Suliassap nukinginnassusia sianigiuaruk

“Oqaaseq oqaluussissutiguuk, . . . nakimajunnaarsitsigit.” — 2 TIMOTHEUSI 4:2.

UKU NASSUIARSINNAAVIGIT?

Sooq kristumiut ukiuni hundredelinni siullerni oqaluussineq taama ulapputigitigaat?

Oqaluussinerup nukinginnassusia qanoq ililluta sianigiuarsinnaavarput?

Sooq oqaluussinerput aatsaat taama nukinginnartigaa?

1, 2. ‘Oqaatsip oqaluussissutiginissaanik nakimajunnaarsitsinissamillu’ kajumissaarut pillugu suut apeqqutaalerpat?

INUIT annaassiniartartut suliassamik nukinginnassusia nalunngilluinnartarpaat. Assersuutigalugu qatserisartut ikuallattoqartillugu ornigutipallattarput inuit navianartorsiorsinnaanerat nalunnginnamikku.

² Jehovamut Nalunaajaasuugatta inuit annaanneqarnissaat kissaatigaarput. Taamaattumik Guutip naalagaaffia pillugu nutaarsiassamik nuannersumik oqaluussissutiginninnerput pingaartingaarparput. Suliassarput nukinginnaraluartoq qatserisartutut tuaviortigissanngilagut. Apustililli Paulusip suna pivaa, ima kajumissaarigami: “Oqaaseq oqaluussissutiguuk, . . . nakimajunnaarsitsigit”? (2 Timotheusi 4:2) Qanoq ililluta ‘nakimajunnaarsitsisinnaavugut’? Aamma sooq oqaluussinerput taama nukinginnartigaa?

OQALUUSSINERPUT SOOQ NUKINGINNARPA?

3. Inunnut Guutip naalagaaffianik tusarliussineq upperinnittunut upperinninngitsunullu qanoq kinguneqarsinnaava?

³ Oqaluussinerput pissutigalugu inuit annaanneqarsinnaanerat eqqarsaatigigaangakku nalunngilluinnarunarpat nutaarsiassamik nuannersumik oqaluussinissavit pingaaruteqarluinnassusia. (Romamiut 10:13, 14) Guutip oqaasiani ima allassimavoq: “Uangali iluanngitsoq oqarfigigukku: Ilumut toqussaatit! taannalu ajortuliani iperarlugit uannut saalluni iluartumik naapertuilluartumillu ilioruni . . . taava inuuginnassaaq toqussananilu. Ajortuliarigalui suulluunniit eqqaamaneqassanngillat. Iluartumik naapertuilluartumillu iliorsimagami inuuginnassaaq.” (Ezekieli 33:14-16) Aap, Biibili naapertorlugu nutaarsiassamik nuannersumik oqaluussissutiginnittartut ‘imminut annaatissapput tusartitillu annatsillugit’. — 1 Timotheusi 4:16; Ezekieli 3:17-21.

4. Sooq Timotheusi oqaaseq oqaluussissutigissallugulu nakimajunnaarsitsisussaava?

⁴ Sooq Paulusip Timotheusi nakimajunnaarsitseqqullugu kajumissaarneraa paasiniarlugu allaaserisamut matumunnga allassimaffik najoqqutarineqartoq aamma  versit ataqatigiinneri sammissavavut. Ima allassimavoq: “Oqaaseq oqaluussissutiguuk, qanoq ilisukkulluunniit sassartarit, nakimajunnaarsitsigit, naqqissuisarit, oqaaqqissaarisarit, nikallujuillutit ajoqersuiuarlutillu! Ullussani nalliuttussani inuit ajoqersuut peqqissinartoq naammagiunnaarumaarpaat, namminneq iluarisaminnik amerlaqisunik ajoqersuisussarsiumaarput siutimik tusarnarisaat tunngavigalugu. Sallusuissut tusarumajunnaarumaarpaat.” (2 Timotheusi 4:2-4) Jiisusip tunussisoqarnissaa siulittuutigaa. (Matthæusi 13:24, 25, 38) Tunussisoqalermat kristumiut ajoqersuutinit eqqunngitsunit tammartinneqaqqunagit ilagiinni Timotheusip Guutip oqaasianik oqaluussissutiginninnera pingaaruteqarluinnarpoq. Taakkua inuunerat pineqarmat! Ullumikkummi?

5, 6. Inuit oqaluussinermi naapitatta ajoqersuutit suut tusassallugit nuannarisarpaat?

⁵ Taamanili pallorfiginninnermit ilumoortumit tunussineq siaruaasimavoq. (2 Thessalonikamiut 2:3, 8) Ullumikkut inuit ajoqersuutit suut tusassallugit nuannaraat? Assersuutigalugu nunarpassuarni pinngoriartuaarsimaneraaneq upperisatut ilungersuutigalugu saqqummiunneqartarpoq. Aap, pinngoriartuaarsimaneraaneq ilisimatuussutsikkut nassuiarneqartaraluarluni upperisarsiornertungajak isigineqalersimavoq inuit Guutimut inunnullu allanut isiginnittaasiannut sunniuteqarluni. Ajoqersuut nuannarineqartoq alla tassaavoq Guutip soqutiginngikkaatigut taamaattumillu uagut taassuminnga soqutiginnittariaqanngitsugut. Sooq inunnut millionilippassuarnut ajoqersuutit tamakku kajungernarpat anersaakkullu sinnassaataappat? Ajoqersuutit taakku pissutigalugit inuit isumaqalertarput qanorluunniit iliorsinnaallutik imminnik eqqartuussisussaqanngimmat. Tamanna inuppassuarnit tusarusunneqartupilussuuvoq. — Atuaruk Tussiaat 10:4.

⁶ Ajoqersuutilli allat aamma upperineqartarput. Naalagiartartut ilaasa tusarusunnerusarpaat ajoqersuisut imatut oqartut: ‘Qanorluunniit ilioraluaruit Guutip asavaatit.’ Inuit allat tusassallugu nuannarisarpaat palasit oqaraangata naalagiarnerit, nalliuttorsiornerit, assilissat inuusaliallu upperisarsiornermut tunngasut Guutip pilluaqqusinerigai. Naalagiartartut taakku naluaat qanoq navianartorsiortigalutik. (Tussiaat 115:4-8) Taakkuli Guutip naalagaaffianik iluaqutiginnilersinnaaqqullugit anersaakkut itersarneqartariaqarlutillu sallusuissutinik Biibilimeersunik paasitinneqartariaqarput.

OQALUUSSIGAANGATTA QANOQ ILILLUTA ‘NAKIMAJUNNAARSITSISARSINNAAVUGUT’?

7. Oqaluussinissap pingaaruteqassusianik paasinnissimanerput qanoq ersersissinnaavarput?

⁷ Inuit inuunerat pineqartillugu nakorsap pilattaasartup pikkorissup suliani kiserluinnaat nakkutigisarpaa. Uaguttaaq oqaluussinissap pingaaruteqassusianik paasinnissimanerput ersersissinnaavarput oqaluussinermik ulapputiginninnitsigut. Assersuutigalugu naapitatta paasissutissat suut soqutigineraat taakkuninngalu apeqqutit suut soqutiginnilersitsisinnaanersut eqqarsaatigisinnaavavut. Oqaluussinissap pingaaruteqassusia paasisimagatsigu immaqa aamma taakkununnga piffissaalluarnerusukkut pulaarsinnaaniassagatta oqaluussinissamut pilersaarutitsinnik allannguiumassaagut. — Romamiut 1:15, 16; 1 Timotheusi 4:16.

8. Suliassatta nukinginnassusianik paasinnissimagatta susariaqarpugut?

⁸ Suliassatta pingaaruteqassusianik nukinginnassusianillu paasinnissimagutta aamma inuunitsinni eqqortumik pingaarnersiuissaagut. (Atuaruk 1 Mosesi 19:15). Assersuutigalugu takorlooriaruk nakorsap misissugassanik arlalinnik misissuereerluni iseqqugaatit imalu oqarfigigaatit: “Navianartorsiorputit. Nappaativit iliuuseqarfiginissaanut annerpaamik qaammammik piffissaqarputit.” Illit qanoq iliussagaluarpit? Nakorsamit aniguit qatserisartup ikuallattumukarneratut tuaviortigissagunanngilatit. Ilimanarpoq nakorsaq tusarnaaqqissaassagit angerlaruillu qanoq pingaarnersiuissanerlutit eqqarsaatigeqqissaassagit.

9. Paulusip suliassap nukinginnassusianik paasinnissimanera Efesosimiitilluni oqaluussineranit qanoq erserpa?

⁹ Paulusip oqaluussinerup nukinginnassusianik paasinninnera ilinniarfigisinnaavarput taassuma  Asiami oqaluussinini pillugu utoqqaanertanut Efesosimiittunut oqaasii misissorutsigit. (Atuakkit Apustilit Suliaat 20:18-21). Tamaannga tikinnerminiilli nutaarsiassaq nuannersoq illumiit illumut oqaluussissutigalugu ulappissimavoq. Aamma ukiuni marlunni ‘ullut tamaasa Tyrannosip ilinniarfiutaani’ oqalugiartarpoq. (Apustilit Suliaat 19:1, 8-10) Paulusip suliassap nukinginnassusia nalunngilluinnarpaa, tamannalu ulluinnarni pilersaarusiorneranut sunniuteqangaarsimassaaq. ‘Nakimajunnaarsitseqqulluta’ kajumissaarneqaratta suliassamut sapiutilissanngilagut. Oqaluussinerli pingaarnerpaatittariaqarparput.

10. Sooq ukiut hundredit missaat matuma siorna Biibilimik Atuaqqissaartartut aallussilluarlutik oqaluussilernerat nuannaarutigisinnaavarput?

¹⁰ Ukioq 1914 sioqqullugu Biibilimik Atuaqqissaartartut ikittunnguit nutaarsiassaq nuannersoq oqaluussissutigilerpaat. Taakkua maligassaannit erserpoq ‘nakimajunnaarsitsineq’ qanoq paasisariaqartoq. Piffissap nukinginnassusia paasigamikku tusindilippaaluinnaagaluarlutik aallussilluarlutik Guutip naalagaaffia oqaluussissutigilerpaat. Aviisinut hundredelippassuarnut oqaluutsit naqiterneqartarput, aamma “Skabelsens Fotodrama” — assinik aalasunik assinillu seqersittakkanik isiginnaagassiaq — takutittarpaat. Taamaalillutik nutaarsiassaq nuannersoq inunnut millionilippassuarnut annguppaat. Biibilimik Atuaqqissaartartut suliassap nukinginnassusianik paasinnissimanngitsuuppata amerlanersatta Guutip naalagaaffianik tusarliussaq tusarsimassanngikkaluarpaat. — Atuaruk Tussiaat 119:60.

SULIASSAP NUKINGINNASSUSIA SIANIGIUARUK

11. Sooq ilaasa piffissap nukinginnassusia sianigiunnaarpaat?

¹¹ Allamut saasaatissarpassuaqarpoq oqaluussinerup nukinginnassusianik sianiginnikkunnaassutaasinnaasunik. Saatanip Jehovamut kiffartornitsinni akornusersorniarluta pissutsinik aaqqissuussinini atorlugu nammineq soqutigisatsinnik pingaaruteqanngitsunilluunniit ulapputiginnilersinniarsaraatigut. (1 Petrusi 5:8; 1 Johannesi 2:15-17) Jehovamut kiffartornerminnik salliutitsisimagaluartut ilaasa piffissap nukinginnassusia sianigiunnaarpaat. Assersuutigalugu Demasi kristumiuuvoq apustilip Paulusip suleqataa, taassumali kingusinnerusukkut silarsuaq allamut saassutigaa. Paulusi ajornartorsiornerani qiimmassarnagu qimappaa. — 2 Timotheusi 4:10; Fiilimuut 23, 24.

12. Maanna sumut periarfissinneqarpugut, siunissamilu sumut periarfissinneqarumaarpugut?

¹² Piffissap nukinginnassusia sianigiuarumallugu ussernartut oqaluussinitsinnit allamut saassutigisinnaasavut akiortariaqarpavut. ‘Inuunivik tigulluartitaartariaqarparput’. (1 Timotheusi 6:18, 19, NV) Qularutiginngilluinnarunarpat Guutip naalagaaffiani naassaanngitsumut soqutiginangaartunik sammisassarpassuaqarsinnaassasugut. Maannali inuit Harmagedonimit aniguisinnaaqqullugit ikiornissaannut periarfissinneqarpugut, taamatulli periarfissinneqaqqinngisaannassaagut.

13. Oqaluussinerup nukinginnassusianik sianiginnittuarnissatsinnut suna iluaqutigisinnaavarput?

¹³ Silarsuarmiut amerlanersaasa Jehova ilisarisimanngimmassuk oqaluussinerup nukinginnassusia sianigiuarumallugu susinnaavugut? Eqqaamasariaqarparput siornatigut Guuti ilisarisimanagulu siunissamut neriuuteqannginnerput. Jehovali Jiisusilu pillugit sallusuissut ilikkarparput, maannakkullu sallusuissummik allanut ilinniartitsinissatsinnik immikkut pisinnaatitaaffeqarpugut. (Atuaruk Efesosimiut 5:14). Paulusi ima allappoq: “Sianiginiarsiuk qanoq inuunersusi, siuneqanngitsutut pinnasi, siuneqartutulli iliorlusi. Piffissaqqissoq atorniarsiuk [Piffissamik pisigitsi, NV], ullut ajortuummata.” (Efesosimiut 5:15, 16) Silarsuarmi ajortumi matumani sammisassanut Jehovamut attaveqarluarnerulissutigisinnaasatsinnut ‘piffissamik pisinissarput’ pingaaruteqarpoq.

ULLUNI PINGAARUTEQANGAARTUNI INUUVUGUT

14-16. Sooq Guutip naalagaaffia pillugu oqaluussinerput aatsaat taama nukinginnartigaa?

¹⁴ Kristumiut oqaluussinerat nukinginnartuaannarsimavoq,  maannakkulli aatsaat taama nukinginnartigaaq. 1914-imiilli nalunaaqqutip Biibilimi siulittuutigineqartup eqquunnera erseqqippoq. (Matthæusi 24:3-51) Inuit aatsaat taama navianartorsiortigaat. Naalagaaffiit pissaaneqarnerpaat eqqisseqatigiinnissamik isumaqatigiissuteqarsimagaluarlutik suli 2000-it missiliorlugit atomip nukinganik qaartartuuteqarput igeriunneqariaannaasunik. Oqartussaasut nalunaaruteqarsimapput atortussanik atomitortunik hundredeleriarluni tammaasaqartoqartarsimasoq. Peqqarniisaarniat atortussat atomitortut taakkua ilaat pissarsiarisimanerpaat? Ilaat oqartarput sorsunneq peqqarniisaarniamit aallartinneqarpat inuit tamarmik toqutaariaannaasinnaasut. Sorsunnerli kisimi inunnik navianartorsiortitsinngilaq.

¹⁵ 2009-mi The Lancet-imit aamma University College London-imit nalunaarusiarineqartumi ima allassimavoq: “Silap pissusiata allanngornera 2000-ikkunni silarsuaq tamakkerlugu peqqissutsimik navianartorsiortitsinerpaavoq. Ukiut qulikkuutaat tulliuttut ingerlaneranni inuit amerlanersaasa silap pissusiata allanngornerata sunniutai peqqussutsimikkut malugilissavaat, inuillu milliardillit peqqissusiat inuunerallu navianartorsiussaaq.” Immap qaffakkiartornera, panernersuit, qarsutsinersuit, nappaalanersuit, ulussaarsuit sorsunnerillu pissutigalugit sumiiffippassuit aserorneqarsinnaapput. Aap, qularnanngilaq sorsunnerit ajunaarnersuillu inunnik navianartorsiortitsisut.

¹⁶ Inuit ilaat isumaqarsinnaapput atombombit atorlugit sorsunneq aallartippat tamatuma kinguneri Jiisusip ullut kingulliit pillugit siulittuutaasa eqquunnerigaat. Inuilli amerlanersaasa Jiisusip siulittuutaa qanoq isumaqarnersoq paasinngilaat. Ukiorpassuarni erseqqippoq Kristusi ilumut najuuttoq pissutsillu aaqqissuussaanerata matuma naggatissaa qanillisoq. (Matthæusi 24:3) Jiisusip siulittuutai aatsaat taama amerlatigisut aatsaallu taama erseqqitsigisumik eqquussorput. Maanna inuit anersaakkut sinikkunnaartariaqarput. Oqaluussinerpullu iluaqutigisinnaavaat.

17, 18. (a) Ulluni kingullerni inuunitsinnik paasinninnerput uagutsinnut qanoq sunniuteqarpa? (b) Inuit Guutip naalagaaffianik tusarliussamik suut soqutiginnilissutigisinnaavaat?

¹⁷ Jehovamut asanninnitta uppernarsarnissaanut ullunilu kingullerni oqaluussinissatta naammassinissaanut piffissaq killeqarpoq. Paulusip kristumiunut Romamiittunut oqaasii uku uagutsinnut suli naleqqunnerupput: “Piffissaq ilisimavarsi nalunagulu sininnermit itissalluni piffissanngoreersoq. Annannissarpummi maanna qaninnerulerpoq uppertunngoqqaarnitsinnit.” — Romamiut 13:11.

¹⁸ Ullut kingulliit pillugit siulittuutigineqartut piviusunngornerat takugunikku inuit ilaasa paasilersinnaavaat Guutimut attaveqarlualertariaqarlutik. Inuit ilaasa Guutip naalagaaffianik tusarliussaq soqutigilerpaat inuit naalakkersueriaasiat iluatsinngimmat. Nunarsuarmi naalakkersuisut aningaasarsiornikkut ajornartorsiutit, atomimik sakkussiat navianartorsiortitsinerat, nakuuserluni pinerluttuliortarnerit nunarsuarmillu aseruineq aaqqissinnaanngilaat. Allat namminneq ilaquttaminni ajornartorsiutit pissutigalugit — soorlu nappaateqartoqaleraangat, avittoqaraangat, asasaminnilluunniit toqusoqaraangat — tusarliussarput soqutigilertarpaat. Taakkulu oqaluussinitsigut ikiorsinnaavavut.

SULIASSAP NUKINGINNASSUSIANIK SIANIGINNINNEQ KAJUMISSISSUTIGAARPUT

19, 20. Kristumiorpassuit suliassap nukinginnassusianik sianiginninnertik kajumississutigalugu qanoq inuunerminnik allannguisarpat?

¹⁹ Kristumiorpassuit suliassap nukinginnassusianik sianiginninnertik kajumississutigalugu oqaluussinerujumallutik inuunerminnik allannguisarput. Assersuutigalugu aappariit inuusuttut Ecuadorimeersut 2006-imi immikkut ittumik ataatsimeersuaararnermi “Isit tappissuutiguk”-mik qulequtalimmi saqqummiunneqartut tusarnaareerlugit inooriaatsiminnik pisariillisaaniarlutik aalajangerput. Pinngitsoorsinnaasatik allattorpaat, qaammatillu pingasut ingerlaneranni inissiamit pingasunik initalimmit inissiamut ataatsimik initalimmut nutserput, pigisamik  ilaat tunivaat akiitsuerullutillu. Sivitsunngitsorlu ikiorti-pionerinngorput ilagiinnillu nakkutilliisup ilagiinnut pisariaqartitsiffiunerusumut nooqqullutik kajumissaarmatik taamaaliorput.

²⁰ Qatanngut angut USA-meersoq ima allappoq: “Nuliaralu 2006-imi ataatsimeersuaararnermut najuukkatta ukiuni 30-ni kuisimasooreerpugut. Angerlamut biilertilluta inooriaatsimik pisariillisaaqqusissut qanoq maleruarsinnaanerlutigu oqaloqatigiissutigaarput. (Matthæusi 6:19-22) Pingasunik illoqarpugut, nunaateqarpugut, biileqarpugut akisuunik, umiatsiaqarpugut biileqarlutalu najugaqarfiusinnaasumik. Misigigatta kristumiutut sianiitsutut illuta aalajangerpugut piffissaq tamaat kiffartortunngornissarput anguniagariniarlugu. 2008-mi panitsitut pionerinngorpugut. Qatanngutinik qanimut suleqateqarluni nuanningaarami! Oqaluussisartunik pisariaqartitsiffiunerusumi kiffartornissamut periarfissarsivugut. Aamma Jehova pillugu iliuuseqarnerugatta Taassumunnga attaveqarluarnerulerpugut. Inuit sallusuissummik Guutip oqaasianeersumik tusaraangamik paasinnileraangamillu nuannaartarnerannik takunninnerup immikkut pisinnaatitaaffiunera uagutsinnut pilluaqquneqaataangaarpoq.”

21. Paasisimasarput suna suliassap nukinginnassusianik sianiginnilluni oqaluussinissamut kajumississutigaarput?

²¹ Nalunngilarput ullormi eqqartuussiffissami “iluaatsut nungutitaanissaanni” silarsuaq ajortoq manna ungasinngitsukkut piuneeruneqassasoq. (2 Petrusi 3:7) Tamanna nalunnginnatsigu annikilliornartussarsuaq silarsuassarlu nutaaq pillugit aallussilluarluta oqaluussisarpugut. Oqaluussinerup nukinginnassusia sianigiuarlugu siunissamut neriuut piviusoq inunnut oqaluussissutigiuarparput. Suliassamik nukinginnartumik tamatuminnga sapinngisarput tamaat suliaqarnitsigut Guutimik inunnillu asanninnerput ilumoortoq ersersittarparput.

[Atuaqqissaarnermi apeqqutit]