Aaperaat — angut asannittoq

Aaperaat aliasunnermit nanertisimavoq. Nulia asasaa Sara toquvoq. Naggammik inuulluaqqutillugu angut utoqqaq eqqaasarpassuaqarpoq. Aliasunnerujartortilluni qissaserpoq. (1 Mosesi 23:1, 2) Qianini kanngusuutigisariaqanngilaa, ersiutaavormi pissusiisa nuannernerpaat ilaannut — asanninneranut.

ASANNINNEQ SUUA? Tassaavoq inummut qanigisarilikkamut tunniusimalluni qamannga pisumik misigissuseq. Asannittup misigissutsini asasaminut iliuutsikkut, pilliuteqassagaluaruniluunniit, ersersittarpai.

ASANNINNINI QANOQ ERSERSIPPAA? Aaperaap ilaquttani asallugit ersersittarpaa. Suliassaaleqisimanavianngilaq. Taamaakkaluartoq ilaquttami misigissutsikkut anersaakkullu pisariaqartitaat sumiginnarneq ajorpai. Jehovap nalunngilaa Aaperaat angutaasoq ilaqutariit pallorfiginninneranni siuttuusutut akisussaaffimminik pingaartitsisoq. (1 Mosesi 18:19) Allaat Jehovap Aaperaap asanninnera toqqaannartumik eqqaavaa ima oqarluni: “Ernerit Iisaaq, . . . asasat.” — 1 Mosesi 22:2.

Aaperaap asanninnera aamma erserpoq nulia asasaa Sara toqummat. Aliasuutigingaarpaa. Angussuugaluarluni aliasunnermi ersersinnissaa ittoorutiginngilaa. Aaperaap killitsiasuunera misigissutsimigullu nukittuujunera nuannerpoq.

Aaperaap Guutini asallugu ersersippaa. Asanninnerata tamatuma inooriaasia tamaat sunneqqavaa. Qanoq? Biibilimi allassimasut uku eqqarsaatigisinnaavavut: ‘Guutimut asanninneq  tassaavoq inassutai maleruaratsigit.’ (1 Johannesi 5:3) Asanninnerup taamaattuunerarneqarnera naapertorlugu Aaperaat Guutimik asanninnermigut maligassaqqilluinnartuuvoq.

Aaperaat Jehovamit peqquneqaraangami ingerlaannaq naalattarpoq. (1 Mosesi 12:4; 17:22, 23; 21:12-14; 22:1-3) Apeqqutaatittanngilaa peqqussutip naalannissaa mersernarpasinnersoq mersernarpasinnginnersorluunniit, aamma sooq Jehovap taamaalioqquneraani paasinngikkaluarlugu naalattuaannarpoq. Guutiminit arlaannik iliuuseqaqquneqaraangami kajumilluni iliuuseqartarpoq. Aaperaap peqqussutit tamaasa Jehovamut asanninnerminik ersersitsinissaminut periarfissatut isigisarpai.

SUNIK ILINNIARFIGISINNAAVARPUT? Aaperaat ilaarsinnaavarput asanninnitta allanut, ingammik ilaquttatsinnut, ersersinneratigut. Ullormut qanorluunniit ulapitsigigaluarutta asasavut piffissaqarfigiuaannartariaqarpavut.

Aamma qamannga pisumik Jehovamut asanninneq ineriartortittariaqarparput. Asanninneq tamanna inuunitsinni kajumississutaalersinnaavoq sunniuteqangaartoq. Assersuutigalugu Guutimit iluarisaajumalluta isiginnittaasitsigut, oqaluttarnitsigut pissusilersornitsigullu allannguinissamut kajumississutigisinnaavarput. — 1 Petrusi 1:14-16.

Jehovap peqqussutaanut naalanneq ajornaatsuujuaannanngilaq. Upperilluinnarsinnaavarpulli Aaperaamik ikiuisup taassumunngalu ‘ikinngutaanerartup’ aamma uagut tapersersorumaaraatigut. (Esaja 41:8) Biibilimi neriorsorneqarpugut ‘Guutip nakussatsissagaatigut aalajaatsumillu tunngavilissagaatigut’. (1 Petrusi 5:10) Aaperaap ikinngutaanit neriorsuut qamuuna attortinnangaartoq!

[Qupp. 10-mi ungalusaq]

Qianeq anguterpalunngitsuunerua?

Inuppassuit angissapput. Immaqa tupaallassapput paasigunikku angutit anersaakkut nukittuujullutillu Guutimik mianerinnittuusut artorsartillutik qiasut Biibilimi oqaluttuarineqartut Aaperaat ilaannarigaat. Assersuutigalugu taakku ilagaat Josefi, Daavi, Petrusi, ilagiinni Efesosimiittuni utoqqaanertat allaallu Jiisusi. (1 Mosesi 45:2; 2 Samueli 19:1; Lukasi 22:61, 62; Johannesi 11:35; Apustilit Suliaat 20:36-38) Erseqqippoq Biibili naapertorlugu angutit qiasinnaasut.