Inuit allat ‘sininnermit iternissaannut’ ikiukkit

“Piffissaq ilisimavarsi nalunagulu sininnermit itissalluni piffissanngoreersoq.” — ROMAMIUT 13:11.

UKU NASSUIARSINNAAVIGIT?

Sooq kristumiut eqqumajuarnissaat pingaaruteqarpa?

Sooq oqaluussisartut eqqummaarissuullutillu tusarnaaqqissaartuusariaqarpat?

Oqaluussinermi inussiarnisaarneq periaaserinnerlu qanoq pingaaruteqartigippat?

1, 2. Inuppassuit sininnermit itersarneqarnissaat qanoq paasisariaqarpa?

UKIUT tamaasa inuit tusindilippassuit biilertillutik uernalertaramik allaalluunniit sinilertaramik ajunaartarput. Allat suliffeeruttarput sinnartoortaramik sulitillutilluunniit sinilertaramik. Anersaakkulli sinilerneq navianarnerungaarpoq. Taamaattumik Biibilimi anersaakkut sinilernermut mianersoqqussummut tunngatillugu ima allassimasoqarpoq: “Pilluarpoq taanna eqqumasoq.” — Saqqummersitat 16:14-16.

² Harmagedoni qanilliartortillugu inuiaat ataatsimut isigalugit anersaakkut sinipput. Allaat kristumiuunerartut siuttuisa ilaasa naalagiartartutik anersaakkut sininnerarpaat. Anersaakkut sininneq qanoq paasisariaqarami? Kristumiut ilumoortut eqqumajuarnissaat sooq pingaaruteqarpa? Inuit allat anersaakkut sininnermit iternissaannut qanoq ikiorsinnaavavut?

ANERSAAKKUT SININNEQ QANOQ PAASISARIAQARPA?

3. Anersaakkut sinittoq illit qanoq oqaatigissaviuk?

³ Inuit sinittut suliaqarneq ajorput. Anersaakkulli sinittut ulapittupilussuusarput, Guutimilli iluarisaanissartik ulapputigineq ajorpaat. Immaqa ulluinnarni isumakuluutit, aliikkutassat, ataqqisaanissartik pigissaarnissartilluunniit pingaarnerutittarpaat. Ulapputigisaat anersaakkut pisariaqartitaannut tunngassuteqanngillat. Inuilli anersaakkut eqqumasut paasivaat “ullussani kingullerni” inuusugut, Guutillu piumasaatut iliornissaq sapinngisartik tamaat ulapputiginiartarpaat. — 2 Petrusi 3:3, 4; Lukasi 21:34-36.

4. Paulusip oqaasii: “Sineqinata inuit allat ileqquattut”, qanoq paasisariaqarpat?

⁴ Atuakkit 1 Thessalonikamiut 5:4-8. Apustilip Paulusip kristumiut ima allaffigai: “Sineqinata inuit allat ileqquattut.” Tamanna qanoq paasisariaqarpa? Guutip ileqqussatigut najoqqutassiaanik maleruaanngikkutta ‘sinissimassaagut’.  Aamma Jehovap ajortunik piuneerussingajalernera sumiginnarutsigu ‘sinissimassaagut’. Guutiitsunit ileqqutsigut eqqarsartaatsitsigullu sunnertinnginnissarput eqqumaffigisariaqarparput.

5. Anersaakkut sinittut qanoq eqqarsartarpat?

⁵ Inuit ilaat eqqarsartarput Guuteqanngitsoq iliuutsitik pillugit eqqartuussisussamik. (Tussiaat 53:2) Allat eqqarsartarput Guutip soqutiginngikkaatigut, taamaattumillu isumaqarput Guuti soqutigisariaqanngikkipput. Allallu eqqarsartarput naalagiartarunik Guutimut ikinngutaalissallutik. Inuit taamatut eqqunngitsunik isumaqartut anersaakkut sinipput. Taakku tamarmik itertariaqarput. Qanoq ikiorsinnaavavut?

UAGUT NAMMINEQ EQQUMAJUARTARIAQARPUGUT

6. Sooq anersaakkut eqqumajuartariaqarpugut?

⁶ Inuit allat itertissagutsigit uagut nammineq eqqumasariaqarpugut. Qanoq eqqumajuarsinnaavugut? Anersaakkut sinittutut ileqqoqassanngilagut. Biibilimi allassimavoq anersaakkut sinittup “taartup suliai” iliuuserisarai, soorlu inuulluapilunnerit, aalakoornerit, kinguaassiuutitigut inuunerlunnerit, kannguttaatsuliornerit, saqitsaanerit sinnganerillu. (Atuakkit Romamiut 13:11-14). Inuit avatangiisitsinniittut inuunerattut inuunnginnissaq unamminiarnarsinnaavoq. Eqqumajuarnissarput pingaaruteqarluinnarpoq. Biilertup eqqaamassavaa biilertilluni sinileruni ajunaarsinnaalluni. Kristumiup aamma eqqaamassavaa anersaakkut sininneq toqussutaasinnaasoq!

7. Oqaluussiffigisartakkatsinniittunut kukkusumik isiginnittaaseqarutta uagutsinnut qanoq sunniuteqarsinnaava?

⁷ Isumaqalersinnaavugut oqaluussiffigisartakkatsinniittut tamarmik nutaarsiassamik nuannersumik soqutiginninngitsut allanngornavianngitsullu. (Ussatit 6:10, 11) Immaqa eqqarsarpugut: ‘Nutaarsiassaq nuannersoq tusarliussarput pillugu tusaajumasoqanngippat sooq inunnik ikiuiniarluta ilungersortariaqarpugut?’ Ilumoorpoq inuppassuit maanna tusaajumanngitsut, taakkuali inuuneranni pisoqarsinnaavoq eqqarsartaatsiminnik allannguissutigisaannik. Ilaat iterpullusooq nutaarsiassarlu nuannersoq upperilerlugu. Uagullu nammineq eqqumajuarutta taakku ikiorsinnaavavut. Assersuutigalugu oqaluusseriaatsit allat misilittarutsigit tusarliussarput soqutiginarnerussaaq. Eqqumajuarnissatsinnut iluaqutigissavarput eqqaamagutsigu sooq oqaluussinissatta taama pingaaruteqartiginera.

OQALUUSSINISSARPUT SOOQ TAAMA PINGAARUTEQARTIGAA?

8. Sooq oqaluussinerput taama pingaaruteqartigaa?

⁸ Eqqaamajuaruk inuit tusaarusunngikkaluartut oqaluussinerput Jehovamut ataqqinaataallunilu ulluni pingaaruteqaqisuni makkunani taassuma piumasaata naammassineqarnissaanut pingaaruteqartoq. Ungasinngitsukkut Guutip inuit oqaluussinitsinnut qanoq periarnerat apeqqutaatillugu eqqartuutissavai. Nutaarsiassamik nuannersumik upperinnikkumanngitsut suujunnaarsitaassapput. (2 Thessalonikamiut 1:8, 9) Kukkunerussaaq eqqarsarutta “iluartut iluaatsullu” toqusunit makititaasussaammata oqaluussinitsinni eqiasuitsuusariaqanngitsugut. (Apustilit Suliaat 24:15) Guutip oqaasianit paasivarput inuit ‘savaasatut’ eqqartuunneqartussat naassaanngitsumik suujunnaarsinneqarumaartut. Oqaluussinerput Guutip nallittuineranut ersiutaavoq, oqaluussinitsigummi inuit allannguinissamut naassaanngitsumillu inuulernissamut periarfissinneqarput. (Matthæusi 25:32, 41, 46; Romamiut 10:13-15) Oqaluussinngikkutta inuit tusarliussaq annassutaasinnaasoq tusarsinnaanngilaat, ilaa?

9. Oqaluusseqataaneq ilinnut allanullu qanoq iluaqutaasimava?

⁹ Nutaarsiassamik nuannersumik oqaluussineq aamma uagut nammineq iluaqutigaarput. (Atuaruk 1 Timotheusi 4:16). Jehova pillugu taassumalu naalagaaffianik neriuut pillugu oqaluussineq upperninnut  nakussatsissutigalugulu Guutimik asanninnerulissutigisarpat, ilaa? Aamma oqaluussineq kristumiutut pissuserissaarnerulernissamut iluaqutigisarpat, ilaa? Aamma oqaluussinikkut Guutimik asanninnerit ersersikkaangakku nuannaarnerulertarunarputit. Sallusuissut pillugu allanik ilinniartitsisimasorpassuit Guutip anersaava iluaqutigalugu ilinniartitamik pitsaanerusumik inooriaaseqalernerat takullugu nuannaarutigisarpaat.

EQQUMMAARISSUUGIT

10, 11. (a) Jiisusi Paulusilu qanoq eqqummaarissuuppat? (b) Oqaluussinitsinni qanoq eqqummaarissuusinnaavugut?

¹⁰ Periaatsit assigiinngitsut atorlugit nutaarsiassaq nuannersoq inunnut soqutiginarnerulersissinnaagatsigu oqaluussinitsinni eqqummaarissuusariaqarpugut. Tamatumunngalu tunngatillugu Jiisusi uagut maligassaraarput. Naammalluinnartuugami nalunngilaa farisiiari oqaaseqanngikkaluarluni kamattoq, arnaq ajortuliortartutut ilisimaneqartoq ilumoorluni allamik isumataartoq uillarnerullu pigisani tamaasa tunniukkai. (Lukasi 7:37-50; 21:1-4) Jiisusip inuit ikiorsinnaavai taakkua pisariaqartitaat nalunnginnamigit. Eqqummaarissuujumallutali naammalluinnartuusariaqanngilagut. Tamatumunnga tunngatillugu apustili Paulusi maligassaalluarpoq. Oqaluusseriaatsit assigiinngitsut atortarpai inuit tamalaat ikiorniarlugit. — Apustilit Suliaat 17:22, 23, 34; 1 Korinthimiut 9:19-23.

¹¹ Jiisusitut Paulusitullu eqqummaarissuugutta inuillu pisariaqartitaat maluginiartarutsigit paasisinnaassavarput qanoq soqutiginnilersissinnaanerlutigit. Assersuutigalugu oqaluussigaangavit pulaakkannut tunngasut assigiinngitsut, soorlu sumiuunersut, sunik soqutigisaqarnersut, kisimiittuunersut, katissimasuunersut meeraqarnersulluunniit, maluginiartarsinnaavatit. Maluginiartaruk sumik suliaqarnersut oqaloqatigilertinnagillu suliaannut tunngasumik oqaaseqalaartarit.

12. Oqaluussitilluta oqaloqatigiikkaangatta suna eqqaamasariaqarparput?

¹² Oqaluussinitsinni eqqummaarissuujumalluta allamut saasaateqarnaveersaartariaqarpugut. Oqaluusseqatitsinnik oqaloqateqarneq kajumissinaraluartoq eqqaamasariaqarparput inunnut allanut oqaluussinissarput pingaarnerpaajusoq. (Oqaluussisartup oqaasii 3:1, 7) Taamaattumik oqaluussitilluta oqaloqatigiinnerput allamut saasaatiginaveersaartariaqarparput. Oqaluussinerput eqqarsaatigiuarumallugu pitsaassaaq naapitassatsinnut qanoq oqarsinnaanerluta oqaloqatigiissutigisarutsigu. Oqarasuaat nassartagaq oqaluussinermi iluaqutaasinnaagaluartoq oqaluussiffigisartakkatsinniittumik oqaloqateqartilluta akornutaatinnaveersaartariaqarparput.

SOQUTIGINNITTUUGIT

13, 14. (a) Pulaakkap soqutigisai qanoq ililluta paasisinnaavavut? (b) Oqaluussitilluta anersaakkut ittut pillugit qanoq ililluta soqutiginnilersitsisinnaavugut?

¹³ Oqaluussinermi naapitatta tusarnaaqqissaarnissaat pingaaruteqarpoq. Oqaluussiffigisartakkatsinniittut qanoq eqqarsarnersut paasiumallugu qanoq aperisinnaavavut? Upperisarsiornerit amerlavallaarnerat, najukkaminni nakuusernerit, politikkerillu ajornartorsiutinut aaqqiissutissarsisinnaannginnerat isumakuluutigaat? Uumassusillit tupinnartumik pinngortinneqarsimanerat siunnersuutilluunniit Biibilimeersut iluaqutaangaarnerat eqqartorlugit Guuti pillugu soqutiginnilersissinnaavigit? Inuit amerlanersaasa qanorluunniit tunuliaqutaqaraluartut, allaat Guutimik upperinninngitsut, qinunermut tunngasut soqutigisarpaat. Inuppassuit qinnutinik tusarnaartoqartarnersoq eqqarsaatigisarpaat. Allat apeqqutit soorlu uku soqutigisarunarpaat: Guutip qinnutit tamaasa tusarnaartarpai? Taamaanngippat Guutimit tusarneqarumalluta susariaqarpugut?

¹⁴ Oqaluussisartut misilittagaqarluartut aallarniutaat tusarnaarlugit ilinniarfigisinnaavavut. Maluginiaruk pulaakkamik peqqusiileqilersitsinatik  qanoq aperisartut. Maluginiaruk nipimikkut kiinnamillu isikkuatigut pulaakkap isumaanik ilumoorlutik paasinnerusunnertik qanoq ersersittaraat. — Ussatit 15:13.

INUSSIARNERSUULLUTILLU OQALUUSSILLAQQISSUUGIT

15. Oqaluussitilluta sooq inussiarnisaartariaqarpugut?

¹⁵ Sinilluaruttorlutit itersarneqaruit nuannarisaraluarpiuk? Inuppassuit itersarneqariataartarnertik nuannarisanngilaat. Sallaatsuunnguamilli itersarneqarusunnerusarput. Inuit anersaakkut sinittut ‘itersarniaraangatsigit’ aamma nuannarineq ajorpaat. Assersuutigalugu oqaluussitillutit pulaakkamik kamattoqarpat qanoq iliussavit? Inussiarnisaarfigiuk ataqqillugulu, eqqissisimallutillu qimaguk. (Ussatit 15:1; 17:14, 1900; 2 Timotheusi 2:24) Inussiarnisaarfigigukku tullianik oqaluussisartoq alla takkuppat inussiarnisaarnerussajunnarsivoq.

16, 17. Oqaluussitilluta qanoq inussiarnersuullutalu oqaluussillaqqissuusinnaavugut?

¹⁶ Immaqa pulaagaq oqaloqateqarusunnginnami soqutiginninnginnerartarluniluunniit allamik upperisaqarnerartarpoq, taamaakkaluartorli ilaannikkut oqaloqatigiinnarneqarsinnaasarpoq. Oqaluussillaqqissut pulaagaq tusarliussamik Biibilimeersumik soqutiginnilersissinnaasarpaat inussiarnerlutik soqutiginartumik aperinermikkut. — Atuaruk Kolossemiut 4:6.

¹⁷ Ilaannikkut tusarnaarnissaminnut ulapippallaarsorisut naapikkaangatsigit pitsaassaaq ataqqinnilluta qimagutiinnartarnissarput. Ilaannikkulli pitsaasinnaavoq eqqarsariaallannartumik oqaaseqalaarnissarput. Assersuutigalugu qatanngutitta ilaasa minutsip ataatsip iluani allassimaffik atuarlugulu pulaagartik tullianik akisassaminnik aperisarpaat. Taamatut saqqummiussilaarneq ima sunniuteqarluartigisinnaavoq pulaagaq oqaloqateqarusulerluni. Tullianik periarfissarsiguit immaqa taamaaliorsinnaavutit.

18. Torrutiinnarlugu oqaluussillaqqinnerulerniarluta qanoq iliorsinnaavugut?

¹⁸ Torrutiinnarlugu oqaluussinissamut piareersarsimagaangatta inuit ulluinnarni naapittakkavut nutaarsiassamik nuannersumik soqutiginnilersissinnaasarpavut. Qatannguterpassuit Biibililersaarutit kaasarfimmioralugilluunniit taskiminiitittarpaat. Immaqa aamma allassimaffik aalajangersimasoq eqqarsaatigisarpaat oqaloqateqalissagunik eqqartorsinnaasartik. Ilagiinniittunut kiffartornermik nakkutilliisumut pionerinulluunniit ikioqqusinnaavutit torrutiinnarlugu oqaluussinissamut piareersarnissannut.

PERIAASERILLUTIT ILAQUTTATIT IKIUKKIT

19. Sooq ilaquttavut ikiorniartuartariaqarpavut?

¹⁹ Tamatta ilaquttavut eqqarlivullu nutaarsiassamik nuannersumik upperinnileqqullugit ikiorusuppavut. (Josva 2:13; Apustilit Suliaat 10:24, 48; 16:31, 32) Immaqa oqaluussiffigeqqaaratsigit tusarliussarput tusaajumasimanngimmassuk oqaluussiffigeqqinnissaat kajumigivallaanngilarput. Immaqa eqqarsarpugut qanorluunniit ilioraluarutta oqaraluaruttaluunniit isumaat allanngortissinnaanagu. Imaassinnaavorli arlaannik pisoqarsimasoq ilaquttavit inuunerannut isumaannulluunniit allannguutaasumik.  Imaassinnaavorluunniit illit sallusuissut pillugu nassuiaallaqqinnerulersimasutit, taamaattumillu maanna killissinnaanerugitit.

20. Ilaquttavut oqaloqatigigaangatsigit taakkua misigissusiinik ataqqinninnerput qanoq ersersissinnaavarput?

²⁰ Ilaquttatta misigissusiinik ataqqinnittuusariaqarpugut. (Romamiut 2:4) Aamma taakku oqaluussinermi naapittatta inussiarnisaarfigisarnerattut inussiarnisaarfigisariaqarpavut. Saamasuullutillu ataqqinnittuugit. Aamma sallusuissut kisiat oqaluuserisariaqanngilat. Pissuserissaarnikkut ersersissinnaavat sallusuissut ilinnut qanoq iluaqutaatigisimasoq. (Efesosimiut 4:23, 24) Jehovamit ilinniartinneqarnerit pissutigalugu pitsaanerusumik inooriaaseqarnerit ersersikkukku taakkua malugisinnaassavaat. (Esaja 48:17) Maligassiuinikkut ilaquttannut ersersiguk qanoq kristumiut inuusariaqarnersut.

21, 22. Misigisaq ilaquttanik anersaakkut ikiuiniartuarnissap qanoq pingaaruteqartigineranik ersersitsisoq oqaluttuariuk.

²¹ Qatanngut arnaq ima allappoq: “Oqaatsikkut iliuutsikkullu qatanngutikka 13-iusut nalunaajaaffiginiarsariuaannartarpakka. Ukiut tamaasa taakku tamaasa allaffigisarpakka. Ukiut 30-t sinnerlugit ilaquttanni kisima Nalunaajaasuuvunga.”

²² Qatanngut arnaq ima nangippoq: “Taamaallunga angajora hundredet kilometerisut ungasitsigisumi najugalik sianerfigaara. Oqaluttuuppaanga palasertik qinnuigisimagaluarlugu Biibilimik atuaqatigeqqulluni, tamannali iluatsinngisaannarsimavoq. Oqarfigigakku ikiorusukkaluarlugu ima akivoq: ‘Ajunngilaq; ikiorsinnaavarma. Paasitereertariaqarpakkilli Jehovamut nalunaajaasunngunngisaannassallunga.’ Atuakkamik Biibilimi sorpiaat ajoqersuutigineqarpat?-mik nassereerakku arlaleriarlunga sianerfigaara, sulili atuagaq misissuataarsimanngilaa. Naggataatigulli qinnuigaara atuagaq tigoqqullugu, oqarasuaatikkullu minutsit 15-it allassimaffiit issuarneqartut ilaat atuarlugillu oqaloqatigiissutigaavut. Arlaleriarlugu sianerfigeqqittareerlugu minutsit 15-it sinnerlugit atuaqqissaarusuttalerpoq. Taava uannut sianertalerpoq, ilaannikkut allaat suli makinngitsunga, ilaannikkullu ullormut marloriarluni atuaqqissaarusuttarluni. Aappaaguani kuisippoq, aappaagunngoqqimmallu pionerinngorpoq.”

23. Sooq inuit anersaakkut sinittut itersarniartuartariaqarpavut?

²³ Inuit anersaakkut sinittut itersarniarlugit iliuuseqartuartariaqarpugut. Tamannali imaannaanngilaq. Sulili inuppassuaqarpoq nutaarsiassamik nuannersumik upperinnilertartunik. Qaammammut agguaqatigiissillugu inuit 20.000-it sinnerlugit Jehovamut nalunaajaasunngorlutik kuisittarput. Taamaattumik Paulusip Arkipposimut siunnersuutaa una maleruartigu: ‘Kiffartuutissaq Naalakkami pisat sianiginiaruk naammasseqqullugu.’ (Kolossemiut 4:17, 1936) Allaaserisami tulliuttumi suliassap nukinginnassusianik sianiginnilluni oqaluussineq qanoq paasisariaqarnersoq sammineqassaaq.

[Atuaqqissaarnermi apeqqutit]

[Qupp. 13-mi ungalusaq]

QANOQ NAMMINEQ EQQUMAJUARSINNAASUTIT

▪ Guutip piumasaatut iliorneq ulapputigiuk

▪ “Taartup suliai” iliuuserinaveersaakkit

▪ Anersaakkut sininnerup navianaatai eqqumaffigikkit

▪ Inunnut oqaluussiffigisartakkatsinniittunut ajunngitsumik isiginnittaaseqarit

▪ Oqaluusseriaatsit nutaat misilittakkit

▪ Oqaluussisarnissavit qanoq pingaaruteqartiginera eqqaamajuk