Jehova ‘ataasiusoq’ ilaquttaminik ataasiussuseqalersitsivoq

“Ilungersorlusi aalajangiusimaniarsiuk anersaakkut ataasiussuseq.” — EFESOSIMIUT 4:3.

APEQQUTIT UKU QANOQ AKISSAVIGIT?

Guutip ingerlatsinerata suna siunertaraa?

“Anersaakkut ataasiussuseq” qanoq aalajangiusimasinnaavarput?

Inussiarnisaartuunissatsinnut suna iluaqutigisinnaavarput?

1, 2. Jehova nunarsuarmut inunnullu qanoq siunertaqarpa?

ILAQUTARIIT. Oqaaseq taanna tusarakku qanoq eqqarsarpit? Asaqatigiinneq pilluarnerlu? Suleqatigiinneq anguniagaqaqatigiinnerlu? Peroriartorfik toqqissisimanartoq ilinniarfiusoq eqqarsaatinik annissueqatigiiffiusoq? Isumassuisunik ilaqutaqaruit taakku eqqarsaatigissagunarpatit. Jehova ilaqutariittut aaqqissuusaanermik pilersitsisuuvoq. (Efesosimiut 3:14, 15) Siunertaraalu qilammi nunarsuarmilu pinngortitami tamarmik toqqissisimanissaat, tatigeqatigiinnissaat ataasioqatigiinnissaallu.

2 Adamip Evallu ajortuliornerata kingorna inuit Guutip ilaqutariissortaanut ilaajunnaarput. Guutilli siunertani siunertariuarpaa. Adamip Evallu kinguaavisa nunarsuarmi paratiisiusumi najugaqalernissaat isumagissavaa. (1 Mosesi 1:28; Esaja 45:18) Siunertani piviusunngorsinnaaqqullugu piareersaqqissaarsimavoq. Efesosimiunut allakkani ataasiussuseq pingaarnerutillugu sammineqarpoq, tassanilu Jehova qanoq piareersaasimanersoq atuarsinnaavarput. Versit taakku ilaat misissoriartigit paasiniarlugulu Jehova siunertaminik naammassinninniarnerani, tassa pinngortitanik sianissusilinnik tamanik ataasiussuseqalersitsiniarnerani, qanoq suleqatigisinnaaneripput.

INGERLATSINEQ TAMATUMALU SIUNERTAA

3. Guutip ingerlatsinera Efesosimiut 1:10-mi eqqaaneqartoq suua, piareersaanerlu siulleq qanga aallartippa?

³ Mosesip Israelikkut ima oqarfigai: “Tusaagit Israeli! Naalagaq Guuterput, Naalagaq ataasiuvoq.” (5 Mosesi 6:4) Jehovap iliuusii tamarmik siunertaanut naapertuupput. Piffissaq aalajangikkani eqqorlugu qilammiittut nunarsuarmiittullu ilaqutariittut ataasioqatigiilernissaat piareersarlugu aallartippaa. Tamanna ‘annaassinissamik pilersaarutiminik’, imaluunniit ‘ingerlatsinermik’ (NW), taavaa. (Atuakkit Efesosimiut 1:8-10). Ingerlatsinermi tamatumani suliassat marluupput. Siullermik, tanitat Jiisusimit Kristusimit siulersorneqarlutik qilammi  kiffartornerminnik ingerlatsiinnaqqullugit Guutimit piareersarneqarput. Tamanna ukiumi 33-mi piinsip ulluani aallartippoq Jehova Kristusimik qilammi naalakkersueqateqartussanik katersuisitsilermat. (Apustilit Suliaat 2:1-4) Kristusip utertitsissutitut pilliutaa iluaqutigalugu Guutip tanitat taakku inuusussatut naapertuilluartuutippai. Tanitallu nalunngilaat Guutimit qitornavissiartaarineqarlutik. — Romamiut 3:23, 24; 5:1; 8:15-17.

4, 5. Guutip ingerlatsinerani piareersaatit aappaat suua?

⁴ Aappassaanik, Guutip inuit nunarsuarmi paratiisiusumi naalagaaffimmit Missiarsikkoortumit aqunneqartumi inuusinnaaqqullugit piareersarpai. Paratiisimi inuusussat taakkua ilaat siulliit tassaapput ‘inuppassuit amerlangaartut’. (Saqqummersitat 7:9, 13-17; 21:1-5) Taakkununnga ilanngutissapput Kristusip ukiuni tusindini naalakkersuinerani inuit milliardillit toqusunit makititaasut. (Saqqummersitat 20:12, 13) Takorlooriaruk makititsiffimmi ataasiussuseqarnitsinnik ersersitsinissamut periarfissarpassuaqassasugut! Ukiut tusindit naangajalerneranni ‘nunamiittut’, tassa ‘amerlangaartut’ makititaasullu, naggammik misilinneqassapput. Aalajaatsullu Guutimit qitornavissiartaarineqassapput. — Romamiut 8:21; Saqqummersitat 20:7, 8.

⁵ Ullumikkut Jehovap tanitat qilammiissinnaaqqullugit savallu allat nunarsuarmi paratiisimi inuusinnaaqqullugit piareersarpai. Uagulli tamatta immikkut Guutip ingerlatsinera qanoq suleqatigisinnaavarput?

“AALAJANGIUSIMANIARSIUK ANERSAAKKUT ATAASIUSSUSEQ”

6. Kristumiut katisimasarnissaat Biibilimi qanoq ersersinneqarpa?

⁶ Biibilimi allassimavoq kristumiut katisimasassasut. (1 Korinthimiut 14:23; Hebræerit 10:24, 25) Ataasioqatigiinnerli sumiiffimmi ataatsimi, soorlu timersortarfimmi pisiniarfimmiluunniit, katisimanerinnaanngilaq. Jehovap siunnersuutaanik maleruaaleraangatta taassumalu anersaavanit inuttut pitsaaneruleqqulluta ikiorneqaraangatta ataasioqatigiilertarpugut.

7. ‘Anersaakkut ataasiussuseq’ qanoq aalajangiusimasinnaavarput?

⁷ Kristusip utertitsissutitut pilliutaa upperigatsigu Jehovap naapertuilluartutut — tanitaagutta ernermisut savanulluunniit allanut ilaagutta ikinngutimisut — isigaatigut. Silarsuarmili matumani inuutilluta ilaannikkut isumaqatigiinngissuteqartassaagut. (Romamiut 5:9; Jaaku 2:23) Taamaattumik Biibilimi kajumissaarneqarpugut ‘kamageqatigeeqqulluta’. Qatanngutivulli qanoq ataasioqatigilersinnaagatsigit? ‘Tamatigut qanilaartuusariaqarpugut saamasuullutalu’, tassa maniguuttuullutalu inussiarnersuusariaqarpugut. Paulusillu kajumissaarpaatigut ‘eqqissineq ataqatigiissutigeqqullugu aalajangiusimaqqullugulu anersaakkut ataasiussuseq’. (Atuakkit Efesosimiut 4:1-3). Kajumissaarut tamanna maleruarsinnaavarput Guutip anersaavanit siulersorneqartikkutta anersaallu inerititaa uagutsinni inerititaqartikkutsigu. Aamma uinngup suliai, Guutip uumigisai, pissuserissanngilavut. Anersaap inerititaa ataasioqatigiilersitsisarmat taanna iluaqutigalugu isumaqatigiinngissutit aaqqissinnaavavut. Uinngulli suliai avissaartuutsitsisarput.

8. Uinngup suliai qanoq avissaartuussutaasarpat?

⁸ “Uinngup suliai” qanoq avissaartuussutaasarpat? (Atuakkit Galatiamiut 5:19-21). Kinguaassiuutitigut inuunerlunneq Jehovamit ilagiinnillu avissaassutaasarpoq. Allasiornerlu ilaqutariinnut aliasuutaangaartarpoq. Tamanna pissutigalugu meeqqat angajoqqaminnit aappaasorlu pisuussuteqanngitsoq aapparminit avissaartinneqarsinnaasarput. Mingunnartuliorneq inuup Guutimut qaninerpaasaminullu attaveqarluarneranik ajoqusiisinnaavoq. Liimmiiniartup kialuunniit liimmigassai nipissagunik mingoqartussaanngillat. Ileqqorlunneq, imaluunniit kannguttaatsuliorneq, inuup Guutip inatsisaanik naapertuilluartunik ataqqinninngilluinnarneranut ersiutaavoq. Uinngup suliai allat tamarmik aamma  Guutimit avissaassutaasarput inunnullu avissaartuussutaasarlutik. Iliuutsit tamakku Jehovap pissusiinut naapertuutinngilluinnarput.

9. Eqqisseqateqarneq ataasioqateqarnerlu eqqarsaatigalugit iliuuseqartarnerluta paasiniarlugu imminut qanoq aperisinnaavugut?

⁹ Taamaattumik tamatta immikkut imminut ima aperisariaqarpugut: ‘Qatanngutikka eqqisseqatigiumallugillu ataasioqatigiumallugit qanoq iliuuseqartigisarpunga? Isumaqatiginngisaqaraangama qanoq pisarpunga? Isumaqatigineqarnissara neriuutigalugu isumaqatigiinngissut kikkunnut tamanut oqaluttuarisarpara? Eqqisseqateqarniarlunga nammineq iliuuseqarnanga ajornartorsiutima utoqqaanertanit aaqqinneqarnissaa naatsorsuutigisarpara? Arlaat arlaannik pissuteqarluni uannik iluarinninngitsoq malugigukku ajornartorsiut oqaloqatigiissutigiumanagu qanillinaveersaartarpara?’ Taamatut iliuuseqartannginnitsigut ersersissavarput Jehovap siunertaa naapertorlugu iliuuseqarluta. Jehovammi siunertaraa suut tamarmik Kristusimi ataatsimut kattutiteqqineqarnissaat.

10, 11. (a) Qatanngutinik eqqisseqateqarneq qanoq pingaaruteqartigaa? (b) Eqqisseqateqarumallutalu Jehovamit pilluaqquneqarumalluta susinnaavugut?

¹⁰ Jiisusi ima oqarpoq: “Tunissutissat pilliivimmukaakkukku tassanilu eqqaalerlugu qatanngutit illit pillutit unnerluussutissaqartoq, taava tunissutissat pilliivimmut qimallugu qatanngutit saammaakkiartoqqaarallaak, taavalu aatsaat kingorna tunissutissat pilliutigiartorlugu. Eqqartuussinermi akerlerisat aqqutaani ingerlaqatigitillugu isumaqatigilipallanniaruk.” (Matthæusi 5:23-25) Jaaku ima allappoq: “Iluarneq eqqissinermi siaruartikkat inerititaraat, eqqissisitsisullu pisassaraat.” (Jaaku 3:17, 18) Tassa imaappoq eqqortuliortuassagutta allat eqqisseqatigiuartariaqarpavut.

¹¹ Assersuutigalugu nunat sorsuffiusimasut ilaanni qaartartut nunamut assaattakkat pissutigalugit nunaatit 35 procentii naatitsivigineqarsinnaanngillat. Qaartartumik qaartoqaraangat naasorissaasut nunaatiminnit qimaguttarput, nunaannarmi illoqarfinni suliffissarsinissaq illoqarfinnilu nerisassanik pissarsinissaq ajornarsisarput, aap, amerliartortoqarunnaartarpoq. Tamatumunnga assingusumik qatanngutinik eqqisseqateqarnitsinnut aserorsaataasunik pissuseqarutta anersaakkut ineriartorunnaassaagut. Qaartartutut issaagut. Taamaakkutta pissuserput allanngortittariaqarparput. Allat isumakkeerfigipallattarutsigit ajunngitsuliorfigisarutsigillu eqqisseqatigiissallutalu Jehovamit pilluaqquneqassaagut.

12. Utoqqaanertat ataasioqatigiittuaqqulluta qanoq ikiorsinnaavaatigut?

¹² Aamma utoqqaanertat kristumiut ‘uppernermi ataasiunissamut anngusinnaaqqulluta’ ikiortarpaatigut. (Efesosimiut 4:11-13) Taakkua Jehovamut kiffartornitsinni suleqatigigaangamisigut Biibilimillu siunnersoraangamisigut kristumiutut pissutsitsinnik  pitsanngorsaaqqulluta ikiortarpaatigut. (Efesosimiut 4:22-24) Utoqqaanertanit taamatut siunnersorneqaraangavit Jehovap taakku atorlugit silarsuassami nutaami inuusinnaaqqullutit ilinnik piareersaaneratut paasisarpiuk? Utoqqaanertaaguillu allanik ikiuiniaraangavit tamanna eqqaamasarpiuk? — Galatiamiut 6:1.

‘IMMISSINNUT INUSSIARNISAARFIGISARITSI’

13. Efesosimiunut allakkani 4:25-32-mi siunnersuutigineqartunik maleruaanngikkutta qanoq kinguneqassava?

¹³ Efesosimiunut allakkani 4:25-29-mi iliuuserisariaqanngisavut eqqaaneqarput. Assersuutigalugu salluliussanngilagut, kamarujussualissanngilagut, eqiasuttuussanngilagut. Oqaatiginerluinaveersaarluta ineriartornartunik oqaluttassaagut. Siunnersuutinik taakkuninnga maleruaanngitsoq avissaartuutsitsisarpoq. ‘Guutillu anersaava illernartoq aliasutsissavaa’, taassumami anersaava ataasiussuseqalersitsisarpoq. (Efesosimiut 4:30) Eqqisseqatigiissinnaaqqulluta ataasioqatigiisinnaaqqullutalu Paulusip siunnersuutai uku aamma maleruartariaqarpavut: “Narrutsatsitsinerit, puffajanerit, kamannerit, nipiliornerit mitalliinerillu, tassami ajorsutsit suulluunniit, eqqaasassanngilasiluunniit. Immissinnulli ajunngitsuliorfigigitsi [inussiarnisaarfigisaritsi, NW] nallittuillusilu, isumakkeerfigeqatigiittaritsilu soorlu Guutip Kristusimi isumakkeerfigigaasi.” — Efesosimiut 4:31, 32.

14. (a) Sooq ‘inussiarnisaartooqqulluta’ kajumissaarneqarpugut? (b) Inussiarnisaartuunissatsinnut suna iluaqutigisinnaavarput?

¹⁴ ‘Inussiarnisaartuunissamik’ kajumissaarneqaratta paasinarsivoq tamatigut immaqa inussiarnisaartanngitsugut pissuserlu tamanna sulissutigiuartariaqaripput. Allat misigissusiinik uagut misigissutsitsinnit pingaarnerutitsisarnissaq ilinniartariaqarparput. (Filippimiut 2:4) Ilaannikkut allat quiagisinnaasaannik allanillu silatorpasinnerulluta oqaaseqarsinnaasarpugut, tamannali inussiarnisaarnerua? Oqaaseqartinnata eqqarsaqqaartarnissarput eqqaamasarutsigu inussiarnisaartuunissatsinnut iluaqutigissavarput.

ILAQUTARIITTUT ASAQATIGIINNEQ ATAQATIGIINNERLU ILINNIARSIUK

15. Uiusut Efesosimiut 5:28 Kristusimik ilaarsinissamik paasinninnissaminnut qanoq iluaqutigisinnaavaat?

¹⁵ Biibilimi Kristusip ilagiinnut attaveqarnera uiusup nuliaminut attaveqarneranut assersuunneqarpoq. Uiusup Kristusip maligassiaa iluaqutigalugu paasisinnaavaa qanoq ilaquttaminik siulersuissanerluni nuliaminillu qanoq asannittuullunilu isumassuissanerluni. Nuliaasullu aamma Kristusip maligassiaa iluaqutigalugu paasisinnaavaa uiminut qanoq naalatsigitissanerluni. (Efesosimiut 5:22-33) Paulusi ima allappoq: “Taamatut aamma uiusut nuliatik asassavaat namminneq timimittut.” Suna pivaa allakkami: ‘Taamatut’? (Efesosimiut 5:28) Apeqqummut tamatumunnga akissut Paulusip Kristusi ilagiillu pillugit oqaasiinit paasisinnaavarput. Allappoq Kristusip ilagiit asallugillu inuunini taakku pillugit tunniukkaa taakkulu ‘eqqiarai imermik oqaatsikkut’. Taamaattumik uiusup ilaquttani Jehovamut attaveqarlualeqqullugit ikiortussaavai. Taamatut ikiuinermigut Jehovap suut tamarmik Kristusimi ataatsimut kattutiteqqinneqarnissaat pillugu siunertaa naapertorlugu iliuuseqassaaq.

16. Angajoqqaat Biibili naapertorlugu akisussaaffimminnik eqqortitsippata qanoq kinguneqassava?

¹⁶ Angajoqqaat meeqqaminnik isumassuinissamut Jehovamit akisussaaffilerneqarsimanertik eqqaamasariaqarpaat. Ajoraluartumik ullumikkut inuppassuit ‘asanniuitsuupput’. (2 Timotheusi 3:1, 3) Ataataasorpassuit meeqqaminnut ajoqutaasumik akisussaaffimminnik sumiginnaasarput. Paulusilli ataataasut kristumiut ima allaffigai: “[Ilissi] ataataasusi, qitornasi narrutsatseqinasigik, perorsartuarsigilli Jehovap ileqqoreqqusai oqaaqqissaarutaalu malillugit.” (Efesosimiut 6:4, NW) Ilaqutariinni meeqqat asanninneq oqartussaassutsimillu ataqqinninneq ilinniartussaavaat, ilaa? Angajoqqaat meeqqaminnik tamakkuninnga ilinniartitsisartut Jehovap tamanik ataasiussuseqalersitsinissaanik siunertaa  naapertorlugu iliuuseqartarput. Angajoqqaat meeqqatik ilaqutariit iluanni asaneqartutut misigitittariaqarpaat. Taamaattumik kamannaveersaartariaqarput, meeqqatillu nilliaffiginaveersaartariaqarpaat annernartunillu oqarfiginaveersaartariaqarlugit. Taamatut meeqqatik allanik asannittuunissaq oqartussaassutsimillu ataqqinninnissaq pillugit pingaarutilimmik ilinniartissavaat. Taamaalillutik Guutip silarsuassaani nutaami inuusinnaanissamut piareersarneqassapput.

17. Diaavulu akiorumallugu susariaqarpugut?

¹⁷ Paasilluartariaqarparput Diaavulup qilammi nunamilu eqqissinermik akornusersuisuusup suut tamaasa atorlugit akerlilersussagaatigut. Inuppassuit avittarnermikkut, katinneqaratik inooqatigiinnermikkut angutillu anguteqatiminnut arnallu arnaqatiminnut katittarnerannik akuerinninnermikkut Diaavulup kissaatigisaatut iliuuseqartarput. Uagulli silarsuarmi matumani akuerineqarlutik pissuserineqartut pissuserilerusunngilavut. Kristusi ilaarusupparput. (Efesosimiut 4:17-21) Diaavulu taassumalu anersaapilui akiorumallugit ‘Guutip sakkutuussutai tamarmiusut atisariaqarpavut’. — Atuakkit Efesosimiut 6:10-13.

‘INUUGITSI ASAQATIGIILLUSI’

18. Ataasioqatigiittuarumalluta susariaqarpugut?

¹⁸ Ataasioqatigiittuassagutta asannittuusariaqarpugut. ‘Naalagarput ataaseq’, Jiisusi Kristusi, ‘Guuterpullu ataaseq’, Jehova, qatanngutivullu asagatsigit eqqisseqatigiittuarnissarput ataasioqatigiittuarnissarpullu aalajangiusimavarput. (Efesosimiut 4:3-6) Taamatut asaqatigiinneq pillugu Jiisusi ima qinuvoq: “Qinnuppakka taakkuinnaanngitsut, aammattaarli taakkua oqaasiisigut uannut uppertunngorumaartut, tamarmik ataasioqqullugit, soorlu illit, Ataataq, uanniittutit uangalu ilinniittunga, taakkuttaaq aamma uatsinneeqqullugit.” Aamma ima qinuvoq: “[Aqqit] taakkununnga ilisimalersippara ilisimalersikkumaarlugulu, asannissuseq uannut asannissuserisat taakkunaneeqqullugu uangalu taakkunaneeqqullunga.” — Johannesi 17:20, 21, 26.

19. Sunissat aalajangiusimaviuk?

¹⁹ Naammalluinnanngitsuunerput pissutigalugu akiugaqarutta asanninnerput kajumississutigalugu tussiaasiortutut ima qinusariaqarpugut: “Uummatiga ataasiulersiguk atinnik mianerinneqqullunga.” (Tussiaat 86:11, NW) Diaavulup Ataatatsinnit asannittumit qatanngutitsinnillu avissaartinniartarmatigut taassuma akiornissaa aalajangiusimalluinnartigu. ‘Guuti maligassarisariaqarparput taassumunnga qitornaasutut asasaasutut’, aamma ilaqutariinni, oqaluussinermi ilagiinnilu ‘asaqatigiittuarluta inuusariaqarpugut’. — Efesosimiut 5:1, 2.

[Atuaqqissaarnermi apeqqutit]

[Qupp. 29-mi assiliartaq]

Pilliutissani pilliiviup sanianut qimaannarlugu qatanngutini eqqisseqatigiartoqqaarallarpaa

[Qupp. 31-mi assiliartaq]

Angajoqqaajususi, meeqqasi ataqqinnittuunissaannik ilinniartissigit