarpoq. Sumiiffinni allani inummut ulorianarsinnaavoq allamik upperisaqalerniarluni oqarneq. Angut sakkutooqarnermut politikkimulluunniit tunngasunik suliaqartoq atorfikkaarluunniit upperisamut tunngasut pillugit oqalukkaangami isornartorsiorneqangaatsiarsinnaasarpoq. Assersuutigalugu angut tyskeq ima oqarpoq: “Ilissi Nalunaajaasut, Biibili pillugu oqaluussissutigisasi ilumoorput. Uangali Nalunaajaasunngoraluaruma kikkut tamarmik ingerlaannaq paasissavaat. Suleqatikka, sanilikka klubbimilu ilaquttakkalu ilaaffigisatsinniittut qanoq eqqarsassappat? Tamanna sapissavara.”

11. Jiisusip ajoqersukkani inunnut qununermik ajugaaffiginnissinnaaqqullugit qanoq ikiortarpai?

¹¹ Jiisusip ajoqersugai sapiissuseqarput. Ilaannikkulli inunnut qunusarput. (Markusi 14:50, 66-72) Jiisusip ajoqersukkani akerlilersorneqaraluarlutik anersaakkut siumukaqqullugit qanoq ikiortarpai? Nassuiaattarpai akerlilersorneqarnissaminnut qanoq piareersimasinnaanerannik. Ima oqarfigai: “Pilluarpusi inuit Inuup Ernera pillugu uumissorpasi, ajattorpasi asissorlusilu atersilu sutut ajortutut maajugalugu.” (Lukasi 6:22) Ajoqersukkani oqarfigai naatsoorsuutigissagaat akerlilersorneqarnissartik. Akerlilersorneqassappulli “Inuup Ernera pillugu”. Neriorsoqqissaarpaalu Guutimit annertoqqusersorneqartuarumaartut taassumunnga ikioqqullutik nakussatseqqullutillu qinusarunik. (Lukasi 12:4-12) Aamma Jiisusip imminik malinnilerlaat ajoqersukkaminik peqateqartaqqullugit taakkuninngalu ikinnguteqaleqqullugit kajumissaarpai. — Markusi 10:29, 30.

12. Biibilimik atuaqqissaaqatigisartagarput inunnut qununermik ajugaaffiginnissinnaaqqullugu qanoq ikiorsinnaavarput?

¹² Uaguttaaq Biibilimik atuaqqissaaqatigisartakkavut inunnut qununermik ajugaaffiginnissinnaaqqullugit ikiortariaqarpavut. Atuaqqissaaqatigisartagaq  malersorneqaleruni qanoq iliussanersoq paasitissinnaavarput. (Johannesi 15:19) Assersuutigalugu allamik upperisaqalermat immaqa suleqatai allallu isumaqataanngillat upperisaaluunniit pillugu apeqqutissaqarlutik. Piareersaqatigisinnaavarput Biibili tunngavigalugu paasiuminartumik akinissaanut. Aamma taassumunnga ikinngutaalersinnaavugut ilagiinniittunullu allanut ilisaritissinnaallugu. Immaqa taanna qatanngutillu ilaat assigiimmik atugaqarsimapput soqutigisaqaqatigiillutillu, ikinngutigiilersinnaappullu. Pingaarnerpaamik qamannga pisumik qinusarnissaanik ilinniartittariaqarparput. Tamanna Jehovamut ikinngutaalernissaminut iluaqutigissavaa. Jehova taassumunnga qaarsutut qimarnguffittut ilissaaq, inunnullu qununissaminut pissutissaqassanngilaq. — Atuakkit Tussiaat 94:21-23; Jaaku 4:8.

Angut sapiuppat

13. Sooq angutit ilaat anersaakkut ittunik sammisaqarnissaminnut tunuarsimaartarpat?

¹³ Angutit ilaat anersaakkut ittunik sammisaqarnissaminnut tunuarsimaartarput atuffarlukkamik, eqqarsaatitik iluamik oqaatigisinnaasannginnamikkit ittooramilluunniit. Imaluunniit inuit arlallit tusaatillugit isummamik misigissutsimilluunniit oqaatiginissaat nuannarinngilaat. Taamaattumik atuaqqissaarneq, ataatsimiinnerni akisarneq allanullu oqaluussineq merseraat. Qatanngut angut oqaluttuarpoq inuusuttuugallarami oqaluussitilluni matumukartarluni kasuttortuusaarlunilu. Nipaarsaarluni qimaguttarpoq neriuutigalugu tusaaneqarsimassanani takuneqarsimassananilu. Ima oqarpoq: “Matumiit matumut angalaarnissara eqqarsaatigiinnarlugu napparsimalertarpunga.”

14. Sooq Jiisusip ajoqersugaasa nukappiaraq anersaapilulik ajorunnaarsissinnaanngilaat?

¹⁴ Eqqarsaatigeriaruk Jiisusip ajoqersugai qanoq misigisimasimassasut nukappiaraq anersaapilulik ajorunnaarsissinnaannginnamikku. Eqqarsarsimagunarput Jiisusip imminnut iliuusereqqusaa iliuuserisinnaanagu. Nukappiaqqap ataataata Jiisusi ornippaa imalu oqarfigalugu: “[Ernera] noqartarnermik nappaateqarmat naalliungaarlunilu; uppittaraaq ilaanni innermut ilaannilu imermut. Ajoqersukkannukaakkaluarpara, ajorunnaarsissinnaanngilaalli.” Jiisusip anersaapiluk anisippaa, nukappiararlu ajorunnaarpoq. Kingusinnerusukkut ajoqersukkat Jiisusi ima aperaat: “Sooq uagut anisissinnaanngilarput?” Jiisusip ima akivai: “Uppernikikkassi. Ilumut oqarfigaassi: Siinuppip naatsiiassartaatut atsigisumik uppersuseqaraluarussi qaqqaq una oqarfigisinnaassavarsi: Uanngaanniit ikunga nuugit! taava nuussagaluarpoq. Sunaluunniillu ilissinnut ajornassanngikkaluarpoq.” (Matthæusi 17:14-20) Inuk Jehovamut uppertoq iliuuserissallugit ajornarluinnarpasissunik iliuuseqarsinnaalertarpoq. Namminerli piginnaanernik tatiginnippallaalerneq qanoq kinguneqarsinnaava? Iluatsinngikkuni imminut tatigiunnaassaaq.

15, 16. Biibilimik atuaqqissaaqatigisartagarput sapiukkunnaarsinnaaqqullugu qanoq ikiorsinnaavarput?

¹⁵ Biibilimik atuaqqissaaqatigineqartartoq sapiuttoq kajumissaarsinnaavarput imminut tatigivallaarnani Jehova tatigeqqullugu. Petrusi ima allappoq: “Guutip assaata pissarsuup ataani qanilaartuugitsi, taava taassuma piffissaq nalliuppat akitsisissavaasi, isumakuluutisilu tamaasa taassumunnga pisissigit.” (1 Petrusi 5:6, 7) Atuaqqissaaqatigisartagarput anersaakkut ittunik pingaartitsilersinnaaqqullugu ikiortariaqarparput. Tamanna ima paasisariaqarpoq ilikkakkani Biibilimeersut nuannaarutigissagai ‘anersaallu inerititaa’ inuunermini ersersissagaa. (Galatiamiut 5:22, 23) Qinusarneq pingaartittariaqarpaa. (Filippimiut 4:6, 7) Aamma paasissavaa Guutip sapiissuseqartittarlunilu nakussatsittaraani  taassuma iliuusereqqusaanik iliuuseqarnissaminut. — Atuakkit 2 Timotheusi 1:7, 8.

¹⁶ Atuaqqissaaqatigineqartartut ilaat atuffarissisinnaaqqullugit nassuiaalluarsinnaaleqqullugillu ikiorneqartariaqarput. Ilaat Jehovamut kiffartornissaminnut ajukkussinnaapput Jehova ilisarisimalinngikkallaramikku ajortuliarisimasatik pissutigalugit. Pissutsit qanorluunniit ikkaluarpata atuaqqissaaqatigisartagarput asannittuulluta kamagittartuullutalu ikiorutsigu ikiuinerput iluaqutigissavaa. Jiisusi ima oqarpoq: “Peqqissut nakorsamik pisariaqanngillat, napparsimasulli.” — Matthæusi 9:12.

Angutit amerlanerusut Jehovamik ilisarisimannilersinnaaqqullugit ikiukkit

17, 18. (a) Oqaluussigaangatta angutit amerlanerusut naapinniarlugit qanoq iliorsinnaavugut? (b) Allaaserisami tulliuttumi suna sammissavarput?

¹⁷ Kissaatigaarput angutit amerlanerusut Biibilimi tusarliussaq kajumissinartoq upperilissagaat. (2 Timotheusi 3:16, 17) Oqaluussigaangatta angutit amerlanerusut naapinniarlugit qanoq iliorsinnaavugut? Angutit naapinniarlugit unnukkut, sapaatip akunnerata naanerani ualikkut nalliuttunilu oqaluussisarsinnaavugut. Ajornanngippat aperisinnaavugut ilaqutariinni ittuusoq oqaloqatigisinnaanerlutigu. Piffissaalluaraangat suleqativut angutit oqaluussiffigisinnaavavut. Ilagiinni qatanngutit arnat ilaat nalunaajaasuunngitsumik ueqarput, angutillu taakku sallusuissummik soqutiginnilersinnaaqqullugit ikiorsinnaavavut.

¹⁸ Naapitavut tamaasa oqaluussiffigigutsigit qularutiginngilluinnarsinnaavarput eqqortuliorusuttut tusarnaarumaartut. Naammagittartuusariaqarpugut sallusuissummillu soqutiginnittut tamaasa ikiortuartariaqarlutigit. Angutit kuisissimasut ilagiinni akisussaaffeqarusulersinnaaqqullugit qanoq ikiorneqarsinnaappat? Allaaserisami tulliuttumi apeqqut tamanna akineqassaaq.

[Quppernerup ataani ilanngussaq]

Qanoq akissavit?

• Angutit suut inuunerminni pingaarnerpaatissanerlugit aalajangersinnaaqqullugit qanoq ikiorsinnaavavut?

• Biibilimik atuaqqissaaqatigisartakkavut inunnut qununermik ajugaaffiginnissinnaaqqullugit qanoq ikiorsinnaavavut?

• Biibilimik atuaqqissaaqatigisartakkavut sapiuttut qanoq ikiorsinnaavavut?

[Atuaqqissaarnermi apeqqutit]

[Qupp. 25-mi assiliartaq]

Angutit nutaarsiassamik nuannersumik oqaluttuunniarlugit siulliullutit iliuuseqartarpit?

[Qupp. 26-mi assiliartaq]

Biibilimik atuaqqissaaqatigisartakkat akerlilersorneqarnerup naammagalugu atornissaanut qanoq piareersarsinnaaviuk?