Kristumiuulluartuujutigaluni innuttaalluartuuneq — Taamaattoqarsinnaava?

JIISUSIP kiffartornera immikkut ittunik marlunnik ilisarnaateqarpoq. Ilisarnaatai suuppat? Siullermik: Jiisusi politikkikkut allannguiniarsarinani inuit ataasiakkaat uummataannik allannguiniarsarisarpoq. Assersuutigalugu qaqqami oqaluutsimini sumik erseqqissaanersoq maluginiariaruk. Taratsutut qaamanertullu ittuunissaq eqqartunngitsiarlugu tusarnaartini oqarfigai inuit pilluavissut tassaasut ‘iluarnermut kaattut imerusuttullu’. Ima nangippoq: “Pilluarput qanilaartut, . . . uummatimikkut minguitsuusut, . . . eqqisseqatigiissitsisut.” (Matthæusi 5:1-11) Jiisusip ajoqersukkani paasitippai eqqarsartaatsip isiginnittaatsillu Guutip eqqortuuneragaanut eqqunngitsuuneragaanullu naleqqussarnissaat qanoq pingaaruteqartigisoq aammalu uummatikkut iluunngarluni Guutimut kiffartornissaq qanoq pingaaruteqartigisoq.

Aappassaanik: Jiisusip inuit naalliuttut takugaangamigit misiginneqatiginningaarnini ersersittarpaa erloqissutaannik oqilisaannerisigut. Naalliuutaarutitsilluinnarniarsarinngilarli. (Matthæusi 20:30-34) Napparsimasunik ajorunnaarsitsisarpoq, nappaatilli atuuttuarput. (Lukasi 6:17-19) Naqisimaneqartut atugaannik atoruminarsaasarpoq, naapertuilluanngissuserli naalliuutaajuarpoq. Kaattunik nerisitsisarpoq, kaannersuarli inuiannut naalliuutaajuarpoq. — Markusi 6:41-44.

Uummatinik allannguineq naalliuutinillu atoruminarsaaneq

Sooq Jiisusip politikkikkut allannguinani naalliuutinillu atuukkunnaarsitsinani, uummatinik allannguinissani annikilliuutinillu atoruminarsaanissani pingaarnerutippaa? Nalunnginnamiuk piffissaq Guutip naalagaaffini iluaqutigalugu naalagaaffinnik nunarsuarmiittunik tamanik suujunnaarsitsiffissaa naalliuuteqarneranullu pissutaasunik tamanik piiaaffissaa nalliukkumaartoq. (Lukasi 4:43; 8:1) Taamaattumik ajoqersukkami kajumissaarmanni napparsimasunik ajorunnaarsitsinermut piffissaqarneroqqulluni Jiisusip taakku oqarfigai: “Allanukarta, illoqarfeeqqanut matuma eqqaaniittunut, taakkunanissaaq oqaluussisinnaaniassagama; tamanna pillugu aallarpunga.” (Markusi 1:32-38) Jiisusi inuppassuit timikkut anniaataannik nipaallisaasarpoq, Guutilli oqaasianik oqaluussissutiginninnissamik ilinniartitsissutiginninnissamillu pingaarnerpaatitsivoq.

Ullumikkut Jehovap Nalunaajaasuisa oqaluussinerminni Jiisusimik ilaarsinissartik anguniagaraat. Inuit allat naalliuutaat atoruminarsarniartarpaat inunnik pisariaqartitsisunik ataasiakkaanik ikiuinermikkut. Jehovalli Nalunaajaasui silarsuarmi naapertuilluanngissuseerutitsiniarsarinngillat. Upperaat naalliuutinut pissutaasorpiaq Guutip naalagaaffianit suujunnaarsinneqarumaartoq. (Matthæusi 6:10) Jiisusip pisimaneratut politikkikkut allannguiniarsarinatik uummatinik allannguiniarsaripput. Taamatut pissutsinik iliuuseqarfiginneriaaseqarneq piviusorsiortuuvoq, inuit ajornartorsiutaasa annerpaartaat politikkikkut ajornartorsiutaanatik ileqqussanut tunngasutigut ajornartorsiutaammata.

Innuttaalluartut

Aammattaarli Jehovap Nalunaajaasuisa innuttaalluartuunissartik kristumiutut pisussaaffimmissut isigaat. Taamaattumik naalagaaffimmik naalagaaffimmullu sinniisuusunik ataqqinnittarput. Atuagassiaatiminni oqaluussinerminnilu inoqatitik kajumissaartarpaat inatsisinik maleruaasooqqullugit. Oqartussaasulli Guutip inatsisaanut akerliusumik piumasaqaraangata Jehovap Nalunaajaasuisa  ‘Guuti inunnit naalakkumanerusarpaat’. — Apustilit Suliaat 5:29; Romamiut 13:1-7.

Jehovap Nalunaajaasuisa inuit illoqarfimminniittut tamaasa ornillugit Biibili pillugu akeqanngitsumik ilinniartinnissaannik neqeroorfigisarpaat. Inuit millionillit taamatut ilinniartinneqarnermik kingunerisaanik uummatimikkut killinneqarlutik inuunerminnik allannguisimapput. Ukiut tamaasa inuit hundredetusindilikkaat ikiorneqarlutik pujortarunnaartarput, imigassamik ikiaroorniutinillu atornerluisarunnaartarput, aningaasanoortarunnaartarput, tamalikakkunnaartarput allanillu ajoqutigisinnaasaminnik atuipilukkunnaartarlutik. Taakku innuttaalluartunngorsimapput ileqqussatigut akisussaassusillit najoqqutassianik Biibilimiittunik inuunerminni atuisalersimagamik.

Aammattaaq Biibili tunngavigalugu taamatut ilinniartinneqarneq iluaqutigalugu ilaqutariinniittut tamarmik immikkut — aappariit, angajoqqaat meeqqallu — ataqqeqatigiinnerulerlutillu attaveqatigiilluarnerulertarput. Pissutsit taamaannerat ilaqutariit ataqatigiilluarnerulissutigisarpaat. Ilaqutariillu nukittuneruleraangata inuiaqatigiittaaq nukittunerulertarput.

Allaaserisani sammineqartut eqqarsaatigereerlugit, taava illit qanoq isumaqarpit: Politikkip upperisarsiornermut akuliunneqarnera Biibilimi tapersersorneqarpa? Erseqqippoq tapersersorneqanngitsut. Kristumiulli ilumoortut innuttaalluartuussappat? Aap. Qanoq ilillutik innuttaalluartunngorsinnaagamik? Jiisusip silarsuarmut taratsutut qaamasutullu innissarput pillugu peqqussutaanik malinninnermikkut.

Jiisusip siunnersuutaanik pitsaasunik atorluarsinnaasunillu ilungersorlutik malinnittut, taamaaliornertik namminneq ilaquttamillu inuiaqatigiillu akuuffigisamik iluaqutigissavaat. Jehovap Nalunaajaasuisa najukkanniittut Biibili pillugu ilinniariaaseq maannakkut atorneqartartoq pillugu paasissutissikkusuttorujussuuaatsit. *

[Quppernerup ataani ilanngussaq]

[Qupp. 7-mi issuagaq]

Jiisusi politikkikkut allannguiniarsarinani inuit uummataannik allannguiniarsarivoq

[Qupp. 8-mi issuagaq]

Jehovap Nalunaajaasuisa innuttaalluartuunissartik pisussaaffimmissut isigaat