‘Ernerup Ataataq saqqummiukkumavaa’

“Ataataq kinaasoq Ernerup Ernerullu taassuminnga saqqummiiffigiumasaata kisimik nalunngilaat.” — LUKASI 10:22.

QANOQ AKISSAVIT?

Sooq Jiisusi Ataataminik saqqummiilluarsinnaanerpaava?

Jiisusip Ataatani allanut qanoq saqqummiuppaa?

Ataatamik allanut saqqummiussinermut tunngatillugu Jiisusi qanoq ilaarsinnaaviuk?

1, 2. Apeqqut suna inuppassuit akiuminaatsippaat, aamma sooq?

‘GUUTI kinaava?’ Inuppassuit tamanna akiuminaatsittarpaat. Assersuutigalugu kristumiuunerartut amerlanerpaartaasa Guutip ataasiullunilu pingasuunera upperigaluarlugu ajoqersuut tamanna paasineqarsinnaannginnerarpaat. Atuakkiortuullunilu palasiusoq allappoq tamanna pillugu ajoqersuut nassuiarneqarsinnaanngitsuusoq aalajangersimasunullu tunngasut ilaat inunnit paasineqarsinnaanngitsut. Allat pinngoriartuaarsimanermik ajoqersuummik upperinnittut Guuteqannginneraapput. Taakkua pinngortitarsuarmi alutornartut nalaatsornerinnakkut pinngornerarpaat. Charles Darwin-ip Guutip piunera miserratiginngikkaluarlugu inuit Guutimut tunngasunik paasinnilluinnarsinnaassuseqannginnerarpai.

² Inuit amerlanersaat sumilluunniit upperisaqaraluaraangamik Guuti pillugu apeqqutissaqartarput. Ilarpassuisali Guuti ujarunnaartarpaat paasisatik naammagineq ajoramikkit. Saatanip ‘uppinngitsut eqqarsaataat tappiillisissimavai’. (2 Korinthimiut 4:4) Taamaammat tupinnanngilaq inuit amerlanerpaartaasa Ataataq, qilammik nunamillu Pinngortitsisoq, pillugu sallusuissut paatsiveqartinnagulu nalummassuk! — Esaja 45:18.

3. (a) Kia Ataatamik saqqummiiffigaatigut? (b) Apeqqutit suut akineqassappat?

³ Inuit Guuti pillugu sallusuissummik paasinninnissaat pingaaruteqartupilussuuvoq. Sooq? ‘Jehovap aqqanik torlorfiginnittut’ kisimik annaanneqassammata. (Romamiut 10:13) Guutip aqqanik torlorfiginnissagutta Guuti ilisarisimalluartariaqarparput. Jiisusip Kristusip ajoqersukkani sallusuissutinik pingaarutilinnik tamakkuninnga ajoqersorpai. Ataatamik saqqummiiffigai. (Atuaruk Lukasi 10:22). Allaaserisami matumani apeqqutit uku akineqassapput: Sooq Jiisusip Ataataq allanit tamanit saqqummiulluarsinnaaneruaa? Qanoq ililluni taamaaliorpa? Uagullu Ataatap allanut saqqummiunneranut, imaluunniit oqaluttuarineranut, tunngatillugu Jiisusi qanoq ililluta ilaarsinnaavarput?

 JIISUSI — SAQQUMMIILLUARSINNAANERPAAQ

4, 5. Sooq Jiisusi Ataataminik saqqummiilluarsinnaanerpaava?

⁴ Jiisusi Ataataminik saqqummiilluarsinnaanerpaavoq. Sooq? Uumassusillit tamarmik pinngortinneqanngikkallarmatali Jiisusi, ‘Guutimut ernituaasoq’, qilammi anersaajummat. (Johannesi 1:14; 3:18) Allanik pinngortitaqanngikkallarmalli Jiisusip Ataatani kisimeeqatigaa, Ataataatalu taanna kisiat sammivaa. Ukiuni tusindilipparpassuarni attaveqatigiinnerminni Jiisusip Ataatani ilisarisimallualerpaa taassumalu pissusii nalunngillualerlugit. Attaveqatigiilluarnerujartortillutik asaqatigiinneruleraluttuinnarlutillu tunniusimaffigeqatigiinneruleraluttuinnarput. (Johannesi 5:20; 14:31) Takorlooriaruk Jiisusip Ataatani qanoq ilisarisimallualertigisimassagaa! — Atuakkit Kolossemiut 1:15-17.

⁵ Ataatap Erneq oqaaseqartartussamisut toqqarpaa. Taamaammat ‘Guutip Oqaasianik’ taaneqarpoq. (Saqqummersitat 19:13) Taamaattumik Jiisusi kisimi Ataatamik allanut saqqummiinissamik immikkut suliassinneqarpoq. Johannesi iivangkiiliumini allappoq Jiisusi, “Oqaaseq”, ‘Ataatap saavaniittoq’. (Johannesi 1:1, 18) Johannesip taamatut oqarami nerinermi ileqqoq taamanikkut nalinginnaasoq eqqarsaatigisimasinnaavaa. Pulaartoq pulaartup allap saavanut ingiffissinneqartarpoq oqaloqatigeeriaannaaniassammata. Tamatumunnga assingusumik Erneq Ataatami ‘saavaniikkami’ Ataatani ikinngutimisut oqaloqatigilluarsinnaavaa.

6, 7. Jehova Jiisusilu qanoq ilillutik attaveqatigiilluarnerulerpat?

⁶ Erneq ‘Guutimut nuannaarutaavoq ullut tamaasa’. (Atuakkit Ussatit 8:22, 23, 30, 31). Ataataq Ernerlu attaveqatigiilluarnerujartuinnarput. Suleqatigiipput, Jiisusillu Ataatap pissusiinik ilaarsisalerpoq. Pinngortitat sianissusillit allat pinngortinneqareermata Ernerup takuaa Jehovap taakku tamaasa immikkut qanoq pisarnerai, Ernerlu Ataataminik asanninneruleraluttuinnarlunilu ataqqinninneruleraluttuinnarpoq.

⁷ Kingusinnerusukkut Saatani Jehovap naalakkersuisinnaatitaaneranik apeqqusiilluni pikitsitsimmat Ernerup Ataatani suli ilisarisimalluarnerulerpaa. Paasivaami Jehova pissutsini imaannaanngitsuni qanoq asannittuliorlunilu naapertuilluartuliorlunilu silatusaartarnersoq pissaanerminillu qanoq atuisarnersoq. Taamaalilluni Jiisusip unamminiarnartunik nunarsuarmi kiffartornermini nalaakkumaakkaminik qanoq iliuuseqarfiginnissinnaanini ilikkarpaa. — Johannesi 5:19.

8. Iivangkiiliuni allaatigineqartut Ataatap pissusii pillugit paasisaqarluarnissamut qanoq iluaqutigaavut?

⁸ Jiisusi Jehovamut qanittumik attaveqarami allanit tamanit sukumiinerusumik Ataatamik saqqummiisinnaavoq. Ataataq pillugu paasisaqarnerussaagut taassuma Ernituata ajoqersuutai iliuusiilu pillugit misissuinitsigut. Assersuutigalugu takorlooriaruk oqaatsip “asanninneq”-up isumaata paasiniarnera qanoq ajornakusoortigissasoq oqaatsinik qinerlerfissiani oqaatsimut nassuiaat atuaannaraanni. Jiisusilli kiffartornera allanillu isumassuinera iivangkiiliuni takorlooruminartumik allaatigineqartut eqqarsaatiginerisigut paasilluarnerussavarput ‘Guutip asanninnerunera’ qanoq paasisariaqarnersoq. (1 Johannesi 4:8, 16) Jiisusip nunarsuarmiitilluni asanninnerinnaanngitsoq ajoqersukkaminut ersersippaa, aammali ersersippai Guutip pissusii allat.

JIISUSIP ATAATANI QANOQ SAQQUMMIUKKAA

9. (a) Sutigut marlutsigut Jiisusip Ataatani ajoqersukkaminut saqqummiuppaa? (b) Jiisusip Ataatani saqqummiukkumallugu sumut assersuuppaa?

⁹ Jiisusip Ataatani ajoqersukkaminut kingusinnerusukkullu ajoqersuganngortunut qanoq saqqummiuppaa? Marlutsigut saqqummiuppaa, tassa ajoqersuutimigut pissusimigullu. Siullermik Jiisusip ajoqersuutai misissoriartigit. Ataatap pissutsinik iliuuseqarfiginneriaasii, eqqarsartaasia misigissusiilu Jiisusip ajoqersukkaminut ajoqersuutigisaanit erserput. Assersuutigalugu Jiisusip Ataatani savanik paarsisumut isumassuisumut, savaatiminik tammartumik ataatsimik ujaasisumut, assersuuppaa. Jiisusi oqarpoq savanik paarsisup sava tammartoq ataaseq nanigamiuk ‘taanna 99-init tammanngitsunit nuannaarutiginerugaa’. Jiisusip sooq tamanna assersuusiaraa? Ima nassuiaavoq: “Ataatassi qilanniittup piumasarinngilaa minninnguit ukua ilaannik ataatsimilluunniit tammartoqassasoq.” (Matthæusi  18:12-14) Assersuut tamanna Jehova pillugu sumik ilinniarfigisinnaavarput? Ilaannikkut pingaaruteqanngitsutut puiorneqarsimasutulluunniit misigisaraluaruilluunniit Ataatavit qilammiusup soqutigalutillu isumassorpaatit. Taassuma illit ‘minninnguanut’ ilaasutut isigaatit.

10. Jiisusip Ataatani nammineq pissusimigut qanoq saqqummiuppaa?

¹⁰ Aamma Jiisusip Ataatani ajoqersukkaminut saqqummiuppaa pissusimigut. Taamaammat apustilip Filipip Jiisusi oqarfigimmagu: “Ataataq uatsinnut takutiguk”, Jiisusi ima oqarsinnaasimavoq: “Uannik takunnittup Ataataq takuaa.” (Johannesi 14:8, 9) Jiisusip Ataatami pissusiinik ersersitsisimaneranik oqaluttuat ilaat eqqarsaatigeriakkit. Pupissup kimigiiserfigimmani ajorunnaarseqqulluni Jiisusip angut “pupittorujussuaq” taanna attorpaa oqarfigalugulu: “Piumavunga, mingukkunnaarit!” Pupissup ajorunnaarsitaareerami qularutiginngilaa Jehovap Jiisusi ajorunnaarsitsisinnaatikkaa. (Lukasi 5:12, 13) Aamma Lazarusi toqummat ajoqersukkat Ataatap misiginneqataanera misigisimassavaat Jiisusi ‘qamuuna nimaarlunilu’ (NV) assut ilungersuummermat qullilillunilu. Jiisusip nalunngikkaluarlugu Lazarusi makitittussaallugu Lazarusip ilaqutaasa ikinngutaasalu naalliunnerat nammineq misigaa. (Johannesi 11:32-35, 40-43) Qularnanngitsumik illit nammineq Jiisusi pillugu Biibilimi oqaluttuat arlaannik Ataatap nallittuisuuneranik paasinninnissannut iluaqutigisannik nuannarinerpaasaqassaatit.

11. (a) Jiisusi naalaffimmik minguiaagami Ataatani pillugu sumik ersersitsiva? (b) Sooq tamanna tuppallersaatigaarput?

¹¹ Jiisusip naalaffimmik minguiaaneranik oqaluttuaq sumik ilinniarfigaajuk? Pisimasut takorlooriakkit: Jiisusi allunaasarsuarmik iperaatsioriarluni ussinnik savanillu tuniniaasut naalaffimmit aniatippai. Taava aningaasanik nioqquteqartut ornippai aningaasaataallu kuillugit nerriviilu uppisillugit. (Johannesi 2:13-17) Taamatut sakkortuumik iliuuseqarmat ajoqersukkat kunngip Daavip siulittuutaa una eqqaavaat: “Illit illunnik ilungersuutiginninnerma nungutilerpaanga.” (Tussiaat 69:10) Jiisusip akuliunnermigut ersersippaa pallorfiginninneq ilumoortoq ilumut illersorusullugu. Oqaluttuaq taanna atuaraangakku Jehovap qanoq pissuseqarnera erseqqittarpa? Eqqaasarparput Guuti nunarsuarmi ajussusermik tamarmik piiaanissaminut killeqanngitsumik pissaaneqaannarani piumassuseqangaartoq. Takorlooriaruk Jehova qanoq misigisimasarnersoq ajussutsip nunarsuarmi tamarmi atuunnera takugaangamiuk! Jehovap Jiisusillu taamaannerat naapertuilluanngitsunik nalaataqaraangatta tuppallersaatigingaartarparput.

12, 13. Jiisusip ajoqersukkaminik iliorfiginneriaasia Jehova pillugu sumik ilinniarfigaarput?

¹² Oqaluttuaq alla sammeriartigu — tassa Jiisusip ajoqersukkaminik iliorfiginneriaasianut tunngasoq. Taakkua kina arlartik pingaarnerpaajunersoq oqqatigiuarpaat. (Markusi 9:33-35; 10:43; Lukasi 9:46) Jiisusip Ataatani sivisoorujussuarmik najornikuugamiuk nalunngilaa makitaneq pillugu qanoq misigisarnersoq. (2 Samueli 22:28; Tussiaat 138:6) Aammattaaq Jiisusip Saatanip makitasaartarnera takoreerpaa. Saatani pinngortitaavoq namminissarsiortoq pissaaneqarusungaarlunilu qaffasissumik inissisimaffeqarusuttoq. Taamaammat Jiisusi aliasussimassaqaaq ajoqersukkami, ilinniartinnikuusami, makitajuarnerat takullugu. Allaat apustilitut toqqagaasa ilaat makitasaarput! Ulloq Jiisusip nunarsuarmi inuuffigisaani kingulleq tikillugu makitasaartarput. (Lukasi 22:24-27) Jiisusilli taakku inussiarnersumik naqqissortuarpai, ilaanni immisut maniguutilernissaat neriuutigiuarlugu. — Filippimiut 2:5-8.

¹³ Jiisusip naammagittarluni ajoqersukkami isiginnittaatsiminnik ajortumik aaqqiinissaannut ikiornerisigut Ataatami pissusiinik ersersitsinera erseqqik, ilaa? Jiisusip oqaasii iliuusiilu Ataataq pillugu ilinniarfigaagit? Guutip innuttani kukkusaraluartut sumiginnarneq ajorpai. Guutip pissusiinik ilisimanninnerput kukkugaangatta allamik isumataartarnissamut Jehovamullu isumakkeerfigeqqulluta qinusarnissamut kajumississutigaarput.

ERNEQ ATAATAMINIK SAQQUMMIINISSAMUT PIUMASSUSEQARPOQ

14. Jiisusip Ataataminik allanut saqqummiussiumanini qanoq ililluni ersersippaa?

¹⁴ Naalakkersuisut ilarpassui pissaaneqarniarsarisarput  innuttaasunut isertuussaqarnermikkut. Jiisusip taamatut pinnani allat Ataatani pillugu kajumilluni paasissutissittarpai, Jehova pillugu paasisariaqagaat tamaasa taakkununnga saqqummiullugit. (Atuaruk Matthæusi 11:27, NV). * Aamma Jiisusip ajoqersukkani ‘siuneqassusilerpai [Jehovamik Guutimik] ilisimasinnaanngortillugit’. (1 Johannesi 5:20) Tamanna qanoq paasisariaqarpa? Jiisusip ajoqersukkani Ataataq pillugu ajoqersuutigisaminik paasinnissinnaanngortippai. Ataatami kinaassusia isertunngilaa; ataasiullunilu pingasuussuseq ajoqersuutiginngilaa.

15. Sooq Jiisusip ajoqersukkani Ataatani pillugu ilisimasaminik tamanik oqaluttuutinngilai?

¹⁵ Jiisusip Ataatani pillugu ilisimasani tamaasa saqqummiuppai? Naamik, silatusaarluni ajoqersukkani ilisimasaminik tamanik oqaluttuutinngilai. (Atuaruk Johannesi 16:12). Sooq? Ajoqersugaasa tamanna tamatuma nalaani ‘artorallarmassuk’. Jiisusili nassuiaavoq “Ikiuisoq” (NV) tikiuppat ilisimasaqarnerungaalerumaartut. Ikiuisoq taanna tassaavoq anersaaq illernartoq ‘sallusuissummut tamarmut’ taakkuninnga siulersuisussaq. (Johannesi 16:7, 13) Soorlu angajoqqaat silatusaarlutik meeqqatik paasinnilluarsinnaalersinnagit sunik tamanik oqaluttuunneq ajoraat, taamatuttaaq Jiisusip ajoqersukkani inersimallualersinnagit paasinnilluarsinnaalersinnagillu Ataataminut tunngasut ilaannik oqaluttuutinngikkallarpai. Jiisusip inussiarnerluni ajoqersukkami pisinnaasaasa killeqarnerat eqqumaffigaa.

JIISUSI ILAARLUGU ALLAT JEHOVAMIK ILISARISIMANNILERNISSAANNUT IKIUKKIT

16, 17. Sooq illit Ataataq allanut saqqummiussinnaaviuk?

¹⁶ Ilisarisimallualigaqaruit taassumalu asannittuunera paasigukku, taanna allanut oqaluttuariumassagaluarpat, ilaa? Jiisusi nunarsuarmiikkallarami Ataatani eqqartortarpaa. (Johannesi 17:25, 26) Uaguttaaq taamaaliorsinnaavugut Jehovalu allanut saqqummiullugu?

¹⁷ Soorlu paasereeripput, Jiisusi Ataatani pillugu allanit tamanit ilisimasaqarnerungaarpoq. Allalli ilisimasaminik avitseqatiginissaannut piumassuseqarpoq, allaallumi ajoqersukkani Ataatami pissusii pillugit paasinnissinnaanerulersippai. Ullumikkut inuit amerlanersaasa Ataataq pillugu ilisimasaqarpianngitsut, uagut Jiisusip ikiuineratigut Ataatarput ilisarisimallualersimavarput. Jiisusip ajoqersuutigisamigut pissusimigullu Ataataminik saqqummiiffigiumasimammatigut qujamasuutigeqaarput! Jehovamik ilisarisimanninnerput tulluusimaarutigaarput. (Jeremia 9:23; 1 Korinthimiut 1:31) Jehovamut attaveqarlualernissarput ilungersuutigisimavarput, maannalu taanna uatsinnut qanillisimavoq. (Jaaku 4:8) Taamaattumik uagut Jehova pillugu ilisimasavut allanut paasitissinnaavavut. Qanoq ililluta taamaaliorsinnaavugut?

18, 19. Qanoq ilillutit Ataataq allanut saqqummiussinnaaviuk? Nassuiaruk.

¹⁸ Jiisusi oqaatsitsigut iliuutsitsigullu ilaaraangatsigu Ataataq allanut saqqummiuttarparput. Eqqaamajuk inuit oqaluussinitsinni naapittakkatta Guutip kinaanera nalummassuk. Imaassinnaavoq eqqunngitsunik ilinniartinneqarsimanertik pissutigalugu Guuti pillugu mumingasumik paasinnittaaseqartut. Taakku Biibili atorlugu paasitissinnaavavut Guuti qanoq ateqarnersoq, inunnut qanoq siunertaqarnersoq qanorlu pissuseqarnersoq. Aamma Biibilimi allaatigineqartut iluaqutigisarpavut Guutip pissusiinik siornatigut eqqarsaatigisimanngisatsinnik paasinninnissamut. Paasisimasavullu uppeqatitsinnut eqqartortarsinnaavavut, taakkualu tamanna qiimmaallaatigisinnaavaat.

¹⁹ Pissutsitsigut Jiisusi ilaarlugulu Ataataq saqqummiuttariaqarparput. Inuit Kristusip asanninnera iliuutsitsigut takugunikku imaassinnaavoq Jiisusimut Ataataanullu kajungilersut. (Efesosimiut 5:1, 2) Apustilip Paulusip ima kajumissaarpaatigut: “Uannik ilaarsisunngoritsi, soorluttaaq uanga Kristusi ilaariga.” (1 Korinthimiut 11:1, NV) Pissutsitsigut Jehovap qanoq ittuuneranik allanik paasititsisinnaanerput immikkut pisinnaatitaaffigaarput nuanningaartoq! Qanortoq tamatta Jiisusimik ilaarsinitsigut Ataataq allanut saqqummiuttuarisigu.

[Quppernerup ataani ilanngussaq]

[Atuaqqissaarnermi apeqqutit]