‘Qanorluunniit iliorussi taamaaliortaritsi uummammit pisumik [tarnikkut iluunngarlusi, NV] — Jehovamut.’ — KOLOSSEMIUT 3:23.

1-3. (a) Jiisusip inuunini pilliutitut tunniummagu, imaappa arlaatigut pilliuteqartarnissarput Jehovap piumasariunnaarsimagaa? Nassuiaagit. (b) Ullumikkut pilliutigisartakkatsinnut tunngatillugu suna apeqqutaalerpa?

UKIUNI hundredelinni siullerni Jehovap innuttaminut paasinarsisippaa Jiisusip utertitsissutitut pilliutaata Mosesip inatsisaanik atorunnaarsitsisimanera. (Kolossemiut 2:13, 14) Juutit ukiuni hundredelinni pilliutigisarsimasaasa tamarmik pilliutigineqartarnissaat pisariaqarunnaarlunilu pingaaruteqarunnaarpoq. Mosesip inatsisaanut siunertarineqartoq — ‘Kristusip tikiunnissaata tungaanut perorsaanissaq’ — naammassineqarpoq. — Galatiamiut 3:24.

² Imaanngilarli kristumiut pilliuteqartarnissartik soqutigiunnaaraat. Apustilimmi Petrusip ‘pilliutinik Anersaap piinik Jiisusi-Kristusikkut Guutimut ilassiuminartunik sassaassinissap’ pisariaqassusia allaatigaa. (1 Petrusi 2:5) Aamma apustili Paulusi erseqqissaavoq kristumiup tunniulluinnarsimasup inuunera tamarmi Guutimut “pilliutitut” ittoq. — Romamiut 12:1.

³ Taamaammat Jehovamut pilliuteqartarpugut, taassumunnga kiffartornermi iliuuseqarnerugaangatta imaluunniit taassumunnga kiffartorluarnerujumalluta arlaannik isumakkiigaqaraangatta. Israelikkut pilliutigisarsimasaat pillugit ilisimasavut eqqarsaatigalugit, ullumikkut pilliutigisavut Jehovamit akuerineqarsinnaanersut qanoq ililluta qulakkeersinnaavarput?

ULLUINNARNI PILLIUTIGINEQARTARTUT

4. Ulluinnarni suliarisartakkatsinnut tunngatillugu suna eqqaamasariaqarparput?

⁴ Ulluinnarni suliarisartakkatta Jehovamullu pilliuteqartarnitta imminnut attuumassuteqarnerat immaqa eqqarsaatigineq ajorparput. Illumi suliaqarneq, ilinniakkerineq, sulineq pisiniarnerlu anersaakkut ittunut tunngassuteqarpianngippasissinnaapput. Inuunerilli  Jehovamut tunniulluinnarsimagukku qanittukkulluunniit taamaaliornissat neriuutigigukku ulluinnarni suliassat tamakkua taassumunnga attaveqarninnut ilumut sunniuteqarsinnaanerat eqqaamassallugu pingaaruteqarpoq. Ulloq unnuarlu kristumiuuvugut. Najoqqutassiat Biibilimiittut inuunitsinni sutigut tamatigut atortariaqarpavut. Taamaattumik Paulusip ima kajumissaarpaatigut: ‘Qanorluunniit iliorussi taamaaliortaritsi uummammit pisumik [tarnikkut iluunngarlusi, NV] — Jehovamut, inunnut pinnasi.’ — Atuakkit Kolossemiut 3:18-24.

5, 6. Ulluinnarni atisalersoriaatsitsinnut pissutsitsinnullu tunngatillugu suut eqqarsaatigisariaqarpavut?

⁵ Ulluinnarni suliarisartakkavut sammisartakkavullu Guutimut kiffartornitsinnut ilaanngillat. Paulusilli ‘tarnikkut iluunngarluta’ Jehovamullusooq sulisaqqulluta kajumissaarinera inooriaatsitsinnik tamarmik eqqarsaatiginnilissutigaarput. Tamanna sumik ilinniarfigisinnaavarput? Kristumiutut pissusilersortuaannarlutalu atisalersortuaannarpugut? Imaluunniit ulluinnarni pissusilersornerput atisalersoriaaserpulluunniit pissutigalugu Jehovamut nalunaajaasuulluta oqarnaveersaartarpugut? Qanortoq taamaaliunngisaannarisa! Guutip aqqanik tusaamanerlugaalersitsisinnaasumik sumilluunniit iliuuseqarusunngilagut. — Esaja 43:10; 2 Korinthimiut 6:3, 4, 9.

⁶ ‘Tarnikkut iluunngarluni’ Jehovamullusooq arlaannik iliuuseqarusussuseq pissutsini assigiinngitsuni eqqarsaatitsinnut iliuutsitsinnullu qanoq sunniuteqartarnersoq misissoriartigu. Misissuinitsinni eqqaamassavarput Israelikkut Jehovamut pilliutigisaat tamarmik pitsaanersaasartussaasut. — 2 Mosesi 23:19.

INUUNINNUT SUNNIUTAAT

7. Guutimut tunniulluinnaratta suvugut?

⁷ Jehovamut tunniulluinnaravit silatusaarputit. Jehova neriorsorpat inuunerit tamaat taanna pingaarnerpaatittarumallugu. (Atuaruk Hebræerit 10:7). Qularnanngitsumik misigisimassavat Jehovap aalajangersimasumut tunngatillugu qanoq isumaqarnera pillugu misissuinivit piumasaanullu naapertuuttumik iliuuseqarnivit kinguneqarluartarnera. (Esaja 48:17, 18) Guutip innuttai illernartuullutillu nuannaartuupput Jehova ilinniartitsisortik ilaaramikku. — 3 Mosesi 11:44; 1 Timotheusi 1:11.

8. Sooq pingaaruteqarpa eqqaamassallugu Jehovap Israelikkut pilliutaat illernartutut isigigai?

⁸ Jehovap Israelikkut pilliutaat illernartutut isigai. (3 Mosesi 6:25; 7:1) Hebræerit oqaasiat ‘illernartoq’-mik nutserneqarsimasoq immikkoortinneqarsimanermik imaluunniit Guutimuinnaq pigititamik isumaqarpoq. Pilliutivut Jehovamit akuerineqarsinnaassappata silarsuarmi minguttuut suulluunniit qanillinaveersaartariaqarpavut. Jehovap uumigisai nuannarisinnaanngilavut. (Atuakkit  1 Johannesi 2:15-17). Tassa imaappoq Guutimit minguttuutut isigineqalissutigisinnaasavut kikkulluunniit aamma suulluunniit ingalassimasariaqarivut. (Esaja 2:4; Saqqummersitat 18:4) Aamma minguttuut ileqqorlunnertallillu isigiuarnagillu eqqarsaatigiuassanngilavut. — Kolossemiut 3:5, 6.

9. Sooq allanik qanoq pinnittarnerput pingaaruteqarpa?

⁹ Paulusip uppeqatini ima kajumissaarpai: “[Puiunngisaannarsigit] ikiuisarneq tukkornerlu, pilliutit taama ittut Guutip iluarisarimmagit.” (Hebræerit 13:16) Taamaattumik ajunngitsuliortuarutta allanillu ikiuisarutta Jehovap iliuutsivut pilliutitut iluarinartutut isigisassavai. Asannittuliortarnitsigut ersersissavarput kristumiuulluta ilumoortut. — Johannesi 13:34, 35; Kolossemiut 1:10.

PALLORFIGINNINNERMI PILLIUTIGINEQARTARTUT

10, 11. Jehovap oqaluussisarnerput pallorfiginninnerpullu qanoq isigai, tamannalu sunissamut kajumississutigisariaqarparput?

¹⁰ Ilaatigut allanut ajunngitsuliortarsinnaavugut ‘neriugisatta’ oqaluussissutigisarneratigut. Nalunaajaanissamut periarfissat tamaasa atorluartarpigit? Paulusi allappoq ‘Guuti pilliivigiuassagipput qujaniutinik, tassa qarlut aqqanik nassuerutiginnittut inerititaannik’. (Hebræerit 10:23; 13:15; Hosea 14:3) Uagut nammineq piffissaq qanoq atsigisoq nutaarsiassamik nuannersumik oqaluussissutiginninnermut atortarneripput oqaluusseriaatsitsinnillu qanoq pitsanngorsaasinnaanersugut eqqarsaatigigutsigu pitsaassaaq. Oqaluussinermut tunngasumik ataatsimiinnerit ilarpassui tamakkua eqqarsaatiginissaannut iluaqutigisarpavut. Pingaartorli mannaavoq, aaqqissuussaasumik oqaluusseqataaneq torrutiinnarlugulu oqaluussineq ‘pilliutaammata qujaniutit’ pallorfiginninnermullu ilaammata taakkuninnga pilliuteqaraangatta pitsaanersaasunik tunniussaqartariaqarpugut, imaluunniit sapinngisarput tamaat iliuuseqartariaqarpugut. Pissutsit atukkavut assigiinngitsuupput, Jehovamulli kiffartornermut isiginnittaaserput piffissamik qanoq atsigisumik oqaluussinermut atuinitsinnut amerlanertigut sunniuteqartarpoq.

¹¹ Kristumiut angerlarsimaffimminni ilagiinnilu pallorfiginninnissamut piffissamik immikkoortitsiuartarput. Jehovap taamaaliortarnissarput piumasaraa. Sabbati pillugu inatsimmik maleruaasariaarukkaluarluta Jerusalemimullu nalliussiartortariaarukkaluarluta inatsisit taakku suli ilinniarfigisinnaavavut. Ullut tamaasa suliassarpassuaqartarpugut, taamaakkaluartorli Guutip  piumaffigaatigut piffissatta ilaa atortassagipput Biibilimik atuaqqissaarnermut, qinunermut ataatsimiigiarnermullu. Aamma ilaqutariinni ittuusup ilaquttami Biibilimik atuaqqissaaqatigisarnissaat akisussaaffigaa. (1 Thessalonikamiut 5:17; Hebræerit 10:24, 25) Taamaattumik pitsaassaaq imminut ima aperigutta: ‘Guutimik pallorfiginninninnik pitsanngorsaasinnaavunga?’

12. (a) Itsaq pallorfiginninnermi tipigissaatilliissutit ullumikkut sumut assersuunneqarsinnaappat? (b) Qinnutivut tipigissaatilliissutitut issappata qanoq qinusariaqassaagut?

¹² Kunngip Daavip Jehova ima erinarsorfigaa: “Qinnutiga ilinnut anngulli tipigissaatilliinertut!” (Tussiaat 141:2) Qinnutitit eqqarsaatigitsiakkit — qanoq qinukulatigisarpit suullu qinnutigisarpigit? Saqqummersitani ‘illernartut qinnutaat’ tipigissaatilliissutinut assersuunneqarput. Tassa qinnutit akuerineqarsinnaasut tipigissutut illutik Jehovamut annguttarput. (Saqqummersitat 5:8) Itsaq Israelimi Jehovamut pilliivimmi tipigissaatilliissutissat peqqissaartumik piareersarneqartarput. Jehovamit akuerineqarsinnaasarput aatsaat taassuma malittarisassiai malillugit tipigissaatilliissutigineqarsimagaangata. (2 Mosesi 30:34-37; 3 Mosesi 10:1, 2) Tamatumunnga assingusumik uagut Jehovap ilitsersuisimaneratut qinusarutta qinnutillu illernartutut isigisarutsigit, qularutiginngilluinnarsinnaavarput qinnutivut taassumannga akuerineqarsinnaassasut.

TUNISISARLUTALU TUNINEQARTARPUGUT

13, 14. (a) Epafroditusip ilagiillu Filippimiittut Paulusi qanoq ikiorpaat, Paulusillu tamanna qanoq isumaqarfigaa? (b) Epafroditusi Filippimiullu qanoq ilaarsinnaavavut?

¹³ Aningaasat nunarsuaq tamakkerlugu oqaluussinermik tapersiiniarluta tunissutigisartakkavut pilliutitut ipput, tunniussavut annikikkaluarpata annertugaluarpataluunniit. (Markusi 12:41-44) Ukiuni hundredelinni siullerni ilagiit Filippimiittut Epafroditusi Romamut aallartippaat Paulusip pisariaqartitaanik isumaginneqqullugu. Epafroditusip Paulusi aningaasanik ilagiinnit tunissutaasunik tunivaa. Filippimiut Paulusi aatsaat taamatut tukkorfiginngilaat. Taamatut inussiarnisaarfigaat Paulusi aningaasanik isumakuluutiginninnginniassammat kiffartornermullu piffissaqarneruniassammat. Paulusip taakkua tunissutaat qanoq isumaqarfigaa? ‘Tipimik naamajuminartumik, pilliummik qujanartumik, Guutip iluarisaanik’ taavaa. (Atuakkit Filippimiut 4:15-19). Filippimiut inussiarnisaarnerat Paulusip ilumoorluni qujamasuutigaa, aamma Jehovap iluaraa.

¹⁴ Ullumikkuttaaq Jehovap silarsuaq tamakkerlugu oqaluussinermut tapersiilluta tunissuteqartarnerput assut iluarisarpaa. Aamma neriorsorpaatigut naalagaaffimminut attuumassuteqartut pingaarnerpaatittuarutsigit anersaakkut timikkullu pisariaqartitavut tamaasa isumagiumaarlugit. — Matthæusi 6:33; Lukasi 6:38.

QUJAMASUNNERIT ERSERSIGUK

15. Illit Jehovamut qujamasuutigisavit ilaat suuppat?

¹⁵ Jehovamut qujamasuutissarpassuaqaqaagut. Inuuneq tunissutaasoq pillugu taanna ullut tamaasa qutsavigisariaqarparput. Taassumami inuujumalluta pisariaqartitatsinnik tamanik tunivaatigut, nerisassaqartilluta, atisassaqartilluta najugaqartilluta silaannarmillu najuussuisinnaatilluta. Aamma sallusuissutit Biibilimiittut pillugit eqqorluartumik ilisimasaqarnerput uppissuseqalissutigisarput siunissamullu neriuuteqalissutigisarput qujamasuutigaarput. Taamaattumik Jehova pallorfigisariaqarlugulu qujaniutinik pilliuteqarfigisariaqarparput taassuma Pinngortitsisuunera uagullu pilluta iliuuserisimasai pissutigalugit. — Atuaruk Saqqummersitat 4:11.

16. Kristusip utertitsissutitut pilliutaanik qujamasuutiginninnerput qanoq ersersissavarput?

¹⁶ Allaaserisap matuma siuliani eqqaaneqarpoq Kristusip utertitsissutitut pilliutaa tassaasoq Guutip inuiannut tunissutaa nuanningaartoq.  Tunissut tamanna Guutip uagutsinnik qanoq asannitsigineranut ersiutaavoq. (1 Johannesi 4:10) Tamatuminnga qujamasuutiginninnerput qanoq ersersissavarput? Paulusi ima allappoq: “[Kristusip] asanninnerata pinngitsaalivaatigut isumarput tassaammat ataatsip tamaasa toqussutigimmagit. . . . Taassumalu tamaasa toqqutigai inuusut imminnik pillutik inuujunnaaqqullugit, imminnilli toqqutiginnittoq makissimasorlu pillugu inooqqullugit.” (2 Korinthimiut 5:14, 15) Paulusi oqarporlusooq Guutip iliuuserisimasai ilumut qujamasuutigigutsigit, inuunerput Guutimik taassumalu erneranik ataqqinninnissamut atorumaaripput. Naalannitsigut oqaluusserusussutsitsigullu ajoqersuganngortitsiortorusussutsitsigullu Guutimut Kristusimullu asanninnerput qujamasunnerpullu ersersittarparput. — 1 Timotheusi 2:3, 4; 1 Johannesi 5:3.

17, 18. Kristumiut ilaat Jehovamut qujaniutinik qanoq pilliuteqarnerusalersimappat? Assersuuteqarit.

¹⁷ Illit Guutimut qujaniutitut pilliutigisartakkannik pitsanngorsaasinnaavit? Inuppassuit Jehovap imminik pillutik iliuuserisimasaanik ajunngitsorpassuarnik eqqarsaatiginninnertik kajumississutigalugu oqaluussinermut Jehovallu peqatigiissortaani allanittaaq suliniuteqarnissamut piffissaqarnerujumallutik allannguisimapput. Ilaat ukiut tamaasa qaammammi ataatsimi qaammatiniluunniit arlalinni ikiorti-pioneriusinnaasimapput, allallu pioneriusinnaasimapput. Allat Jehovamut kiffartornermi atugassanik sanaartoqataasarput. Ilaatigut tamakkuninnga suliniuteqaqataanikkut qujamasunnermik ersersitsilluartoqarsinnaavoq. Eqqortunik pissutiginiagaqarluta, tassa qujamasunnerput ersersinniarlugu qujaniarlutalu, Guutimut kiffartorutta taassuma suliniutivut akuerissavai.

¹⁸ Kristumiut ilarpassui Jehovamut qujamasunnertik kajumississutigalugu iliuuseqarnerusalersimapput. Taakkua ilagaat Morena. Taanna katuulisut perorsagaasimavoq, taamaakkaluartorli Guuti inuunerullu siunertaa pillugu apeqqutissarpassuaqarpoq. Katuuliussuseq Asiamiullu isumaliutersuutaat akissutissarsiorfigai. Aatsaalli Jehovap Nalunaajaasuinit Biibilimik atuaqqissaaqatigineqartalerami apeqqutini paasiuminartunik akissutissarsivai. Paasisani Biibilimeersut ima qujamasuutigitigai imalu pillualissutigitigai nukini tamaasa Jehovamut kiffartornermut atorusulerlugit. Kuisinnermi kinguninngua ikiorti-pioneriulerpoq kingusinnerusukkullu periarfissaqalerami pionerinngorluni. Tamanna ukiut 30-t matuma siorna pivoq, Morenalu suli piffissaq tamaat kiffartortuuvoq.

19. Illit qanoq ilillutit Jehovamut pilliuteqarnerusalersinnaavit?

¹⁹ Jehovamut kiffaasut aalajaatsut ilarpassui pissutsit atukkatik pissutigalugit pioneriusinnaanngillat. Jehovamut kiffartornermi iliuuserisinnaasavut suugaluarpataluunniit, tamatta akuerineqarsinnaasunik taassumunnga pilliuteqarsinnaavugut. Pissutsitsigut najoqqutassiat Biibilimiittut atortarpavut eqqaamajuartarlugulu ulloq unnuarlu Jehovamut sinniisuunerput. Jehovamut uppernerput pissutigalugu taassuma siunertaminik tamanik naammassinnikkumaarnera qularutiginngilluinnarsinnaavarput. Suliatsigut nutaarsiassamik nuannersumik siaruartereqataasarpugut. Jehovap uagut pilluta iliuuserisimasaanik tamanik ilumoorluta qujamasuutiginninnerput ersersittarparput. Taamaattumik tarnikkut iluunngarluta Jehovamut pilliuteqartuarta.

[Atuaqqissaarnermi apeqqutit]

[Qupp. 27-mi issuagaq]

Jehovap ajunngissusia iliuuseqarnerunissannut kajumississutigaajuk?

[Qupp. 25-mi assiliartaq]

Nalunaajaanissamut periarfissat tamaasa atorluartarpigit?