Uummatikkut iluunngarlutit Jehovamut kiffartortuarit

“Ernera . . . , ataatavit Guutia ilisariniaruk, kiffartorfiginiaruk uummatikkut iluunngarlutit.” — 1 NALUNAARSUUTIT 28:9.

QANOQ AKISSAVIT?

Uummat assersuutaasoq sunaava?

Ilaatigut qanoq uummaterput misissorsinnaavarput?

Qanoq ililluta uummatikkut iluunngarluta Jehovamut kiffartorsinnaavugut?

1, 2. (a) Timip pisataasa ilaat sorleq Biibilimi assersuutaasumik atorneqarajunnerua? (b) Sooq uummatip assersuutaasup suuneranik paasinninnissarput pingaaruteqarpa?

BIIBILIMI timip pisataasa ilaat assersuutaasumik eqqaaneqartarput. Assersuutigalugu Jobi ima oqarpoq: “Isikka isumaqatigiissuteqarfigisimavakka.” Jehovap Ezekieli ima neriorsorpaa: ‘Qaat ujaqqamit manngertumit manngernerulersippara.’ Jiisusi ima oqarpoq: “Talerpippit tammartippatit, kipiuk.” — Jobi 31:1; Ezekieli 3:9, 1990; Matthæusi 5:30.

² Timilli pisataasa ilaat ataaseq Biibilimi assersuutaasumik atorneqarnerpaavoq. Hannap aalajaatsup qinnutimini ima eqqaavaa: “Uummatiga qiimmattarpoq [Jehovami].” (1 Samueli 2:1) Uummat Biibilimik allattunit 1000-eriangajalluni, amerlanertigut assersuutaasumik, eqqaaneqarpoq. Uummatip sumut assersuutaaneranik paasinninnissarput pingaaruteqarluinnarpoq Biibilimi allassimagami paarisariaqaripput. — Atuaruk Ussatit 4:23.

UUMMAT ASSERSUUTAASOQ — SUUGAMI?

3. Uummatip assersuutaasup isumaanik qanoq ililluta paasinnissinnaavugut? Assersuuteqarit.

³ Uummat assersuutaasoq Biibilimi nassuiarneqanngikkaluartoq tamatuma suunera paasisinnaavarput. Qanoq ililluta? Assersuuteqariarta. Ujaraaqqanik ikkussoqqissaakkanik tusindilippassuarnik assilialiaq eqqarsaatigeriaruk. Suna assilialiarineqarsimanersoq takusinnaajumallugu tunuaamilaartariaqarpugut. Taamatuttaaq oqaaseq “uummat” Biibilimi arlalippassuariarluni atorneqarmat oqaatsip tamatuma qanoq atorneqarsimanera misissorutsigu tamatuma isumaanik paasinnissinnaalissaagut. Oqaatsip tamatuma isumaa paasiniariartigu.

4. (a) ‘Uummat’ sumut assersuutaava? (b) Matthæusi 22:37-mi allassimasoq qanoq paasisariaqarpa?

 ⁴ Biibilimik allattut oqaaseq ‘uummat’ inuup ilorlikkut pissusiinut tunngatillugu atortarpaat. Tassa kissaatitsinnut, eqqarsaatitsinnut, kinaassutsitsinnut, pissutsitsinnut, piginnaanitsinnut, kajumississutigisatsinnut anguniakkatsinnullu tunngassuteqarpoq. (Atuakkit 5 Mosesi 15:7; Ussatit 16:9; Apustilit Suliaat 2:26). Ilaannikkulli oqaaseq ‘uummat’ tamakkununnga tamanut tunngatinneqarneq ajorpoq. Soorlu Jiisusi ima oqarpoq: “[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.” (Matthæusi 22:37) Matumani oqaaseq ‘uummat’ inuup misigissusiinut kissaataanullu tunngatinneqarpoq. Jiisusip uummat, tarneq isumalu tamaasa immikkut eqqaavai erseqqissarusukkamiuk Guutimik asanninnerput ersersissagipput misigissutsitsigut, inooriaatsitsigut isumatsinnillu atuinitsigut. (Johannesi 17:3; Efesosimiut 6:6) Oqaaserli ‘uummat’ kisimi eqqaaneqaraangat inuup ilorlikkut pissusiinut tamanut tunngatinneqartarpoq.

SOOQ UUMMATERPUT PAARISARIAQARIPPUT

5. Sooq uummatikkut iluunngarluta Jehovamut kiffartorusuppugut?

⁵ Kunngip Daavip ernini Salomo ima eqqaasippaa: “Ernera Salomo, ataatavit Guutia ilisariniaruk, kiffartorfiginiaruk uummatikkut iluunngarlutit nuannaarlutillu, uummatit tamaasa misissuiffigeqqissaartarpai inuillu piumasaat pilersaarutaallu tamaasa paasisimallugit.” (1 Nalunaarsuutit 28:9) Jehovap uummatit tamaasa, aamma uagut uummativut, misissuiffigisarpai. (Ussatit 17:3; 21:2) Jehovamut ikinngutaasinnaallutalu nuannersumik siunissaqarsinnaavugut aatsaat Jehovap uummatitsinniittut iluarippagit. Taamaattumik uummatikkut iluunngarluta Jehovamut kiffartornitsigut Daavip siunnersuutaanik malinninnissamut pissutissaqarluarpugut.

6. Jehovamut kiffartornissamik aalajangiusimanninnitsinnut tunngatillugu suna nalunngittariaqarparput?

⁶ Jehovamut nalunaajaasutut aallussilluarluta oqaluussisarnitsigut ersersittareerparput uummatikkut iluunngarluta Guutimut kiffartorusulluta. Nalunngilarpulli Saatanip silarsuaa ajortoq ajortulioqqajaasarnerpullu uagutsinnut sunniuteqangaarsinnaasut uummatikkullu iluunngarluta Jehovamut kiffartornissamik aalajangiusimannippiarunnaassutigisinnaagivut. (Jeremia 17:9; Efesosimiut 2:2) Taamatut pisoqartikkumanagu uummatitsinnik misissuiuartariaqarpugut. Qanoq ililluta?

7. Uummatikkut qanorpiaq pissuseqarnerput sumit ersertarpa?

⁷ Inuup qannartarput takusinnaanngilaa, soorlu orpiup qiteraa takuneqarsinnaanngitsoq. Taamaakkaluartorli, Jiisusip qaqqami oqaluutsimini oqarneratut uummatikkut pissuserput iliuutsitsinnit takuneqarsinnaavoq, soorluttaaq orpik ajunngitsuunersoq ajortuunersorluunniit inerititaasigut takuneqarsinnaasoq. (Matthæusi 7:17-20) Tamanna pillugu misissueriarta.

UUMMAMMIK MISISSUERIAATSIT ILAAT

8. Matthæusi 6:33-mi allassimasoq naapertorlugu uummammiugisatsinnut qanoq tunngassuteqarpa?

⁸ Aamma Jiisusip qaqqami oqaluutsimini tusarnaartuni paasitippai uummatikkut iluunngarlutik Jehovamut kiffartorusunnertik ersersinniarlugu susariaqartut. Ima oqarpoq: “Naalagaaffik naapertuilluassuserlu taassuma pia siulliullugit noqqaassutigiuarsigit, taava tamakku tamaasa ilanngullugit ilissinnut tunniunneqarumaarput.” (Matthæusi 6:33, NV) Uummatitsigut kissaatigisavut, eqqarsaativut pilersaarutivullu inuunitsinni pingaarnerpaatitatsinnit ersertarput. Taamaattumik  inuunitsinni sunik pingaarnerpaatitsinitsinnik eqqarsaatiginninnitsigut paasisinnaavarput uummatikkut iluunngarluta Guutimut kiffartornerluta.

9. Jiisusip angutit taakku soqqullugit kajumissaarpai, akissutaannillu suna erserpa?

⁹ Jiisusip malinnitsini ‘naalagaaffik siulliullugu noqqaassutigeqqullugu’ kajumissaareermagit pisimasut sammeriartigit. Pisimasunit erserpoq inuup qamuuna qanoq misigissuseqarnera inuunermini pingaarnerpaatitaatigut paasineqarsinnaasoq. Lukasi allappoq Jiisusip Jerusalemiliarnissani aalajangiusimalluinnaraa nalunngikkaluarlugu kingusinnerusukkut tassani naalliuttussaalluni. Jiisusip apustilillu Jerusalemiliartillutik angutinik naapitsipput, Jiisusillu taakku maleqqulluni kajumissaarpai. Angutit taakku akuersigaluarput, allanilli iliuusereqqaagassaqarnerarput. Ilaat ima akivoq: “Naalagaq, akuerisinnaagumma ataataga iliartoqqaarumagaluarpara.” Alla ima oqarpoq: “Naalagaq, malissavakkit, ilaquttakkali inuulluaqqujartoqqaarallarlakka.” (Lukasi 9:51, 57-61) Jiisusip Guutip piumasaatut iliornissaminik aalajangiusimannilluinnarnerata angutillu Jiisusip malinneqqusaasa nangaarpalunnerata assigiinngilluinnassusiat erseqqippoq. Nammineq piumasatik pingaarnerpaatippaat, tamatumanngalu erserpoq uummatikkut iluunngarlutik Guutimut kiffartornissartik kissaatiginngikkaat.

10. (a) Jiisusip imminut ajoqersuganngoqqusissutaa qanoq periarfigaarput? (b) Jiisusip suna assersuusiaraa?

¹⁰ Uagut ajoqersuganngorusunneraannartut taakku pisimanerattut pinnata, silatusaarluta Jiisusip imminut ajoqersuganngoqqusissutaa malillugu iliorpugut maannalu ullut tamaasa Jehovamut kiffartortarluta. Taamaalilluta Jehovamut qanoq misigissuseqarnerput ersersittarparput. Jehovamulli kiffartorneq ulapputigigaluarlutigu eqqaamasariaqarparput uummaterput navianartorsiuleriaannaasoq. Qanoq? Tamanna Jiisusip ajoqersuganngorniarneraraluartut suli oqaloqatigitillugit oqaasiinit ukunannga erserpoq: “Assallatserilerluni tunummut qiviartoq kinaluunniit Guutip naalagaaffianut naleqqutinngilaq.” (Lukasi 9:62) Assersuut tamanna sumik ilinniarfigisinnaavarput?

‘AJUNNGITSOQ AALAJANGERFIGAARPUT?’

11. Jiisusip assersuusiaani naasorissaasup suliani qanoq suliarilluartigaa, aamma sooq taama pisoqarpa?

¹¹ Jiisusip assersuusiaa paasilluarnerujumallugu misissorluariartigu. Naasorissaasoq narsaammik assallatserivoq. Assallatseritilluni angerlarsimaffini eqqarsaatigiunnaarneq ajulerpaa. Ilaquttani ikinngutinilu kipilerfigai, nerisassat nipilersuutit illaqattaarnerillu qiitsavigai assullu alanngumiikkusulluni. Assallatseringaatsiareerluni inuunermi ilorrisimaarnartut tamakku ima kajungeritigilerpai ‘tunummut qiviarluni’. Narsaatip siaruarteriffigineqannginnerani suli suliassarpassuaqaraluarluni naasorissaasoq allamut saasaateqarpoq suliassanilu iluamik suliarinagu. Soorunami taassuma naalagaa pakatsivoq taanna pinertusaanngimmat.

12. Jiisusip assersuusiaani naasorissaasoq ullumikkullu kristumiut ilaannut qanoq assersuunneqarsinnaava?

¹² Maanna takorlooriaruk ullumikkut tamatumunnga assingusumik qanoq pisoqarsinnaanersoq. Naasorissaasoq tassaasinnaavoq kristumiu ingerlalluarpasikkaluarluni anersaakkut navianartorsiortoq. Assersuutigalugu takorlooriartigu qatanngut taanna ataatsimiigiartartoq oqaluusseqataasartorlu. Tamannali ilutigalugu nuannarisani silarsuarmi matumaniittut eqqarsaatigiunnaarneq ajuleqqavai — qamuuna assut kajungerai. Ukiorpaalunni Guutimut kiffartoreerluni silarsuarmi matumaniittut ima kajungeritigilersimavai ‘tunummut qiviarluni’.  Oqaluussinermi suliassarpassuaqaraluartoq allamut saasaateqarpoq, kristumiutullu sammisassanik aallussilluarpiarunnaarpoq. (Filippimiut 2:16) Jehova, “katersuinermi naalagaasoq”, taamatut pinertusaarunnaartoqaraangat aliasuttarpoq. — Lukasi 10:2.

13. Uummatikkut iluunngarluni Jehovamut kiffartorneq qanoq paasisariaqarpa?

¹³ Matumani ilinniutigineqartoq paasiuminarpoq. Uummatikkut iluunngarluni Jehovamut kiffartorneq tassaaginnanngilaq ataatsimiigiartuartarneq oqaluussiuarnerlu. (2 Nalunaarsuutit 25:1, 2, 27) Kristumiup silarsuarmi inooriaaserineqartunut tunngasut aalajangersimasut qamuuna nuannariuarunigit Guutimut attaveqarluarunnaariataannaavoq. (Lukasi 17:32) Taamaammat uummatikkut iluunngarluta Guutimut kiffartorumalluta ‘ajussuseq maajugisariaqarlugulu ajunngitsoq aalajangerfigisariaqarparput’. (Romamiut 12:9; Lukasi 9:62) Saatanip silarsuaaniittut ilaat atorluarsinnaarpasikkaluarlutillu nuannerunarpasikkaluartut qulakkeertariaqarparput uummatikkut iluunngarluta Guutimut kiffartorniarnitsinni sunilluunniit akornuteqannginnissarput. — 2 Korinthimiut 11:14; atuakkit Filippimiut 3:13, 14.

EQQUMAJUARIT!

14, 15. (a) Saatanip qanoq ililluni Jehovamut kiffartornitsinni aallussilluarpiarunnaarsinniarsarisarpaatigut? (b) Saatanip qanoq nakutitsiniaasarneranik assersuuteqarit.

¹⁴ Jehovamik asanninnerput taassumunnga tunniulluinnarnissamut kajumississutigaarput. Tunniulluinnarattali ilarpassuavut ukiorpassuarni uummatikkut iluunngarlutik Jehovamut kiffartornissaminnik aalajangiusimannissimapput. Taamaakkaluartorli Saatanip suli sunnerniartuarpaatigut. Uummativut suli ajoquserniartuarpai. (Efesosimiut 6:12) Soorunami nalunngilaa Jehovamut kiffartorunnaariataarnavianngitsugut. Taamaattumik ‘silarsuaq manna’ atorlugu salloqittarniartarpaatigut aallussilluarunnaariartuaartikkumalluta. (Atuakkit Markusi 4:18, 19). Taamatut nakutitsiniaanermini sooq taama iluatsitsilluartigisarpa?

¹⁵ Tamanna paasiumallugu assersuuteqariarta. Takorlooruk qaammaarissumik qulleqarlutit atuarujoortillutit qullit pæriiartoq. Taggarissuinnanngormat ingerlaannaq paasivat  susoqarnersoq pærilu qaarsimasoq allamik taarserlugu. Ini qaammaarisseqqippoq. Aqaguani unnukkut taanna qulleralugu atuaqqipputit. Pærilli ikkussimasavit pærimik sakkukinnerulaannguartumik taarserneqarsimanera sianiginngilat. Tamannali malugigunanngilat. Ullumilu tulliuttumi pæri taarserneqaqqippoq pærimit tamatumannga sakkukinnerulaartumik, tamannalu aamma suli malugigunanngilat. Sooq? Qullip qaamarnga malunnanngitsumik sakkukilliartuaarmat. Tamatumunnga assingusumik Saatanip silarsuaanit sunnerneqarutta Jehovamut kiffartornermi aallussilluarunnaariartuaarsinnaavugut. Kristumiu eqqumanngikkuni aallussilluarunnaariartornini maluginavianngilaa, Saatanilu iluatsitsisimassaaq. — Matthæusi 24:42; 1 Petrusi 5:8.

QINUSARIAQARPUGUT

16. Saatanimit sunnerneqarumanata qanoq ililluta imminut illersorsinnaavugut?

¹⁶ Saatanimit sunnerneqarumanata qanoq ililluta imminut illersorsinnaavugut uummatikkullu iluunngarluta Jehovamut kiffartortuarluta? (2 Korinthimiut 2:11) Qinusarnissaq pingaaruteqarpoq. Paulusip kristumiut kajumissaareerlugit ‘Diaavulup qoqassiniaraangatik atasaqqullugit’, peqquai periarfissat tamaasa qinusaqqullugit. — Efesosimiut 6:11, 18; 1 Petrusi 4:7.

17. Jiisusip qinnutai sumik ilinniarfigaavut?

¹⁷ Aalajaattuarumalluta Jiisusi taassumalu uummatikkut iluunngarluni Jehovamut kiffartorusussusia ilaartariaqarpavut. Lukasi Jiisusip toqunissani aqaguttoq qanoq qinuneranik allaatiginnippoq: “Annilaanganermini suli ilungersornerulluni qinulerpoq.” (Lukasi 22:44) Jiisusi siornatigut ilungersorluni qinusareerpoq, maannali, nunarsuarmi inuunermini sakkortunerpaamik misilinneqalerluni ‘ilungersornerulluni’ qinuvoq — qinnutaalu akineqarpoq. Jiisusip maligassiaanit paasivarput qinutilluni ilaannikkut ilungersornerusoqarsinnaasoq. Taamaammat misilinneqaativut artornarsiartortillugit Saatanilu sunniiniarnerujartuinnartillugu Jehovamit illersorneqarnissarput ‘ilungersornerulluta’ qinnutigisariaqartassavarput.

18. (a) Qinnutitsinnut tunngatillugu imminut qanoq aperisariaqarpugut, aamma sooq? (b) Uummatitsinnut sunniuteqarsinnaasut suuppat, aamma qanoq sunniuteqarsinnaappat? (Takuuk  ungalusaq qupperneq 22-miittoq.)

¹⁸ Ilungersorluta qinunerput qanoq kinguneqassava? Paulusi ima allappoq: “[Kissaatigisasi] qanoq ittukkulluunniit Guutimut saqqummiuttarsigit qinullusi torlulallusilu qujallusilu. Taava eqqissinerup Guutimit pisup siuneqassusernit tamanit annerungaartup uummatisi sernigissavai.” (Filippimiut 4:6, 7) Uummatikkut iluunngarluta Jehovamut kiffartornissarput kissaatigigutsigu ilungersorluta qinukulasariaqarpugut. (Lukasi 6:12) Taamaammat imminut ima aperigit: ‘Qinugaangama qanoq ilungersortigisarpunga? Qanoq qinukulatigisarpunga?’ (Matthæusi 7:7; Romamiut 12:12) Apeqqutinut taakkununnga akissutinnit paasinarsissaaq illit Guutimut kiffartornissat qanoq kissaatigitigigit.

19. Illit uummatikkut iluunngarlutit Jehovamut kiffartortuarumallutit sussavit?

¹⁹ Soorlu sammereeripput, uummatikkut qanoq pissuseqarnerput inuunitsinni pingaarnerpaatitatsigut paasisinnaavarput. Qulakkeerusupparput silarsuarmi inooriaaserineqartut Saatanilluunniit nakutitseriaasii pissutigiinnarlugit uummatikkut iluunngarluta Jehovamut kiffartornissatsinnik aalajangiusimannippiarunnaannginnissarput. (Atuakkit Lukasi 21:19, 34-36). Taamaattumik, Daavip pisimaneratut, Jehova maniguulluta qinnuigiuarparput ‘uummatikkut iluunngarluta’ kiffartorsinnaaqqulluta ikioqqulluta. — 1 Nalunaarsuutit 29:19.

[Atuaqqissaarnermi apeqqutit]

[Qupp. 22-mi ungalusaq]

UUMMATITSINNUT SUNNIUTEQARTARTUT PINGASUT

Soorlu uummatitsinnut iluaqutaasumik iliuuseqarsinnaasugut, taamatuttaaq uummatitsinnut assersuutaasumut nakussatsissutaasumik iliuuseqarsinnaavugut. Pingaarutillit pingasut uku sammeriartigit:

1 Inuussutissat: Uummaterput peqqissuutikkumallugu peqqinnartunik nerisariaqartarpugut. Taamatuttaaq anersaakkut naammattunik nerisariaqartarpugut nammineq atuaqqissaartarnitsigut, eqqarsaatiginneqqissaartarnitsigut ataatsimiigiartarnitsigullu. — Tussiaat 1:1, 2; Ussatit 15:28; Hebræerit 10:24, 25.

 2 Sungiusartarneq: Peqqissuujumalluta timersornitsigut uummaterput ilaannikkut sukkanerusumik tillilersittariaqartarparput. Taamatuttaaq aallussilluarluta oqaluussisarnitsigut — immaqa oqaluussinermi iliuuseqarnerusarnitsigut — uummaterput assersuutaasoq peqqissuutissinnaavarput. — Lukasi 13:24; Filippimiut 3:12.

3 Ilagisartakkat: Inuit Guutimik ataqqinninngitsut akornanni inuunerput pissutigalugu uummativipput uummaterpullu assersuutaasoq artorsalersinnaapput. Uppeqatitsinnilli sapinngisarput tamaat peqateqartarnerput oqiliallaatigisinnaavarput, taakkumi uagutsinnik ilumoorlutik isumassuipput uummatikkullu iluunngarlutik Jehovamut kiffartorlutik. — Tussiaat 119:63; Ussatit 13:20.