Silarsuarmi ajortumi ‘allamiuuneq’

‘Taaneqartut tamakku tamarmik uppersuseqarnertik pigalugu nassuerput nunami takornartaallutik allamiuullutillu.’ — HEBRÆERIT 11:13.

1. Kristumiut ilumoortut silarsuarlu manna pillugit Jiisusi qanoq oqarpa?

JIISUSI ajoqersukkani pillugit ima oqarpoq: “Silarsuarmiipput.” Aammali ima oqarpoq: ‘Silarsuarmut ilaanngillat, soorlu uanga silarsuarmut ilaanngitsunga.’ (Johannesi 17:11, 14, NV) Oqaaserisaanit taakkunannga erseqqippoq kristumiut ilumoortut ‘silarsuarmik’ matumannga, Saatanimik guuteqartumik, qanoq isiginnittaaseqassanersut. (2 Korinthimiut 4:4) Kristumiut silarsuarmi inuugaluarlutik tamatumunnga ilaanngillat. Taamaattumik kristumiut Biibilimi ‘takornartanik’ taaneqarput. Silarsuarmi matumani ‘allamiuupput’. — 1 Petrusi 2:11.

“Allamiuusutut” inuupput

2, 3. Sooq oqarsinnaavugut Enoki, Noa aamma Aaperaat Saralu “takornartaallutik allamiuullutillu” inuusut?

² Jehovap kiffai aalajaatsut silamiunit allaanerujuaannarput, soorlu Enoki Noalu.  Biibilimi allassimavoq taakkua Guuti saqeqatigigaat. (1 Mosesi 5:22-24; 6:9) Sapiillutik Jehovap Saatanip silarsuaanut ajortumut eqqartuussutai oqaluussissutigaat. (Atuakkit 2 Petrusi 2:5; Judasi 14, 15). Inuit avatangiisitik ajortulioraluartut eqqortuliortarput. Taamaattumik allassimavoq Enoki “Guutimit iluarisaasimasoq” Noalu “naligisami akornanni assuarnaatsumik inuuseqartoq”. — Hebræerit 11:5; 1 Mosesi 6:9.

³ Aamma Aaperaat Saralu ilinniarfigisinnaavavut. Guutip peqqusinera naalallugu Urimi Kaldæamiittumi angerlarsimaffitsik ilorrisimaarnartoq qimallugu nunami takornakkaminni tupermiuullutik inuulerput. (1 Mosesi 11:27, 28; 12:1) Apustili Paulusi ima allappoq: “Uppernikkut Aaperaat naalappoq aallaqquneqarami, aallarporlu nunamut pigiligassaminut ornigassi nalullugu. Uppernikkut nunami neriorsuutigisami takornartatut ittumi nunassippoq tupernilu ineqarluni Iisaaq Jaakulu neriorsuutigisamik kingornusseqataasussat peqatigalugit.” (Hebræerit 11:8, 9) Jehovap kiffai taakku pillugit Paulusi aamma ima allappoq: “Taaneqartut tamakku tamarmik uppersuseqarnertik pigalugu toqupput neriorsuutit suli eqquutinngitsut. Eqquunnissaat kisiat ungasianit takusinnaasimavaat ilassisimallugulu, nassuerpullu nunami takornartaallutik allamiuullutillu.” — Hebræerit 11:13.

Israelikkunnut mianersoqqussut

4. Jehovap Israelikkut nunassaannik tunitinnagit suna mianersoqqussutigaa?

⁴ Aaperaat kinguaarpassuaqarpoq. Guutillu taakkua inuianngortippai Israelikkuusut inatsiseqalersillugit nunaqalersillugillu. (1 Mosesi 48:4; 5 Mosesi 6:1) Israelikkut eqqaamasariaqarpaat nunamik piginnittuiusoq tassaasoq Jehova. (3 Mosesi 25:23) Nunamik attartuisutut piginnittup kissaatai ataqqisariaqarpaat. Aamma Israelikkut eqqaamasariaqarpaat ‘inuup timiusaannaq inuussutiginngikkaa’ aamma ajunngitsut tamarmik Jehovaminngaanneersuusut. (5 Mosesi 8:1-3) Taamaattumik Jehovap nunassaannik tunitinnagit ima mianersoqquai: “[Jehovap] Guutivit isertissavaatit nunamut ilinnut tunniukkumallugu uppernarsaalluni neriorsuutigisaminut siuaasannut Aaperaamut, Iisaamut Jaakumullu. Tamaaniipput illoqarfissuit kusanartut illit sanaarinngisatit, illorsuit ulikkaartut alutornartunik assigiinngitsorpassuarnik illit katersugarinngisannik, imiisivilianik illit ikuttagarinngisannik, viinnequteqarfinnik olivenequteqarfinnik illit ikkutarinngisannik. Qaarsillarlutit nerereeruit mianersussaatit [Jehova] . . . isumakkiissannginnakku.” — 5 Mosesi 6:10-12.

5. Sooq Jehovap Israelikkut innuttariumajunnaarpai, inuiaallu nutaat kikkut toqqarpai?

⁵ Israelikkut Jehovap mianersoqqussutaa sumiginnarlugu killormut iliorput. Nunami neriorsuutigisami illuni ilorrisimaarnartuni inuuleramik nerisassanillu viinninillu naammattorsuarnik peqaleramik Jehova puiorpaat. Nehemiap nalaani Levikkuusut ilaasa qanoq pisoqarsimanera kanngusuutigalugu Nehemia 9:25-27-mi allassimasutut oqarput. (Atuakkit). Oqarput inuit ‘nerisut qaarsillarlutik puallarlutillu’. Israelikkut Guutimut pikitsitsipput pruffiitillu taassuma mianersoqqusiartortitai toqullugit. Taamaattumik Jehovap akeraannit naalagaaffigineqalernissaat akueraa. (Hosea 13:6-9) Kingusinnerusukkut Israelikkut Romamiunit naalagaaffigineqartillutik Missiarsi neriorsuutigisaq toquppaat! Taamaattumik Jehovap innuttariumajunnaarlugit inuiaat nutaat toqqarpai, tassaalersoq “Israeli Guutip pigisaa”. — Galatiamiut 6:16; Matthæusi 21:43; Apustilit Suliaat 7:51, 52.

‘Silarsuarmut ilaanngillat’

6, 7. (a) Jiisusip ajoqersukkani silarsuarlu pillugit oqaasii qanoq nassuiassavigit? (b) Petrusi naapertorlugu sooq kristumiut ilumoortut silarsuarmut ilaassanngillat?

⁶ Allaaserisap matuma aallaqqaataani paasivarput Jiisusi, ilagiinnut kristumiunut niaquusoq, oqartoq ajoqersukkani Saatanip silarsuaanut ilaassanngitsut. Jiisusi toqussi sioqqutitsiarlugu ajoqersukkaminut ima oqarpoq: “Silarsuarmit  pisuugussi [Silarsuarmut ilaasuugussi, NV] silarsuup nammineq ilamisut asassagaluarpaasi; silarsuarmilli pisuunngilasi [silarsuarmulli ilaanngilasi, NV]. Uangali silarsuarmit qinerpassi, taamaattumik silarsuup uumissorpaasi.” — Johannesi 15:19.

⁷ Piffissap ingerlanerani Romamiut naalagaaffigisaanni sumiiffippassuarni kristumiut najugaqartitilerput. Kristumiut suli silarsuarmut ilaasussaanngillat. Kristumiuussuseq siaruariartortillugu kristumiut silarsuarmit iluarisaaniarsarissappat tamatumunngalu naleqqussarlutillu ilaalertussaappat? Naamik. Sumiikkaluarunilluunniit Saatanip silarsuaanit avissaarsimasariaqarput. Jiisusip toqunerata kingorna ukiut 30-t missaat qaangiuttut apustili Petrusi kristumiunut siullernut ima allappoq: “Asasakka! Oqaaqqissaarpassi allamiuusutut takornartaasutullu inuutillusi uinngup pilerigisai tarnimut sorsuttut ileqqoreqqunagit. Guutimik nalusut akornanni ajunngitsumik inuugitsi.” — 1 Petrusi 1:1; 2:11, 12.

8. Oqaluttuarisaanermik ilisimatuup qanoq ersersippaa kristumiut siulliit silarsuarmut ilaanngitsut?

⁸ Romamiut naalagaaffianni kristumiut “takornartaallutik allamiuullutillu” inuupput. Oqaluttuarisaanermik ilisimatooq allappoq ingasattumik malersugaakulasartut. Oqarpoq taakku upperisarsiornermi eqqunngitsumi ileqqulersuutinut peqataaneq ajoramik Guutimut uppertuunnginnerarneqartut. Kristumiut innuttaaqatigiinni inuunermut — nalliuttorsiornernut kikkunnullu tamanut aliikkusersuutinut guutipilussiornermit kinguaassiuutitigullu inuunerlunnermit sunnerneqangaarsimasunut — akuliunneq ajoramik “inunnik uumissuisutut” taaneqartarput.

Silarsuarmik tamakkiisumik atuinngilagut

9. Qanoq ersersittarparput ‘inunnik uumissuisuunata’?

⁹ ‘Silarsuarmut ajortumut maannakkut ittumut’ ilaanngilagut, soorlu Kristumiut siulliit ilaasimanngitsut. (Galatiamiut 1:4) Tamanna pissutigalugu inooriaaserput inuppassuarnit paasineqarneq ajorpoq. Allaat inuit ilaannit uumigineqartarpugut. Uagulli, inuit ilaasa isumaqarnerattut, ‘inunnik uumiginnittuunngilagut’. Inunnik asannittuulluta ersersittarparput illumiit illumut angalaarluta Guutip naalagaaffia pillugu nutaarsiassap nuannersup tamanut oqaluttuarineratigut. (Matthæusi 22:39; 24:14) Jehovap naalagaaffia oqaluussissutigisarparput upperigatsigu  tamatuma nunami naalakkersuisut naammalluinnanngitsut tamaasa qanittukkut piuneerutitissagai. Naalagaaffik tamanna, Kristusip kunngiuffigisaa, silarsuarmik nutaamik naapertuilluassuseqarfiusumik pilersitsissaaq. — Danieli 2:44; 2 Petrusi 3:13.

10, 11. (a) Kristumiut silarsuarmik qanoq atuippat? (b) Sutigut silarsuaq tamakkiisumik atunngilaat?

¹⁰ Saatanip silarsuaa piuneerutingajalermat nalunngilarput ilorrisimaarluni inuuniarnissamut maannakkut piffissaanngitsoq. Apustili Paulusi ima allappoq: “Piffissaq sivikilleqaaq.” Imalu nangippoq pisisut “pissarsisimanngitsutut, silarsuarmillu atuisut atuinngitsutut [issasut]. Tassami silarsuaq maannakkutut ittoq aserorumaarpoq.” (1 Korinthimiut 7:29-31) Ullumikkut silarsuarmik qanoq atuisarpugut? Assersuutigalugu teknikkikkut atortorissaarutit attaveqaatillu nutaat atortarpavut. Nunarpassuarni oqaatsinilu assigiinngitsorpassuarni Biibilimik ilinniartitsigaangatta tamakku iluaqutigisarpavut. Aamma ullormut inuussutissatsinnik pisisinnaajumalluta sulinikkut aningaasarsiortarpugut. Silarsuarli tamakkiisumik atunngilarput. Tassa aningaasat, pigisavut suliffippullu inuunitsinni pingaarnerpaajunngillat. — Atuakkit 1 Timotheusi 6:9, 10.

¹¹ Kristumiut anersaakkut eqqumasut qaffasissumik ilinniagaqarnermut tunngatillugu silarsuarmik tamakkiisumik atuinaveersaartarput. Silarsuarmi matumani inuppassuit isumaqarput universitetimi atuartariaqarlutik, suliffigissaartariaqarlutik aningaasarsiorluartariaqarlutillu. Kristumiut allamiuusutut inuupput anguniagaallu allaallutik. ‘Qaffanniarsarineq ajorput’. (Romamiut 12:16; Jeremia 45:5) Jiisusip mianersoqqussutaa una naalappaat: “Sissueritsi mianersorlusilu piumatussusermut sumulluunniit, inuummi inuuneranut aalajangiisuunngilaq sumik pigisaqarnera naammattorsuarnilluunniit pigisaqaraluaruni.” (Lukasi 12:15) Tassa kristumiut inuusuttut eqqaamasariaqarpaat Jehovamut kiffartorneq pingaarnerpaasoq. Pisariaqavissut pisinnaajumallugit naammattumik ilinniagaqartariaqarput uummatikkut, tarnikkut, isummakkullu iluunngarlutik nukitillu tamakkerlugit Jehovamut kiffartorsinnaajumallutik. (Lukasi 10:27) Taamaaliorunik ‘Guutimi pisuujussapput’. — Lukasi 12:21; atuakkit Matthæusi 6:19-21.

Pigisat isumakuluutigeqinasigit

12, 13. Sooq Jiisusip Matthæusi 6:31-33-mi oqaasiinut naalannerput silamiunit allaassutigaarput?

¹² Aamma pigisat pillugit eqqarsartaaserput silamiunit allaassutigaarput. Jiisusi ima oqarpoq: “Isumakuluuteqassanngilasi ima aperalusi: Suna nerissavarput? Suna imissavarput imaluunniit suna atissavarput? Tamakku tamaasa Guutimik nalusut ujartarpaat, ataatassilu qilammiittup nalunngilaa tamakku tamaasa pisariaqartikkisi. Guutilli naalagaaffia iluarneralu ujaqqaarsigit, taava tamakku tamarmik ilanngullutik ilissinnut tunniunneqarumaarput.” (Matthæusi 6:31-33) Uppeqaterpassuatta namminneq misigisimavaat Ataatatta qilammiusup pisariaqartitaminnik isumassoraatik.

¹³ Naammagittartuuneq iluaqutaavoq. (1 Timotheusi 6:6) Tamanna silamiut eqqarsartaasiannit allaaneruvoq. Assersuutigalugu inuusuttut aappartaaraangamik ingerlaannaq suut tamaasa kissaatigisarpaat. Kusanartumik akisuunillu pisatsersukkamik angerlarsimaffittaarusullutillu kusanartumik biileqarusullutillu atortorissaarutinik nutaajunerpaanik peqarusupput. Kristumiulli allamiuusutut inuusut kissaatitik inornartuutinnaveersaarlugillu killilersimaartarpaat. Amerlasuut Jehovamut kiffartornermi piffissaqarnerujumallutik nukissaqarnerujumallutillu piffissartik aningaasaatitillu tamakkununnga atorneq ajoraat takullugu nuannerpoq. Uppeqatitta ilaannik pioneritut, Betelimi sulisutut, angalalluni kiffartortutut ajoqersuiartortitatulluunniit kiffartorsinnaasoqarpoq. Taakkua Jehovamut uummatikkut iluunngarlutik kiffartornerat qujamasuutigingaarparput.

14. Jiisusip assersuusiaata ilaat sumik ilinniarfigisinnaavarput?

 ¹⁴ Jiisusi assersuusiami ilaanni oqarpoq ‘silarsuarmi matumani isumakuluutit pisuussutillu nakutitsisarnerisa’ Guutimut kiffartornitsinni qasukkaallatsissinnaagaatigut. (Matthæusi 13:22) Silarsuarmi maani allamiuusutut inuunissarput aalajangiusimagutsigu taamatut pisoqassanngilaq. Isitsinnik ‘qaammaaritsitsineq’ isumaqarpoq Guutimik kiffartornitsinnik eqqumaffiginninneq taassumalu naalagaaffiata soqutigisaanik salliutitsineq. — Matthæusi 6:22.

‘Silarsuaq nungussaaq’

15. Silarsuaq manna pillugu Johannesi qanoq allappa?

¹⁵ Kristumiut ilumoortut “allamiuusutut takornartaasutullu” inuunerannut pissutaasoq pingaarutilik tassaavoq upperigamikku Saatanip silarsuaa qanittukkut piuneerussaassasoq. (1 Petrusi 2:11; 2 Petrusi 3:7) Tamatuminnga upperinninnerput aalajangiinitsinnut, kissaatitsinnut anguniakkatsinnullu aalajangiisuuvoq. Apustilip Johannesip kristumiut allaffigai silarsuarmik tamatumaniittunilluunniit asanneqqunagit ‘silarsuaq piumatussusialu nungussammata, Guutilli piumasaanik iliortoq naassaanngitsumik atassaaq’. — 1 Johannesi 2:15-17.

16. Qanoq ersersissinnaavarput Jehovap innuttaanut immikkoortitanut ilaalluta?

¹⁶ Jehovap Israelikkut oqarfigai naalakkunikku ‘inuiaqatigiinnit tamanit immikkoortillugit pigisassarsiariumaarini’. (2 Mosesi 19:5) Israelikkut Guutimut naalakkaangata pallorfiginninnerat inooriaasiallu inuiaqatigiit allat pallorfiginninnerannit inooriaasiannillu allaanerusarput. Aamma ullumikkut Jehovap innuttai Saatanip silarsuaanit immikkoorput. Biibilimi ima allassimavoq: “Perorsarneqarpugut naaggaarsinnaassalluta iluaatsuussusermut silarsuarmiullu kajungerisaannut, silatusaarluta peqqusersuillutalu Guutimillu mianerinnittuulluta silarsuarmi matumani inuusinnaaqqulluta utaqqitillugit neriuutitta pilluarnartup naammassineqarnissaa Guutittalu angingaartup annaassisitta Jiisusi-Kristusip naalannassuseqarluni saqqummernissaa. Imminut tunniuppoq uagut pilluta inatsisaatsuliornernit sunilluunniit tamanit utertikkumalluta pigisaqalerumallunilu inuiannik minguitsunik ajunngitsuliornissamillu noqqaassuteqartunik.” (Titusi 2:11-14) Jehovap innuttai tassaapput kristumiut tanitat aamma ‘savat allat’, taakkuninnga tapersersuisut, millionillit. — Johannesi 10:16.

17. Sooq tanitat savallu allat silarsuarmi ajortumi matumani allamiuusutut inuusimanertik nuannaarutigiuaannassavaat?

¹⁷ Tanitat ‘neriuutaat pilluarnartoq’ tassaavoq Kristusimik qilammi naalakkersueqateqarnissaat. (Saqqummersitat 5:10) Savat allat nunarsuarmi naassaanngitsumik inuunissaq neriuutigaat. Neriuut tamanna piviusunngorpat savat allat silarsuarmi ajortumi allamiuujunnaassapput. Kusanartumik angerlarsimaffeqalissapput sorpassuarnillu mamartunik nerisassaqarlutillu imigassaqassapput. (Tussiaat 37:10, 11; Esaja 25:6; 65:21, 22) Israelikkut puiuinerattut Jehova puiussanngilaat. Eqqaamajuassavaat pigisatik tamarmik, ‘nunarsuup tamarmi Guutianit’, Jehovaminngaanneersuusut. (Esaja 54:5) Tanitat savallu allat nuannaarutigiuaannassavaat silarsuarmi ajortumi matumani allamiuusutut inuusimanertik.

Qanoq akissavit?

• Itsaq Guutip kiffai aalajaatsut allamiuusutut qanoq inuusimappat?

• Kristumiut siulliit silarsuarmi qanoq inuuppat?

• Kristumiut ilumoortut silarsuarmik tamakkiisumik qanoq atuinngillat?

• Sooq nuannaarutigissavarput silarsuarmi ajortumi matumani allamiuusutut inuusimanerput?

[Atuaqqissaarnermi apeqqutit]

[Qupp. 21-mi assiliartaq]

Kristumiut siulliit aliikkusersuutit nakuusernertallit kinguaassiuutitigullu inuunerlunnertallit aliikkusersuutiginaveersaartarpaat