Jehovap innuttani aniguisinneq sapinngilai

“[Jehovap] mianerinnitsini ussernartunit [misilinneqarnermit, NV] aniguisinneq sapinngilai.” — 2 PETRUSI 2:9.

SOOQ QULARUTIGINNGILLUINNARSINNAAVARPUT JEHOVAP...

. . . siunertani piviusunngortikkumallugu qaqugukkut akuliutissanerluni nalunngilluinnartaraa?

. . . innuttaminik aniguisitsiniarluni pissaanerminik atuinissaa?

. . . annikilliornartussarsuarmi qanorpiaq pisoqassanersoq nalunngilluinnaraa?

1. Annikilliornartussarsuarmi pissutsit qanoq issappat?

SAATANIP silarsuaa inuit ilimaginngilluinnagaattut tassanngaannaq suujunnaarsinneqassaaq. (1 Thessalonikamiut 5:2, 3) ‘Jehovap ullussarsuani’ silarsuarmi paatsiveerunnersuaqassaaq. (Sefania 1:14-17) Naalliunnartoqangaarlunilu ajornartorsiuteqangaassaaq Biibilimi ullussat taakku pillugit ima allassimasoqarmat: “Naalliunnartoqangaassaaq silarsuup pileqqaarneraniit maannamut asseqanngitsumik nalliuteqqinngisaannassasumillu.” — Atuakkit Matthæusi 24:21, 22.

2, 3. (a) ‘Annikilliornartussarsuarmi’ Saatanip Guutip innuttai soriaraluassavai? (b) Suna Jehovap innuttaminik aniguisitsisinnaaneranik qularutiginninnginnerulissutigissavarput?

² Ezekielip siulittuutigaa annikilliornartussarsuup naangajalernerani Guutip innuttai ‘Gogimit Magogimi nunaqartumit’ saassunneqassasut. ‘Sakkutoorpassuit’ Guutip innuttai saassutissavaat, soorlu ‘nuissap majortup nunaat tamakkeraa’. (Ezekieli 38:2, 14-16) Silarsuarmi peqatigiiffeqassanngilaq Jehovap innuttaanik ikiuisussanik. Jehovap kiffaasa Guutimit aniguisinneqarnissartik upperilluinnartariaqassavaat. Taakkua akeqqaminnit nungutinniarneqarunik sussappat?

³ Jehovamut kiffaaguit annikilliornartussarsuarmi Jehovap innuttaminik aniguisitsisinnaallunilu aniguisitsiumanera upperaajuk? Apustili Petrusi ima allappoq: “[Jehovap] mianerinnitsini ussernartunit [misilinneqarnermit, NV] aniguisinneq sapinngilai, iluaatsulli parnaarussaatissavai ullormi eqqartuussivissami pillagassanngorlugit.” (2 Petrusi 2:9) Jehovap itsaq kiffaminik aniguisitsisarsimaneranik eqqarsaatiginneqqissaartarnerput ullumikkut Jehovap innuttaminik aniguisitsisinnaaneranik qularutiginninnginnerulissutigissavarput. Taamaattumik tamatumunnga tunngatillugu oqaluttuat pingasut sammissavavut.

ULERSUARMIT ANIGUISOQ

4. Ulersuaq pitinnagu qanoq pisoqassava?

⁴ Noap nalaani ulersuarmik oqaluttuaq sammeqqaartigu. Jehovap piumasaa naammassineqarsinnaaqqullugu piffissaq  eqqorlugu pisussat pinissaat pingaaruteqarpoq. Ulersuaqartinnagu umiarsualiorneq naammassineqarsimassaaq, uumasullu umiarsuarmukaanneqarsimassapput. Mosesimik allakkanit siullernit erserpoq Jehovap ulersuup qaqugu pinissaa aalajangerniarlugu umiarsualiornerup naammassinissaa utaqqinngikkaa. Jehovap umiarsualiornerup naammassinissaa isumakuluutigisariaqanngilaa. Aap, Guutip aalajangerpaa Noap umiarsualioqqunissaa sioqquterujussuarlugu ulersuup qaqugu pinissaa. Tamanna qanoq nalunngilarput?

5. Mosesimik allakkat siulliit 6:3 naapertorlugu Jehova qanoq nalunaaruteqarpa qangalu nalunaarpa?

⁵ Biibilimi allassimavoq Jehovap aalajangikkani qilammi nalunaarutigigaa. Mosesimik allakkat siulliit 6:3 naapertorlugu ima nalunaarpoq: “Anersaartornera uumassutaasoq inunniittuaannassanngilaq pinngortitaannaammata toqusussat, ukiut inuuffigisassaat 120-innaassapput.” Jehovap inuit qanoq sivisutigisumik inuusarnissaat pinngilaa, nunarsuarmili ajussutsip qaqugu peernissaa pivaa. * Ukiumi 2370-imi Kr.in.si. ulersualerpoq. Taamaattumik ukiumi 2490-imi Kr.in.si. Guuti taama nalunaaruteqarsimassaaq. Taamani Noa 480-inik ukioqarpoq. (1 Mosesi 7:6) Guutip nalunaarneranit ukiut 20-t qaangiuttut ukiumi 2470-imi Kr.in.si. Noap ernerisa pingasut angajullersaat inuuvoq. (1 Mosesi 5:32) Noap ernerisa inunngornerata kingorna ulersuup pinissaanut suli ukiut 100-t qaangiuttussaapput. Jehovalli Noap immikkut ittumik suliaqarnissaa inuillu qanoq annaanneqarnissaat pillugu suli oqarfiginngilaa. Guutip Noa tamatumunnga tunngatillugu qanoq sivisutigisumik oqarfiginngilaa?

6. Qanga aatsaat Jehovap Noa umiarsualioqqusimagunarpaa?

⁶ Noap ernerisa inunngornerannit ukiorpassuit qaangiuttut aatsaat Jehovap Noa sussanersoq oqarfigisimassagunarpaa. Sooq taamatut isummersinnaavugut? Biibilimi allassimavoq Noap erneri inersimasunngoreersimasut katereersimasullu Guutip Noa umiarsualioqqummagu. Jehovap ima oqarfigaa: “[Illit] angerfigeqatigissavakkit. Umiarsuarmut ikissaatit ernitit nuliallu ukuatillu ilagalugit.” (1 Mosesi 6:9-18) Taamaattumik imaassinnaavoq ukiut 40-t 50-illuunniit ulersuaqarnissaa sioqqullugu aatsaat Noa umiarsualioqquneqarsimasoq.

7. (a) Noap ilaqutaasalu uppernertik qanoq ersersippaat? (b) Qanga Guutip Noa qaqugorpiaq ulersuaqalissanersoq oqarfigaa?

⁷ Noa ilaqutaalu umiarsualiortillutik eqqarsarsimassagunarput Guuti qanoq ulersuaqartitsissanersoq qaqugulu ulersuaqalissanersoq. Tamanna nalugaluarlugu umiarsualiorlutik aallartinnermikkut upperluartuunertik ersersippaat. Biibilimi ima allassimavoq: “Noa Guutip peqqusineratorluinnaq iliorpoq.” (1 Mosesi 6:22) Naggataatigut Jehovap Noa oqarfigaa ullut arfineq-marluk qaangiuppata ulersuaqalissasoq. Taamaalillutik Noa ilaqutaalu uumasut umiarsuarmut ikiorartipallannissaannut piffissaqarput. Taamaattumik siallilermat “ukiumi Noap 600-nik ukioqalerfiani qaammatip aappaata ulluisa 17-ianni ulloq taannarpiaq” suut tamarmik piareeqqapput. — 1 Mosesi 7:1-5, 11.

8. Ulersuaqarsimaneranik oqaluttuamit qanoq ersersinneqarpa Jehovap innuttaminik qaqugorpiaq aniguisitsinissani nalunngikkaa?

⁸ Ulersuaqarsimaneranik oqaluttuamit paasinarsivoq Jehovap innuttaminik aniguisitsinissani qaqugorpiaq pissanersoq qanorlu ilioruni pitsaanerpaassanersoq tamatigut nalusanngikkaa. Taamaattumik pissutsit aaqqissuussaanerata matuma naggatissaa qanilliartortillugu Jehovap siunertaasa tamarmik ‘ulloq nalunaaquttap-akunneralu’ eqqoqqissaarlugu piviusunngornissaat qularutiginngilluinnarsinnaavarput. — Matthæusi 24:36; atuaruk Habakkuki 2:3.

IMMAKKUT AAPPALAARTUKKUT ANIGUISUT

9, 10. Jehovap innuttani atorlugit Egyptenimiut sakkutuui qanoq napitippai?

⁹ Ulersuaqarsimaneranik oqaluttuamit paasivarput Jehovap siunertani piviusunngortikkumallugu qaqugukkut akuliutissanerluni nalunngilluinnartaraa. Oqaluttuap aappaanit sammisassatsinnit paasinarsissaaq Jehovap innuttaminik aniguisitsiniarluni piumasaminillu  naammassinninniarluni pissaaneqangaarnerminik atuinissaa qularutiginngilluinnarsinnaagipput. Soorunami Jehova innuttaminik aniguisitsisinnaajuaannarpoq. Ilaannikkulli akeqqani napitinniarlugit innuttami navianartorsiornissaat akuerisarpaa. Taamatut pisoqarpoq Jehovap Israelikkut Egyptenimi inussiaataanerannit aniguisimmagit.

¹⁰ Israelikkut 3 millionit missaat Egyptenimit aniguipput. Jehovap Mosesi aqqutigalugu siulersueriaasia pissutigalugu Farao eqqarsalerpoq Israelikkut tammartajaartut. (Atuakkit 2 Mosesi 14:1-4). Taava Faraop sakkutuuni ilagalugit inussiaatigisaraluani malersulerpai ungullugillu Immap Aappalaartup eqqaani. Israelikkut aqqutissaarussoripput. (2 Mosesi 14:5-10) Israelikkulli navianartorsiuinngillat. Sooq? Jehova aniguisinniarlugit piareeqqammat.

11, 12. (a) Jehovap Israelikkut qanoq illersorpai? (b) Tamanna qanoq kinguneqarpa, Jehovalu pillugu qanoq paasisaqarpugut?

¹¹ ‘Napasoq nuiaasoq’ Israelikkunnik siulersuisoq tunuanniilerpoq Egyptenimiullu unitsillugit. Nuiaq Egyptenimiut tungaannut taarsisitsivoq, Israelikkulli tungaannut qaamatitsilluni — allaat unnuakkut. (Atuakkit 2 Mosesi 14:19, 20). Jehovap assarnersuartitsilluni imaq avissaartippaa immallu naqqa paqqertillugu. Qularnanngilaq tamanna sivisusimassasoq allassimasoqarmat “unnuaq tamaat” anorlersoq ‘Israelikkut immap qeqqatigut panertukkut ingerlasinnaalerserlugit’. Egyptenimiut sakkutuuisa qamutaannut sanilliullugit Israelikkut arriinnerujussuarmik ingerlapput. Egyptenimiulli taakku angusinnaanngilaat Jehova innuttani illersorlugit sorsummat. Jehovap “Egyptenimiut sakkutoorpassui . . . [ularussisippai], qamutaasalu assakaasui kigaaqusersorlugit ingerlaqqartippai.” — 2 Mosesi 14:21-25.

¹² Israelikkut tamarmik akianut apuummata Jehovap Mosesi ima oqarfigaa: “Assat immap qulaagut isatsiguk ermit uterlutik Egyptenimiut qamutaallu qimussersuilu uluguteqqullugit.” Sakkutuut immamit qaputtuinnarsuarmit qimaaniaraluartillugit Jehovap “Egyptenimiut immamut naloriuppai”. Aniguisinnaanngilluinnarput. “Ataatsimilluunniit amiakkoqanngillat.” (2 Mosesi 14:26-28) Jehovap ersersippaa qanorluunniit pisoqaraluaraangat innuttaminik aniguisitsinissamut pissaaneqarluni.

JERUSALEMIP PIUNEERUNNEQARNERANI ANIGUISUT

13. Jiisusi qanoq peqqusiva, ajoqersugaalu qanoq eqqarsarsimassappat?

¹³ Oqaluttuat pingajuanni sammissavarput ukiuni hundredelinni siullerni Jerusalemip Romamiut sakkutuuinit unguneqarnera. Oqaluttuamit erserpoq Jehovap siunertami naammassineqariartuarnerani qanorpiaq pisoqassanersoq nalunngikkaa. Jehovap Jiisusi aqqutigalugu ukiumi 70-imi Kr.in.king. Jerusalemip piuneerunneqarnera sioqqullugu kristumiut Jerusalemimi Judæamilu najugaqartut siunnersorpai. Jiisusip oqarfigai ‘Maajunnartoq Aseruisoq inimi illernartumiittoq takulerunikku taava qaqqanut qimaassasut’. (Matthæusi 24:15, 16) Jiisusilli ajoqersugaasa qanoq paasisinnaavaat siulittuut taanna eqquutilersoq?

14. Ajoqersukkat qanoq pisoqarmat Jiisusip oqaasii paasilerpaat?

¹⁴ Ajoqersukkat ukiorpassuit qaangiuttut Jiisusip oqaasiisa qanoq paasisariaqarnerat aatsaat paasilerpaat. Ukiumi 66-imi Kr.in.king. Romamiut sakkutuui Cestius Gallusimit siulersorneqartut Jerusalemimukarput juutit pikitsitsinerat unitsinniarlugu. Juutit pikitsitsisut, zelotitut ilisimaneqartut, naalaffiup qarmarsuisa iluatungaannut qimaammata Romamiut sakkutuuisa  naalaffiup qarmarsui aserortilerpaat. Kristumiut Jiisusip peqqussutaanik eqqaamannittut tamakku tamarmik qanoq paasisariaqarnersut paasilerpaat. Paasivaat Romamiut sakkutuuisa erfalasui guutipilussiornermut tunngasut naalaffiup qarmarsuata silataaniimmata “Maajunnartoq Aseruisoq” “inimi illernartumiittoq”. Maanna Jiisusip ajoqersugai ‘qaqqanut qimaasariaqalerput’. Qanorli ilillutik illoqarfimmit unguneqarsimasumit qimaasinnaassappat? Ilimaginngisamilli pisoqarpoq.

15, 16. (a) Jiisusip ajoqersukkani qanoq paasiuminartumik peqquai, aamma sooq oqaasiisa maleruarnissaat pingaaruteqarpa? (b) Annaanneqarumalluta susariaqarpugut?

¹⁵ Cestius Gallus sakkutuullu pissutissaqarsorinanngitsumik Jerusalemimit qimagupput. Zelotillu Romamiut malersulerpaat. Maanna Romamiut juutillu pikitsitsisut illoqarfimmit qimagummata Jiisusip ajoqersugai qimaanissaminnut periarfissaqalerput. Jiisusip paasiuminartumik oqarfigisimavai illoqarfik ingerlaannaq qimassagaat pigisatik qimaannarlugit. (Atuakkit Matthæusi 24:17, 18). Sooq ingerlaannaq iliuuseqartariaqarpat? Ullut arlaqanngitsut qaangiummata zelotit uterput Jerusalemimi Judæamilu najugallit pikitsitseqataaqqullugillu pinngitsaaliniarlugit. Jerusalemimi pissutsit ajorseriataarput juutit pikitsitsisut pissaaneqarniullutik imminnut akersuummata. Jerusalemimit qimaanissaq ajornarsigaluttuinnarpoq. Ukiumilu 70-imi Kr.in.king. Romamiut utermata Jerusalemimit qimaasoqarsinnaajunnaarpoq. (Lukasi 19:43) Illoqarfimmiiginnartut tamarmik anisinnaajunnaarput! Kristumiulli Jiisusip oqaasii malillugit iliortut tamarmik annapput. Namminneq misigaat Jehova innuttaminik aniguisitsineq sapinngitsoq. Oqaluttuaq tamanna qanoq ilinniarfigisinnaavarput?

¹⁶ Annikilliornartussarsuarmi kristumiut Guutip oqaasianit taassumalu peqatigiissortaanit iliuusereqquneqartut malittariaqassavaat. Assersuutigalugu Jiisusip ajoqersukkani ‘qaqqanut qimaaqquai’. Uaguttaaq annikilliornartussarsuarmi ‘qimaaqquneqarumaarpugut’. Qanoq ilioqquneqassaagut? Taamanikkut paasiumaarparput. * Qularutiginngilluinnarsinnaavarpulli qanoq iliornissatsinnik Jehovap piffissaq eqqorlugu paasitikkumaaraatigut. Taamanikkussamut peqquneqarnitsitut iliorutta aatsaat aniguissaagut. Taamaattumik imminut ima aperisariaqarpugut: ‘Maannakkut Jehovap innuttaminut peqqussutai maleruartarpakka? Ingerlaannaq iliuuserisarpakka, imaluunniit iliuuserinaveersaartarpakka?’

SIUNISSAMI PISUSSAT PIAREERSIMAFFIGAAVUT

17. Gogip Guutip innuttaanik saassussinissaa pillugu Habakkukip siulittuutaa qanoq ilinniarfigisinnaavarput?

¹⁷ Gogip saassussinera allaaserisap aallaqqaataani eqqaaneqartoq sammilaariartigu. Ezekielip siulittuutaanut assingusumik pruffiiti Habakkuki ima allappoq: “Tamanna tusarakku qamuuna sajulerpunga, qanngulunneranit allerulaarpunga. Saanikka aasutut ilerput, patajallungalu pisuttalerpunga. Utaqqivara ulloq annikilliorfissap inuiannik uatsinnik saassussiniartunik eqquinissaa.” (Habakkuki 3:16) Habakkukip tusaramiuk akeqqat Guutip innuttaanik saassussiniartut Habakkuki qamuuna sajulerpoq, allerulaalerluni nukeerullunilu. Jehovalli ullussarsua ‘utaqqiumavaa’. Gogip ilerpassuisalu saassutilerpatigut immaqa aamma uagut annilaangassaagut. Habakkukitulli Jehovap innuttaminik aniguisitsiumaarnera qularutiginngilluinnarsinnaavarput. — Habakkuki 3:18, 19.

18. (a) Sooq annilaangassanngilagut uagutsinnut akeraasut saassuppatigut? (b) Allaaserisami tulliuttumi suna sammissavarput?

¹⁸ Oqaluttuani pingasuni sammeriikkatsinni erseqqilluinnarpoq Jehovap innuttani aniguisinneq sapinngikkai. Qularnanngilluinnarpoq siunertani piviusunngortikkumaarai akeqqanilu ajugaaffigiumaarai. Jehovap ajugaanissarsua tamanna misigissagutsigu naggatissamut aalajaattuartariaqassaagut. Assuarnaattuaqqulluta Jehovap qanoq ullumikkut ikiortarpaatigut? Allaaserisami tulliuttumi tamanna sammissavarput.

[Quppernerup ataani ilanngussat]

[Atuaqqissaarnermi apeqqutit]