Jehova ‘piffissanut piffissarititanullu’ Guutiusoq tatigiuk
Jehova ‘piffissanut piffissarititanullu’ Guutiusoq tatigiuk
“Taassuma piffissat piffissarititallu kingoraartaatsippai. Kunnginik soraarsitsisarpoq ivertitsisarlunilu.” — DANIELI 2:21.
QANOQ AKISSAVIT?
Pinngortitat siulittuutillu eqquussimasut Jehovap piffissaq aalajangikkani eqqorlugu siunertaminik naammassinnissinnaaneranut qanoq uppernarsaataappat?
Jehovap ‘piffissanut piffissarititanullu’ Guutiuneranik ilisimanninnerput sunissamut kajumississutigaarput?
Sooq Jehova inuit qanorluunniit ilioraluarpata siunertaminik naammassinnikkumalluni piffissamik aalajangikkaminik allanngortitsisariaqanngila?
1, 2. Sooq oqartoqarsinnaava Jehova piffissamik paasinnilluinnarsinnaasoq?
JEHOVA GUUTI inunnik pinngortitsinini sioqquterujussuarlugu piffissamik naatsorsuisinnaanissamut tunngaviliivoq. Guuti ullut pinngortitsiffimmi sisamaanni ima oqarpoq: “Qilaap qaarajunnerani qaammaqqutit ullormik unnuamillu avissaartitsisussat pinngorlit — nalliuttunut, ullunut ukiunullu nalunaaqutissat.” (1 Mosesi 1:14, 19, 26) Jehovap piumasaanut naapertuuttumik taamatorluinnaq pisoqarpoq.
2 Mannali tikillugu ilisimatuut piffissap sorpiaaneranik nassuiaasinnaasimanngillat. Qinerlerfissiami ima allassimasoqarpoq: “Tamatuma sorpiaanera kimilluunniit oqaatigineqarsinnaanngilaq.” Jehovali piffissamik paasinnilluinnarsinnaavoq. Tassami taanna ‘qilammik pinngortitsisuuvoq’ ‘nunamillu ilusiliillunilu pilersitsisuulluni’. Jehovap aamma ‘pileqqaarneranit qanoq pisoqarnissaa nalunaarutigisarpaa, itsaanilli suli pinngitsut oqaatigisarpai’. (Esaja 45:18; 46:10) Taassumunnga uppernerput taassumalu Oqaasianik, Biibilimik, upperinninnerput nakussatsikkumallugit, pinngortitarsuup siulittuutillu eqquussimasut Jehovap piffissanik aalajangersakkaminik eqqortitsisarneranut qanoq ersiutaanerat maanna misissoriartigit.
JEHOVAP PINNGORTITAI UPPERNIKKUT NAKUSSATSISSUTAAPPUT
3. Pinngortitarsuarmiittut aalajangersimaqqissaartumik ingerlaasillit ilaat suuppat?
3 Jehovap pinngortitaasa ilarpassui, angisuut mikisullu, aalajangersimaqqissaartumik ingerlaaseqarput. Assersuutigalugu atomit aalajangersimaqqissaartumik akuttussuseqartumik sajukulaartarput. Nalunaaquttat immikkut ittut atominik piffissamik naatsorsuutitallit ukiuni 80 millionini sekundinnguamilluunniit kigaallinavianngillat. Ullorissat aalajangersimaqqissaartumik ingerlaarfeqarmata suup tungaani inissisimanissaat nalunngereersinnaasarparput. Taakkua inissisimaffii inuit ukiup qanoq ilineranik angalanerminnilu sukkoornissaminnik paasinninnissamut iluaqutigisarpaat. Jehova atominik ullorissanillu pinngortitsisuugami pissaaneqangaarpoq uagutsinnillu nersorneqartariaqarluni. — Atuaruk Esaja 40:26.
4. Pinngortitat uumassusillit ilumikkullusooq ‘nalunaaqutaqarnerat’ Jehovap ilisimassuseqarneranut qanoq uppernarsaataava?
4 Aamma pinngortitat uumassusillit piffissamit aqunneqartarpullusooq. Naasut uumasullu ilarpassui ilumikkullusooq ‘nalunaaquttamik’ malitaqartarput. Timmissat ilarpassuisa eqqarsaatigeqqaarnagu naluneq ajorpaat qaqugukkut ingerlaalissanerlutik. (Jeremia 8:7) Inuittaaq ilumikkullusooq ‘nalunaaqutaqarput’, soorlu timitta malugitittarpaatigut qaqugukkut ulluunersoq unnuaanersorluunniit. Nunamut allamut timmisartumik angalagutta timerput piffissamut nunami tamatumani atuuttumut ullualunni sungiussiniartariaqarsinnaavoq. Taamaammat pinngortitani Jehovap ‘piffissanut piffissarititanullu’ Guutiuneranut, pissaaneqangaarneranut ilisimassuseqangaarneranullu takussutissarpassuaqarpoq. (Atuaruk Tussiaat 104:24). Aap, Jehova killeqanngitsumik ilisimassuseqarlunilu pissaaneqarmat taassuma siunertaminik naammassinnissinnaanera qularutiginngilluinnarsinnaavarput!
SIULITTUUTIT PIFFISSAQ EQQORLUGU EQQUUTTUT UPPERNIKKUT NAKUSSATSISSUTAAPPUT
5. (a) Inuiaat qanoq siunissaqarnersut taamaallaat qanoq ililluta paasisinnaavarput? (b) Sooq Jehovap pisussanik taakkualu qaqugukkut pinissaannik paasitissinnaavaatigut?
5 Jehovap pinngortitai taassuma “pissusii takussaanngitsut” pillugit ilinniarfigingaartarpavut, taakkuali qimerloornerinnaasigut pingaarutilinnik, soorlu inuiaat qanoq siunissaqarnerannik, paasinnissinnaanngilagut. (Romamiut 1:20, NV) Inuiaat qanoq siunissaqarnerat paasiumallugu Guutip Biibilimi allatsissimasai atuaqqissaartariaqarpavut. Misissuinitsigut paasissavarput siulittuuterpassuaqartoq piffissaq eqqoqqissaarlugu eqquussimasunik. Jehovap pisussanik paasitissinnaavaatigut siunissamik ilisimannereersinnaagami. Aammattaaq siulittuutit Biibilimiittut piffissaq eqqorlugu eqquuttuaannarput Jehovap pisussat siunertaminut naapertuuttumik piffissamilu aalajangikkamini pitissinnaammagit.
6. Qanoq ililluta nalunngilarput siulittuutinik Biibilimiittunik paasinninnissarput Jehovap kissaatigigaa?
6 Guuti uagut piffissamut isiginnittaatsitsitut isiginnittaaseqanngikkaluartoq, uagut oqaatsit taassuma piffissami aalajangersimasumi pisussat pillugit siulittuinermini atugai paasisinnaasarpavut. (Atuaruk Tussiaat 90:4). Assersuutigalugu Saqqummersitani eqqaaneqarput ‘inngilit sisamat’ “nalunaaquttap-akunnerata ullullu qaammatillu ukiullu aalajangersimasup nalliunnissaannut piareersimatitat” — piffissanullu taaguutit taakku uagut paasisinnaavavut. (Saqqummersitat 9:14, 15) Siulittuutit piffissaq eqqoqqissaarlugu eqquussimanerat paasigaangatsigu, Jehovap ‘piffissanut piffissarititanullu’ Guutiuneranik taassumalu oqaasianik upperinninnerput nakussatsinneqartarpoq. Siulittuutit eqquussimasut ilaat sammeriartigit.
7. Jeremiap Jerusalemi Judalu pillugit siulittuutaanit qanoq erserpa Jehovap siunertani piffissami aalajangikkamini naammassiuaannaraa?
7 Siullermik, ukiut 700-ngajaat Kr.in.si. pisimasut sammeriartigit. “Ukiut Jojakimip Judap kunngiata Josijap ernerata naalakkersuiffiisa sisamaanni” Jehovap Judakkut Jeremiamut eqqartorpai. (Jeremia 25:1) Jehova oqarpoq Babylonimiut Jerusalemimik piuneerussiumaartut juutinillu Judamiittunik Babylonimut aallarussiumaartut. Taakku tassani “Babylonip kunngianut inussiaataassapput ukiuni 70-ini”. Ukiumi 607-imi Babylonimiut sakkutuuisa Jerusalemi suujunnaarsippaat, juutillu Judameersut Babylonimut aallarunneqarput. Ukiulli 70-it qaangiunneranni qanoq pisoqartussaasimava? Jeremia ima siulittuivoq: “Ima oqarpoq [Jehova]: Aatsaat ukiuni 70-ini Babylonimeereerussi isumagiumaarpassi nunassinnullu utertinneqarnissassinnik ilissinnut neriorsuutigisara naammassillugu.” (Jeremia 25:11, 12; 29:10) Siulittuut tamanna piffissaq eqqoqqissaarlugu eqquuppoq — ukiumi 537-mi Kr.in.si. juutit Mediamiunit Persiamiunillu Babylonimit aniguisitaammata.
8, 9. Jehovap ‘piffissanut piffissarititanullu’ Guutiunera Danielip siulittuutaanit qanoq erserpa?
8 Siulittuut alla Guutip itsaq innuttaanut tunngassuteqartoq eqqarsaatigeriaruk. Juutit Babylonimit aniguisitaanissaat ukiut marluk missiliorlugit sioqqullugu Guuti pruffiiti Danieli aqqutigalugu siulittuivoq Missiarsi ukiut 483-it Jerusalemimik qarmaaqqeqqusisoqarnerata kingorna tikiukkumaartoq. Ukiumi 455-imi Kr.in.si. Mediap Persiallu kunngiat qarmaaqqeqqusivoq. Ukiut 483-eqqissaat tamatuma kingorna, ukiumi 29-mi, Jiisusi Nazaretimiu kuisikkami anersaamik illernartumik taninneqarpoq taamaalillunilu Missiarsinngorluni. * — Nehemia 2:1, 5-8; Danieli 9:24, 25; Lukasi 3:1, 2, 21, 22.
9 Maanna eqqarsaatigikkit Guutip naalagaaffia pillugu Biibilimi siulittuutigineqartut. Biibilimi ersersinneqarpoq Kristusi 1914-imi qilammi kunnginngorumaartoq. Tamanna Jiisusip najuunnissaanut — piffissamut Saatanip qilammit igitaanera pissutaalluni nunarsuarmi eqqanangaartorsiorfiusussamut — ‘nalunaaqutaasussaq’ pillugu siulittuummit erserpoq. (Matthæusi 24:3-14; Saqqummersitat 12:9, 12) Aammattaaq siulittuutini allani 1914-erpiaq “Guutimik nalusunut piffissarititaasut” naaffissaattut Guutillu naalagaaffiata qilammi naalakkersuilerfissaatut siulittuutigineqarpoq. — Lukasi 21:24; Danieli 4:7-14. *
10. Pisussat suut qularnanngilluinnartumik piffissaq eqqoqqissaarlugu pissappat?
10 ‘Naalliunnartoqangaarfissaq’ Jiisusip siulittuutigisaa qanittukkut nalliutissaaq. Tamatuma kingorna Jiisusi ukiuni tusindini naalakkersuissaaq. Qularnanngilluinnarpoq pisussat tamakkua piffissaq eqqoqqissaarlugu pinissaat. Jiisusi nunamiikkallarmat Jehovap ‘ulloq nalunaaquttallu-akunnera’ pisussat taakkua nalliuffissaat aalajangereerpai. — Matthæusi 24:21, 36; Saqqummersitat 20:6.
PIFFISSAQ SILATUSAARTUMIK ATORTARUK
11. Naggatissap nalaani inuunerput upperigutsigu susariaqarpugut?
11 Kristusip kunnginngorsimanera ‘naggatissallu nalaani’ inuunerput nalunnginnatsigu susariaqarpugut? (Danieli 12:4, NV) Inuppassuit maluginiarsimavaat pissutsit ajorsiartuinnarnerat, paasinngilaalli pissutsit taamaannerat ullussat kingulliit pillugit siulittuutit Biibilimiittut eqquunnerigaat. Inuit ilaasa pissutsit ingasatsikkaluttuinnassasoraat, allalli inuit ‘aarlerinartuerutitsisinnaasoraat’. (1 Thessalonikamiut 5:3) Uagummi? Saatanip silarsuaata naggatissarpiaani inuunerput upperigutsigu piffissarput Jehovamut kiffartornermut atussavarput allallu taassuminnga ilisarisimannileqqullugit ikiorlugit. (2 Timotheusi 3:1) ‘Piffissaqqissoq atortariaqarparput’, tassa imaappoq piffissarput silatusaartumik atortariaqarparput. — Atuakkit Efesosimiut 5:15-17.
12. Jiisusip Noap ullui pillugit oqaasii sumik ilinniarfigisinnaavavut?
12 Silarsuarmi allamut saasaatigisinnaasavut amerlaqimmata piffissamik silatusaartumik atuinissaq imaannaaneq ajorpoq. Jiisusi ima mianersoqqusivoq: “Soorlumi Noap ulluini ittoq, taamatuttaaq Inuup Ernerata tikiuffissaa ikkumaarpoq.” Noap nalaani pissutsit qanoq ikkamik? Guutip Noa paasitippaa silarsuaq taamanikkut atuuttoq suujunnaarsinneqarumaartoq. Inuit ajortut nunarsuaq tamakkerlugu ulersuarnerani ajunaassapput. Noa ‘naapertuilluarnermik oqaluussissutiginnittuugami’ (NV) aalajaalluni Guutip tusarliussaanik nalimini inuusunut oqaluussissutiginnippoq. (Matthæusi 24:37; 2 Petrusi 2:5) Taakkuli ‘nerillutillu imerput nuliartaarlutillu uinitsitsisarlutik’ ‘aatsaallu paasisaqalerlutik ulersuaq nalliummat tamaasalu nungutillugit’. Taamaattumik Jiisusi ima mianersoqqusivoq: “Piareersimassaasi Inuup Ernera tikiutissammat nalunaaquttap-akunnerani ilimasuffiginngisassinni.” (Matthæusi 24:38, 39, 44) Noatut inniartariaqarpugut, taassuma nalaani inuusut ilaarnagit. Piareersimanissamut suna iluaqutigissavarput?
13, 14. Jehovamut tunngasoq suna aalajaalluta taassumunnga kiffartornissatsinnut iluaqutigisinnaavarput?
13 Inuup Ernera piffissami ilimasuffiginngisatsinni tikiuttussaagaluartoq eqqaamasariaqarparput Jehova piffissaq aalajangikkani eqqorlugu siunertaminik naammassinnittartoq. Silarsuarmi qanorluunniit pisoqaraluarpat inuillu qanorluunniit pilersaaruteqaraluarpata, Jehovap pisussat qaqugukkut pinissaat qanorlu kinguneqarnissaat aalajangersinnaavaa. (Atuaruk Danieli 2:21). Tassami Ussatit 21:1-imi ima allassimavoq: “Kuunnguatut ippoq kunngip uummataa [Jehovap] assaani; piumasani malillugu aalajangertarpaa ingerlavissaa.”
14 Jehovap pissutsit aqussinnaavai siunertani piffissaq eqqorlugu naammassineqarsinnaaqqullugu. Silarsuarmi allanngorujussuartoqarnerata kingunerisaanik siulittuutit Biibilimiittut, ingammik Guutip naalagaaffianik nutaarsiassap nuannersup oqaluussissutigineqarnissaanik siulittuutit, eqquutissapput. Eqqarsaatigeriakkit Sovjetunionip ajalusoornerata kingorna pisimasut. Inuit amerlanerpaartaasa politikkikkut taama allanngorujussuartoqapallatsiginissaa naatsorsuutiginngilaat. Taamatulli allanngortoqarnerata kingunerisaanik maanna nutaarsiassaq nuannersoq nunarpassuarni, siornatigut oqaluussinermik inerteqqutiginniffiusimasuni, oqaluussissutigineqarpoq. Taamaattumik piffissarput silatusaartumik atortartigu ‘piffissanut piffissarititanullu’ Guutiusoq aalajaalluta kiffartorfigisinnaaniassagatsigu.
JEHOVAP PIFFISSAQ EQQORLUGU ILIUUSEQARTARNERANIK UPPERINNINNERIT ERSERSIGUK
15. Jehovap peqatigiissortaani allannguuteqartoqaraangat qanoq ililluta uppernerput ersersittarsinnaavarput?
15 Ulluni kingullerni makkunani oqaluussiuarumalluta Jehovap piffissaq eqqorlugu siunertaminik naammassinnittarnera upperisariaqarparput. Silarsuarmi pissutsit allanngorartuarmata ilaannikkut oqaluusseriaatsitsinnik allannguisariaqartarsinnaavugut. Jehovap peqatigiissortaani ilaannikkut allannguuteqartoqartarsinnaavoq nutaarsiassaq nuannersoq sunniuteqarluarnerpaamik oqaluussissutigisinnaaniassagatsigu. ‘Piffissanut piffissarititanullu’ Guutiusumut uppernerput ersersissinnaavarput taamatut allannguuteqartoqaraangat tamakkiisumik suleqataasarnitsigut ilumoorfiginnillutalu Ernermut, ‘ilagiinnut niaquusumut’, kiffartornitsigut. — Efesosimiut 5:23.
16. Sooq qularutiginngilluinnarsinnaavarput Jehovap piffissaq eqqorlugu ikiortarumaaraatigut?
16 Jehovap kissaatigaa ‘piffissaq eqqorlugu nammineq ikiuiumaarnerminik’ qularutiginninngilluinnarluta qaqugukkulluunniit imminut qinusassasugut. (Hebræerit 4:16) Tamatumannga paasinarsivoq taassuma tamatta immikkut qanoq asatigalutalu isumassortigigaatigut. (Matthæusi 6:8; 10:29-31) Jehovamut Guutimut uppernerput ersersittarparput taassumunnga ikioqqulluta qinujuartarnitsigut tamatumalu kingorna ilitsersuussutai malillugit iliortarnitsigut. Aammattaaq qatanngutitta qinnuttarnissaat eqqaamasarparput.
17, 18. (a) Jehovap akeqqani qanittukkut qanoq piumaarpai? (b) Sunaveersaartariaqarpugut?
17 Maanna piffissaanngilaq ‘uppinngissuseqarnissamut’; piffissaavorli upperluartuunissamut, tamanna Guutip piumasaatut iliornissamut sapiissuseqalissutigissagatsigu. (Romamiut 4:20) Saatani taassumanngalu sunnersimaneqartut Jiisusip uagutsinnut suliassiissutigisaanik suliarinnikkunnaarsitsiniaagaluarput. (Matthæusi 28:19, 20) Diaavulu uagutsinnik saassussisaraluartoq nalunngilarput Jehova tassaasoq ‘Guuti uumasoq inuit tamalaat annaassisaat, pingaartumik uppertut ilumoortullu’. Taassuma “mianerinnitsini ussernartunit aniguisinneq sapinngilai”. — 1 Timotheusi 4:10, NV; 2 Petrusi 2:9.
18 Jehova pissutsit aaqqissuussaanerannik ajortumik matuminnga qanittukkut suujunnaarsitsissaaq. Naluarput qanorpiaq qaqugorpiarlu tamanna pissasoq, nalunngilarpulli Kristusip Guutimut akeraasut piffissaq eqqorlugu piuneerukkumaarai. Taamanikkussamut kikkut tamarmik nalussanngilaat Jehova qilammi nunamilu kisimi oqartussaasuusoq. Taamaattumik kukkorujussuassaagut “piffissat piffissarititallu” maanna inuuffigisatta pingaaruteqassusiat sumiginnarutsigu. Isumaqalernaveersaartariaqarpugut ‘suut tamarmik pinngortinneqaqqaarnermissut ittuaannarsimasut’. — 1 Thessalonikamiut 5:1; 2 Petrusi 3:3, 4.
JEHOVA ‘NERIUFFIGIUK’
19, 20. Sooq Jehova neriuffigissavarput?
19 Jehovap Guutip inuiannut aallaqqaammulli siunertaanut ilaavoq taakkua imminik pilluni pinngortitarsuanilu alianaatsoq pillugu qaqugorsuarmulluunniit ilinniarsinnaanissaat. Oqaluussisartup oqaasiini 3:11-mi Jehova pillugu ima allassimasoqarpoq: “Suut tamaasa suliarisimavai ajunngitsumik eqqortumillu piffissarlu eqqorlugu, aammattaaq inunnut eqqarsaatigisassanngortippai silarsuarmi pisartut [Aammattaaq naassaanngissuseq inuit uummataanniitissimavaa, Biibili-mi quppernerup ataani ilanngussaq].”
20 Jehovap inunnut siunertaminik allanngortitsisimannginnera nuannaarutigeqaarput. (Malaki 3:6) Biibilimi allassimavoq Guuti ‘allanngorneq ajortoq alanngerarfigineqanngitsorlu’. (Jaaku 1:17) Jehova piffissap ingerlarnganit sunnerneqarneq ajorpoq. ‘Naassaanngilluinnartumik kunngiuvoq.’ (1 Timotheusi 1:17) Taamaattumik Jehova ‘neriuffigisigu’. (Mika 7:7) Aap, Tussiaat 31:25-mi kajumissaarutigineqartoq manna malillugu iliorta: “Nikallornasi tatitusaaritsi, tamassi [Jehovamik] neriuffiginnittusi!”
[Quppernerup ataani ilanngussat]
[Atuaqqissaarnermi apeqqutit]
[Qupp. 25-mi assiliartaq]
Danieli Guutip siulittuutaasa eqquunnissaannik qularutiginninngilaq
[Qupp. 27-mi assiliartaq]
Jehovap piumasaatut iliorumallutit piffissamik atorluaasarpit?
