Aappariinneq Guutimit tunissutisiaasoq ilumut pingaartippiuk?

‘Qanortoq Jehovap isumannaatsumik atugaqartillisi tamassi immikkut uissi illuani!’ — RUTHI 1:9.

PINGAARNERIT UKU EQQUMAFFIGIKKIT:

Sooq oqarsinnaavugut itsaq Guutimut kiffaasut aappariinnermik Guutimit tunissutisiaasumik pingaartitsisut?

Qanoq nalunngilarput kimut katissanerluta aalajangernerput Guutimut pingaaruteqartoq?

Aappariinnermut tunngatillugu siunnersuut suna illit inuuninni malikkusuppiuk?

1. Adami nuliani pinngortinneqarmat qanoq misigiva?

“TAMANNA tassa saaneq saanerma ilaa uinillu uinimma ilaa. Una arnamik taaneqassaaq angummit tigusaagami.” (1 Mosesi 2:23) Inuk siulleq, Adami, taama oqarpoq. Adamip Jehova arnamik pinnersumik nuliassaminik pinngortitsimmat nuannaarutigaa. Guutip Adami itisuumik sinitsillugu najungasuanik tigusilluni arnaq pinngortippaa, Adamillu arnaq Evamik atserpaa. Guutip taakku katitippai. Jehovap arnaq angutip najungasuanit pinngortimmagu Adami Evalu ullumikkut aappariinnit allanit tamanit imminnut qaninnerupput.

2. Sooq angutit arnallu asannilersoortarpat?

² Jehovap inuit asannilersoorsinnaanngortillugit pinngortissimavai. Taamatullu asannilersooraangamik angut arnarlu imminnut kajungereqatigiilertarput. Inuit amerlanersaat katikkaangamik neriuttarput asaqatigiinnertik ataavartuussasoq.

AAPPARIINNERMIK GUUTIMIT TUNISSUTISIAASUMIK ATAQQINNITTUT

3. Aaperaap ernini Iisaaq nuliassarsiuunnialeramiuk qanoq iliorpa?

³ Aaperaap aalajaatsup Jehovap aappariinnermik aaqqissuussaa ataqqivaa. Taamaattumik inussiaatimi utoqqaanersaat Mesopotamiamut aallartippaa Iisaaq nuliassarsiortillugu. Inussiap Jehova qinnuigaa ikioqqulluni tamannalu kinguneqarluarpoq. Arnaq Guutimik mianerinnittoq, Rebekka, naapippaa Iisaallu taanna nuliartaaraa, Jehovallu kinguaassamut tunngatillugu Aaperaamut neriorsuutaanut eqquutsitseqataavoq. (1 Mosesi 22:18; 24:12-14, 67) Ajunngitsumilli isumaqaraluaruttaluunniit aappassarsiuussisussaanngilagut. Ullutsinnimi inuppassuit namminneq aalajangertarpaat kina katissanerlugu. Aamma inuk kimut katissanersoq Guutimit aalajangiissunneqarneq ajorpoq.  Kristumiulli katinniarlutik eqqarsartut tamatumunnga allanullu tunngatillugu Guutimit ikiorneqarsinnaapput siulersoqqullutik qinugunik anersaavanillu siulersortikkunik. — Galatiamiut 5:18, 25.

4, 5. Qanoq nalunngilarput Shulamimiup savanillu paarsisup asaqatigiinnerat?

⁴ Itsaq Israelimi niviarsiaq Shulamimiu pinnersoq kunngip Salomop nuliarpassuinut ilannguteqqulluni allanit kajumissaarneqarusunngilaq. Ima oqarpoq: “Ilungersorlunga oqaluffigaassi, Jerusalemip panii: Asanninneq itersaqinasiuk, pileritsassaaqinasiuk nammineq piumallertinnagu!” (Erinarsugassiat Pingaarnersaat 8:4) Shulamimiup alla asavaa, tassa savanik paarsisoq, taannalu maniguulluni ima oqarfigaa: “Uanga tassa Saronip ruusaa, qooqqut liljaat.” Savanik paarsisup aamma taanna asavaa, imalu akivaa: “Soorlu lilja kapinartullit akornanni naasimasoq taama ippoq asanerpaasara niviarsiaqatimi akornanni.” (Erinarsugassiat Pingaarnersaat 2:1, 2) Ilumut imminnut asaqatigiipput.

⁵ Shulamimiup savanillu paarsisup Guuti imminnit asanerugamikku aappariinnerat ingerlalluassaaq. Shulamimiu savanik paarsisumut asasaminut ima oqarpoq: “Ivertinnga naqissutitut illit uummatinni, naqissutitut illit talinni! Massami asanninneq toqutut nakuutigimmat, asanniummerneq toqusut inaattut sakkortutigimmat. Naaralaalersarpoq innertut, asanninneq tassaammat ikualasoq [Jehovamit] pisoq. Erngup supinerata asanninneq qamitissinnaanngilaa, kuuit suppussinnaanngilaat.” (Erinarsugassiat Pingaarnersaat 8:6, 7, 1990) Aamma taamatut aappariit Guutimut kiffaasut imminnut tunniusimaffigeqatigiissapput, ilaa?

AALAJANGERNERIT GUUTIMUT PINGAARUTEQARPOQ

6, 7. Qanoq nalunngilarput kimut katissanerluta aalajangernerput Guutimut pingaaruteqartoq?

⁶ Kimut katissanerlutit aalajangernerit Jehovamut pingaaruteqarpoq. Assersuutigalugu Kana’animiut pillugit Jehovap Israelikkut ima mianersoqquai: “Aappaninnikkut atassuteqarfigissanngilatit, panitit ernerinut nuliartaaritissanngilatit taakkualuunniit panii erninnut nuliartaaritissanagit, ernitit uannik tunussitinneqaqqunagit guutit allat guutisiorfigilerlugit. Naalanngikkussi [Jehovap] kamaatingaarumaarpaasi tassuuguinnarlu nungutikkumaarlutit.” (5 Mosesi 7:3, 4) Ukiut hundredellit qaangiuttut palasi Ezra ima oqarpoq: “Peqquserlussimavusi takornartat arnartaannik nuliartaarsimagassi; taamaaliornissigut Israelip pillagassaatitaanera annerulersissimavarsi.” (Ezra 10:10) Apustili Paulusi kristumioqatiminut ima allappoq: “Arnap pinngitsoorani uini taanna inuutillugu kisiat attavigisussaavaa. Uinili toquppat piumasaminik uinissinnaavoq, kisianni tamanna Naalakkami pippat.” — 1 Korinthimiut 7:39.

⁷ Kristumiu Jehovamut tunniulluinnarsimasoq uppeqatiginngisaminut katikkuni Guutimut naalanngitsuliussaaq. Israelikkut Ezrap nalaani inuusut Guutimut naalanngitsuliorput arnanut nunami allamiunut katikkamik. Biibilimi erseqqissumik allaatigineqarpoq kristumiut taamaallaat ‘Naalakkami’ katissasut, taamaattumik Guutip najoqqutassiaanik malinninnginnissamut pissutissarsiorneq eqqunngitsuliornerussaaq. (Ezra 10:10; 2 Korinthimiut 6:14, 15) Kristumiu kuisimasoq kuisimanngitsumut katikkuni Guutip katinnissamut peqqussutaanik malinninngilaq ilagiinnilu immikkut pisinnaatitaaffini annaasinnaavaa. Taamaattumik naleqqutissanngilaq pilluaqquneqaqqulluni Jehovamut ima qinugaanni: “Jehova, piaaralunga ilinnut naalanngippunga, pilluaqquinnanngali.”

JEHOVA ILISIMASAQARNERPAAVOQ

8. Sooq Guutip aappariinnermut tunngatillugu najoqqutassiai maleruassavavut?

⁸ Maskiinaliortartup maskiinaliani qanoq  atorneqassanersoq nalunnginnerpaagamiuk ilitsersuusiortarpoq allat iluarsaassiniaraangamik iluaqutigisinnaasaannik. Taavami isumarput maliinnarlugu ilitsersuullu malinnagu maskiina katiterutsigu qanoq pisoqassava? Ajorluinnartumik kinguneqarsinnaavoq! Taamaattumik aappariittut pilluartuussagutta najoqqutassiat Jehovamit pisavut maleruartariaqarpavut, taannami aappariinnermik pilersitsisuuvoq.

9. Sooq Jehova aappariinnermik pilersitsiva?

⁹ Jehovap inummut aappariinnermullu tunngasut suut tamaviisa ilisimavai. Inuit ‘kinguaassiorlutik amerliartorsinnaaniassammata’ atoqateqarnissamik pisariaqartitaqartillugit pinngortissimavai. (1 Mosesi 1:28) Eva suli pinngortinnagu Jehova ima oqarpoq: “Iluanngilaq inuk kisimiimmat, ikiortissiussavara taassumunnga tulluartumik.” (1 Mosesi 2:18) Jehovap aappariit aappariittut pilluartuunissaat kissaatigaa. — Atuaruk Ussatit 5:15-18.

10. Aappariit atoqatigiinnermut tunngatillugu suna eqqarsaatigisariaqarpaat?

¹⁰ Inuk kinaluunniit ajortimik naammalluinnanngissusermillu kingornussisimammat pilluartuaannavissunik aappareeqanngilaq. Jehovamulli kiffaasut inuunerminni sutigut tamatigut Guutip oqaasianik maleruaanermikkut pillualivissinnaapput. Assersuutigalugu Paulusi aappariinnermi atoqatigiittarnissaq pillugu erseqqissumik siunnersuuteqarpoq. (Atuakkit 1 Korinthimiut 7:1-5). Biibilimi allassimasoqanngilaq aappariit aatsaat meeqqiorniaraangamik atoqatigiittarnissaannik. Aamma aappariit misigissutsikkut timikkullu pisariaqartitaqarput. Kinguaassiuutitigulli iliuutsit maajunnartut Guutip iluarinngilai. Aappariit kristumiut tamatumunnga tunngatillugu imminnut qajassuartumik pisassapput taamaalillutillu piviusumik asaqatigiinnertik ersersittassavaat.

11. Ruthi Jehovap piumasaatut iliorami qanoq pilluaqquneqarpa?

¹¹ Aappariinneq nuannersuusariaqarlunilu pilluarnartuusariaqarpoq. Kristumiut angerlarsimaffiat eqqissinartuullunilu eqqissisimaarfiusariaqarpoq. Ukiut 3000-ingajaat matuma siorna pisimasoq eqqarsaatigeriaruk. No’omi arnaq utoqqaq taassumalu ukuai Orpa aamma Ruthi uillarnerupput. Moabimit Judamut ingerlatillutik No’omip arnat inuusuttut taakku inuiaqataannut uteqquai. Ruthilli No’omi qimakkumanngilaa Guutimullu ilumoortumut aalajaalluni. Boazi utoqqaavoq Jehovamik ilumoorluni pallorfiginnittoq taassumalu Ruthi ima oqarfigaa: “Qanortoq [Jehovap] Israelikkut Guutiata naammattumik akissarsitikkilisit maanga ornissimaganni suluisa ataanni  oqqiffissarsiumallutit!” (Ruthi 1:9; 2:12) Ruthi aappariinnermik Guutimit tunissutisiaasumik pingaartitsillunilu ataqqinnippoq, Boazimullu katippoq. Ruthip, Guutip silarsuassaani nutaami makititaaguni, nuannaarutigissavaa paasiguniuk Jiisusimut Kristusimut siuaasanngorsimanini. (Matthæusi 1:1, 5, 6; Lukasi 3:23, 32) Ruthi Jehovamut aalajaattuarami pilluaqquneqangaarpoq!

AAPPARIINNUT SIUNNERSUUTIT ILUAQUTAASUT

12. Sumi aappariinneq pillugu iluaqutaasunik siunnersuuteqarpa?

¹² Aappariilluassagutta qanoq iliortariaqarnitsinnik Guutip oqaatsini aqqutigalugu paasitippaatigut. Inoqanngilaq Guutitut ilisimasaqartigisumik. Aappariinneq pillugu siunnersuutit Biibilimiittut tamatigut iluaqutaasarput. Taamaattumik siunnersuiniartoq kinaluunniit Biibili tunngavigalugu siunnersuisariaqarpoq. Assersuutigalugu apustili Paulusi ima allappoq: “[Ilissi] tamassi immikkut nuliasi immissisut asasussaavasi, nuliaasullu uini mianerisussaavaa,” imaluunniit ataqqingaassavaa. (Efesosimiut 5:33) Kristumiut anersaakkut inersimalluartut siunnersuutit paasiuminartut Biibilimeersut paasisinnaavaat. Maleruarusuppaalli? Maleruassavaat aappariinneq Guutimit tunissutisiaasoq pingaartillugulu ataqqigunikku. *

13. Uiusup siunnersuut 1 Petrusi 3:7-imiittoq maleruanngippagu qanoq pisoqarsinnaava?

¹³ Uiusup kristumiup nuliani asannittumik pisarpaa. Apustili Petrusi ima allappoq: “Ilissi angutit, arnaq ilissinnit qajannarnerusoq qajassuullugu inooqatigissavarsi; ataqqissavasilu, taakkuttaarmi saammaannermit tunissutaasumik inuussutaasumik ilumut kingornusseqataasussaammata — qinusarnisi akornuserneqaqqunagit.” (1 Petrusi 3:7) Uiusup qinnutai Jehovap tusarumanavianngilai uiusoq siunnersuutiminik maleruaanngippat. Aappariit marluullutik Jehovamut attaveqarnertik akornusersinnaavaat. Aamma isumaqatigiinngilersinnaapput, oqqatilersinnaapput kamaatilersinnaallutillu.

14. Nuliaasoq asannittoq ilaquttani pillugit qanoq iliuuseqarsinnaava?

¹⁴ Nuliaasoq siunnersuutinik Biibilimeersunik malinnittoq Guutillu anersaavanit illernartumit siulersortittoq angerlarsimaffimmi eqqissisimanartuunissaanut pilluarnartuunissaanullu ilasaaqataangaarsinnaavoq. Pissusissamisuuinnarpoq uiusup kristumiup nuliani asallugulu illersorusuppagu. Nuliaasoq kristumiu uiminit asaneqarnerulerumalluni pissuserineqartussanik ajunngitsunik ersersitsisinnaavoq. Ussatini ima allaqqasoqarpoq: “Arnat ilisimassuseqartut angerlarsimaffik sanasarpaat, kisianni arnap sianiitsup assamminik ingutsertarpaa.” (Ussatit 14:1, 1990) Nuliaasoq silatullunilu asannittoq ilaquttani ingerlalluaqqullugillu pilluartuusinnaaqqullugit iliuuseqangaartarpoq, taamaalilluni ersersittarpaa aappariinnermik Guutimit tunissutisiaasumik ilumut pingaartitsilluni.

15. Efesosimiut 5:22-25-mi qanoq siunnersuuteqarpa?

 ¹⁵ Jiisusip ilagiissiminut pinneriaasianik ilaarsinermikkut aappariit aappariinnermik Guutimit tunissutisiaasumik ataqqinninnertik ersersittarpaat. Asaqatigiillutillu ataqqeqatigiipput. (Atuakkit Efesosimiut 5:22-25). Aappariit imminnut asaqatigiittut maniguuttuupput aamma imminnut oqaluunnaveersaarnavianngillat imaluunniit aappariinnerminnut ajoqutaasumik ileqqorlunnavianngillat. Aappariit taama pissusillit Jehovamit pilluaqqusaasarput!

“INUUP AVISSAARTISSANNGILAI”

16. Sooq kristumiut ilaat aappaqanngillat?

¹⁶ Inuit amerlanersaasa arlaanni katinnissartik eqqarsaatigisarpaat. Jehovalli kiffaasa ilaat aappartaarneq ajorput tulluartumik aappassaqannginnamik imaluunniit Jehovap akuerinngisaanut katikkumannginnamik. Ilaasali aappartaarnissartik pisariaqartinneq ajorpaat. Taakku piffissaq Jehovamut kiffartornerminnut atorluarnerusinnaagamikku aappaqannginnertik nuannaarutigisinnaavaat. — Matthæusi 19:10-12; 1 Korinthimiut 7:1, 6, 7, 17.

17. (a) Jiisusi aappariinneq pillugu qanoq oqarpa? (b) Kristumiu allap aappaanik pileritsaassaqaruni ingerlaannaq susariaqarpa?

¹⁷ Appaqanngikkutta aappaqaruttaluunniit Jiisusip oqaasii uku eqqaamasariaqarpavut: “Atuarsimanngilisiuk pileqqaarneranniit Pinngortitsisup angut arnarlu pinngortikkai oqarlunilu: ‘Tamanna pillugu angutip ataatani anaananilu qimassavai nulianilu attavigalugu, taakkulu marluk uininngussapput ataaseq’? Taamaattumik marluujunnaarlutik uiniulissapput ataaseq. Guutimmi ataqatigiilersitai inuup avissaartissanngilai.” (Matthæusi 19:4-6) Allap aappaanik pileritsaassineq ajortuliorneruvoq. (5 Mosesi 5:21) Kristumiu taamatut pileritsaassaqaruni tamanna eqqarsaatigiunnaarniarlugu ingerlaannaq iliuuseqartariaqarpoq, misigissutsikkulluunniit naalliukkaluaruni. (Matthæusi 5:27-30) Pingaaruteqartupilussuuvoq pileritsaassap eqqarsaatigiunnaarnissaa. — Jeremia 17:9.

18. Sooq aappariinnermik Guutimit tunissutisiaasumik ataqqinnissaagut?

¹⁸ Inuit Jehovamik Guutimik aappariinnerullu Guutimit tunissutisiaaneranik ilisimasaqalaaginnartut ilisimaqanngivissulluunniit aappariinnermik ataqqinnipput. Uagummi ataqqinnippugut? Guutimut Jehovamut ‘pilluartumut’ tunniulluinnarsimasuugatta, inooriaatsitsigut aappariinnermik Guutimit tunissutisiaasumik ilumut pingaartitsinitsinnik ataqqinninnitsinnillu ersersitsisarnerput nuannaarutigaarput! — 1 Timotheusi 1:11.

[Quppernerup ataani ilanngussaq]

[Atuaqqissaarnermi apeqqutit]

[Qupp. 12-mi issuagaq]

Aappariittut ingerlalluarneq Jehovamut ataqqinaataallunilu ilaqutariinniittunut tamanut nuannaartaangaarsinnaavoq

[Qupp. 11-mi assiliartaq]

Ruthi aappariinnermik Guutimit tunissutisiaasumik pingaartitsillunilu ataqqinnippoq

[Qupp. 13-mi assiliartaq]

Aappariinneq Guutimit tunissutisiaasoq ilumut pingaartillugulu ataqqiviuk?