Akissutissarsiorneq

“Inuit tamangajammik [Jiisusip] kinaaneranik nalunnginneraasarput. Qanorluunniit upperitigigaluarutsigu isorinnitsigigaluaruttaluunniit imminut aperisarpugut: ‘Angut taanna kinaana?’” — ATUAKKIORTOQ STAN GUTHRIE.

INUIT Jiisusi pillugu alapernaattarput. Taanna pillugu atuakkiat tunisaanerpaasarput. Taanna pillugu filmiliat nuannarineqartorujussuupput. Taamaakkaluartorli Jiisusi pillugu apeqqutit suli amerlaqaat. Jiisusip kinarpiaanera pillugu inuit assigiinngitsunik isumaqartarput.

Ukiut arlalialunnguit qaangiuttut tusagassiortut marluk inunnut internettikkut apeqqut “Jiisusi kinaava?” akeqqullugu kajumissaaripput. Akissutit ilaat imaapput:

● “Rabbiugunarpoq (ajoqersuisoq) inuunermini nallittuinermik maligassiuisoq.”

● “Inuuvoq nalinginnaasoq immikkorluinnaq ittumik inuuneqartoq.”

● “Jiisusip inuusimaneranik uppernarsaatissaqanngilaq.”

● “Jiisusi Guutip erneraa inunngortoq, toqusoq ajortitsinnillu annaanniarluta toqusunit makittoq. Suli uumavoq nunarsuarmullu uteqqikkumaarluni.”

● “Uanga isumaqarpunga Jiisusi Kristusi Guutip ernituarigaa, inuullunilu guutitut ittuusoq.”

● “Jiisusi inersimasunut oqaluttualiaannaavoq.”

Soorunami isummat assigiinngitsorpassuit taamaattut tamarmik ilumoorsinnaanngillat. Jiisusi pillugu apeqqutitsinnut tutsuiginartumik akisinnaasoqarpa? Atuagassiamik uuminnga saqqummersitsisut upperaat Biibili Guutip oqaaserigaa tassaniinnarlu Jiisusi pillugu eqqortoq oqaluttuarineqartoq. * — 2 Timotheusi 3:16.

Allaaserisami tulliuttumi Jiisusi pillugu apeqqutigineqarajuttut Biibilimi qanoq akineqarnersut sammissavavut. Jiisusi nammineq oqarpoq “taassumunnga uppertoq kinaluunniit” annannissamut periarfissaqartoq. (Johannesi 3:16) Akissutit misissornissaannut Jiisusilu pillugu ilikkagaqarnerorusunnerlutit taassumunngalu uppernerit qanoq ersersinnerusinnaanerit paasiniaqqullugu kajumissaarusuppatsigit.

[Quppernerup ataani ilanngussaq]