Allaaserisami matumani immaqa apeqqutigisarnikuusatit taakkualu akissutaat illit nammineq Biibilinni sumi takusinnaaneritit sammineqassapput. Akissutissarsiorninni Jehovap Nalunaajaasuisa ikiorusuppaatsit.

1. Jiisusip toqunera qanoq eqqaaniarneqassava?

Jiisusip ajoqersukkani oqarfigai nereqatigiinnikkut toqunissani eqqaaniartaqqullugu timiusaq viinnilu assersuutaasumik isumaqartut atorlugit. Timiusaq Jiisusip timaanut assersuutaavoq viinnilu aavanut assersuutaalluni. — Atuakkit Lukasi 22:19, 20.

Timiusaq Jiisusip atortagaa seernarsaateqanngilaq, tassa qapoqanngitsoq. Biibilimi seernarsaat ajortimut assersuutaagajuppoq. Taamaattumik timiusaq Jiisusip timaanut naammalluinnartumut assersuutaalluarpoq. Timini pilliutigimmagu uumasut Mosesip inatsisaani pilliutigineqaqquneqartut atorunnaarput. (Hebræerit 10:5, 9, 10) Viinni Jiisusip aavanut erlinnartumut ajortivut pillugit pilliutitut kuineqartumut assersuutaavoq. — Atuakkit 1 Petrusi 1:19; 2:24; 3:18.

2. Jiisusip toqunera qaqugukkut eqqaaniartassavarput?

Jiisusi toquvoq poorskip ulluani, nisanip 14-ianni. Juutinut ulloq nutaaq seqerngup tarrinnerani aallartittarpoq. Unnukkut toqunissani aqaguttoq apustilinilu poorskisiummik nereqatigeereerlutik Jiisusi toqunini eqqaaniartaqqullugu nereqatigiinnissamik nutaamik pilersitsivoq. — Atuakkit Lukasi 22:14, 15.

Ullumikkut Guutip innuttaasa eqqaaniartarpaat Guutip Jiisusi aqqutigalugu pilersitaa inuit tamaasa ajortimit toqumillu aniguisinniarlugit. (2 Mosesi 12:5-7, 13, 17) Soorlu poorski ukiumut ataasiarluni nalliuttorsiutigineqartartoq taamatuttaaq Jiisusip toquneranik eqqaaniaaneq ukiumut ataasiarluni nalliuttorsiutigineqartarpoq, Biibilip qaammatisiutaa naapertorlugu nisanip 14-ianni seqernup tarrinerata kingorna. — Atuaruk Johannesi 1:29.

  3. Kikkut timiusamik viinnimillu ilangiissappat?

Jiisusip viinni ajoqersukkaminut tunniukkamiuk ima oqarpoq: “Ermuseq manna tassa . . . angerusisaaq.” (1 Korinthimiut 11:25) Angerutsip nutaap Mosesimik inatsisit taarserpai, inatsisinilu taakkunani israelikkut Guuti naalappassuk taassuma innuttariumaarlugit neriorsorsimavai. (2 Mosesi 19:5, 6) Israelikkulli Guuti naalanngilaat. Taamaattumik Jehovap angeruseq nutaaq pilersippaa. — Atuaruk Jeremia 31:31.

Angeruseq nutaaq iluaqutigalugu Jehovap amerlanngitsut aqqutigalugit inuppassuit pilluaqquneqarnissamut periarfissippai. Angerusisaamut ilaasut 144.000-innaapput. Taakku aqqutigalugit inuit inuiannit tamaneersut millionillit nunami paratiisiusumi inuunermik naassaanngitsumik pilluaqquneqarumaarput. Angerusisaamut ilaasut ilaat ullumikkut nunami Jehovamut kiffartorput. Jiisusip aavatigut Jehovap angerfigeqatigimmatik taakku kisimik timiusamik viinnimillu ilangiissapput ‘ermusermi angerusisaajummat’. — Atuakkit Lukasi 12:32; Saqqummersitat 14:1, 3.

4. Eqqaaniaasarneq qanoq iluaqutigissavarput?

Jiisusip toquneranik eqqaaniaalluni ukiumoortumik nalliuttorsiortarneq Jehovap asseqanngilluinnartumik asanninneranik pingaartitsinerulissutigaarput. Taassuma ernini aallartippaa ajortivut pillugit toquniassammat. Taamaattumik eqqaaniaanermut najuukkaangatta Jiisusip toqunera uagutsinnut qanoq pingaaruteqartigisoq eqqarsaatigisariaqarparput. Jehovap Jiisusillu uagut pilluta iliuuserisimasaannik pingaartitsinerput qanoq ililluta ersersissinnaanerlutigu isumaliutigissavarput. — Atuakkit Johannesi 3:16; 2 Korinthimiut 5:14, 15.

Paasisaqarnerorusukkuit atuakkit qupp. 206-208 atuakkami uani, Biibilimi sorpiaat ajoqersuutigineqarpat?, Jehovap Nalunaajaasuinit saqqummersinneqartoq.