“Oqaatsitit sallusuissutaapput.” — JOHANNESI 17:17.

1. Jehovap Nalunaajaasui oqaloqatigeqqaarakkit upperisarsioqatigiinnit allanit allaanerussutaat suna malugiviuk?

JEHOVAP Nalunaajaasuisa ilaannik oqaloqateqaqqaarnerit eqqarsaatigiuk. Tamanna sumik eqqaamasaqarfigaajuk? Ilarpassuavut oqassapput eqqaamallugu nalunaajaasut Biibili tunngavigalugu apeqqutivut tamaasa akigaat. Nuannaangaarpugut Guutip nunarsuarmut siunertaa, toqugutta qanoq pisoqassanersoq asasatsinnullu toqusimasunut neriuut paasigatsigit!

2. Sooq Biibili pingaartippiuk?

² Biibilimilli atuaqqissaarnerujartortillutit paasivat inuuneq, toqu siunissarlu pillugit apeqqutit Biibilimi akineqaannanngitsut. Paasivarput Biibili atuagaasoq silarsuarmi iluaqutaanerpaasoq. Siunnersuutit Biibilimeersut iluaqutaajuaannarsimapput. Taakkuninnga maleruaasut pilluassapput ingerlalluarlutillu. (Atuakkit Tussiaat 1:1-3). Kristumiut ilumoortut Biibili ‘inuit oqaasiattut ilassinagu, kisianni pissusiviatut, tassa Guutip oqaasiatut’ akueriuaannarsimavaat. (1 Thessalonikamiut 2:13) Kingumut qiviallatsiarnikkut Biibilimik ataqqinnittut ataqqinninngitsullu qanoq assigiinngitsiginerat paasissavarput.

APEQQUT MIANERNARTOQ AKINEQARTOQ

3. Apeqqut suna ilagiit kristumiut ataasiussusiannik navianartorsiortitsiva, aamma sooq tamanna mianernarpa?

³ Corneliusip juutiunngitsup kipineqanngitsup taninneqarneraniit ukiut 13-it ingerlapput. Juutiunngitsut kristumiunngortut amerliartuinnarput. Ukiut taakku ingerlaneranni ilagiit kristumiut ataasiussuseqarnerannik navianartorsiortitsisoq una ajornartorsiutaalerpoq: Juutit ileqqutoqaat malillugu angutit kuisissagunik kipineqartariaqarpat? Apeqqutaavoq juutiusumut akiuminaatsoq. Juutit inatsisinik maleruaasut juutiunngitsup angerlarsimaffianut iserumanavianngillat taannalu ikinngutigiumanaviarnagu.  Kristumiut juutiusut siornatigut upperisaminnik qimatsinertik pissutigalugu malersorneqangaarput. Kristumiut juutiunngitsunik kipineqanngitsunik qatanngutimissut ilassinnikkunik suli malersugaanerulissapput kristumiut juutiussusermillu upperinnittut imminnut ungasinneruliinnassutigisaannik. — Galatiamiut 2:11-14.

4. Ajornartorsiut aaqqinniarlugu kikkut ataatsimiippat, tamatumunngalu tunngatillugu suut apeqqutaasinnaappat?

⁴ Ukiumi 49-mi Jerusalemimi apustilit utoqqaanertallu, juutiusut kipineqarsimasut, “ataatsimiilerput tamanna oqaluuserissallugu”. (Apustilit Suliaat 15:6) Ataatsimiinnerat annikitsualuit pingaaruteqanngitsut pillugit upperisarsiornikkut naammaannartumik tunngavilersuinerunani Biibilimi ajoqersuutit pillugit pissanganartumik oqallinneruvoq. Najuuttut tamarmik oqalliseqataapput. Nammineq iluarinerusat paqumisunnerilluunniit aalajangiisuussappat? Utoqqaanertat akisussaasut aalajangiinissartik kinguartissavaat Israelimi pissutsit najummassimanarpallaarunnaarnissaata tungaanut? Imaluunniit eqqortuusorinngisartik aalajangiutissavaat aalajangigaqarniaannarlutik?

5. Ukiumi 49-mi Jerusalemimi ataatsimiinneq ukiuni hundredelinni tulliuttuni oqaluffeqarfiit siuttuisa ataatsimiittarnerannit pingaarutilitsigut qanoq allaanerua?

⁵ Ullumikkumut allaat oqaluffeqarfinni siuttut ataatsimiinneranni nalinginnaavoq siuttut taakkua isumaqatigerpianngisaminnik aalajangigaqarniaannarlutik akuersiinnartarnerat aalajangeeqataasussanillu allanik isumaqatissarsiortarnerat. Jerusalemimili ataatsimiinnermi taamaattoqanngilaq. Taamaakkaluartoq aalajangiisinnaasimapput najuuttut tamarmik isumaqatigisaannik. Qanoq ilillutik? Isummamikkut assigiinngikkaluarlutik najuuttut tamarmik Guutip oqaasianik ataqqinnikkamik ajornartorsiullu aaqqinniarlugu Allakkat atoramikkit. — Atuakkit Tussiaat 119:97-101.

6, 7. Allakkat atorlugit kipineqarneq pillugu apeqqut qanoq akineqarpa?

⁶ Ajornartorsiummik aaqqiiniarnerminni Amosi 9:11, 12-imi allassimasut iluaqutigaat. Oqaatsit taakkua Apustilit Suliaat 15:16-imi ima issuarneqarput: “Uterumaarpunga Daavillu illunngua uppissimasoq nappaqqillugu; isatersimasoq nappaqqissavara iluarsarlugulu.” Nanginneralu versi 17-imi 1936-meersoq naapertorlugu imaappoq: ‘Inuit amiakkuinut Guutimillu nalusunut atinnik taasiffigineqartunut tamanut Jehova apeqqutigeqqullugu.’

⁷ ‘Kisiannimi’, immaqa ilaat oqassapput, ‘versini taakkunani allassimanngilaq juutiunngitsut kristumiunngorunik kipineqarnissaq pinngitsoorsinnaanngikkaat.’ Tamanna ilumoorpoq, juutilli kristumiut tamanna kipineqarnissap pisariaqannginneratut paasissavaat. Sooq? Juutit kristumiut juutiunngitsut kipineqarsimasut ‘inuianneersutut’ isiginagit qatanngutimissut isigigamikkik. (2 Mosesi 12:48, 49) Assersuutigalugu Bagsterip Septuaginta-mik nutsigaa naapertorlugu Esteri 8:17 imaappoq: ‘Guutimik nalusut ilarpassui kipineqarput juutinngorlutillu.’ Tassa Allakkani siulittuutigineqarmat Israelikkut amiakkui (juutit kipineqarsimasullu juutit upperisaannut ilanngussimasut) ‘Guutimik nalusut’ (juutiunngitsut kipineqarsimanngitsut) peqatigalugit inuianngussasut ataatsit Guutip aqqanik taagorneqartut, tassa akissut Allakkaneersoq una erseqqippoq: Juutiunngitsut kristumiunngorusuttut kipineqartariaqanngillat.

8. Sooq kipineqarnermut tunngatillugu eqqortumik aalajangiissagaanni sapiissuseqartariaqarpa?

⁸ Guutip oqaasiata anersaavatalu kristumiut eqqortuliorusuttut taakku ‘isumaqatigiillutik aalajangernissaannut’ ikiorpaat. (Apustilit Suliaat 15:25) Kristumiut juutit malersorneqarnerulernerannik kinguneqassagunaraluartoq ilumoorfiginnittut Biibili tunngavigalugu aalajangiineq tapersersorluinnarpaat. — Apustilit Suliaat 16:4, 5.

 ASSIGIINNGISSUT ERSEQQISSISOQ

9. Pallorfiginninnerup ilumoortup mingutsinneqarneranut pissutaasoq pingaarutilik suua, ajoqersuullu pingaarutilik suna mumisinneqarpa?

⁹ Apustili Paulusi siulittuivoq apustilit toqunerisa kingorna pallorfiginninneq ilumoortoq ajoqersuinerluutinit mingutsinneqassasoq. (Atuakkit 2 Thessalonikamiut 2:3, 7). Allaat ilagiinni akisussaaffillit “ajoqersuut peqqissinartoq” naammagiunnaarumaarpaat. (2 Timotheusi 4:3) Paulusip nalimini utoqqaanertat ima mianersoqquai: “Allaammi ilissi akornassinnit saqqummersoqarumaarpoq angutinik ilumoortuunngitsumik oqaluttunik ajoqersukkat imminnut malinnaatikkumallugit.” (Apustilit Suliaat 20:30) The New Encyclopædia Britannica-mi ajoqersuinerluuteqalerneranut pissutaanerpaat ilaat allaaserineqarpoq. Allassimavoq kristumiut grækerit isumaliutersuutaannik ilinniartinneqarsimasut isumaliutersuutit taakku atorlugit kristumiut upperisaannik nassuiaaniartalersut. Tamanna iluarusuutigaat isumaqarpullu Guutimik nalusut kristumiussusermik ilassinninnissaannut iluaqutaassasoq. Assersuutigalugu ajoqersuut pingaarutilik Guutimik nalusut isumaannit mumisinneqartoq Jiisusip Kristusip kinaaneranut tunngassuteqarpoq. Biibilimi Guutip erneranik taaneqarpoq, grækerilli isumaliutersuutaannik nuannarinnittut ilinniartitsissutigaat taanna Guutiusoq.

10. Oqaluffeqarfinni siuttut Kristusip kinaanera pillugu apeqqut sumi akissutissarsisinnaagaluarpaat?

¹⁰ Kingusinnerusukkut oqaluffeqarfiit siuttuisa ataatsimiittarneranni tamanna oqallisigineqartarpoq. Jiisusip Kristusip kinaanera pillugu apeqqut Allakkat atorlugit akineqariaannaagaluarpoq, taakkuli pingaartinneqarpallaanngillat. Amerlanerilli ataatsimiinneq suli aallartinngitsoq aalajangereersimapput, isumaallu sumilluunniit allanngortinneqarsinnaanngillat. Ataatsimiinnerni taakkunani aalajangikkat Biibilimut innersuussutertaqanngillat.

11. Oqaluffeqarfinni siuttut aalajangikkatik sumit tunngaveqartittarpaat, aamma sooq taamaaliortarpat?

¹¹ Sooq oqaluffeqarfinni siuttut aalajangiinerminni Allakkat atornerunngilaat? Misissueqqissaartartoq Charles Freeman nassuiaavoq Jiisusimik Guutiuneraanertik Biibilimi allassimasunut naapertuutinngimmat, Jiisusimmi nammineq oqaasiinit erserpoq Guuti imminit annerusoq. Tamanna akerlilersinnaannginnamikku oqaluffinni ileqqutoqqat inuinnaallu isumaat iivangkiiliuninngarnit pingaartinnerulerpaat. Allaat ullumikkut oqaluffeqarfinni siuttorpassuit isumaqarput oqaluffeqarfinni ajoqersuisuunernit taaneqartartut oqaasii Guutip oqaasianit pingaarnerusut! Ataasiullunilu pingasuussusermik ajoqersuut pillugu teologilu oqaloqatigiissimagussi tamanna malugisimassagunarpat.

12. Kaasari qanoq sunniuteqartarsimava?

¹² Romamiut kaasarii ataatsimiinnernut taamaattunut sunniuteqangaartarsimapput. Assersuutigalugu professorip Richard E. Rubensteinip Nikæami oqaluffeqarfiit isumalioqatigiissitaasa ataatsimiinnerat allaatigaa. Allappoq kaasarinngortup Konstantinip biskoppit pisoorsuanngortikkai, annaasimasaallu tamaasa, soorlu oqaluffiit, atorfiit taaguutaallu, ukioq naanngitsoq taakkununnga atulerseqqikkai. Kristumiullu palasii Guutimik nalusut palasiisa pisinnaatitaaffigisimasaannik pisinnaatitaaffilerpai. Tamatuma kingunerisaanik Konstantin Nikæami oqaluffeqarfiit isumalioqatigiissitaasa ataatsimiinneranni aalajangiinernut sunniuteqangaarpoq, allaallumi allanngortissinnaallugit. Tamanna pillugu Charles Freeman aamma allappoq tamatuma kingorna kaasarip oqaluffeqarfiit oqartussaassusilersinnaalerlugillu ajoqersuutaat sunniuteqarfigisinnaalerai. — Atuaruk Jaaku 4:4.

13. Sooq oqaluffeqarfinni siuttut sallusuissutinik paasiuminartunik Biibilimeersunik sumiginnaasoraagit?

 ¹³ Oqaluffeqarfinni siuttut Jiisusi Kristusi Guutip ernerigaa akueriuminaatsikkaat inuinnaat amerlanerit, Allakkani atuakkatik paasilluaramikkit akueralugillu, tamanna akueriuminaatsinngilaat. Oqaluffeqarfinnili siuttut kaasarip aningaasaatai oqartussaassuseqarsinnaanertillu kissaatigigamikku Biibili sumiginnarpaat. Gregorip Nyssameersup, taamanikkut teologiusup, inuinnaat, soorlu atisaarniat, aningaasanik taarsiisartut, niuertut kiffallu, upperisaq pillugu eqqartuisut mitallerpaluttumik isornartorsiorpai. Nuannarinngilaa inuinnaat Ernerup Ataataannginneranik, Ataatap Ernermit anneruneranik Ernerullu piunngitsumit pinngortitaaneranik nassuiaanerat. Inuinnaat palasinit allaanerullutik Biibili atorlugu sallusuissutit taakku nassuiarsinnaavaat. Taakkununnga tusarnaarsimagaluarunik Gregor taassumunngalu isumaqataasut silatusaarsimassagaluarput!

‘QAJUUSIASSAT’ AAMMA “NAASUPILUIT” NAAJARTOQATIGIIPPUT

14. Qanoq nalunngissinnaavarput ukiuni hundredelinniilli nunarsuarmi kristumioqartuaannarsimasoq tanitanik?

¹⁴ Jiisusip assersuusiaasa ilaanni erserpoq ukiuni hundredelinniilli nunarsuarmi kristumioqartuaannassasoq tanitanik. Jiisusip taakku assersuuppai ‘qajuusiassanut’ ‘naasupilunnik’ naajartoqateqartunut. (Matthæusi 13:30) Soorunami naluarput inuit eqimattalluunniit sorliit tanitanut ilaanersut. Nalunngilarpulli inoqartuaannartoq sapiillutik Guutip oqaasianik illersuisunik oqaluffeqarfinnilu ajoqersuinerluutinik qulaajaasunik. Assersuuteqariarta.

15, 16. Angutit Guutip oqaasianik illersuisut ilaat kikkuuppat?

¹⁵ Frankrigimi Lyonip biskoppiunerata Agobardip, ukiumi 779-imiit 840-mut inuusup, assilissanik pallorfiginninneq, oqaluffiit iluartuutitanut pigititaanerat oqaluffeqarfinnilu ileqqut pallorfiginninnerillu akerlerai. Taassuma nalaani inuusoq biskoppi Claudius oqaluffeqarfinni ileqqunik aamma akuerinnikkumananilu iluartuutitanut qinusarnerit illernartuutitanillu pallorfiginninnerit iluarinngilai. 1000-ikkunni Frankrigimi Toursimi palasimut ikiortaanerup Berangarip transsubstantiation (ajoqersuut nerliiviliarnermut tunngasoq) pillugu katuullit ajoqersuutaat akueriumannginnamiuk ilagiinnut ilaajunnaarsinneqarpoq. Aamma isumaqarpoq Biibili oqaluffeqarfinni ileqqutoqqanit pingaarnerusoq.

¹⁶ Peter Bruysimeersoq Henrikilu Lausannemeersoq, 1100-kkunni inuusut, Biibilimi sallusuissutinik aamma nuannarinnittuupput. Peter palasiujunnaarpoq isumaqarami naalungiarsunnik kuisineq, transsubstantiation, toqusunut qinusarneq  sanningasulimmillu pallorfiginninneq Biibilimut naapertuutinngitsut. 1140-mi Peter upperisani pillugu ikuallagaavoq. Henrikip, mattuttup, oqaluffimmi atorfillit peqquserluttarnerat eqqunngitsumillu pallorfiginninneq akerliliiffigai. 1148-mi tigusaavoq inuunermilu sinnera parnaarussaaqqalluni.

17. Valdo malinnittaalu pingaarutilinnik sunik iliuuseqarpat?

¹⁷ Inuk sallusuissutit Biibilimeersut siaruarnerannut sunniuteqangaarumaartoq Peterip Bruysimeersup toqutaanerata nalaani inunngorpoq. Kinguliaqutaa tassaavoq Valdès, imaluunniit Valdo. * Peteritut Henrikitullu ilinniarsimasuunngilaq, Guutilli oqaasia pingaartingaaramiuk pigisani allanut tunniuppai Frankrigillu kujataata kangiani oqaaserineqartunut Biibilimik nutsereqataalluni. Ilaasa tusarliussaq Biibilimeersoq oqaatsitik atorlugit tusarlugu nuannaangaaramik pigisatik allanut tunniullugit sallusuissut Biibilimeersoq allanut oqaluttuarisalerpaat. Oqaluffeqarfinni siuttut tamanna nuannarinngilluinnarpaat. 1184-imi angutit arnallu aallussilluartut taakku, kingusinnerusukkut Valdosiortunik taaneqartartut, paavimit ilagiinnut ilaajunnaarsinneqarput biskoppimillu angerlatsaalineqarlutik. Taamaaliorneqarnerat tusarliussap Biibilimeersup siaruarneqarneranut iluaqutaaginnarpoq. Piffissap ingerlanerani Europap ilarujussuani Valdo, Peter, Henrik allallu oqaluffeqarfinnit namminneq avissaarsimasut malitseqalerput. Ukiuni hundredelinni tulliuttuni allat sallusuissummik Biibilimeersumik illersuisut ukuupput: John Wycliffe (1330-1384 miss.), William Tyndale (1494-1536 miss.), Henry Grew (1781-1862) aamma George Storrs (1796-1879).

“GUUTIP OQAASIA QILERSUGAANNGILAQ”

18. 1800-kkunni Biibilimik atuaqqissaartartut qanoq atuaqqissaartarpat, aamma sooq periaaseq tamanna pitsaava?

¹⁸ Biibilimut akeraasut sallusuissutit Biibilimeersut siaruarnerat akornusersinnaasimanngilaat. Timotheusimut allakkat aappaat 2:9-mi ima allassimavoq: “Guutip oqaasia qilersugaanngilaq.” 1870-imi eqimattat Biibilimik atuaqqissaartartut pimoorussillutik sallusuissummik ujarlilerput. Qanoq atuaqqissaartarpat? Siullermik peqataasoq ataaseq apeqquteqartarpoq. Taava tamanna oqaloqatigiissutigeriarlugu allassimaffiit tamatumunnga tunngasut tamaasa atuartarpaat. Allassimaffiit imminnut qanoq ataqatigiinnersut paasigaangamikku akissutaa aalajangiuttarpaat allallugulu. Atuaqqissaariaaseq tamanna pitsaavoq ukiuni hundredelinni siullerni apustilit utoqqaanertallu maligassiaat malinneqarmat. Angutit aalajaatsut taakku Jehovap Nalunaajaasuisa oqaluttuarisaaneranni siusissukkut upperisartik Guutip oqaasianik tunngaveqarluartittaraat nalunagu nuannerpoq.

19. Suna ukiumut 2012-imut allassimaffiussava, aamma sooq tamanna naleqquppa?

¹⁹ Uagut ullumikkut upperisarput aamma Biibilimik tunngaveqarpoq. Taamaattumik Jehovap Nalunaajaasuisa Siulersuisoqatigiivisa ukiumut 2012-imut allassimaffittut Jiisusip oqaasii uku toqqarsimavaat: “Oqaatsitit sallusuissutaapput.” (Johannesi 17:17) Guutimit iluarisaarusuttoq kinaluunniit sallusuissummut naapertuuttumik inuusariaqarpoq. Qanortoq Guutip oqaasianit siulersortikkumalluta sapinngisatsinnik iliortuarta!

[Quppernerup ataani ilanngussaq]

[Atuaqqissaarnermi apeqqutit]

[Qupp. 12-mi issuagaq]

Ukiumut 2012-imut allassimaffik: “Oqaatsitit sallusuissutaapput.” — Johannesi 17:17.

[Qupp. 11-mi assiliartaq]

Valdo

[Qupp. 11-mi assiliartaq]

Wycliffe

[Qupp. 11-mi assiliartaq]

Tyndale

[Qupp. 11-mi assiliartaq]

Grew

[Qupp. 11-mi assiliartaq]

Storrs