“Tunummut” qiviaqinak

“Assallatserilerluni tunummut qiviartoq kinaluunniit Guutip naalagaaffianut naleqqutinngilaq.” — LUKASI 9:62.

EQQAAMAVIGIT?

Sooq ‘Lotip nulia eqqaamassavarput’?

Pingasut suut eqqarsaatigiuassanngilavut?

Jehovap peqatigiissortai qanoq siumukaqatigiuarsinnaavavut?

1. Jiisusi suna mianersoqqussutigaa, sunalu apeqqutaalerpa?

“LOTIP nulia eqqaamasiuk!” (Lukasi 17:32) Ukiut 2000-ingajaat matuma siorna Jiisusip Kristusip mianersoqqussutaa tamanna ullumikkut aatsaat taama pingaaruteqartigaaq. Jiisusip oqaasii pikkunartut taakku qanoq isumaqarpat? Tusarnaartaasa juutiusut Lotip nulia susimanersoq nalunngimmassuk tamanna nassuiarneqartariaqanngilaq. Ilaquttanilu Sodomamiit qimaatillutik Jehovamut naalanngilluni tunummut qiviarami napasunngorpoq tarajoq. — Atuakkit 1 Mosesi 19:17, 26.

2. Sooq Lotip nulia tunummut qiviarpa, naalannginneralu qanoq kinguneqarpa?

² Soormiuna Lotip nulia tunummut qiviartoq? Qanoq pisoqarnersoq takorusuppaa? Imaluunniit illoqarfiup aserorneqarnera upperinagu tunummut qiviarpa? Uppernikippa? Sodomami qimallugisaqarpa? (Lukasi 17:31) Tunummut qiviarnerminut sunaluunniit pissutigigaluaruniuk naalannginnini toqqutigaa. Eqqarsalaarit! Ullormi Sodomamiut Gomorramiullu ajortut toquffianni toquvoq. Tupinnanngilaq Jiisusi ima oqarmat: “Lotip nulia eqqaamasiuk!”

3. Jiisusip kingumut qiviartariaqannginnerput qanoq erseqqissarpaa?

³ Lotip nuliata kingunerminiittut qiviartariaqanngikkaluarpai. Aamma uagut kingunitsinniittut qiviartariaqanngilavut, tassa suulluunniit qimatavut eqqarsaatigiuartariaqanngilavut. Tamanna Jiisusip erseqqissarpaa angut ajoqersuganngortinnani ilaquttaminik inuulluaqquseqqaarusuttoq oqaluukkamiuk. Jiisusi ima akivoq: “Assallatserilerluni tunummut qiviartoq kinaluunniit Guutip naalagaaffianut naleqqutinngilaq.” (Lukasi 9:62) Jiisusip akissutaa sukannerpallaarpa ingasattajaarpaluunniit? Naamik, Jiisusip nalunngilaa angut  taanna akisussaaffimmik pinngitsuuiniarluni utoqqatsissutissarsiuinnartoq. Jiisusi oqarpoq inuk “tunummut qiviartoq” tassaasoq Guutimut akisussaajumanngitsoq. Inuk narsaammik assallatserisoq assallatseriitigaluni tunummut qiviallatsiarsinnaavoq, assallatserulluunniit iperarlugu tunummut saassinnaavoq. Iliuuserineqarsinnaasut taakku marluk aallutassaraluarmit allamut saasaataapput suliamullu sunniutipiloqarlutik.

4. Suna pingaarnerutittariaqarparput?

⁴ Siunissaq pingaarnerutittariaqarparput, pereersut pinnagit. Tamannami Ussatit 4:24-mi ima erseqqissarneqarpoq: “Isitit sammisikkit siumuinnaq, isiginerit siumoorluinnarli.”

5. Sooq tunummut qiviassanngilagut?

⁵ Kingunitsinniittut qiviannginnissaannut pissutissaqarluarpugut. Sumik? “Ullussani kingullerni” inuuvugut. (2 Timotheusi 3:1) Guutip illoqarfiit marluk suujunnaarsereerpai, qanittukkullu silarsuarmi pissutsit aaqqissuussaanerat manna tamaat suujunnaarsissavaa. Lotip nuliatut allamut saasarneqannginnissatsinnut suna iluaqutigisinnaavarput? ‘Tunummut qiviarnissamut’ uagutsinnik ussernartorsiortitsisinnaasut suunersut paaseqqaartariaqarparput. (2 Korinthimiut 2:11) Taamaattumik tamakku ilaat sammeriartigit qanorlu isiginiarnerunaveersaarsinnaanerivut misissorlutigu.

QANGA ULLUT NUANNERSUT

6. Sooq eqqaamannissinnaanerput tatigiuaannassanngilarput?

⁶ Kukkulluta isumaqalersinnaavugut siornatigut inuunerput nuannernerusoq. Eqqaamannissinnaanerpulli tatigiuaannarsinnaanngilarput. Isumaqalersinnaavugut siornatigut ajornartorsiutivut taama ajortiginngitsut taamanikkullu pilluarnerujussuusugut. Taamatut kukkunikkut qanga ullut nuannersut takorloorpallaalersinnaavavut. Biibilimili ima mianersoqquneqarpugut: “Ima aperissanngilatit: ‘Sunaana pissutigalugu suut tamarmik itsaq pitsaanerusut?’ Ilisimassuseq tunngavigalugu taama aperinngilatit.” (Oqaluussisartup oqaasii 7:10) Sooq taama eqqarsarneq navianartuua?

7-9. (a) Israelikkut Egyptenimi qanoq pineqarpat? (b) Israelikkut suut nuannaarutigisinnaavaat? (c) Israelikkut suna naammagittaalliuutigilerpaat?

⁷ Mosesip nalaani Israelikkut qanoq pinersut eqqarsaatigiuk. Israelikkut Egyptenimut tikikkamik aallaqqaammut tikeraatut pineqarput. Josefilli toqunerata kingorna Egyptenimiunit “Israelikkut nakkutilliisulerneqarput, taakkualu Israelikkut erloqisillugit pinngitsaalillugit sulisittussaavaat”. (2 Mosesi 1:11) Allaallumi kingusinnerusukkut Farao Israelikkut amerlitsaaliniarlugit peqqusivoq Israelikkunni nukappiaqqat inunngortut toqunneqartassasut. (2 Mosesi 1:15, 16, 22) Jehova pissutissaqarluarluni Mosesimut ima oqarpoq: “Innuttama Egyptenimi naalliunnerat takusimavara, inussianillu sulisitsisut pillugit nimaarlutik nillianerat tusarpara. Erloqissutaat nalunngilakka.” — 2 Mosesi 3:7.

⁸ Israelikkut Egyptenimit aniguisitaagamik nuannaarnerat takorloorsinnaaviuk? Jehova pissaanermigut tupinnangaartuliorluni Farao makitasooq taassumalu innuttai qulinik perlussiortimmagit takunnittuupput. (Atuakkit 2 Mosesi 6:1, 6, 7). Naggataatigut Israelikkut aallarnissaat Egyptenimiunit akuerineqarpoq. Allaammi Egyptenimiut Israelikkut  aallaqqullugit tuavisaarpaat, pigisaminnillu kuultiusunik sølviusunillu tuniorangaarmatigik Biibilimi allassimavoq Guutip innuttaasa ‘Egyptenimiut pigisaannik piiaaffigigaat’. (2 Mosesi 12:33-36) Tamatuma kingorna Israelikkut Jehovap Farao sakkutuuilu Immami Aappalaartumi piuneerummagit nuannaarutigaat. (2 Mosesi 14:30, 31) Tamakkuninnga takunnittuulluni uppernikkut nakussatsinnartorujussuusimassaaq!

⁹ Upperiuminaappoq tupinnartuliornikkut Jehovamit aniguisitaanermik kinguninngua naammagittaalliulernerat. Suna pillugu? Nerisassat! Jehovamit pisatik naammagiunnaarlugit ima oqarput: “Takorloornaqaat Egyptenimiikkallaratta aalisagartugarisartakkavut akeqanngitsumik pissarsiarisartakkavut. Takorloornaqaat agurkit, melonit, porrit uanitsullu. Nererusukkunnaarpugulli mannat kisiisa nerileratsigit.” (4 Mosesi 11:5, 6) Aap, isiginnittaatsimikkut piviusorsiorunnaangaaramik nunamut inussiaataaffigisaminnut uterusulerput! (4 Mosesi 14:2-4) Israelikkut kingunerminniittut qiviarpaat Jehovamillu iluarisaajunaarlutik. — 4 Mosesi 11:10.

10. Israelikkut oqaluttuarisaanerat sumik ilinniarfigisinnaavarput?

¹⁰ Tamanna ullumikkut sumik ilinniutigisinnaavarput? Ajornartorsiuteqaleraangatta qanga pisimasut, immaqa allaat sallusuissut ilikkanngikkallaratsigu pisimasut, nuannersutut eqqaamasavut eqqarsaatigiinnaavittassanngilavut. Pereersunik ilinniutiginninneq misigisimasanilluunniit nuannersunik takorluuineq kukkunerunngilaq. Oqimaaqatigiissaarisariaqarpugulli pereersunullu piviusorsiortumik isiginnittaaseqarluta. Taamaaliunngikkutta maannakkut inuunerput naammagiunnaaraluttuinnassavarput siornatigutullu inooriaaseqaqqilerusulluta. — Atuakkit 2 Petrusi 2:20-22.

PILLIUTIGISIMASAVUT

11. Siornatigut pilliuteqarsimasut ilaat qanoq misigippat?

¹¹ Ajoraluartumik isumaqartoqarpoq siornatigut pilliutigisimasatik tassaasut periarfissaraluit asuliinnarsimasat. Immaqa ilinniagaqarnerunissannut, tusaamasanngornissannut aningaasaaterpassuaqalernissannulluunniit periarfissaqarsimagaluarputit, aalajangerputilli tamakku anguniagariniarnagit. Qatannguterpassuavut akissarsiarissaarsimapput. Assersuutigalugu immaqa namminersortuusimapput, immaqaluunniit nipilersortartuusimapput, universitetimi professoriusimapput timersortartuusimappulluunniit tusaamasat. Tamakkuli tunussimavaat. Ukiulli ingerlareerput sulili naggatissaq nalliutinngilaq. Tamakkuninnga pilliuteqarsimanngitsuuguit qanoq pisoqarsimassagaluarnersoq takorloortuarpiuk?

12. Paulusi imminiikkani pillugit qanoq misigiva?

¹² Apustili Paulusi kristumiunngorniarluni imminiigarpassuaqarpoq. (Filippimiut 3:4-6) Imminiikkani pillugit qanoq misigiva? Ima allappoq: “Siornatigut iluanaarutigigaluakka tamakku maanna Kristusi pissutigalugu ajunaarutaatippakka.” Sooq? Ima nangippoq: “Ilumummi suli tamakku tamaasa ajunaarutaatippakka pissutigalugu Kristusi-Jiisusimik Naalakkannik ilisimanninneq annerungaartoq. Taanna pillugu tamakku tamaasa annaasimavakka, tamaasalu perlukutut igitassaannaatippakka Kristusi pigilerumallugu.” *  (Filippimiut 3:7, 8) Inuup perlukunik igitassanilluunniit igitsisup igitsinini kingusinnerusukkut peqqissimissutigineq ajorpaa. Taamatuttaaq Paulusip silarsuarmi periarfissarisimasaraluani imminiikkani peqqissimissutiginngilaa. Noqqaassutigisariaarullugit misigivoq.

13, 14. Paulusi qanoq ilaarsinnaavarput?

¹³ Siornatigut periarfissarisimasaraluarput immineersimasarput eqqarsaatigiuaannalersimagutsigu qanoq iliussaagut? Paulusitut iliortariaqarpugut. Qanoq? Maannakkut ilinnut naleqangaartut eqqarsaatigikkit. Jehovamut ajunngitsumik attaveqarputit inuttullu aalajaatsutut ilisarisimavaatit. (Hebræerit 6:10) Silarsuaq neqeroorutissaqanngilaq Jehovap maannakkut siunissamilu anersaakkut ittunik tunniukkumaagaanit naleqarnerusunik. — Atuakkit Markusi 10:28-30.

¹⁴ Taava Paulusip Jehovamut aalajaalluta kiffartortuarnissatsinnut iluaqutissarput ima allalluni eqqaavaa: “Kinguninniittut isumakkeerlugit siuninniittut isattorpakka.” (Filippimiut 3:13) Paulusip iliuuserisariaqakkavut marluk uani eqqaavai. Siullermik, kingunitsinniittut puiortariaqarpavut, taakkualu eqqarsaatigiuarnerisigut nukivut piffissarpullu naleqangaartut atulussinnarnagit. Aappassaanik, arpattartutut apuuffissamut apuutilersutut ‘siunitsinniittut isattortariaqarpavut’, siunissaq isiginiarnerullugu.

15. Sooq Guutip kiffaasa aalajaatsut maligassaalluarnerannik eqqarsaatiginneqqissaarneq iluaqutaava?

¹⁵ Guutip kiffai aalajaatsut itsaq inuusimasut ullumikkullu inuusut eqqarsaatigikkit. Maligassaalluarnerannik eqqarsaatiginninneq siunissap isiginiarnerujuarnissaanut kingunitsinniittunullu qiviannginnissamut kajumississutigissavarput. Aaperaap Sarallu Uri eqqarsaatigiuarsimasuugunikku “uterfiginissaanut periarfissaqarsimassagaluarput”. (Hebræerit 11:13-15) Urimulli utinngillat. Mosesip Egypteni siullermik qimakkamiuk Israelikkut imminiigaannit imminiigaqarnerungaarpoq. Biibilimi allassimanngilaq tamakku uteqqiaffigigai, imali allassimavoq: ‘Kristusip mitannarsisitaanera [Mosesip] tassaatippaa pisuussut Egyptenip erlinnartuutaanit annerusoq, akissarsiassartaa isumagigamiuk.’ (Hebræerit 11:26) Tassa imaappoq Mosesip akissarsiassap tunniunneqarnissaa qilanaaralugu utaqqiuaraa.

MISIGISIMASAT NUANNIITSUT

16. Siornatigut misigisimasat nuanniitsut uagutsinnut qanoq sunniuteqarsinnaappat?

¹⁶ Siornatigut misigisatta ilaat nuanniitsuusinnaapput. Assersuutigalugu siornatigut ajortuliarisimasavut kukkussutigisimasavulluunniit artorsaatigisinnaavavut. (Tussiaat 51:5) Imaassinnaavoq sukannersumik oqaaqqissaarneqarnerput suli anniaatigigipput. (Hebræerit 12:11) Immaqa naapertuilluanngitsuliorfigineqarnerput naapertuilluanngitsuliorfigineqarsorinerpulluunniit eqqarsaatigiunnaarsinnaanngilarput. (Tussiaat 55:3) Misigisanik taamaattunik eqqarsaatiginnittuannginnissamut suna iluaqutigisinnaavarput? Pingasunik assersuuteqariarta.

17. (a) Sooq Paulusi ‘illernartunit tamanit nikanarnersaasutut’ misigiva? (b) Paulusip ilerasunnini pissutigalugu nikallunnginnissaminut suna iluaqutigaa?

 ¹⁷ Siornatigut kukkussutit. Paulusi ‘illernartunit tamanit nikanarnersaasutut’ misigaluni allappoq. (Efesosimiut 3:8) Sooq taama misigiva? Guutip ilagiissaanik malersuinikuugami. (1 Korinthimiut 15:9) Qatanngutit siornatigut malersorsimasani naapikkaangamigit ilerasungaartarsimassaaq. Taamatulli misigineq nikallussutiginagu Guutimit saammaanneqarnini eqqarsaatigiuarpaa. (1 Timotheusi 1:12-16) Taamaattumik qujamasungaarpoq tamannalu kiffartortuarnissaminut killissutigalugu. Kingunerminiittut puiorumallugit allakkami aamma siornatigut kukkussutigisani pivai. Siornatigut kukkussutigisatta allanngortissinnaanngisatta eqqarsaatigiuarnerisigut nukivut atulussinnarnagit Jehovamut kiffartornermut atortariaqarpavut taassumalu uagutsinnik nallittuinera eqqaamajuartariaqarlugu.

18  (a) Siornatigut oqaaqqissaarneqarsimanerput eqqarsaatigikulagutsigu qanoq pisoqassava? (b) Salomop oqaaqqissaarneqarnermik akuersinissaq pillugu siunnersuutaa qanoq maleruarsinnaavarput?

¹⁸ Sukannersumik oqaaqqissaarneqarneq. Imaassinnaavoq siornatigut oqaaqqissaarneqarnerput eqqarsaatigikulagipput. Tamanna aliasuutigiliinnarnagu aamma ‘nikalluutigisinnaavarput’. (Hebræerit 12:5) Oqaaqqissaarneqarneq ingerlaannaq itigartikkutsigu akuereriarluguluunniit kingusinnerusukkut ‘nikalluutigigutsigu’ assigiimmik kinguneqassaaq — tassa oqaaqqissaarut sunniuteqartinngilarput. Salomop siunnersuutaa una maleruarutsigu pitsaanerungaassaaq: “Ajoqersuussutit tamatigut aalajangiusimaniakkit, annaanaveersaarniakkit ilinnut inuussutaammata.” (Ussatit 4:13) Biilertutut aqqusinermi maleruagassanik maleruaasutut oqaaqqissaarut akueritigu, maleruartigu siunitsinniittullu isigitigit. — Ussatit 4:26, 27; atuakkit Hebræerit 12:12, 13.

19. Habakkukip Jeremiallu uppernerat qanoq ilaarsinnaavarput?

¹⁹ Naapertuilluanngitsuliorfigineqarnerit taamaassorinninnerilluunniit. Immaqa ilaannikkut pruffiititut Habakkukitut Jehovamut naapertuilluartulioqquneqaqqulluni nilliasutut misigisarpugut. Taassuma paasisimanngilaa naapertuilluanngitsuliorfigineqarnini sooq Jehovap akuerisimaneraa. (Habakkuki 1:2, 3) Uagutsinnut pingaaruteqarluinnarpoq pruffiitip taassuma upperneranik ilaarsinissarput, taannami ima oqarpoq: “[Jehova] qiimmattaatigissavara, Guuti annatsitsisiga tipaatsuutigalugu.” (Habakkuki 3:18) Jeremiatut Jehovamik, naapertuilluarnerup Guutianik, upperinnilluinnarluta ‘utaqqigutta’ tatigilluinnarsinnaavarput taassuma piffissaq eqqorlugu suut tamaasa aaqqikkumaarai. — Upputit 3:19-24.

20. ‘Lotip nulia eqqaamallutigu’ qanoq ersersissinnaavarput?

²⁰ Piffissami pissanganartumi inuuvugut. Nuanningaartunik maannakkut pisoqarpoq qanittukkullu pisoqarumaarluni. Jehovap peqatigiissortai siumukarput uagullu siumukaqataasariaqarpugut. Siumut isiginissamik kingunitsinniittunullu qiviannginnissamik siunnersuut Biibilimeersoq maleruartigu. Taamaalilluta ersersissavarput ‘Lotip nulia eqqaamallutigu’!

[Quppernerup ataani ilanngussaq]

[Atuaqqissaarnermi apeqqutit]