Allaaserisami matumani immaqa apeqqutigisarnikuusatit taakkualu akissutaat illit nammineq Biibilinni sumi takusinnaaneritit sammineqassapput. Akissutissarsiorninni Jehovap Nalunaajaasuisa ikiorusuppaatsit.

1. Biibilimi siulittuutit sukumiisumik siulittuutaappat?

Guuti ajugaqanngitsoq kisimi siunissaq pillugu sukumiisumik siulittuisinnaavoq. (Amosi 3:7) Assersuutigalugu qangarsuarli Guutip siulittuutigaa Missiarsimik, imaluunniit Kristusimik, taaguutilimmik tikiuttoqarnissaa. Tikiuttussaq taanna angummit aalajaatsumit, Aaperaamit, kinguaarineqartussaavoq. Taanna naalaganngorumaarpoq, taassumalu inuit naalattut nappaateqaratik naammalluinnartuullutik inuulernissaannut periarfisseqqissavai. (1 Mosesi 22:18; Esaja 53:4, 5) Neriorsuutigisaq taanna Betlehemiminngaanneersuussaaq. — Atuaruk Mika 5:1.

Paasinarsivoq Jiisusi tassaasoq Missiarsi. Missiarsip niviarsiamit erniarineqarnissaa nikagineqarnissaalu ukiunik 700-nit amerlanerusunik sioqqullugu Biibilimi siulittuutigineqarpoq. Inuunini inuppassuit ajortuliaat pillugit tunniukkumaarpaa, pisuullu akornanni ilineqarumaarpoq. (Esaja 7:14; 53:3, 9, 12) Aamma siutituumik qimusserluni Jerusalemimut iserumaarnera aningaasallu sølvit 30-t pillugit killuutigineqarumaarnera ukiut 500-t sinnerlugit tamatuma siorna Biibilimi siulittuutigineqarpoq. Siulittuutit taakku tamarmik eqquuteqqissaarput. — Atuakkit Zakaria 9:9; 11:12.

2. Guutip pisussat qaqugorpiaq pissanersut siulittuutigisarpai?

Missiarsip ukioq sunarpiaq saqqummernissaa ukiut 500-t sinnerlugit tamatuma siorna Biibilimi siulittuutigineqarpoq. Missiarsip tikiunnissaata tungaanut piffissaq eqqartorneqarpoq sapaatit-akunnerisa ullui ukiunngortitat atorlugit, tassa sapaatip-akunneri taakku tamarmik immikkut ukiunik arfineq-marlunnik sivisussuseqassapput. Sapaatip-akunneri 69-it, tassa ukiut 483-it, qaangiuppata Missiarsi saqqummissaaq. (Danieli 9:25, 1900) Ukiut taakku aallartipput Biibili naapertorlugu Guutip kiffaa, Nehemia, Jerusalemimut tikimmat illoqarfillu qarmaqqinniarlugu aallartimmat. Perserit naalagaaffiata oqaluttuarisaanera naapertorlugu tamanna ukiumi 455-imi Kr.in.si. pivoq. (Nehemia 2:1-5) Ukiut 483-it tamatuma kingorna Jiisusi Missiarsinngorluni, imaluunniit Kristusinngorluni, kuisippoq, tamannalu piffissaq eqqorluinnarlugu ukiumi 29-mi Kr.in.king. pivoq. — Atuakkit Lukasi 3:15, 21, 22.

 3. Ullumikkut Biibilimi siulittuutinik eqquussortoqarpa?

Jiisusip nalitsinni pisussat pingaarutillit siulittuutigai. Taassuma siulittuutaani Guutip naalagaaffia pillugu nutaarsiassaq nuannersoq eqqaaneqarpoq. Guutip naalagaaffia inunnut Guutimik asannittunut tamanut neriuutissiillunilu tuppallersaataavoq pissutsit aaqqissuussaanerannik ajortumik maanna inuuffigisatsinnik suujunnaarsitsissagami. — Atuakkit Matthæusi 24:14, 21, 22.

Pissutsit aaqqissuussaanerata tamatuma naggataatungaa Biibilimi sukumiisumik siulittuutigineqarpoq. Ullumikkut siumukartoqaraluartoq Biibilimi siulittuutigineqarpoq inuit ‘nunarsuarmik aseruiumaartut’. Sorsunnerit, kaannersuit, nunap sajunneri nappaalanerillu pissutigalugit annikilliuutit amerligaluttuinnarumaarput. (Lukasi 21:11; Saqqummersitat 11:18) Ileqqussatigut najoqqutassiaarutissaaq. Ulluni artornartorsiorfiusuni makkunani Jiisusip ajoqersugai Guutip naalagaaffia pillugu nutaarsiassamik nuannersumik inuiaqatigiinnut tamanut oqaluussissutiginnissapput. — Atuakkit Matthæusi 24:3, 7, 8; 2 Timotheusi 3:1-5.

4. Inuit sumik siunissaqarpat?

Guutip ajugaqanngitsup inuit aalajaatsut nuanningaartumik siunissaqartippai. Jiisusi Kristusi, Missiarsi neriorsuutigisaq, qilammiit nunarsuarmut naalakkersuissaaq qinikkani peqatigalugit. Taakku Guutip naalagaaffiani ukiuni tusindini naalakkersuissapput. Toqusimasut makitinneqassapput naassaanngitsumillu inuunissamut periarfissinneqassallutik. Aammattaaq Guutip naalagaaffiata aqutsinerani inuit tamarmik ajorunnaarsinneqassapput. Nappaatit toqulu peerukkumaarput. — Atuakkit Saqqummersitat 20:6, 12; 21:4, 5.

Paasisaqarnerorusukkuit atuakkit qupp. 23-25 aamma 197-201, Biibilimi sorpiaat ajoqersuutigineqarpat?, atuakkami uani.