‘Pigaaqatigisinga.’ — MATTHÆUSI 26:38.

1-3. Jiisusip nunarsuarmi inuunerani unnummi kingullermi apustilit sumik kukkussuteqarpat, qanorlu nalunngilarput kukkunertik ilinniutigigaat?

JIISUSIP nunarsuarmi inuunerani unnummi kingullermi pisimasoq takorlooriaruk. Jiisusi apustilini aalajaatsut ilagalugit nuannarisami ilaanni, Naatsiivimmi Getsemanemi, Jerusalemip kangiatungaaniittumiippoq. Jiisusi pingaarutilinnik eqqarsaatigisassarpassuaqarami kisimiittariaqarpoq qinuniarluni. — Matthæusi 26:36; Johannesi 18:1, 2.

² Apustilit Petrusip, Jaakup Johannesillu Jiisusi naatsiivimmut ilorparteqatigaat. Jiisusip ima oqarfigai: “Maaniigitsi pigaaqatigalunga.” Taava qinuniarluni qimagupppoq. Utermalli ikinngutai sinipput. Taava ilungersorluni ima oqarfigai: “Eqqumagitsi.” Taamaakkaluartoq marloriarluni qinujartoreerluni uterfigisarpai sinittut! Unnuk taanna kingusinnerusukkut apustilit tamarmik anersaakkut eqqumannginnerat erserpoq. Allaat Jiisusi qimappaat qimaallutillu! — Matthæusi 26:38, 41, 56.

³ Qularnanngitsumik apustilit eqqumannginnertik aliasuutigaat. Angutit aalajaatsut taakku kukkussutertik paasiaarpaat. Biibilimi Apustilit Suliaanni ersersinneqarpoq eqqumanermut tunngatillugu taakkua maligassaallualernerat. Ukiuni hundredelinni siullerni kristumiut allat taakkua maligassiaat eqqumanissaminnut iluaqutigisimassavaat. Maannakkullu eqqumanissarput aatsaat taama pisariaqartigaaq. (Matthæusi 24:42) Maanna oqaluttuat Apustilit Suliaanniittut pingasut ilinniarfigisinnaasavut eqqumanissatsinnullu iluaqutaasinnaasut sammilaariartigit.

SUMI OQALUUSSEQQUNEQARNERTIK EQQUMAFFIGAAT

4, 5. Paulusi angalaqataalu anersaamit illernartumit qanoq siulersorneqarpat?

⁴ Siullermik, apustilit sumi oqaluusseqquneqarnertik  eqqumaffigaat. Biibilimi ersersinneqarpoq Jiisusip Paulusi angalaqataalu angalaneranni nalinginnaanngitsumi Guutip anersaava atorlugu siulersorai. (Apustilit Suliaat 2:33) Angalanerat malinnaaffigeriartigu. — Atuakkit Apustilit Suliaat 16:6-10.

⁵ Paulusi, Silasi Timotheusilu illoqarfimmit Lystramit Galatiap kujasinnerusortaaniittumit aallarput. Ullualuit qaangiuttut Romamiut aqquserngannut nunap immikkoortuanut Asiap kitaatungaanukartumut inuppassualimmut apuupput. Aqqusinikkut tassuunaarusupput illoqarfiit inunnit tusindilinnit Kristusi pillugu tusarliussamik pisariaqartitsisunit najugaqarfigineqartut tikeraarniarlugit. Tassuunaarnissaminulli akornuserneqarput. Versi 6-imi ima allassimavoq: “Nunap immikkoortuani Asiami oqaatsip oqaluussissutiginissaanut Anersaap Illernartup akornutissaqartilermatik Frygia nunalu Galatia aqqusaarlugit ingerlapput.” Biibilimi qanoq akornuserneqarnerat nassuiarneqanngilaq, angalasulli nunap immikkoortuanut Asiamut oqaluussiartoraluarnerat anersaamit illernartumit akornuserneqarpoq. Paulusip angalaqataasalu paasivaat anersaap illernartup siulersuineratigut Jiisusip allamukarnissartik kissaatigigaa.

6, 7. (a) Paulusi angalaqataalu Bityniap eqqaani qanoq misigisaqarpat? (b) Oqaluussisartut taakku qanoq aalajangerpat, tamannalu qanoq kinguneqarpa?

⁶ Paulusi angalaqataalu sumukarpat? Versi 7-imi ima allassimavoq: “[Mysiap] eqqaanut pigamik Bityniamukarniaraluarput, Jiisusilli anersaavata taamaalioqqunngilai.” Asiamut oqaluussiartoraluarnertik Guutip anersaavanit akornuserneqaraluartoq avannamukarput illoqarfinni Bityniamiittuni oqaluussiniarlutik. Bityniamulli qanillimmata Jiisusip anersaaq illernartoq atorlugu unitsippai. Angutit unitsinneqaqqinnertik eqqumiigisimassagunarpaat. Nalunngilaat suna oqaluussissutigissanerlugu aamma qanoq oqaluussissanerlutik, naluaalli sumi oqaluussissanerlutik. ‘Matu’ Asiamukartoq kasuttoraluarpaallusooq, ammarneqanngilarli. Aamma ‘matu’ Bityniamukartoq ‘kasuttorsimagaluarpaat’, aammali taanna ammarneqanngilaq. Oqaluussisartut aallussilluartut taakku uniinnarpat? Naamerluinnaq!

⁷ Taava aalajangerput eqqumiippasissinnaasumik. Versi 8-mi ima allassimavoq: “Taava Mysiakkoorlutik samunga Troasimut pipput.” Tassa angalasut kilometerit 550 missaat pisullutik kimmukarsimapput. Illoqarfiit arlallit sanioqquallugit illoqarfimmut umiarsualivittalimmut Troasimut pipput. Umiarsualivimmit tassannga umiarsuarmik Makedoniamukartoqarsinnaavoq. Versi 9-mi ima nangippoq: “Unnuami Paulusi takorluugaqarpoq angutip Makedoniamiup qinnuigigaani oqarluni: ‘Makedoniamut ikaarlutit ikioriartortigut!’” Kiisami Paulusip angalaqataasalu paasivaat sumi oqaluussissanerlutik. Pingajussaanik matu kasuttorfigaallusooq, massakkulli ammarneqarpoq! Erniinnaq umiarsuarmik Makedoniamut aallarput.

8, 9. Paulusip angalaneranik oqaluttuaq qanoq ilinniarfigisinnaavarput?

⁸ Oqaluttuaq tamanna qanoq ilinniarfigisinnaavarput? Maluginiaruk aatsaat Paulusi Asiap tungaanut aallarami Guutip anersaavanit siulersorneqalersoq. Aamma aatsaat Paulusi Bityniamut qanilligami Jiisusimit siulersorneqaqqilerpoq. Aammalu aatsaat Paulusi Troasimut pigami Jiisusimit Makedoniamukaqquneqarpoq. Jiisusi suli ilagiinnut niaquugami tamatumunnga assingusumik siulersorsinnaavaatigut. (Kolossemiut 1:18) Assersuutigalugu pionerinngornissat oqaluussisartunilluunniit pisariaqartitsiffiunerusumut nuunnissat immaqa eqqarsaatigisimassavat. Immaqali aatsaat anguniakkat anguniarlugu iliuuseqareeruit Jiisusip Guutip anersaava atorlugu siulersorumassavaatit. Tamanna biilernermut assersuunneqarsinnaavoq. Biilertup biili aatsaat aallareeraangat talerpimmut saamimmulluunniit sangutissinnaalertarpaa. Taamatuttaaq kiffartornitsinni iliuuseqarnerorusuleraangatta Jiisusip siulersorsinnaavaatigut, aatsaalli  ilungersorluta anguniagarput anguniarlugu iliuuseqarutta.

⁹ Taavami iliuuseqarnerit ingerlaannaq kinguneqarluanngippat? Uniinnassavit Guutip anersaavanit siulersorneqanngissoralutit? Eqqaamajuk Paulusip ilimagisaatut ingerlaannaq pisoqanngimmat. Paulusi kasuttortuarporlusooq matup ammarneqarnissaata tungaanut. Illittaaq “sulinissamut matu angisooq” ujartuarukku pilluaqquneqarsinnaavutit. — 1 Korinthimiut 16:9, NV.

“QINUNERMUT TUNNGATILLUGU EQQUMAGITSI”

10. Sumit erserpa eqqumajuarumalluta qinujuartariaqarnerput?

¹⁰ Ukiuni hundredelinni siullerni kristumiunit qatanngutitsinnit ilinniarfigisinnaasatta aappaat sammilaariartigu. Taakku ‘qinunermut tunngatillugu eqqumapput’. (1 Petrusi 4:7, NV) Eqqumajuarumalluta qinujuartariaqarpugut. Eqqaamakkit Jiisusip Naatsiivimmi Getsemanemi tigusarineqanngitsiarluni apustiliminut pingasunut oqaasii uku: “Eqqumagitsi, qinugitsilu [qinujuaritsilu, NV].” — Matthæusi 26:41.

11, 12. Sooq aamma qanoq Herodesip kristumiut, aamma Petrusi, ajortumik pisarpai?

¹¹ Petrusip Naatsiivimmi Getsemanemi Jiisusip oqaasii taakku tusarpai. Kingusinnerusukkut nammineq misigaa allat qinnutaasa qanoq pingaaruteqartigisinnaanerat. (Atuakkit Apustilit Suliaat 12:1-6). Apustilit Suliaanni kapitali 12-imi versini siullerni allassimavoq Herodesip juutit qujanarniarfigalugit kristumiut ajortumik pisarai. Taassuma nalugunanngilaa Jaaku apustiliusoq Jiisusimullu attaveqarluartuusimasoq. Taamaattumik Herodesip Jaaku “panamik toqutaatippaa”. (Versi 2) Ilagiinniittut Jaaku asangaaramikku misilinneqangaarsimassapput!

¹² Taava Herodesi sua? Versi 3-mi ima allassimavoq: “[Herodesip] malugigamiuk juutit tamanna iluarigaat ilallugu Petrusi tigusaatippaa.” Tamannali sioqqullugu apustilit ilaat, aamma Petrusi, tupinnartuliornikkut parnaarussivimmit aniguisinneqarput. (Apustilit Suliaat 5:17-20) Herodesip tamanna nalugunanngilaa. Herodesip Petrusip parnaarussivimmit qimaaqqinnginnissaa qulakkeerusuppaa. Taamaattumik “[sakkutuut] immikkoortut sisamanngorlugit tamaasa sisamanik inuttalerlugit paarsisussanngortippai. Poorskereerpammi inunnut [Petrusi] sassartilersaarpaa.” (Versi 4) Takorlooriaruk! Herodesip sakkutuut marluk akornanni Petrusi kalunnernik qilersortippaa qimaannginniassammallu sakkutuunik 16-inik ulloq unnuarlu paarsisulerlugu. Poorskip kingorna juutit nuannaartinniarlugit Herodesip Petrusi toqutaatilersaarpaa. Pisumi taama alianartigisumi qatanngutit susinnaagaluarpat?

13, 14. (a) Ilagiinniittut Petrusi parnaarunneqarmat suppat? (b) Ilagiinniittut qinunerat qanoq ilinniarfigisinnaavarput?

¹³ Ilagiinniittut sussanerlutik nalunngilluinnarpaat. Versi 5-imi ima allassimavoq: “Petrusi parnaarussivimmiititaavoq, ilagiillu Guutimut [ilungersorlutik, 1936] qinnuttuarpaat.” Petrusi qamannga pisumik qinnuppaat. Jaakup toqutaanera pissutigalugu neriuutaarutinngillat, eqqarsalinngillalluunniit qinnutitik asuliinnaasut. Nalunngilaammi Jehovap imminik pallorfiginnittut aalajaatsut qinnutaat pingaartingaarai. Taakkua qinnutaat piumasaminut naapertuuppata akissavai. — Hebræerit 13:18, 19; Jaaku 5:16.

¹⁴ Ilagiinniittut iliuuseqarnerat qanoq ilinniarfigisinnaavarput? Eqqumajuarumalluta imminuinnaq qinnunnata aammali qatanngutivut qinnuttariaqarpavut. (Efesosimiut 6:18) Qatanngutinik maanna misilinneqartunik nalunngisaqarpit? Ilaat malersorneqarnermit pinngortitamiluunniit ajunaarnersuarnit nalaanneqartarput. Allat nunani oqaluussinermik inerteqquteqarfiusuni najugaqarput. Pitsaassaaq qatanngutit taakku ilungersorluta qinnuttarutsigit. Immaqa qatanngutinik ajornartorsiuteqarnerat malunnanngilluinnartunik nalunngisaqarputit. Taakku  immaqa ilaqutariittut ajornartorsiuteqarput, nikallungasinnaallutilluunniit peqqiilliuuteqarsinnaapput. Pitsaassaaq Jehova, ‘qinnutinik tusartartoq’, qinnuigigaangakku taakku allalluunniit aqqi taallugit eqqaasarukkit. — Tussiaat 65:3.

15, 16. (a) Petrusi parnaarussivimmit Jehovap inngilianit qanoq aniguisinneqarpa? (Assiliartaa takuuk) (b) Sooq Jehovap Petrusimik aniguisitsineranik eqqarsaatiginninnerput uppernitsinnut nakussatsinnarpa?

¹⁵ Petrusi qanoq piva? Unnuk kingulleq Petrusi parnaarussivimmi sinitsillugu tupinnartumik pisoqarpoq. (Atuakkit Apustilit Suliaat 12:7-11). Una takorlooriaruk: Tassanngaannaq ini parnaarussivimmiiffigisaa qaamanermit sakkortuumit qinngorneqarpoq. Petrusi sakkutuunut marlunnut kalunnernik qilersorneqarsimavoq, sakkutuulli taakkua inngili sanianiittoq takunngilaat. Inngilip makikkasuaqquaa. Kalunnequtaalu assaanit katapput! Inngilip Petrusi sakkutuut inip silataaniittut sanioqqullugit aneqatigaa. Isaaffik saviminiusoq tupinnartuliornikkut ammarneqarmat Petrusi inngililu anipput. Parnaarussiviup silataanut pigamik inngili qimaguppoq, Petrusilu aniguisinneqarpoq!

¹⁶ Jehovap kiffaminik aniguisitsisinnaaneranik eqqarsaatiginneqqissaarnerput uppernitsinnut nakussatsissutigaarput. Soorunami uagut ullumikkut Jehovamit tupinnartuliornikkut aniguisinneqarnissarput naatsorsuutiginngilarput. Jehovalli innuttaminik ikiuinissamut pissaaneqarnera upperilluinnarparput. (2 Nalunaarsuutit 16:9) Anersaani illernartoq sunniinertooq atorlugu misilinneqarnerit suulluunniit naammagalugit atornissaannut nakussatsissinnaavaatigut. (2 Korinthimiut 4:7; 2 Petrusi 2:9) Qanittukkullu Jehovap Jiisusi toqusimasunik, ‘parnaaruneqarsimasutut’ ittunik, millionilippassuarnik makititsinissaanut pissaaneqartikkumaarpaa. (Johannesi 5:28, 29) Ullumikkut misilinneqarnitsinni Guutip neriorsuutaanik upperinninnerput sapiillissutigingaarsinnaavarput.

MISILINNEQARALUARLUTIK PEQQISSAARLUTIK NALUNAAJAAJUARPUT

17. Paulusi qanoq maligassaalluarpa suliap nukinginnassusianik ilisimaarinninneq oqaluussinermilu aallussilluarneq eqqarsaatigalugu?

¹⁷ Maanna apustilit eqqumajuarnerannit ilinniarfigisinnaasatta pingajuat sammissavarput: Misilinneqaraluarlutik peqqissaarlutik nalunaajaajuarput. Eqqumajuarumalluta suliatta nukinginnassusia ilisimaaralugu aallussilluarluta oqaluussisariaqarpugut. Tamatumunnga tunngatillugu apustili Paulusi maligassaalluarpoq. Sapinngisani tamaat oqaluussisarpoq. Angalasupilussuusarpoq ilagiippassuarnik pilersitsiortorluni. Misilinneqangaaraluarluni suliap nukinginnassusia ilisimaaralugu aallussilluarluni oqaluussiuarpoq. — 2 Korinthimiut 11:23-29.

18. Paulusi parnaarussatut Romamiitilluni qanoq oqaluussiuarpa?

¹⁸ Atuakkami Apustilit Suliaanni kapitali 28-mi Paulusi kingullermik eqqaaneqarpoq. Paulusi Romamut Neromut sassartinneqarfissaminut  tikippoq. Paulusi parnaarussaavoq, immaqa sakkutuumut kalunnernik pitunneqarsimalluni; taamaakkaluartoq aallussilluarluni nalunaajaajuaannarpoq! Paulusi allanut oqaluussinissaminut periarfissarsiortuaannarpoq. (Atuakkit Apustilit Suliaat 28:17, 23, 24). Apuukkami ullut pingasut qaangiuttut “Paulusip juutini pingaarnertaasut katersortippai” oqaluussiffigiumallugit. Juutit tamaanimiut ullormi naapiffissamittut isumaqatigiissuteqarfigisaminni Paulusi naapeqqippaat, maannali Paulusi peqqissaarnerulluni nalunaajaavoq. Versi 23-mi ima allassimavoq: “Ullormi naapiffissatut isumaqatigiissutigineqartumi suli amerlanerit najugaanut ornippaat; ullaaralaannguamiit unnuk tikillugu taakkununnga nassuiaavoq nalunaajaallunilu Guutip naalagaaffianik, Mosesillu inatsisai pruffiitillu najoqqutaralugit Jiisusimik qularunnaarsinniarpai.”

19, 20. (a) Sooq Paulusi oqaluussinermini angusaqarluarpa? (b) Nutaarsiassaq nuannersoq ilaasa akuersaanngikkaluaraat Paulusi sua?

¹⁹ Sooq Paulusi oqaluussinermini angusaqarluarpa? Versi 23-mi pissutaasut ilaat eqqartorneqarput. (1) Guutip naalagaaffia Jiisusilu Kristusi pillugit ilinniartitsivoq. (2) Tusarnaartuni “qularunnaarsinniarpai”. (3) Allakkanik Illernartunik tunngavilersuivoq. (4) “Unnuk tikillugu” nalunaajaanermigut imminut pilliutigeriaannaavoq. Paulusi sunniuteqarluartumik nalunaajaavoq, ilaannaasali nutaarsiassaq nuannersoq akuersaarpaat. Versi 24-mi ima allassimavoq: “Ilaat oqaasiinit qularunnaarsinneqarput, allalli uppinngillat.” Isumaqatigiikkunnaarlutik avissaarput.

²⁰ Ilaannaasa nutaarsiassaq nuannersoq akuersaarmassuk Paulusi nikallorpa? Naamerluinnaq! Apustilit Suliaanni 28:30, 31-mi ima allassimavoq: “Paulusi ukiut marluk naallugit najukkaminiippoq attartukkamini imminullu orniguttut tamaasa ilassisarlugit. Guutip naalagaaffia oqaluussissutigisarpaa Naalagarlu Jiisusi-Kristusi nakimmateqarani akornusersorneqaranilu ajoqersuutigisarlugu.” Taamatut atuagaq Apustilit Suliaat Guutimit isumassarsiarititaasoq kajumissinartumik naavoq.

21. Paulusip illumi parnaarussaaffimminiitilluni maligassiaa qanoq ilinniarfigisinnaavarput?

²¹ Paulusip maligassiaa qanoq ilinniarfigisinnaavarput? Illumi parnaarussaaffimminiitilluni Paulusi illumiit illumut oqaluussisinnaanngilaq. Isumalluartuarporli, imminullu takkuttut tamaasa oqaluussiffigisarpai. Taamatuttaaq ullumikkut Guutip kiffai amerlasuut uppernertik pissutigalugu parnaarussivimmiikkaluarlutik nuannaartuarlutillu oqaluussiuarput. Qatanngutitta asasatta ilaat utoqqaligamik napparsimagamilluunniit angerlarsimaffimminniiginnalersimapput immaqaluunniit paaqqutarisariallit angerlarsimaffianniilersimapput. Taakku pisinnaagaangamik nakorsanut, sulisunut pulaartunullu oqaluussisarput. Guutip naalagaaffia pillugu peqqissaartumik nalunaajaarusupput. Taakkua maligassiaat pingaartingaarparput!

22. (a) Apustilit Suliaannik paasinninnissamut atuagaq Biibililersaarut suna iluaqutigisinnaavarput? (Ungalusaq takuuk). (b) Silarsuatoqqap matuma naggatissaa utaqqitillugu sussavit?

²² Biibilip atuagartaasa ilaanni Apustilit Suliaanni apustilit kristumiullu allat pillugit atuaraangatta eqqumaneq pillugu ilikkagarpassuaqartarpugut. Silarsuatoqqap matuma naggatissaa utaqqitillugu sapiilluta aallussilluarlutalu oqaluussisarnitsigut taakku ilaarusuppavut. Guutip naalagaaffia pillugu peqqissaarluta nalunaajaanerput immikkut pisinnaatitaaffiuvoq annerpaaq! — Apustilit Suliaat 28:23.

[Atuaqqissaarnermi apeqqutit]

[Qupp. 17-mi ungalusaq]

“ATUAGAQ APUSTILIT SULIAAT AATSAAT ILUAMIK PAASIVARA”

Nakkutilliisup angalasartup atuagaq “Et grundigt vidnesbyrd om Guds rige” atuareeramiuk ima oqarpoq: “Atuagaq Apustilit Suliaat aatsaat iluamik paasivara.” Taassuma Biibilip atuagartaasa ilaat Apustilit Suliaat arlaleriarluni atuarsimavaa, atuagarli nutaaq atuareeramiuk misigaaq Apustilit Suliaat iluaqutigilluarnerusinnaallugu.

[Qupp. 16-mi assiliartaq]

Inngilip Petrusi isaaffikkut saviminiusukkut aneqatigaa