Ilisimatuussutsikkut paasisanut naapertuuttoq
“Siornatigummi ilinnut allattorsimavakka siunnersuutit ilisimasallu sallusuissummik oqaatsinillu tatiginartunik ilisimalersikkumallutit, ilinnik aallartitsisoq eqqortumik akisinnaaqqullugu.” — USSATIT 22:20, 21.
BIIBILI QANOQ ALLAANERUA? Atuakkat itsarnitsat imaqarajupput isummanik tutsuiginanngitsunik ulorianartunillu ullumikkut ilisimatuunit kukkulluinnartutut qulaarneqarsimasunik. Allaat ullumikkut atuakkiortut ilinniutini allassimasunik nutaanik ilaartuisariaqartarput paasisanut kingullernut naapertuuteqqullugit. Biibilimili allassimavoq Biibili Pinngortitsisumit namminermit atuakkiarineqarsimasoq taassumalu ‘oqaasia naassaanngitsumik atassasoq’. — 1 Petrusi 1:25.
ASSERSUUT: Mosesip inatsisaani piumasarineqarpoq Israelikkut “tammaarfiup avataani” nunami assatami kingornatigut matuugassami perusuersariartortassasut. (5 Mosesi 23:13, 14) Uumasumik inummilluunniit toqungasumik attuisimagunik asattortariaqarput atisatillu errortortariaqarlugit. (3 Mosesi 11:27, 28; 4 Mosesi 19:14-16) Taamanikkut pupissut immikkut inissinneqartarput misissorneqareerserlugit tunillaanissaallu aarlerinarunnaarnera qulakkeerneqareerserlugu. — 3 Mosesi 13:1-8.
NAKORSAANERMIK ILISIMATUSARNIKKUT PAASISAT: Eqqagassanik annanillu iluamik eqqaaneq, errortortarneq napparsimasunillu immikkut inissiisarneq ullumikkut suli nappaatinik akiueriaatsitut sunniuteqarluartutut isigineqarput. Anartarfeqanngitsumiittunut Amerikami peqqinnissaqarnikkut oqartussaasut ima unnersuussuteqarput: “Perusuersaraangavit minnerpaamik meterinik 30-nik immamit ungasitsigisumiittassaatit, annallu matoortassavat.” Ukiut 200-unngitsulluunniit matuma siorna paasineqarpoq napparsimasut nappaammik tunillanneqartartut nakorsat timimik toqungasumik attugaqarnermik kingorna assatik errortorsimanngikkaangatigik. Amerikami peqqinnissaqarnikkut oqartussaasut naapertorlugit errortortarneq tassaavoq “nappaatip tunillaassuunnissaa pinaveersaartinniarlugu iliuuserineqarsinnaasut sunniuteqarluarsinnaanerpaartaat”. Pupissunimmi allanillu nappaateqartunik immikkut inissiisarnermut tunngatillugu? Atuagassiami Saudi Medical Journal-imi qanittukkut ima allassimasoqarpoq: “Tunillaassuuttumik nappaateqalersimasunik siusissukkut immikkut inissiineq nappaammik tunillaassuutsitsiunnaarsitsiniarluni immaqa iliuuserineqarsinnaasutuaavoq.”
ILLIT QANOQ ISUMAQARPIT? Atuakkanik itsarnitsanik illernartunik allanik ullumikkut nakorsaanermik ilisimatusarnikkut paasisanut naapertuuttoqarpa? Imaluunniit Biibili immikkorluinnaq ittuua?
“Mosesip nalaani eqqiluisaarnissamik malittarisassiat sukumiisut pillugit atuarluni tupigusunnanngitsuunngilaq.”—MANUAL OF TROPICAL MEDICINE, DR. ALDO CASTELLANI AAMMA DR. ALBERT J. CHALMERS.
