Aaperaat kinaava?

INUIT ikittuinnaat silarsuarmi upperisarsiornernut Aaperaap * sunniuteqarsimaneratut sunniuteqartigisimapput. Taanna juutinit, musliiminit kristumiunillu ataqqisaalluni “Allakkani Illernartuni inuit pingaartorsuit ilaattut” aamma “uppernikkut maligassaqqissutut” allaatigineqarsimavoq. Biibilimi ‘uppertunut tamanut ataataasutut’ taaneqarpoq. — Romamiut 4:11.

Sooq Aaperaat taama ataqqisaatigiva? Ilaatigut taanna kisimi Biibilimi Guutip ikinngutaatut, allaat pingasoriarluni, taaneqarmat. — 2 Nalunaarsuutit 20:7; Esaja 41:8; Jaaku 2:23.

Allatigulli Aaperaat uatsitut inuuvoq nalinginnaasoq. Uagutsitulli unamminiagassaqartarpoq. Tamakku qanoq iliuuseqarfigisarai qanorlu anigortarai paaserusuppiuk? Sammeriartigu angut maluginiarnartoq taanna pillugu Biibilimi qanoq allassimasoqarnersoq.

Tunuliaqutaa

Aaperaat 2018-imi Kr.in.si. inunngorpoq Urimilu peroriartorluni. (1 Mosesi 11:27-31) Uri illoqarfissuuvoq pigissaarfiullunilu guutipilussiorfiungaartoq. Aamma Aaperaap angutaa, Tera, guutipilunnik assigiinngitsunik pallorfiginnittuusimasinnaavoq. (Josva 24:2) Aaperaalli, guutipiluit uumassuseqanngitsut pallorfiginagit, Jehova * kisiat pallorfiginiarlugu aalajangerpoq.

Aaperaap taamatut aalajangernerminut suna killitsissutigaa? Aaperaat 150-inik ukioqartoq Noap ernera Semi toquvoq. Semi imminit utoqqaanerujussuaq ilagisarsimaguniuk qanoq sunnertissutigisimasinnaavaa? Semip silarsuaq tamakkerlugu ulersuarmit aniguineq nammineq misigisani qanoq issimanersoq Aaperaamut oqaluttuarisimasinnaavaa. Aamma Aaperaap paasisimasinnaavaa Jehovap, Semimik ilaqutaanillu ulersuarmit aniguisitsisup, pallorfigineqarnissaa qanoq pingaaruteqartiginersoq.

Naluarput Aaperaap Guuti ilumoortoq pillugu paasisimasani Semi aqqutigalugu allatulluunniit paasisimanerai, nalunngilarpulli paasisani ajunngitsumik qisuariarfigigai. Jehovap ‘uummatinik misiliisartup’ Aaperaat isigigamiuk ajunngitsumik taassumaniittumik malugisaqarpoq, ajunngitsumillu tamatuminnga ineriartortitsinerunissaanik ikiorpaa. — Ussatit 17:3; 2 Nalunaarsuutit 16:9.

Inuunera

Aaperaat unamminiagassaqartarpoq, inuunerali pissanganartuuvoq siunertaqartuaannarlunilu. Misigisaasa ilamininngui aajuku:

▪ Aaperaat Urimi najugaqartillugu Guutip peqquaa nuna inunngorfini qimallugu nunamut takutitassaminut aallassasoq. Aaperaap Sarallu suut tamaasa — sumunnassanerlutik aamma sooq Guutip taama peqquneraatik — ilisimanngikkaluarlugit naalapput. Kana’animi tuperni najugaqalerput, toqunissamillu tungaannut angalaannartuupput. — Apustilit Suliaat 7:2, 3; Hebræerit 11:8, 9, 13.

▪ Aaperaat Saralu suli meerartaanngitsut Jehova neriorsuivoq Aaperaat inuiassuanngortikkumaarlugu. Aamma neriorsuutigaa Aaperaat aqqutigalugu nunarsuarmi ilaqutariit tamarmik pilluaqqunarsiumaartut. (1 Mosesi 11:30; 12:1-3) Kingusinnerusukkut Jehovap neriorsuutini oqaatigeqqippaa oqarluni Aaperaap kinguaavi qilaap ulloriaasut amerlatigilerumaartut. — 1 Mosesi 15:5, 6.

 ▪ Aaperaat 99-inik ukioqartoq Saralu 90-it pallillugit ukioqartoq Jehova neriorsuivoq ernertaassasut. Inuit isiginnittaasiat naapertorlugu tamanna ajornarpasippoq, Aaperaalli Sarallu ‘Jehovamut ajornartoqanngitsoq’ paasilertorumaarpaat. (1 Mosesi 18:14) Aappaaguani Aaperaat 100-nik ukioqarluni ernertaarpoq Iisaamik atsikkaminik. (1 Mosesi 17:21; 21:1-5) Guuti neriorsuivoq inuit tamarmik Iisaaq aqqutigalugu pilluaqqusaangaarumaartut.

▪ Ukiualuit tamatuma kingorna Jehovap Aaperaat qaqutigoorluinnartumik piumaffigaa: Aaperaap ernini asasani Iisaaq inuusuttoq suli aappaqarnanilu meeraqanngitsoq pilliutigissagaa. Ernermi annaanissaa eqqarsaatigalugu Aaperaat aliasussimassaaq, naalallunili Iisaap pilliutiginissaa piareersalerpaa. Aaperaap upperilluinnarpaa pisariaqassappat Guutip neriorsuutini eqquussinnaaqqullugit Iisaaq toqusunit makitissinnaagaa. (Hebræerit 11:19) Piffissami artornartumi Aaperaap ernini pilliutigileraalu Guuti akuliuppoq Iisaallu inuunera asattuullugu. Jehovap Aaperaat naalannera asseqanngitsoq pillugu nersualaarpaa neriorsuutigeriikkanilu uteqqillugit. — 1 Mosesi 22:1-18.

▪ Aaperaat 175-inik ukioqarluni toquvoq. Biibilimi allassimavoq ‘utoqqarsuanngorluni toqusoq, utoqqarmut ullussani naammatsissimallugit’. (1 Mosesi 25:7, 8) Taamaalilluni Aaperaap Guutip neriorsuutaata allap eqquunnera misigivaa, tassa utoqqarsuanngorluni ‘eqqissilluni’ toqussalluni. — 1 Mosesi 15:15.

Maligassaalluarnera

Aaperaat angutaavoq ilumut inuusimasoq upperisarsiortuusorlu. Naak itsarsuaq inuusimagaluartoq inuunera suli soqutiginaateqarpoq, tamattami malilluarsinnaavarput. (Hebræerit 11:8-10, 17-19) Pissuserineqartussat sisamat Aaperaami malunnarluartut misissoriartigik. Aallartissutigeriartigu pissuseq ilisimaneqaatiginerpaasarigunagaa — uppernera.

[Quppernerup ataani ilanngussat]

[Qupp. 4-mi Ungalusaq]

Inuit Biibilimi oqaluttuarineqartut pingaarutillit ilaat

Mosesimik allakkani siullerni kapitalini siullerni qulini angutit arlallit uppernertik pillugu oqaluttuarineqarput — assersuutigalugu Abeli, Enoki Noalu. Kapitalinili tulliuttuni 15-ini angut ataasiinnaq allaaserineqarnerpaavoq, tassa Aaperaat.

Aammami Biibilimi assigiinngitsunut tunngatillugu pingaarnerpaat ilaat Aaperaamut tunngatillugu eqqaaneqaqqaarput. Assersuutigalugu Aaperaamut tunngatillugu . . .

▪ eqqaaneqaqqaarpoq Guuti kiffaminut eqqortinnaveeqqutitullusooq ittoq, tassa illersuisuusoq. — 1 Mosesi 15:1; 5 Mosesi 33:29; Tussiaat 115:9; Ussatit 30:5.

▪ eqqaaneqaqqaarpoq Guutimik upperinninneq. — 1 Mosesi 15:6.

▪ atorneqaqqaarpoq oqaaseq pruffiiti. — 1 Mosesi 20:7.

▪ eqqaaneqaqqaarpoq angajoqqaat asanninnerat. — 1 Mosesi 22:2.