‘Nammineq paasisimasaqassutsit tatigeqinagu’

“[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu!” — USSATIT 3:5.

1, 2. (a) Unamminiarnartunik sunik nalaataqarsinnaavugut? (b) Artornartorsioraangatta, pingaarutilinnik aalajangigassaqaraangatta ussernartunilluunniit akiugaqaraangatta kina tatigisariaqarparput, aamma sooq?

CYNTHIAP * sulisitsisua sulisumi ilaannik soraarsitsereerpoq. Maanna Cynthia aamma soraarsitaassasorilerpoq. Akiligassani qanoq akilertassavai? Qatanngut arnaq alla, Pamela, nutaarsiassamik nuannersumik oqaluussissutiginnittussanik pisariaqartitsiffiusumut nuukkusuppoq. Eqqarsaatigaali nuunnissani ilumut aalajangiutissanerlugu. Samuel allamik isumakuluutissaqarpoq. Inuusuttuaraagallarami pornografiimut tunngasunik isiginnaartarpoq. Maanna 20-t sinnerlugit ukioqarpoq, taamaaliortaleqqinnissaminullu assut ussernartorsiorpoq. Ussernartoq tamanna qanoq akiorsinnaavaa?

² Illit artornartorsioraangavit, pingaarutilinnik aalajangigassaqaraangavit ussernartorsioraangavilluunniit kina tatigisarpiuk? Imminuinnaq tatigisarpit, imaluunniit ‘nanertuutigisat Jehovamut tunniuttarpiuk’? (Tussiaat 55:23) Biibilimi ima allassimavoq: “[Jehovap] isaasa sammivigaat iluartut, ikioqqullutik nillianerat siutaasa tusartarpaat.” (Tussiaat 34:16) Taamaattumik pingaaruteqangaarpoq nammineq paasisimasaqassuserput tatiginagu uummatikkut iluunngarluta Jehovamik tatiginninnissarput. — Ussatit 3:5.

3. (a) Jehovamik tatiginninneq qanoq paasisariaqarpa? (b) Sooq inuit ilaat namminneq paasisimasaqassutsiminnik tatiginnittarpat?

³ Uummatikkut iluunngarluta Jehovamik tatiginninnerput ersersittarparput taassuma piumasaatut ilioraangatta. Taassumunnga qinujuartariaqarpugut ikiorlutalu siulersorniassammatigut. Inuppassuilli Jehovamik tatiginninnissartik sapernartittarpaat. Assersuutigalugu qatanngut arnaq Lynnimik atilik allappoq Jehovamik tatiginnilluinnarnissani assut sapernartissimallugu. Sooq? Ima allappoq: “Ataatannut attaveqanngilanga, anaanamalu misigissutsikkut timikkullu isumaginikuunngilaanga. Taamaammat imminut isumaginissara ilikkapallappara.” Tamakku pissutigalugit taassuma allanik tatiginninnissani sapernartippaa. Inuit ilaasa immaqa Jehovamik tatiginninnatik piginnaasaminnik angusinnaasaminnillu tutsuiginnittarput. Assersuutigalugu imaassinnaavoq utoqqaanertaq misilittagaqarluarnini tutsuigivallaarlugu Guuti qinunikkut saaffigeqqaarnagu ilagiinnut tunngasunik suliaqartoq.

4. Allaaserisami matumani suut sammineqassappat?

⁴ Jehovap piumasaraa qinnutivut naapertorlugit inuuniarluta sapinngisarput tamaat iliortarnissarput piumasaminullu naapertuuttumik iliuuseqartarnissarput. Qanoq ililluta paasisinnaavarput isumakuluutigisavut qaqugukkut Jehovamut isumagitissanerlugit qaqugukkullu nammineq aaqqinniassanerlugit? Aalajangigassaqaraangatta suut mianersorfigisassavavut?  Sooq ussernartorsiortilluta qinusariaqarpugut? Apeqqutit taakku akissutissarsissavavut Biibilip nalaani maligassiuisut samminerisigut.

Artornartorsioraangatta

5, 6. Hizkija qanoq piva kunngi Sankeribi Jerusalemimik saassussiniarnerarmat?

⁵ Judami kunngi Hizkija pillugu Biibilimi ima allassimasoqarpoq: “[Jehova] attavigiuarpaa qimanngivillugulu, inatsisillu [Jehovap] Mosesimut tunniussimasai maleruarpai.” Aap, “Hizkijap [Jehova] Israelip Guutia tatigaa”. (2 Kunngit 18:5, 6) Ilaanni Assyriami kunngi Sankeribi taassumalu sakkutuui pissaaneqaqisut Judami illoqarfinnik pallittaalisalinnik tiguaapput Jerusalemilu tulliullugu tiguassamaarlugu. Taava kunngip Sankeribip sakkutuuni Jerusalemimut aallartippai Rabsjakelu allallu marluk Jerusalemimi innuttaasunik ajuallatsitsiartortillugillu sioorasaaritikkiartorpai. Hizkija qanoq piva? Jehovap naalaffianukarpoq imalu qinulluni: “Assyriap kunngiata assaanit annaatsigut, [Jehova] Guuterput, nunarsuarmi naalagaaffinnut tamanut ilisimaleqqullugu illit [Jehova] kisivit Guutiusutit.” — 2 Kunngit 19:14-19.

⁶ Hizkija qinnutiminut naapertuuttumik iliuuseqarpoq. Assersuutigalugu allaat naalaffimmut qinujartornissani sioqqullugu innuttani peqquai Rabsjakep ajuallatsitsiniutaanut akiniaaqqunagit. Aamma angutitami ilaat pruffiitimut Esajamut siunersiuiartortippai. (2 Kunngit 18:36; 19:1, 2) Aammattaaq Hizkija taamaallaat Jehovap iluarisaanik iliuuseqarpoq. Egyptenimut inuiaqatigiinnulluunniit allanut ikioqqunngilaq. Nalunngilaa taamaaliornissani Jehovap piumasarinngikkaa. Taamaalilluni Hizkijap nammineq paasisimasaqassutsini tatiginngilaa. Jehova tatigaa. Jehovap inngiliata Sankeribip sakkutuuisa ilaannik 185.000-inik toqutsinerata kingorna Sankeribi sakkutuuilu Ninevemut uterput. — 2 Kunngit 19:35, 36.

7. Hannap Jonallu qinnutaat qanoq tuppallersaatigisinnaavavut?

⁷ Suli allanik marlunnik maligassaqarpoq. Hannap, Elkanap Levikkuusup nuliata, meerartaarsinnaannginnini aliasuutigeqaa. Taassumali Jehova tatigaa pissutsillu atukkani pillugit oqaluttuullugu. (1 Samueli 1:9-11, 18) Jona, Jehovap pruffiitia, Jehovap peqqusaatut iliunngilaq aalisagarsuarmillu iineqarluni. Imali qinuvoq: “Annikilliorninni [Jehovamut] torlulagama akivaanga, toqusut inaata itineranit ikioqqullunga torlorfigaakkit, tusarparmalu.” (Jona 2:2, 3, 11) Tuppallernarpoq nalunagu qanorluunniit artornartorsiortigigaluarutta Jehovamut ikioqqulluta qinusinnaasugut. — Atuakkit Tussiaat 55:2, 17.

8, 9. Hizkijap, Hannap Jonallu sunut tunngasut qinnutiminni ilannguttarpaat, taakkualu maligassiaat sumik ilinniarfigisinnaavavut?

⁸ Hizkijap, Hannap Jonallu maligassiaannit paasivarput artornartorsioraangatta suut qinnutigisassanerivut. Taakku tamarmik artornartorsiornertik pillugu naalliukkaluartut, taakkua qinnutaannit erserpoq imminuinnaq eqqarsaatiginngitsut aamma ajornartorsiutitik kisiisa eqqarsaatiginngikkaat. Taakkua pingaarnerpaatippaat Guutip aqqanik ataqqinartitsinissartik, Guutimik pallorfiginninnissartik taassumalu piumasaatut iliornissartik. Hizkijap inuit Guutip aqqanik asissuinerat aliasuutigaa. Hannap Jehova neriorsorpaa ernertaartissappani ernertaani illernartuummi Shilomiittumi kiffartortussanngortikkumaarlugu. Jonalu ima oqarpoq: “[Ilinnut] neriorsuutigisakka naammassissavakka.” — Jona 2:10.

⁹ Artornartorsiornerput pissutigalugu ikioqqulluta qinugutta qinunitsinnut pissutiginiakkavut eqqarsaatigeqqissaartariaqarpavut. Uagut nammineq ajornartorsiutitta aaqqinneqarnissaat kisiat qinnutigisarparput? Imaluunniit Jehova taassumalu siunertaa qinnutitsinni eqqaasarpavut? Artornartorsioraangatta uagut nammineq ajornartorsiutivut ima isumakuluutigitigilersinnaavavut Jehovap siunertaanik taassuminngalu pallorfiginninnitsinnik pingaartitserpiarunnaarluta. Jehovamut ikioqqulluta qinugaangatta taassuma aqqata illernarsisinneqarnissaata naalakkersuisinnaatitaaneratalu uppernarsarneqarnissaata qinnutigisarnissaat eqqaamasassavarput. Qinnutitsinni  tamakku ilannguttarutsigit, tamanna isumalluartuarnissatsinnut iluaqutigissavarput, aamma qinnutigisavut ilimagisatsinnit allaanerusumik aaqqinneqaraluarpataluunniit. Ilaannikkut Jehovap qinnutivut akisarpai ajornartorsiutitta naammagalugu atornissaanut pisariaqartitatsinnik nakussatsilluta. Imaassinnaavoq ajornartorsiut ingerlaannaq aaqqinngikkaa. — Atuakkit Esaja 40:29; Filippimiut 4:13.

Aalajangigassaqaraangatta

10, 11. Joshafati qanoq iliussanerluni naluleramiuk sua?

¹⁰ Illit inuunermi aalajangigassanik pingaarutilinnik qanoq aalajangiisarpit? Aatsaat aalajangeereeraangavit Jehova qinnuigisarpiuk aalajangikkannik pilluaqquseqqullugu? Judami kunngi Joshafati eqqortumik aalajangiinermut tunngatillugu maligassaalluarpoq. Moabikkut Ammonikkullu Juda sorsuffigilerpaat, Judali akiuunnissamut naammattumik pissaaneqanngilaq. Joshafati qanoq piva?

¹¹ Biibilimi ima allassimavoq: “Joshafati annilaaqaaq; [Jehovamut] saappoq ujarniarlugu.” Pissutsit qanoq ilungersunartiginerat erseqqissarniarlugu, Joshafatip Judakkut tamaasa iisinnginniaqquai katersortillugillu Jehovamut siulersoqqullutik. Taava Judakkut Jerusalemimiullu katersorsimasut akornannut pilluni ima qinuvoq: “Guuterput, tamanna pillugu pillakkit. Sakkutoorpassuit saassussisut akiussallugit uagut naammattumik pissaaneqanngilagut. Naluarput qanoq iliussalluta, isivulli ilinnut sammipput.” Guutip ilumoortup kunngip qinnutaa tusarpaa tupinnartuliornikkullu taakku annaallugit. (2 Nalunaarsuutit 20:3-12, 17) Pingaarutilinnik, ingammik anersaakkut peqqissutsitsinnut sunniuteqarsinnaasunik, aalajangigassaqaraangatta nammineq paasisimasaqassuserput tatiginagu Jehova tatigisariaqarparput.

12, 13. Aalajangigassanut tunngatillugu kunngip Daavip maligassiaa sumik ilinniarfigisinnaavarput?

¹² Aaqqikkuminarpasitsitatsinnik unamminiagaqalerutta qanoq pissaagut? Immaqa eqqarsarpugut assingusumik misigisaqarnikuugatta aaqqipallassinnaallugu. Kunngi Daavi pillugu oqaluttuat ilaat pissutsinik taama ittunik atugaqartilluta qanoq iliortarnissatsinnik paasisaqarfigissavarput. Amalekikkut illoqarfik Siklagi saassukkamikku Daavip angutitaasalu nuliaannik meeraannillu aallarussipput. Daavip Jehova saaffigalugu ima aperaa: “Piiaasut taakku malersorukkit angusinnaanerpakka?” Jehova ima akivoq: “Malersorniakkit angussagakkit aallarussaallu aniguisillugit.” Daavi peqquneqarnermisut iliorpoq, ‘Amalekikkullu tiguagaat tamaasa utertippai’. — 1 Samueli 30:7-9, 18-20.

¹³ Amalekikkut saassussereersimalersut filisterit Israelimik saassussipput. Daavip Jehova apereqqippaa qanoq iliussanerluni, Jehovallu paasiuminartumik ima akivaa: “Sorsukkiartorit, filisterit illit assannut tunniutissagakkit.” (2 Samueli 5:18, 19) Tamatuma kinguninngua filisterit Daavi saassuteqqippaat. Daavi maanna qanoq piva? Eqqarsarsimasinnaagaluarpoq tamatumunnga assingusumik marloriarluni misigisaqareerami nalunagu qanoq iliussanerluni. Aalajangersimasinnaagaluarpoq Guutimut akeraasunut akiuunniarluni. Daavilli nammineq misilittakkani tutsuigiinnarnagit Jehova saaffigeqqippaa. Jehova maanna allatut akivoq. Daavi Jehovamut siulersoqqulluni qinusimagami qanoq qujamasutsigisimassava! (2 Samueli 5:22, 23) Siornatigut misigisimasatsinnut assingusumik unamminiagaqaraangatta nammineq misilittakkavut tutsuigiinnarnaveersaartariaqarpavut. — Atuaruk Jeremia 10:23, NV. *

14. Josvamik Gibeonikkunnillu oqaluttuaq sumik ilinniarfigisinnaavarput?

¹⁴ Naammalluinnanngitsuugatta tamatta — aamma utoqqaanertatut misilittagaqarluaraluaruttaluunniit — aalajangigassaqartilluta Jehovamut siulersoqqunngitsoornaveersaartariaqarpugut. Gibeonikkut saassuteqqunatik qinnuigiartormatik Josvap Israelimilu utoqqaanertat Jehova qinnuiginngilaat siulersoqqullutik. Gibeonikkut nunamit ungasissorsuarmeersuusaarput. Josvalli Israelimilu utoqqaanertat Jehova siunersioqqaarnagu Gibeonikkut eqqisseqatigiinnissamik  isumaqatigiissuteqarfigaat. Ilumoorpoq Jehovap isumaqatigiissut atorunnaarsinngikkaa. Taakkuali imminik siunersiueqqaannginnerata Biibilimi allaatigineqarnissaa isumagaa. Uagut aalajangiitinnata Jehova siulersoqqulluta qinnuigeqqaartuartariaqarparput. — Josva 9:3-6, 14, 15.

Ussernartorsioraangatta

15. Sooq ussernartunik akiuiumalluni qinunissaq pingaaruteqarpa?

¹⁵ Tamatta ajortiliugatta kissaatigisapiluvut akiorniarlugit sapinngisarput tamaat iliuuseqartariaqarpugut. (Romamiut 7:21-25) Taamatut akiuunnitsinni ajugaasinnaavugut. Qanoq ililluta? Jiisusip malinnitsinni peqquai ussernartunik akiuinissamut ikioqqullutik qinusassasut. (Atuaruk Lukasi 22:40). Qinusaraluarlutali imaassinnaavoq suli kissaatipiloqartarlutaluunniit eqqarsaatipiloqartartugut. Taamaappat ussernartunik akiuisinnaajumalluta ilisimassuseq Guutimut qinnutigiuartariaqarparput. Biibilimi allassimavoq Guuti ‘avoqqaarlernani tamanut tunisisartoq’. (Jaaku 1:5) Jaaku kissaatigisapilunnik akiuinissamut nakussatsissutigisinnaasatsinnik suli allamik eqqaasaqarpoq. Allappoq anersaakkut sanngiilliortup ‘ilagiit utoqqaanertaat qaaqqussagai, taakkualu Jehovap aqqani uuliamik tanissavaat qinnullugulu. Uppernikkut qinnutaasup napparsimasoq annaatissavaa.’ — Jaaku 5:14, 15.

16, 17. Ussernartumik akiuinissamut ikioqqulluta qinunissatsinnut qaqugukkut piffissaalluarnerpaassava?

¹⁶ Ussernartunik akiuisinnaassagutta qinusarnissarput pingaaruteqarpoq, aammali eqqaamasariaqarparput piffissaq eqqorlugu qinusarnissarput. Angut inuusuttoq Ussatit 7:6-23-mi eqqartorneqartoq qanoq pinersoq eqqarsaatigeriaruk. Unnuit ilaanni aqqusinermi arnamit inuunerluttumit najugaqarfigineqartutut ilisimaneqartumi angalaarpoq. Arnap taassuma angut inuusuttoq qaaqquaa. Angutip inuusuttup ussernartoq akiorsinnaanagu taanna malippaa, ussik toqutaaffissaminukartoq assigalugu. Sooq angut inuusuttoq taanna aqqusinermut tassunngarpa? Biibilimi allassimavoq ‘misilittagakitsuusoq’, aamma imaassinnaavoq kissaatigisapilunnik akiugaqartoq. (Ussatit 7:7) Qaqugukkut qinusimasuuguni taassumunnga iluaqutaanerpaasimassagaluarpa? Soorunami pitsaasimassagaluarpoq arnamit oqaluunneqarnermini qinusimasuuguni. Pitsaanerpaasimassagaluarporli aqqusinikkut tassuunaarnissani eqqarsaatigileramiulli qinusimasuuguni.

¹⁷ Ullumikkut tamatumunnga assingusumik atugaqartoqartarpoq. Assersuutigeriartigu angut pornografiimut tunngasunik isiginnaagaqarnaveersaarsuataartoq. Taassuma nittartakkat assilissanik videonillu tiingasulersaarutinik alakkaaffigineqarsinnaasutut ilisimasani alakkaraluarunigit, taava angut inuusuttoq Ussatit kapitali 7-imi eqqartorneqartoq assigiinnassagaluarpaa, ilaa? Taamaalioruni assigiinnassagaluarpaa aqqusinikkut  navianartoqaqisukkooruni. Pornografiimik isiginnaarnissamut ussernartoq akiorumallugu nittartakkat navianartulittut ilisimasatta alakkannginneranni Jehovamut ikioqqulluta qinusariaqarpugut.

18, 19. (a) Sooq ussernartunik akiuineq imaannaaneq ajorpa, tamakkuninngalu akiugaqarnitsinni qanoq ililluta ajugaasinnaavugut? (b) Illit sunissat aalajangiusimaviuk?

¹⁸ Ussernartunik ileqqupalaanilluunniit akiuineq imaannaaneq ajorpoq. Apustili Paulusi ima allappoq: “Uinngummi pilerissusiisa Anersaaq assortorpaat, Anersaallu uinik assortorpaa.” Taamaammat iliuusererusutavut iliuuserineq ajorpavut. (Galatiamiut 5:17) Tamakkuninnga akiugaqarnitsinni ajugaajumalluta, eqqarsaatipiloqalerlutaluunniit ussernartorsiuleraangatta ingerlaannaq qamannga pisumik qinusariaqartassaagut taavalu qinnutitsinnut naapertuuttumik iliuuseqartarluta. Eqqaamajuk ‘usserneqaatigisimasasi inuit atortagaattut iinnartut’, Jehovallu ikiuineratigut taassumunnga aalajaattuarsinnaavugut. — 1 Korinthimiut 10:13.

¹⁹ Qinusinnaanerput Jehovamit tunissutisiaraarput nuannersoq artornartorsioraangatta, pingaarutilinnik aalajangigassaqaraangatta ussernartunilluunniit akiugaqaraangatta iluaqutigisinnaasarput. Taassumunnga qinugaangatta paasitittarparput tatigalutigu. Aamma anersaamik illernartumik siulersorneqarlutalu nakussatsinneqarnissarput Guutimut qinnutigiuartariaqarparput. (Lukasi 11:9-13) Aap, nammineq paasisimasaqassuserput tatiginagu Jehova tatigiuartigu.

[Quppernerup ataani ilanngussat]

Eqqaamavigit?

• Jehovamik tatiginninnermut tunngatillugu Hizkija, Hanna Jonalu sumik ilinniarfigaagit?

• Daavimik Josvamillu oqaluttuanit qanoq erserpa aalajangigassaqartilluta mianersortariaqartugut?

• Sooq piffissaalluartukkut qinusarnissaq pingaaruteqarpa?

[Atuaqqissaarnermi apeqqutit]

[Qupp. 13-mi assiliartaq]

Ussernartorsiortilluta qaqugukkut qinugutta iluaqutaanerpaassava?