Inuuneq angujumallugu anersaaq malillugu inuugit

‘Uagut uinik malinnagu kisianni Anersaaq malillugu inuuvugut.’ — ROMAMIUT 8:4.

1, 2. (a) Biilertilluni allamut saasaateqaraanni susoqaratarsinnaava? (b) Jehovamut pallorfiginninnitsinnit allamut saasaateqarnerput qanoq kinguneqarsinnaava?

“BIILERTUT biilertillutik allamut saasaateqartarnerat nappaatitut siaruaattutut ippoq ukiullu tamaasa ingasatsikkaluttuinnarluni.” USA-mi angallannermut allattoqarfimmit tamanna nalunaarutigineqarpoq. Biilertut biilertillutik allamut saasaatigisinnaasaasa ilagaat mobilikkut oqalunneq. Misissuinermi apersorneqartut pingajorarterutaat biilertunit mobilikkut oqaluttunit aportissimanerarlutilluunniit aportingajassimanerarput. Biilertilluni  mobilikkut oqalunneq piffissamik atuilluarsorinarsinnaavoq, taamaaliornerli ajorluinnartumik kinguneqarsinnaavoq.

² Biilertoq allamut saasaateqartoq navianartunik eqqumaffiginninngitsoortarpoq. Jehovamut attaveqarnitsinnut tunngatillugu aamma taamatupajaaq pisoqarsinnaavoq. Guutimut kiffartornitsinnit kristumiutullu sammisassanit allamut saasaateqarutta ‘uppersutsitsigut umiiarsinnaavugut’. (1 Timotheusi 1:18, 19) Apustilip Paulusip tamanna mianersoqqussutigaa qatanngutini Romamiittut ima allaffigigamigit: “Uinimmimmi eqqarsaatiniititsiuarneq toqumik kinguneqartarpoq, anersaamilli eqqarsaatiniititsiuarneq inuussutaallunilu eqqississutaavoq.” (Romamiut 8:6, NV) Paulusip matumani suna pivaa? Qanoq ililluta ‘uinimmik eqqarsaatiniititsiuarnaveersaarluta’ ‘anersaamik eqqarsaatiniititsiuarnissaq’ ilungersuutigisinnaavarput?

“Pillagassaatitaajunnaarput”

3, 4. (a) Sumik akiugaqarnini Paulusip allaatigaa? (b) Sooq pissutsit Paulusip atugarisimasai soqutigisariaqarpavut?

³ Paulusip Romamiunut allakkamini allaatigaa akiugaqarnini — tassa uinimmi eqqarsaatimilu imminnut akiuunnerat. (Atuakkit Romamiut 7:21-23). Paulusip tamanna allaatigigamiuk iliuutsini pillugit utoqqatsissutissarsiornaniluunniit imminut naakkiginngilaq. Isumaqanngilaq eqqortumik iliorsinnaanani. Kristumiuuvoq inersimalluarlunilu tanitaasoq, aamma “Guutimik nalusunut apustiliusutut” aallartitaavoq. (Romamiut 1:1; 11:13) Taava sooq Paulusip taamatut akiugaqarnini allaatigaa?

⁴ Paulusip kissaatigisamisut annertutigisumik nammineerluni Guutip piumasaatut iliorsinnaannginnini unneqqarilluni nassuerutigaa. Sooq? Ima allappoq: “[Tamarmik] ajortuliorput Guutimit naalannassuseq pigiunnaarlugu.” (Romamiut 3:23) Paulusi Adamimut kinguaajugami naammalluinnanngitsuuvoq kissaatipiloqartarlunilu. Taassuma qanoq misiginera paasisinnaavarput uaguttaaq naammalluinnanngitsuugatta kissaatipilutsinnillu taassumatut akiugaqartaratta. Aamma Guutimik pallorfiginninnitsinnit allamut saasaatigisinnaasavut aqqutikkullu nerukitsukkut inuussummut sammisukkoorunnaassutigisinnaasavut amerlaqaat. (Matthæusi 7:14) Paulusili neriuutissaarutinngilaq; uaguttaaq neriuutissaarutinngilagut.

5. Paulusi kimit ikiorneqarpa, aamma suut iluaqutigai?

⁵ Paulusi ima allappoq: “Kia kiffaajunnaarsissavaanga . . .? Guutili qujanarsili Jiisusi-Kristusikkut Naalakkatsigut!” (Romamiut 7:24, 25) Taava Paulusip kristumiut tanitat, “Kristusi-Jiisusimiittut”, saaffigai. (Atuakkit Romamiut 8:1, 2). Jehovap taakku anersaani illernartoq atorlugu qitornavissiartaarai, ‘Kristusip kingornusisussaaqataatut’ taallugit. (Romamiut 8:14-17) Taakkua Guutip anersaava illernartoq Jiisusillu utertitsissutitut pilliutaa akiuunnermi Paulusip eqqaasaani ajugaanissaminnut iluaqutigisarpaat. Taamaalillutik naammalluinnanngissusertik pillugu Guutimit pillagassaatitaajunnaartarput. “Ajortip toqullu inatsisaannit” kiffaajunnaartarput.

6. Sooq Guutimut kiffaasut tamarmik Paulusip allagaanik paasinnikkumasariaqarpat?

⁶ Paulusip isumassarsisitaalluni kristumiut tanitat saaffigigaluarai, Guutip anersaava illernartoq Jiisusillu utertitsissutitut pilliutaa pillugit taassuma allagai Jehovamut kiffaasut tamarmik iluaqutigisinnaavaat — qilaliarnissamik neriugisaqaraluarunik nunarsuarmiluunniit naassaanngitsumik inuunissamik neriugisaqaraluarunik. Taamaattumik pingaaruteqarpoq Guutimut kiffaasut tamarmik allakkanik taakkuninnga paasinnillutillu iluaqutiginninniarnissaat.

Guutip qanoq ililluni ‘ajorti uinimmiittoq pillagassanngortikkaa’

7, 8. (a) Mosesip inatsisaasa ‘uinimmit sapilersitaanerat’ qanoq paasisariaqarpa? (b) Guuti anersaani illernartoq utertitsissutitullu pilliut iluaqutigalugit sunik naammassisaqarpa?

⁷ Romamiunut allakkani kapitali 7-imi  Paulusi allappoq inuit naammalluinnanngitsut ajortimit naalakkersorneqartut. Kapitali 8-mi anersaap illernartup pissaanera eqqartorpaa. Nassuiaavoq kristumiut Guutip anersaava illernartoq ajortip pissaaneranut akiuunnissamut iluaqutigisinnaagaat. Jehovap piumasaatut iliornissamut taassumanngalu akuerisaanissamut iluaqutigisinnaavaat. Paulusip ersersippaa Guuti Mosesip inatsisaasigut naammassineqarsinnaanngitsumik naammassisaqarsimasoq, anersaani illernartoq Jiisusillu utertitsissutitut pilliutaa atorlugit.

⁸ Mosesip inatsisai ajortuliortunik pillagassaatitsipput taakkunani peqqussutigineqartut ilarpassui maleruarneqarsinnaanngimmata. Israelimi palasiunerit Mosesip inatsisaanik maleruaasut naammalluinnanngitsuupput, taakkualu pilliutigisartagaat ajortinut matoorutissatut naammanngillat. Taamaammat Mosesip inatsisai ‘uinimmit sapilersitaapput’. Guutip ernini inuttut “uinimmut ajortilimmut assigitillugu” aallartippaa, taassumalu utertitsissutitut pilliutaata ‘ajorti uinimmiittoq pillagassanngortippaa’. Jiisusip pilliuteqarneratigut inuit ajortimit annaanneqarsinnaanngorput. Kristumiut tanitat Jiisusip pilliutaa upperimmassuk Jehovap taakku naapertuilluartutut isigisinnaavai. Paulusip allagai ‘uinik malinnagu kisianni Anersaaq malillugu inuunissamut’ kristumiunut tanitanut kajumissaarutaapput. (Atuakkit Romamiut 8:3, 4). Taamatut inuujuartariaqarput nunarsuarmi inuunertik tamaat. Aalajaattuarunik ‘niaqorummik inuussutaasumik’ tunineqarumaarput. — Saqqummersitat 2:10.

9. Oqaaseq ‘inatsisit’ Romamiut 8:2-mi atorneqartoq qanoq paasisariaqarpa?

⁹ Paulusip aamma eqqartorpai ‘anersaap inatsisai’ aamma ‘ajortip toqullu inatsisaat’. (Romamiut 8:2) Inatsisit taakku suuppat? Oqaaseq Paulusip versimi tamatumani atugaa maleruagassianut aalajangersimasunut, soorlu Mosesip inatsisaaniittunut, tunngassuteqanngilaq. Qinerlerfissiami allassimavoq oqaaseq grækerisooq versimi tamatumani ‘inatsisit’-nik nutserneqarsimasoq inuup najoqqutarisaanut ajunngitsunut ajortunulluunniit inatsisitut sunniuteqarlutik iliuusiinut tunngaviusartunut tunngasoq; najoqqutarisallu taakku aamma inuup nammineq najoqqutarisassamisut aalajangiussaanut tunngasinnaapput.

10. Ajortip toqullu inatsisaannit qanoq aqunneqarpugut?

¹⁰ Apustili Paulusi ima allappoq: “Soorlu inukkut ataasiinnakkut ajorti silarsuarmut tikiuttoq  ajortikkullu toqu tikiulluni, taamatut toqu inunnut tamanut annguppoq tamarmik ajortuliormata.” (Romamiut 5:12) Tamatta Adamimut kinguaajugatta ajortip toqullu inatsisaannit aqunneqarpugut. Uinitta ajortiliusup Guutip iluarinngisaanik toqumik kinguneqartussamik iliortinniarsarisarpaatigut. Paulusi Galatiamiunut allakkamini allappoq iliuutsit ileqqullu tamakku tassaasut “uinngup suliai”. Nangillunilu ima allappoq: “Tamakkuninnga ileqqoqartut Guutip naalagaaffia kingornussarsiarissanngilaat.” (Galatiamiut 5:19-21) Inuit taama ittut ‘uinik malillugu’ inuupput. Uinikkut kajungerisatik maliinnartarpaat. (Romamiut 8:4) Uinimminnit naammalluinnanngitsumit siulersortipput. Inuilli kinguaassiuutitigut inuunerluttut, guutipilussiortut, anersaarsiortut allatullu ajortuliortartut kisimik uinikkut kajungerisaminnik malinnittarpat? Naamik. “Uinngup suliai” Galatiamiunut allakkani eqqaaneqartut aamma inuttut sanngiissutitut isigineqartunut tunngapput, soorlu sinnganermut, kamaammernermut, assortuiumatunermut qinngarsuinermullu. Isumaqanngisaannartariaqarpugut uinitsinnut naammalluinnanngitsumut akiuuttariaqarnata.

11, 12. Jehova ajortip toqullu inatsisaannit kiffaajunnaarsikkumalluta susimava, taassumanngalu akuerisaajumalluta susariaqarpugut?

¹¹ Jehovap uagut ajortip toqullu inatsisaannit kiffaajunnaarsinnaatilerniarluta iliuuseqarsimanera qujamasuutigeqaarput! Jiisusi ima oqarpoq: “[Guutip] silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.” Inooriaatsitsigut ersersikkutsigu Guutimik asannilluta Jiisusillu utertitsissutitut pilliutaanik upperinnilluta, taava ajorti kingornussarput pissutigalugu pillagassaatitaanermit kiffaajunnaarsinnaavugut. (Johannesi 3:16-18) Taamaattumik immaqa Paulusitut ima oqarusussaagut: “[Guuti] qujanarsili Jiisusi-Kristusikkut Naalakkatsigut!”

¹² Pissutsit atukkavut perulunnartumik nappaateqarnermit ajorunnaarsitaanermut assersuunneqarsinnaapput. Inuup napparsimasup peqqissilluinnarusukkuni nakorsap iliuusereqqusai iliuuserisariaqarpai. Tamatumunnga assingusumik utertitsissummik upperinninnerput ajortip toqullu inatsisaannit kiffaajunnaassutigisinnaavarput; sulili naammalluinnanngitsuullutalu ajortiliuvugut. Tassa anersaakkut peqqissilluinnarusukkaanni Guutimillu akuerisaallunilu pilluaqqusaajumagaanni  iliuuseqarnerunissaq pisariaqarpoq. Taamaammat Paulusip peqquaatigut anersaaq malillugu inuussasugut.

Qanoq ililluta Guutip anersaava malillugu inuusinnaavugut?

13. Guutip anersaava malillugu inuuneq qanoq paasisariaqarpa?

¹³ Anersaaq malillugu inuujumalluta anersaakkut siumukartuartariaqarpugut. (1 Timotheusi 4:15) Naammalluinnanngitsuugaluarluta tamatta ullut tamaasa sapinngisarput tamaat iliuuseqarluta Guutip anersaavanit siulersortinniartarpugut. Paulusi ima allappoq: “Anersaamut naapertuuttumik saqiuaritsi, taava uinngup kajungerisai suulluunniit naammassinavianngilasi.” Tassa anersaaq malillugu inuugutta Guutimit iluarisaassaagut. — Galatiamiut 5:16, NV.

14. ‘Uinimmut naapertuuttut’ qanoq eqqarsartaaseqarpat?

¹⁴ Paulusip Romamiunut allakkamini tulliullugit eqqartorpai inuit assigiinngilluinnartunik marlunnik eqqarsartaasillit. (Atuaruk Romamiut 8:5, NV). * Matumani oqaaseq “uinik” timimut tunnganngilaq. Biibilimi ilaannikkut “uinik” naammalluinnanngissutitsinnut tunngatinneqartarpoq. Naammalluinnanngissutivut pissutigalugit Paulusip eqqaasaatut uinik eqqarsaatillu akiuussinnaapput. Paulusi uinimminik, imaluunniit naammalluinnanngissutiminik, akiugaqarpoq. Ullumikkulli inuppassuit kissaatigisapiluminnik akiuiniarsarinerluunniit ajorput, taamalu ‘uinimmut naapertuuttuusarlutik’. Guutimit sumik piumaffigineqarnerlutik eqqarsaatiginagu taassumalu ikiuiumanera soqutiginagu ‘uinimmut atasunik eqqarsaatiminniititsisarput’. Namminneq piumasamik timikkullu pisariaqartitamik pinissaannik ulapputiginninnerusarput. “Anersaamulli naapertuuttut” Jehovamit siulersortittarput.

15, 16. (a) Arlaannik eqqarsaatiniititsineq eqqarsartaatsimut qanoq sunniuteqartarpa? (b) Ullumikkut inuit amerlanersaat sunik soqutigisaqarpat?

¹⁵ Atuaruk Romamiut 8:6, NV. * Inuit ajunngitsumik ajortumilluunniit iliuuseqartinnatik iliuuseriniakkatik eqqarsaatiminniitittarpaat. Inuit uinimmut tunngasunik eqqarsaatiminniititsiuartut uinimmut atalluinnartumik eqqarsartaaseqalipallattarput. Taakkua eqqarsaataat, soqutigisaat misigissusiilu uinimmut tunngalluinnalertarput.

¹⁶ Ullumikkut inuit amerlanersaasa suut soqutigaat? Apustili Johannesi ima allappoq: “[Silarsuarmiittut] tamarmik — uinngup pilerigisai, isit pilerigisaat nunallu piinik usorsisimaaruteqarneq — Ataatamit pisuunngillat, silarsuarmit pisuupput.” (1 Johannesi 2:16) Pilerigisanut taakkununnga ilaapput kinguaassiuutitigut inuunerlunnissaq, nuimasuunissaq pigisaqarnerulernissarlu. Atuakkani, atuagassiani, filmini, tv-kkut aallakaatitassiani internettikkullu tamakku sammineqartuarput. Inuit tamakku pilerigisarivikkamikkit tamakku eqqarsaatiminniitittarpaat. Paulusi allappoq ‘uinimmik eqqarsaatiniititsiuarneq toqumik kinguneqartartoq’. Tassa massakkut Guutimut attaveqarunnaarsinnaavugut siunissamilu inuunissamik neriuutaarussinnaalluta. Sooq? “Uinimmik eqqarsaatiniititsiuarneq tassaammat Guutimut akeraaneq, Guutip inatsisaanut  naalatsigitinnerunngimmat naalatsigitinnerusinnaananilu. Taamaammat uinimmut naapertuuttut Guutimit iluarisaasinnaanngillat.” — Romamiut 8:7, 8, NV.

17, 18. Qanoq ililluta Guutip anersaavanit illernartumit siulersortissinnaavugut, taamaalioruttalu qanoq kinguneqassava?

¹⁷ “[Anersaamik] eqqarsaatiniititsiuarneq inuussutaallunilu eqqississutaavoq.” Siunissami inuunermik naassaanngitsumik kinguneqassaaq, maannakkullu qamuuna eqqissisimanermik Guutimillu eqqisseqateqarnermik kinguneqassalluni. Anersaamik eqqarsaatiniititsiuarnerput qanoq ililluta ersersissinnaavarput? Taamaaliorsinnaavugut Guutip siulersuinera naapertorlugu iliortarnitsigut anersaamillu illernartumit siulersortittarnitsigut. Taava taassuma eqqarsartaasianut naapertuuttumik eqqarsartaaseqaleriartussaagut, eqqarsartaaserpullu ‘Guutip inatsisaanut naalatsigitikkusulissavarput’. Aamma ussernartorsioraangatta sunissarput nalornissutigisarnavianngilarput. Anersaamut naapertuuttumik eqqortumik aalajangerusuttalissaagut.

¹⁸ Anersaamut tunngasunik eqqarsaatitsinniititserusuttariaqarpugut. Kristumiutut sammisassat inuunitsinni pingaarnerpaatikkusuppavut. Sammisassat taakkua ilagaat aalajangersimasumik qinusarneq, Biibilimik atuartarneq atuaqqissaartarnerlu, ataatsimiinnernut najuuttarneq oqaluussisarnerlu. (1 Petrusi 1:13) Pilerissusipilutsinnit aqunneqartinnata anersaamut tunngasunik eqqarsaatitsinniititsisariaqarpugut, taamaalillutalu anersaaq malillugu inuussaagut. Tamanna amerlasuunik pilluaqquneqaatigissavarput inuunermik eqqissinermillu naassaanngitsunik kinguneqassammat. — Galatiamiut 6:7, 8.

[Quppernerup ataani ilanngussat]

Nassuiarsinnaaviuk?

• Mosesip inatsisaasigut suna naammassineqarsinnaanngila, Guutili sua?

• ‘Ajortip toqullu inatsisaat’ qanoq paasisariaqarpa, qanorlu ililluta tamatumannga kiffaajunnaarsinnaavugut?

• ‘Anersaamik eqqarsaatitsinniititsiuarumalluta’ susariaqarpugut?

[Atuaqqissaarnermi apeqqutit]

[Qupp. 16, 17-mi assiliartat]

Uinik malillugu imaluunniit anersaaq malillugu inuuit?