Akissutit pingaaruteqarpat?

‘Sallusuissut ilisimalissavarsi, sallusuissutillu inussiaajunnaarsissavaasi.’ — JOHANNESI 8:32.

BIIBILIMI sallusuissuteqarpoq Jiisusi pillugu paatsuunganermit ajoqersuinerluutinillu ‘inussiaajunnaarsitsisinnasumik’. Jiisusili pillugu qanoq upperisaqarnerput pingaaruteqarami? Aap. Jehovamut pingaaruteqarpoq. Jiisusimut pingaaruteqarpoq. Aamma uagutsinnut pingaaruteqartariaqarpoq.

● Sooq Jehovamut pingaaruteqarpa? Naatsumik oqaatigalugu ‘Guuti tassaammat asanninneq’. (1 Johannesi 4:8) Jehovap kissaatigaa naassaanngitsumik pilluarluta inuussasugut. Jiisusi oqarpoq: ‘Guutip silarsuaq [tassa inuit] ima asatigaa ernituani tunniussimallugu taassumunnga uppertoq kinaluunniit naassaanngitsumik inooqqullugu.’ (Johannesi 3:16) Guutip ernini aallartippaa uagutsinnut utertinneqaatissatut aallaqqaammullu siunertamisulli nunami paratiisiusumi naassaanngitsumik inuunissatsinnut periarfissaqalersilluta. (1 Mosesi 1:28) Ernerminut upperinnittunut taassumalu piumasaa naapertorlugu inuusunut inuunermik naassaanngitsumik Guuti tuniserusuttorujussuuvoq. — Romamiut 6:23.

● Sooq Jiisusimut pingaaruteqarpa? Aamma Jiisusip inuiaat asavai. Asanninnini ersersippaa uagut pilluta imminut pilliutigeriaannaalluni inuunini tunniukkamiuk. (Johannesi 15:13) Ilisimavaa taamaaliornermigut annaanneqarnissamut aqqutissatuaalluni. (Johannesi 14:6) Tupinnanngilaq Jiisusip kissaatigimmagu sapinngisamik amerlanerpaat utertitsissutitut pilliutaa iluaqutigissagaat. Taamaattuminguna ajoqersukkani ilumoortut Guutip piumasaa siunertaalu pillugit nunarsuaq tamakkerlugu inunnut oqaluusseqqugai. — Matthæusi 24:14; 28:19, 20.

● Sooq uagutsinnut pingaaruteqassava? Ilinnut pingaaruteqartut eqqarsaatigeriakkit — peqqissutsit ilaquttatillu. Illit asasatillu peqqissuunissarsi ingerlalluarnerunissarsilu kissaatigaajuk? Jehovap Jiisusi aqqutigalugu illit asasatillu silarsuassami nutaami naalliuuteqarfiunngitsumi peqqilluinnarlusi naassaanngitsumillu inuunissassinnik neriuuteqalersippaasi. (Tussiaat 37:11, 29; Saqqummersitat 21:3, 4) Silarsuarmi taamaattumi inuunissat kissaatigaajuk? Taamaappat iliuuseqartariaqarputit.

Allassimaffik allaaserisap matuma qulequtaata ataaniittoq maluginiaqqeriaruk: ‘Sallusuissut ilisimalissavarsi, sallusuissutillu inussiaajunnaarsissavaasi.’ Jiisusi pillugu taassumalu Guutip siunertaataa naammassineqarnissaani pingaaruteqassusia pillugu sallusuissutip inussiaanermit ajornerpaamit — ajortimit toqumillu — inussiaajunnaarsissinnaavaatigut. Tamanna misigerusukkukku ‘sallusuissut ilisimasariaqarpat’. Sallusuissutip ilisimanerata ilinnut ilaquttannullu qanoq iluaqutaasinnaanera paaserusuppiuk? Jehovap Nalunaajaasuisa tamatuminnga ikiorusuppaatsit.