Allaaserisami matumani immaqa apeqqutigisarnikuusatit taakkualu akissutaat illit nammineq Biibilinni sumi takusinnaaneritit sammineqassapput. Akissutissarsiorninni Jehovap Nalunaajaasuisa ikiorusuppaatsit.

1. Kristumiutut kuisinneq qanoq paasisariaqarpa?

Kuisinneq Guutimut attaveqarlualernissamik qinnuteqarfiuvoq. Taamaattumik kristumiu naalungiarsuulluni kuisittussaanngilaq, aatsaalli Guuti pillugu ilinniarnissamut Jiisusimullu ajoqersuganngornissamut naammattumik utoqqaassuseqaleruni kuisittussaavoq. (Apustilit Suliaat 8:12; 1 Petrusi 3:21) Jiisusip peqqussutai ilinniarlugillu maleruarutsigit taassumunnga ajoqersuganngussaagut. — Atuakkit Matthæusi 28:19, 20.

Jiisusip ajoqersugaasa nalaanni inuppassuit ingerlaannaq iliuuseqarput Guuti Jiisusilu pillugit ilinniarumallutik. Assersuutigalugu angutip paasigamiuk Jiisusip toquneratigut annaanneqarnissaq ajornarunnaartoq ingerlaannaq ajoqersuganngorpoq. Aamma ullumikkut eqqortuliorusuttorpassuit Jiisusimut ajoqersuganngorniarlutik aalajangersimapput. — Atuakkit Apustilit Suliaat 8:26-31, 35-38.

2. Sooq Jiisusi kuisippa?

Jiisusi 30-t missaannik ukioqarluni kuussuarmi Jordanimi Johannesimit Kuisisumit imermut morsutsitaalluni kuisippoq. Jiisusip kuisinnermigut ersersippaa Guutip imminut piumasaatut iliorumalluni. (Hebræerit 10:7) Ilaatigut inuit ajortaat pillugit inuunerminik pilliuteqarnissani. Allaat qilammiit nunamukannginnerminili Jiisusip Ataatani, Jehova, asajuaannarlugulu naalattuaannarsimavaa. — Atuakkit Markusi 1:9-11; Johannesi 8:29; 17:5.

  3. Sooq kristumiu kuisittariaqarpa?

Uagut pissutsit atukkavut Jiisusip atugarisimasaanit allaanerupput — uagummi ajortiliulluta inunngorpugut. Taamaakkaluartorli Jiisusip inuunerminik pilliuteqarneratigut Guutimut attaveqarlualernissamut periarfissaqalerpugut. (Romamiut 5:10, 12; 12:1, 2) Aap, Guutip ilaqutariissortaanut ilaalersinnaallutalu taassumannga pigineqalersinnaavugut. (2 Korinthimiut 6:18) Qanoq ililluni taamatut pisinnaatitaaffeqalertoqarsinnaava? Nammineerluni qinunikkut Jehovamut tunniulluinnartoqartariaqarpoq inuunerup sinnerani taassuma piumasaatut iliorniarluni neriorsuinikkut. Tamatuma kingorna imermut morsutsitaalluni kuisittoqartarpoq Guutimut tunniulluinnarsimaneq kikkunnut tamanut ersersinniarlugu. — Atuakkit Matthæusi 16:24; 1 Petrusi 4:2.

4. Kuisissinnaanngortinnak qanoq iliortariaqarpit?

Jehovap Nalunaajaasuisa Guutimut qanillerusuttut tamaasa Biibilimik atuaqqissaaqatigiumallugit neqeroorfigisarpaat. Biibilimik atuaqqissaaraangavit kristumiullu ataatsimiinnerinut najuukkaangavit Guutimik asanninnerit taassumunngalu uppernerit nakussatsinneqartassaaq. Tamanna ajunngitsumik isiginnittaaseqalernissannut ileqqunillu pitsaasunik ineriartortitsinissannut aamma iluaqutigissavat. Asanninnermik uppernermik pissuserineqartussanillu Guutip iluarisaanik allanik ineriartortitsiguit Jehovamut naassaanngitsumik kiffartorniarlutit neriorsuutivit eqqortinnissaa ajornannginnerutissavat. — Atuakkit Johannesi 17:3; Hebræerit 10:24, 25.

Paasisaqarnerorusukkuit atuaruk kapitali 18 atuakkami uani, Biibilimi sorpiaat ajoqersuutigineqarpat?, Jehovap Nalunaajaasuinit saqqummersinneqartoq.