Jehovap annaanneqaqqulluta illersortarpaatigut

“Guutip pissaaneranit uppernikkut [sernigineqarpusi] annannissamut ullussani kingullerni saqqummissalluni piareersimasumut.” — 1 PETRUSI 1:5.

QANOQ AKISSAVIT?

Jehovap pallorfiginninnermut ilumoortumut qanoq kajungilersippaatigut?

Jehovamit qanoq siulersortissinnaavugut?

Jehovap qanoq nakussatsillutalu qiimmassartarpaatigut?

1, 2. (a) Sooq qularutiginngilluinnarsinnaavarput Guutip naggatissamut assuarnaattuaqqulluta ikiussagaatigut? (b) Jehovap tamatta immikkut qanoq ilisarisimalluartigaatigut?

‘NAGGATISSAMUT nikallujuitsuusoq annaanneqassaaq.’ (Matthæusi 24:13) Jiisusip oqaasiinit erserpoq Saatanip silarsuaata suujunnaarsinneqarnissaani aniguisinneqarumalluta naggatissamut assuarnaattuartariaqartugut. Tamannali ima paasisariaqanngilaq Jehovap nammineerluta ilisimassutsitsinnillu tatiginninnitsigut pinertusaaqqugaatigut. Biibilimi ima neriorsorneqarpugut: “[Guuti] unneqqarippoq; akuersaarumanngilaa artukkassinnik usserneqarnissarsi, kisianni usserneqarnermut ilagitillugu aniguiffissaq pilersissavaa artorsartitaaqqunasi.” (1 Korinthimiut 10:13) Allassimaffik taanna qanoq ilinniarfigisinnaavarput?

² Jehovap artukkatsinnik usserneqarnissarput pinngitsoortissinnaassaguniuk uagutsinnut tunngasut suut tamaasa — assersuutigalugu sunik ajornartorsiuteqarnerput, inuttut qanoq ittuunerput atukkatsinnillu qanoq naammaginnissinnaatiginerput — ilisimasariaqarpai. Guutip ilumut taama ilisarisimalluartigaatigut? Aap. Biibilimi allassimavoq Jehovap tamatta immikkut ilisarisimalluaraatigut. Ullormut sammisartakkavut ileqquvullu nalunngilai. Allaat eqqarsaativut uummammiuvullu nalunngilai. — Atuakkit Tussiaat 139:1-6.

3, 4. (a) Jehovap Daavimik soqutiginninneranit uagutsinnik inuttut ataasiakkaatut soqutiginninnera qanoq erserpa? (b) Jehovap ullumikkut uagutsinnik soqutiginninnini qanoq ersersittarpaa?

³ Guutip ajugaqanngitsup ilumut inuinnannguakkuluit soqutigai? Tussiaasiortoq Daavi aamma taama eqqarsarpoq, Jehovamullu ima oqarpoq: “Takugaangakkit qilak pigisat, assappit pinngortitaat, qaammat ullorissallu tassani ivertitatit, taava inuk suummat eqqaasarpiuk, inuup qitornaa suummat isumagisarpiuk?” (Tussiaat 8:4, 5) Daavi immaqa taama aperivoq Jehovamit nammineq soqutigineqarnini  misigisimagamiuk. Daavi, Isajip nukarlequtaa, nukappiaraq savanik paarsisuinnaagaluartoq Jehovap ‘angutitut uummammi iluarisaatut’ isigalugu ‘Israelimut naalagaaninngortippaa’. (1 Samueli 13:14; 2 Samueli 7:8) Daavi inuusuttuaraannaagaluartoq qilammik nunarsuarmillu Pinngortitsisup Daavip misigissusii eqqarsaataalu ilorlerpaat soqutigai. Takorlooriaruk Daavi tamanna paasigamiuk qanoq misigisimasimassasoq!

⁴ Aamma Jehovap ullumikkut uagutsinnik inuttut ataasiakkaatut soqutiginninnera tupinnaqaaq. Jehova ‘inuiaat tamarmik erlinnangaartortaannik’ katersuivoq pallorfiginiassammanni. (Haggaji 2:7, NV) Aamma kiffani assuarnaattuarsinnaaqqullugit ikiortarpai. Qanoq ililluni ikiuisartoq paasiumallugu sammissavarput Jehovap inunnik pallorfiginninnermut ilumoortumut qanoq kajungilersitsisarnera.

GUUTIP KAJUNGILERSIPPAATIGUT

5. Jehovap inuit Ernerminut qanoq kajungilersittarpai? Assersuuteqarit.

⁵ Jiisusi ima oqarpoq: “Kinaluunniit uannut ornigussinnaanngilaq Ataatap uannik aallartitsisup kajungilersinngippani.” (Johannesi 6:44) Allassimaffimmit tamatumannga erserpoq Kristusimut ajoqersuganngorumalluta Guutimit ikiorneqartariaqartugut. Jehovap Ernerminut qanoq kajungilersittarpaatigut? Oqaluussinikkut anersaamigullu illernartukkut kajungilersittarpaatigut. Assersuutigalugu Paulusip ajoqersuiartortitaqataatalu Filippimiitillutik arnaq Lydiamik atilik naapippaat. Biibilimi oqaluttuarineqarpoq nutaarsiassamik nuannersumik oqaluussilermata Jehovap ‘taassuma uummataa ammaraa Paulusip oqaasiinik pigiliussisillugu’. Guutip anersaani illernartoq atorlugu arnaq tusarliussamik paasinnilersillugulu upperinnilersippaa. Tamatuma kingunerisaanik Lydia ilaqutaalu kuisipput. — Apustilit Suliaat 16:13-15.

6. Tamatta pallorfiginninnermut ilumoortumut qanoq kajungilersinneqarsimavugut?

⁶ Lydia kisimi taama pineqarpa? Naamerluinnaq. Kristumiuuguit Guutimut tunniulluinnarsimasoq aamma illit pallorfiginninnermut ilumoortumut Guutip kajungilersippaatit. Soorlu Ataatarput qilammiusoq Lydiap uummataani naleqangaartumik nassaarsimasoq, ilinni aamma ajunngitsumik nassaarsimavoq. Nutaarsiassaq nuannersoq tusarnaalerakku Jehovap anersaani illernartoq atorlugu tusarliussamik paasinnilersillutillu upperinnilersippaatit. (1 Korinthimiut 2:11, 12) Ilikkakkatit Biibilimeersut malillugit inuuleravit iliuuserisatit pilluaqquai. Guutimut tunniulluinnaravit uummataa nuannaartippat. Ilumoortorlu unaavoq: Taassumunnga kiffartuleqqaarninniilli Jehovap ikiortuarpaatit.

7. Qanoq nalunngilarput Guutip aalajaattuaqqulluta ikiussagaatigut?

⁷ Jehovap imminut kiffartuleratta ikioramisigut qularutiginngilluinnarsinnaavarput aalajaattuaqqulluta ikiortuassagaatigut. Soorlu nalunngikkaa nammineerluta sallusuissummiilinngitsugut aamma nalunngilaa nammineerluta sallusuissummiittuarsinnaanngitsugut. Apustilip Petrusip kristumiut tanitat allaffigai ‘Guutip pissaaneranit sernigineqartut’, imaluunniit illersorneqartut aalajaattuarsinnaaniassammata. (1 Petrusi 1:4, 5) Petrusip oqaasii kristumiunut tamanut atuupput.  Jehovap ullumikkut qanoq illersortarpaatigut? Apeqqummut tamatumunnga akissut paaserusupparput aalajaattuarsinnaaqqulluta Guutimit tamatta ikiorneqartariaqaratta.

UNIOQQUTITSEQQUNATA GUUTIP IKIORTARPAATIGUT

8. Sooq unioqqutitsisoornissamut navianartorsiorsinnaavugut?

⁸ Ajornartorsiutit namminerlu naammalluinnanngissuserput pissutigalugit Jehovap isiginnittaasiatut isiginnittaaseqarsinnaanngikkutta misigiitsoorluta unioqqutitsisoorsinnaavugut. (Atuaruk Galatiamiut 6:1). Tamanna erserpoq Daavimut pisimasumit.

9, 10. Jehovap Daavi unioqqutitseqqajaammat unioqqutitseqqunagu qanoq ikiorpaa, qanorlu ullumikkut ikiortarpaatigut?

⁹ Daavi kunngimit Saulimit qimaatinneqarami imminut naalakkersinnaassuseqarluarpoq. Allaat Daavip Sauli akiniarsinnaagaluarlugu akinianngilaa. (1 Samueli 24:3-8) Tamatumali kinguninnguatigut Daavi imminut naalakkersinnaajunnaarpoq. Daavi sakkutuunilu nerisassaarukkamik Israelikkuusoq Nabalimik atilik ataqqinnilluni ikiorsinnaaneraatik aperaa. Nabalip Daavi ikiorumannginnamiuk ajuallatserujussuarpaa. Daavi ima kamatsigaaq aalajangerluni Nabali illuaniittullu tamaasa akiniarniarlugit. Daavip eqqarsaatiginngilaa inunnik pinngitsuusunik toqutsinermigut Jehovamit pisuutinneqassalluni. Abigajililli, Nabalip nuliata, unitsimmani Daavi kukkorujussuanngilaq. Daavip paasivaa Jehovap Abigajili aqqutigalugu illersoraani, Abigajilimullu ima oqarpoq: “Qujanarsili [Jehova] Israelip Guutia, ullumi uannukartikkamisit! Qujanarlu silatusaallaqqissuugavit; illimmi qujanarsigit ullumi aammut pisuunissaraluara imminullu akiniunnissaraluara ingalatsikkakkit.” — 1 Samueli 25:9-13, 21, 22, 32, 33.

¹⁰ Oqaluttuaq tamanna qanoq ilinniutigisinnaavarput? Unioqqutitserujussuaqqajaagutta unioqqutitseqqunata Jehovap ikiorsinnaavaatigut. Soorunami ilimagissanngilarput kukkoqqajaalernivut tamaasa Guutip arlaannik akuliutsitsisarnissaa. Aamma naluarput pisuni aalajangersimasuni Guuti qanorpiaq iliussanersoq piumasanilu piviusunngortinniarlugu suut akuerissanerai. (Oqaluussisartup oqaasii 11:5) Qularutiginngilluinnarsinnaavarpulli Jehovap pissutsit atukkavut tamatigut naluneq ajorai imminullu aalajaattuarsinnaaqqulluta ikiorumagaatigut. Ima neriorsorpaatigut: “Ilinniartissavakkit ilitsersorlutillu ingerlavissannik. Siunnersussavakkit, isigiuassavakkillu.” (Tussiaat 32:8) Jehovap qanoq siunnersortarpaatigut? Siunnersuutaalu qanoq iluaqutigisinnaavavut? Aamma sooq qularutiginngilluinnarsinnaavarput Jehovap innuttani ullumikkut siulersorai? Maluginiariaruk apeqqutit taakku Saqqummersitani qanoq akineqartut.

SIUNNERSORLUTA ILLERSORTARPAATIGUT

11. Jehovap innuttami ilagiivini pisut qanoq ilisimalluartigai?

¹¹ Takorruukkami Saqqummersitani kapitalini 2-mi 3-milu allaatigineqartumi kunngip Jiisusip Kristusip ilagiinni arfineq-marlunni Asiaaqqamiittuni pisut takusarpai. Kristusip ilagiinni pisut ilisimalluarpai. Aap, pissutsit aalajangersimasut allaallu inuit arlallit  atiisigut taallugit eqqartorpai. Aamma ilagiit immikkut pisariaqartitaat naapertorlugit nersualaarlugillu siunnersorpai. Takorruugaq tamanna qanoq ilinniarfigisinnaavarput? Ilagiit arfineq-marluk taakku 1914-ip kingorna kristumiunut tanitanut assersuutaapput. Kristusip pingaarnerpaamik tanitat siunnersoraluarai siunnersuutai taakku ullumikkut Guutip innuttaasa ilagiivinut tamanut iluaqutaapput. Taamaattumik isummersinnaavugut Jehovap ernini atorlugu ullumikkut innuttani siulersorai. Jehovap siulersuinera qanoq iluaqutigisinnaavarput?

12. Jehovamit qanoq siulersortissinnaavugut?

¹² Ilaatigut nammineq atuaqqissaartarnitsigut Jehovamit siulersortissinnaavugut. Jehova Biibililersaarutit ‘inussiamit aalajaallunilu silatuumeersut’ aqqutigalugit uagutsinnut siunnersuuterpassuaqarpoq. (Matthæusi 24:45, NV) Siunnersuutit iluaqutigiumallugit atuaqqissaarnissamut piffissalertariaqarpugut ilikkakkavullu inuunitsinni atorluarlugit. Atuaqqissaartarutta Jehova ‘orloqqunata’ uagutsinnik ‘sernissuinissaanut’ periarfississavarput. (Judasi 24) Biibililersaarutaatitsinniittumik atuagaqaravit eqqarsarnikuuit: ‘Soorlu uanga eqqarsaatigalunga allataq’? Taamaappat siunnersuut Jehovameersutut isigiuk. Soorlu ikinngutivit arlaannik takutitaqarniarluni tuikkut toortalaaraatit, Jehovap anersaani illernartoq atorlugu ileqquit inuttulluunniit pissutsivit ilaannik pitsanngorsaasariaqarnerit pillugu paasitinniarsinnaavaatit. Anersaap illernartup siulersuinera eqqumaffigigutsigu Jehovamit siulersortissaagut. (Atuakkit Tussiaat 139:23, 24). Maanna sammilaariartigu atuaqqissaartarnerput qanoq pimoorutsigineripput.

13. Sooq atuaqqissaartarnitta eqqarsaatigeqqissaarnissaa pitsaassava?

¹³ Aliikkutassanut piffissarujussuaq atortarutsigu nammineq atuaqqissaarnissamut piffissaarutipajaassaagut. Qatanngut angut ima oqarpoq: “Nammineq atuaqqissaanngitsoortoqariaannaavoq. Aliikkutassaqarniarneq aatsaat taama ajornanngitsigaaq, aammalu aatsaat taama akikitsigaaq. Tv-kkut, qarasaasiakkut, mobilikkullu isiginnaartoqariaannaavoq. Sumiluunniit aliikkutassaqartarpoq.” Mianersunngikkutta aliikkutassanut piffissaq atornerujartuinnassavarput, naggataatigullu nammineq atuaqqissaarnissamut piffissaarutissaagut. (Efesosimiut 5:15-17) Tamatta immikkut imminut ima aperisariaqarpugut: ‘Guutip oqaasianik atuaqqissaaraangama itisiliinerunissamut qanoq piffissaqakulatigisarpunga? Aatsaat ataatsimiinnerni pisassaqaraangama?’ Taamaappat immaqa ilaqutariittut anersaakkut ittunik sammisaqaraangatta namminerlu atuaqqissaaraangatta Biibilimik misissuinermut piffissaqarnerusarsinnaavugut. Jehovap ilisimassusia ujartariaqarparput erlinnartuutinik ujaasisutut. Taassuma ilisimassusia illersuutigalugu naggatissamut aalajaattuarnissamut iluaqutigisinnaavarput. — Ussatit 2:1-5.

NAKUSSATSILLUTA QIIMMASSARTARPAATIGUT

14. Biibilimit qanoq erserpa Jehovap misigissutsitsinnik ilisimannittarnera?

¹⁴ Daavi inuunermini misilinneqartarsimaqalunilu annikilliuuteqartarsimaqaaq. (1 Samueli 30:3-6) Biibilimit erserpoq Jehovap  Daavip misigissusii nalunngikkai. (Atuakkit Tussiaat 34:19; 56:9). Guutip aamma uagut misigissutsivut nalunngilai. Tuppallersaatigisarparput ‘sequmissimasumik uummateqaraangatta’ ‘aserortersimasumillu anersaaqaraangatta’ Guutip uagutsinnut qanittarnera. Tamanna aamma Daavip tuppallersaatigaa, imami erinarsorpoq: “Unneqqarissutsit qiimmattaatigalugulu tipaatsuutigissavara. Annikilliornera takoreerpat, annikilliuutinni ikiorparma.” (Tussiaat 31:8) Jehova annikilliornitsinnik takunniinnartanngilaq. Pinertusaarsinnaaqqulluta ikiortarpaatigut uagutsinnik tuppallersaanermigut qiimmassaanermigullu. Ilaatigut taamaaliortarpoq kristumiut ataatsimiinneri aqqutigalugit.

15. Asafip misigisimasaanit suna paasivarput?

¹⁵ Ataatsimiinnernut najuuttarnerup uagutsinnut iluaqutaanera tussiaasiortup Asafip misigisaanit erserpoq. Asafip naapertuilluartut naalliutsillugit inuit ajortut ingerlalluarpasittarnerat eqqarsaatigiuarpaa, tamannalu aliasuutigaa. Jehovamut kiffartornerup iluaqutaanera qularilerpaa. Misigissutsini ima allaatigai: ‘Uummatiga narrutsassimavoq ilukkullu anniarpunga.’ Asafi Jehovamut kiffartorunnaangajavikkami eqqarsaatimi allanngortinnissaanut suna iluaqutigaa? Ima nassuiaavoq: “Guutip illernartuutaanut [pivunga].” Jehovamut kiffartortunik allanik peqateqarnermigut eqqortumik isiginnittaaseqalerpoq. Paasivaa inuit ajortut ingerlalluarnerat sivikitsuinnaasoq Jehovalu naapertuilluanngissutsimut akuliukkumaartoq. (Tussiaat 73:2, 13-22) Immaqa ilaannikkut Asafitut misigisimasarpugut. Saatanip silarsuaani naapertuilluanngitsuliornerit pissutigalugit nikallungasinnaavugut. Qatanngutitsinnik peqateqartarnitsigut nakussatsinneqartarlutalu nuannaarluta Jehovamut kiffartortuarsinnaaqqulluta ikiorneqartarpugut.

16. Hannap maligassiaa qanoq iluaqutigisinnaavarput?

¹⁶ Taavami arlaannik pissuteqarlutit ataatsimiigiarnissat sapernartittarukku? Immaqa ilagiinni akisussaaffeeruttariaqarsimaguit tamanna kanngusuutigaat. Immaqaluunniit qatanngut isumaqatigiinngissuteqarfigisimavat. Taamaappat Hannap misigisimasaa iluaqutigisinnaavat. (Atuakkit 1 Samueli 1:4-8). Hanna uimi nuliata aappaanit, Peninnamit, asissorneqartarpoq. Tamannalu erloqinarnerpaasarpoq ilaqutariit ukiumoortumik Jehovamut pilliartorniarlutik Shilomukaraangata. Hanna ima aliasutsigaaq ‘qialluni neriumananilu’. Tamannali Jehovamik pallorfiginnittarfimmukarnissaminut akornutiginngilaa. Hannap aalajaannera Jehovap pingaartippaa pilluaqqullugulu. — 1 Samueli 1:11, 20.

17, 18. (a) Ataatsimiikkaangatta qanoq qiimmassarneqartarpugut? (b) Jehovap asannilluni isumassuinera eqqarsaatigigaangakku qanoq misigisarpit?

¹⁷ Ullumikkut kristumiut Hanna ilaartariaqarpaat ataatsimiinnernut najuuttuartarnermikkut. Tamatta misigisimasatsitut ataatsimiikkaangatta pisariaqartitatsinnik qiimmassarneqartarpugut. (Hebræerit 10:24, 25) Ataatsimiikkaangatta qatanngutinit asannittuliorfigineqartarnerput tuppallersaatigisarparput. Assersuutigalugu oqalugiaammi akissummiluunniit tusakkavut killitsissutigisarpavut. Immaqa aamma qatanngut uagutsinnut tusarnaarluniluunniit oqaaseqarsinnaavoq tuppallersaatigisatsinnik. (Ussatit 15:23; 17:17) Aamma Jehova erinarsorfigigaangatsigu qiimmaallallutalu nakussatsittarpugut. Ingammik ‘eqqarsaatitsinnit eqqissiviilliortinneqaraangatta’ ataatsimiinnerni qiimmassarneqarnissarput pisariaqartittarparput. Ataatsimiikkaangatta Jehovap ‘tuppallersaanera’ pinertusaarnissamut aalajaattuarnissamullu iluaqutigisarparput. — Tussiaat 94:18, 19.

¹⁸ Guutip asannilluni isumassuinera toqqissisimassutigigatsigu tussiaasiortutut Asafitut Jehovamut ima erinarsortutut misigivugut: “Talerpiga tigummivat. Ilitsersuutikkut ingerlatissavarma.” (Tussiaat 73:23, 24) Jehovap naggatissamut pinertusaarsinnaaqqulluta illersuinera qujamasuutigingaarparput!.

[Atuaqqissaarnermi apeqqutit]

[Qupp. 29-mi assiliartaq]

Illit aamma Jehovamit kajungilersinneqarputit

[Qupp. 30-mi assiliartat]

Guutip siunnersuutaanik malinninnerput illersuutigaarput

[Qupp. 31-mi assiliartaq]

Qiimmassarneqartaratta pinertusaarsinnaavugut