Kiffaanngissutsip Guutia kiffartorfigiuk

‘Guutimut asanninneq tassaavoq inassutai maleruaratsigit, inassutaalu artornartuunngillat.’ — 1 JOHANNESI 5:3.

QANOQ AKISSAVIT?

Saatanip Jehovap piumasaqaatai pillugit qanoq eqqarsartinniarpaatigut?

Sooq ikinngutissanik toqqaanermi mianersortariaqarpugut?

Kiffaanngissutsip Guutianut ilumoorfiginnittuarnissatsinnut suna iluaqutigissavarput?

1. Jehovap kiffaanngissutsini qanoq atortarpaa, aamma Adami Evalu qanoq kiffaanngissuseqartippai?

JEHOVA kisimi killeqanngitsumik kiffaanngissuseqarpoq, atornerlunngisaannarpaalu. Kiffamilu iliuusii sunnguit tamaasa aqullugit kiffaanngissusiianngilai. Namminneq piumasamissut iliorsinnaatippai kissaatinillu eqqortunik pisinnaatillugit. Assersuutigalugu Guutip Adami Evalu oqarfigai ataasiinnarmik inerteqquteqartoq. Oqarpoq “orpik ajunngitsumillu ajortumillu ilisimalersitsisoq” neriffigissanngikkaat. (1 Mosesi 2:17) Tassa Guutip piumasaatut iliorsinnaatigalutik tupinnaannartumik kiffaanngissuseqarput!

2. Sooq Adami Evalu ajortimut inussiaataalerpat?

² Sooq Guutip Adami Evalu taama kiffaanngissuseqartitsigai? Jehovap nalunngeqatiginnissuseqartillugit imminullu assililluni pinngortikkamigit. Naatsorsuutigaa Pinngortitsisimissut imminut asanninnertik pissutigalugu eqqortuliussasut. (1 Mosesi 1:27; Romamiut 2:15) Ajoraluartumik Adamip Evallu Pinngortitsisertik kiffaanngissuseqartitsisoq qujamasuffiginagu namminneq aalajangerpaat suna eqqortuunersoq sunalu eqqunngitsuunersoq. Isumaqarput kiffaanngissuseqarnerulissallutik, imminnulli kinguaassatik ilanngullugit ajortimut inussiaataalersipput naalliunnermik toqumillu kinguneqartumik. — Romamiut 5:12.

3, 4. Jehovap maligassiai pillugit Saatanip qanoq isumaqalersinniarpaatigut?

³ Saatanip inuit naammalluinnartut inngilerpassuillu Guutip oqartussaaneranik akuersaarunnaartissinnaappagit uaguttaaq taamaalisissinnaavaatigut. Saatani suli taama periaaseqarpoq. Isumaqalersinniarpaatigut Guutip maligassiai artornartuusut nuannersunillu misigisaqanngitsoortugut. (1 Johannesi 5:3) Silamiut Saatanitut eqqarsartartut ilagiuartarutsigit uagut aamma taamatut eqqarsartaaseqaleriaannaavugut. Qatanngut arnaq  maannakkut 24-nik ukiulik oqarpoq ikinngutipalaanit sunnertinnikuusimaqaluni. Inuusuttoqatimi isumaannik allaanerusumik isumaqarnissani annilaangagisarsimavaa, allaat kinguaasiuutitigut inuunerlunnermik kingunilimmik. Immaqa aamma illit tamatumunnga assingusunik misigisaqarnikuuvutit.

⁴ Ajoraluartumik ilagiinniittut aamma ajortumik sunniisinnaapput. Qatanngut angut inuusuttoq oqarpoq ilaagiinni ikinngutimi ilaat silamiunik ajuutiginnillutik sammisaqartartut. Eqqarsaatigileriataarpaa ikinngutigiinnertik sivitsoriartortillugu taakkutut pissuseqaleriartuaarluni. Ima oqarpoq: ‘Anersaakkut sanngiillivunga. Ataatsimiinnerni saqqummiussat soqutigiunnaarpakka, oqaluusserpiassaarlungalu. Paasilluarpara ikinngutigiunnaartariaqarlugit, taammaliorpungalu!’ Illimmi, eqqumaffigiviuk ikinngutitit ilinnut qanoq sunniuteqartigisartut? Assersuut Biibilimeersoq misissoriartigu. — Romamiut 15:4.

“UUMMATAAT TILLIPPAI”

5, 6. Absalomip inuit allat qanoq nakutippai, ajortisaarinerminilu iluatsitsiva?

⁵ Biibilimi inuppassuit allanut sunniinerlussimasut eqqaaneqarput. Absalomi kunngip Daavip ernerisa ilaat eqqarsaatigeriaruk. Absalomi isikkorissuusimavoq. Saatani assigalugu kissaatipiluit uummatimini ineriartortilerpai. Absalomip ataatani kunngiusoq inangerniarpaa uffa kunnginngortussaanani. * Kunngimik inangiiniaagaluarnermini Absalomip Israelikkut inuinnaat soqutigisuusaarpai kunngikkormiullu inuinnarnik soqutiginninnginnerarlugit. Ilumut, Naatsiivimmi Edenimi Diaavulu assigalugu Absalomi inuit allat ajunngitsuusaarfigiitigalugit ataatani salluliuutigalugu ajortisarpaa. — 2 Samueli 15:1-5.

⁶ Absalomi ajortisaarinermini iluatsitsiva? Aap ilaatigut, oqaluttuamimi ima allassimavoq: ‘Absalomip Israelikkut uummataat tillippai.’ (2 Samueli 15:6) Naggataatigulli makitasuujunini ajunaarutigaa. Toquvoq inuillu tusindilippassuit nakutitai aamma toqupput. — 2 Samueli 18:7, 14-17.

7. Absalomimik oqaluttuaq sumik ilinniutigisinnaavarput? (Takuuk asseq qupp. 19-imiittoq).

⁷ Sooq Israelikkut taakku taama nakutikkuminartigippat? Immaqa Absalomip neriorsuutigisai piumagamikkit isikkorissuuneraluunniit pissutigalugu. Sunaluunniit pissutaagaluarpat, una qularutissaanngilaq: Jehovamut taassumalu kunngitut toqqagaanut ilumoorfiginninngillat. Aamma ullumikkut Saatani inuit Absalomitut ittut atorlugit Jehovap kiffaanik nakutitsiniaasarpoq. Immaqa taakku ima oqassapput: ‘Jehovap piumasaqaatai artornarpallaarput. Jehovamut kiffartortuunngitsut eqqarsaatigeriakkit, nuannisaartuaannarput!’ Peqqusersusaartumik salluliuutaaneri paasisinnaavigit Guutimullu ilumoorfiginnittuaannarlutit? Paasiviuk ‘inatsisit naammalluinnartut’, Kristusip inatsisaata, kisimik kiffaanngissuseqalivississinnaagaatit? (Jaaku 1:25) Taamaappat inatsisit taakku pingaartillugit ersersiguk kristumiutullu kiffaanngissuseq atornerlunngisaannaruk. — Atuaruk 1 Petrusi 2:16.

8. Jehovap najoqqutassiaanik sumiginnaaneq pillualernanngitsoq oqaluttuanit sunit erserpa?

⁸ Ingammik inuusuttut Saatanimit saassunneqartarput. Qatanngut angut maannakkut 30-t sinnerlugit ukiulik inuusuttuunini ima oqaluttuaraa: “Jehovap ileqqussatigut najoqqutassiai killilersuisutut isigaakka, illersuutitut isiginagit.” Taamatut isiginnittaaseqarnera kinguaassiuutitigut inuunerlunnermik kinguneqarpoq. Pillualissutiginngilaali. Ima oqarpoq: “Ukiorpassuarni tamanna ajorusuutigaara ilerasuutigalugulu.” Qatanngutip arnap inuusuttuaraanini ima allaatigaa: “Kinguaassiuutitigut inuunerloreerlunga misigissuseeruttutut naleqanngitsutullu misigivunga. Allaat ullumikkut, ukiut  19-init qaangiutereersut, tujormissutigisarpara.” Qatanngut arnaq alla oqarpoq iliuutsimi inunnut asasaminut sunniuteqarnera anniaatigingaarlugu. Imalu nangilluni: “Jehovamit iluarisaanani inuuneq tujorminartorujussuuvoq.” Saatanip kissaatiginngilaa ajortuliornerpit kingunipilui eqqarsaatigissagitit.

9. (a) Jehovamut taassumalu inatsisaanut najoqqutassiaanullu isiginnittaasitsinnik misissuinissamut apeqqutit suut iluaqutigisinnaavavut? (b) Sooq Guutimik ilisarisimannilluarnissaq pingaaruteqarpa?

⁹ Oqaluttuat eqqaariikkatta ersersippaat kissaatinut eqqunngitsunut nakkaannaarneq kingunipiloqartartoq! Alianarpoq inuusuttorpassuit sallusuissummiittut — allaat utoqqalereersut — naallioqqaarlutik tamanna ilikkartarmassuk. (Galatiamiut 6:7, 8) Taamaattumik imminut ima aperigit: ‘Saatanip nakutitseriaasii piareersimaffigisarpakka? Jehova ikinngutiginerpaasattut isigaara, uannut ilumoortumik oqaluttartoq uannillu ajunnginnerpaamik kissaassisoq? Qularutiginngilluinnarpara arlaannik ajunngivissumik — nuannaarutigisassannik pillualissutigisassannillu — erliguutinngisaannaraanga?’ (Atuakkit Esaja 48:17, 18). Apeqqutit taakku qamannga pisumik angersinnaajumallugit Jehova ilisarisimalluartariaqarpat. Paasisariaqarpat inatsisinit najoqqutassianillu Biibilimiittunit ersermat Jehovap asagaatit, imaanngitsoq kiffaanngissusiiarniaraatit. — Tussiaat 25:14.

UUMMAT ILISIMASOQ NAALATTORLU QINNUTIGIUK

10. Sooq kunngi Salomo ilaarniartariaqarparput?

¹⁰ Salomo inuusuttuaraalluni maniguulluni ima qinuvoq: ‘Inuusuttunnguugaluarpunga  misilittagakitsuullungalu’. Taava naalattumik ilisimasumillu uummateqarteqqulluni qinuvoq. (1 Kunngit 3:7-9, 12) Eqqortuliorusuttup qinnutaa tamanna Jehovap akivaa aamma illit, inuusuttuugaluaruit utoqqaagaluaruilluunniit, akissavaatit. Soorunami Jehovap tupinnartuliornikkut ilisimasaqalersinnavianngilaatit ilisimassuseqalersinnallu. Biibilimilli atuaqqissaartarnerit pimoorukkukku, anersaaq illernartoq qinnutigisarukku ilagiinnilu kristumiuni anersaakkut ilinniartitaaneq iluaqutigilluartarukku ilisimassuseqalersissavaatit. (Jaaku 1:5) Aap, Jehovap kiffani inuusuttut ilisimassuseqarnerulersittarpai siunnersuutiminik sumiginnaasuminngarnit, aamma silarsuarmi matumani ‘ilisimasunik sianisuunillu’ taaneqartartuninngarnit. — Lukasi 10:21; atuakkit Tussiaat 119:98-100.

11-13. (a) Tussiaat 26:4, Ussatit 13:20 aamma Korinthimiut allakkat siulliit 15:33 pingaarutilinnik sunik ilinniutigisinnaavavut? (b) Illit inuuninni najoqqutassiat taakku qanoq atussavigit?

¹¹ Allassimaffinnik Biibilimik atuaqqissaarnerup atuakkatsinnillu eqqarsaatiginneqqissaarnerup pingaaruteqarneranik ersersitsisunik misissueriarta, taamaalilluta Jehova ilisarisimallualissavarput. Ikinngutissanik toqqaanermut tunngatillugu allassimaffiit uku tamarmik immikkut najoqqutassiamik pingaarutilimmik imaqarput: “Sallutuut peqatigisarinngilakka, peqquserluttut ilagineq ajorpakka.” (Tussiaat 26:4) “Ilisimasunik peqateqartoq ilisimassuseqalersarpoq, sianiitsunilli ikinnguteqartoq ajortumeertussaasarpoq.” (Ussatit 13:20) “Ikinngutipalaaqarneq ileqqorikkaluartunut aseruutissiisarpoq” — 1 Korinthimiut 15:33.

¹² Pingaarutillit suut allassimaffinnit taakkunannga ilinniarsinnaavavut? (1) Jehovap kissaatigaa ikinngutissanik toqqaagaangatta eqqarsarluartassasugut. Ileqqussatigummi anersaakkullu illersorusuppaatigut. (2) Ilagisartakkatsinnit ajunngitsumik ajortumilluunniit sunnerneqartarpugut. Inuuneq taamaappoq. Versit issuarneqartut oqaasertalerneqarnerannit erserpoq Jehova uummatitsinnik kajumissisitsiniartoq. Qanoq? Malugiuk versini assortugassaanngitsut allaatigineqarmata, taakku arlaannaalluunniit inerteqqutitaqanngillat, soorlu uiguut ‘-qassanngilatit’ atorneqanngilaq. Jehovap ima oqarfiginiarpaatigullusooq: ‘Tassa pissutsit taamaapput. Qanoq periaaseqarniarpit? Suna uummammiugaajuk?’

¹³ Naggataatigut eqqaaneqarsinnaavoq versit pingasut taakku sallusuissutitut tunngaviusutut allataagamik pisoqaavallaalerneq ajorput assigiinngitsorpassuarnullu atatillugu atorsinnaallutik. Imminut ima aperigit: “Peqquserluttut”, tassa kinaassutsiminnik isertuisut, qanoq ikinngutiginaveersaarsinnaavakka? Pissutsini qanoq ittuni naapissinnaavakka? (Ussatit 3:32; 6:12) ‘Ilisimasut’ Jehovap ikinngutigeqqusai kikkuuppat? ‘Sianiitsut’ ilaginaveersaaqqusai kikkuuppat? (Tussiaat 111:10; 112:1; Ussatit 1:7) Ikinngutipalaaqarniaruma ‘ileqqorinnerit’ suunuku ileqqoriunnaassagikka? Ilagiit avataaniinnaq ‘ikinngutipalaat’ naammattuugassaappat? (2 Petrusi 2:1-3) Apeqqutit taakku qanoq akissavigit?

14. Unnuk ilaqutariittut anersaakkut ittunik sammisaqarfik qanoq pissarsiffiginerusinnaavisiuk?

¹⁴ Tamatumunnga assingusumik ilinnut ilaquttannullu pingaarutillit pillugit Guutip eqqarsartaasia paasiumallugu allassimaffinnik allanik misissuisinnaavutit. * Angajoqqaajususi, unnummi ilaqutariittut anersaakkut ittunik sammisaqarfiusumi taamaattunik eqqartuisinnaaneq eqqarsaatigisiuk. Taamaaliussagussi eqqaamasiuk siunertaasoq tassaammat ilaqutariinniittut tamarmik matumannga paasinninnissaat: Guutip uagutsinnik qanoq asannitsigineranut taassuma inatsisai najoqqutassiaalu ersiutaapput. (Tussiaat 119:72) Ilaqutariittut taamatut atuaqqissaaqatigiittarussi  Jehovamut immissinullu attaveqarnersi nakussatsissaaq.

15. Ilumut ilisimassuseqarnerlutit naalattuunerlutillu qanoq nalunngissinnaaviuk?

¹⁵ Ilumut ilisimassuseqarnerlutit naalattuunerlutillu qanoq nalunngisinnaaviuk? Ilaatigut taamaliorsinnaavutit illit isiginnittaatsit itsaq Guutip kiffaasa aalajaatsut, soorlu kunngip Daavip, isiginnittaasiannut naleqqiullugu. Daavi ima allappoq: “Guuti, piumasat malillugu iliornissaq tassa kajungerisara; inatsisitit uanga ilunni ipput.” (Tussiaat 40:9) Aamma Tussiaat 119-imi ima allassimavoq: “Ilami inatsisitit nuannareqaakka, eqqarsaatinniipput ulloq tamaat.” (Tussiaat 119:97) Taamatut nuannarinnissaguit ilungersortariaqarputit. Taakkuninnga nuannarinninnerulissaatit pimoorussillutit Biibilimik atuaqqissaartaruit, qinusaruit eqqarsaatiginneqqissaartaruillu aamma Guutip najoqqutassiaanik maleruaanerup pilluaqqussutissartai nammineq misigisalerukkit. — Tussiaat 34:9.

KRISTUMIUTUT KIFFAANNGISSUTSIT SORSUUTIGIUK!

16. Kiffaanngissuseqartuarumalluta akiuunnermi ajugaassagutta suna eqqaamasariaqarparput?

¹⁶ Oqaluttuarisaanerup ingerlanerani inuiaqatigiit kiffaanngissuseq naakkittaatsumik sorsuutigisarpaat. Kristumiutut kiffaanngissuseqartuarumallutit sorsuutiginnikkusunnerusariaqarputit! Eqqaamajuk akeqqatit tassaaginnanngimmata Saatani eqqarsartaaserlu silamiorpaluttoq toqunartoq. Aamma illit nammineq naammalluinnanngissutsit uummallu tatigisassaanngitsoq akiortariaqarpatit. (Jeremia 17:9; Efesosimiut 2:3) Jehovap ikiuineratigut akiuunnermi ajugaasinnaavutit. Ajugaanerit tamarmik minnerpaamik marlunnik ajunngitsunik kinguneqartarput. Siullermik, Jehovap uummataa nuannaartissavat. (Ussatit 27:11) Aappassaanik, ‘kiffaanngissutsip inatsisaanik naammalluinnartunik’ naalannerup ilinnut iluaqutaanera paasigaangakku “isaaffikkut nerukitsukkut”, inuunermut naassaanngitsumut sammisukkut, ingerlanissat suli aalajangiusimanerulertarpat. Siunissami kiffaanngissuseq annerungaartoq Jehovap ilumoorfiginnitsiminut neriorsuutigisaa nuannaarutigisinnaavat. — Jaaku 1:25; Matthæusi 7:13, 14.

17. Kukkussuteqaraangatta sooq nikallortassanngilagut, Jehovallu qanoq ikiortarpaatigut?

¹⁷ Soorunami tamatta ilaannikkut kukkusarpugut. (Oqaluussisartup oqaasii 7:20) Kukkussuteqaraangavit nikallornak naleqanngitsutulluunniit misiginak pisariaqartumik aaqqiisarit, allaat utoqqaanertanut ikiortissarsiortariaqassagaluaruit. Jaaku ima allappoq: “Uppernikkut qinnutaasup napparsimasoq annaatissavaa, Naalakkallu ajorunnaarsissavaa; ajortulisimagunilu isumakkeerfigineqassaaq.” (Jaaku 5:15) Puiunngisaannaruk Guuti ilumut naakkinnittuusoq ilagiinnullu kajungilersikkaatit arlaannik ajunngitsumik illit ilunni takusaqarami. (Atuakkit Tussiaat 103:8, 9). Uummatikkut iluunngarlutit Jehovamut kiffartorniartuartillutit taassuma ikiortuassavaatit. — 1 Nalunaarsuutit 28:9.

18. Jehovamit illersorneqarumalluta susariaqarpugut?

¹⁸ Jiisusi aqagumut toqusussaalluni apustilini aalajaatsut aqqanillit qinoqatigalugit puiunaatsumik ataataminut ima qinnuppai: ‘Paarikkit ajortumut peqqunagit.’ (Johannesi 17:15) Jiisusi apustiliminik isumassuinermisulli ullumikkut ajoqersukkaminik isumassuivoq. Taamaattumik upperisinnaavarput Jiisusip ilungersunartorsiortitsinitsinni illersoqqulluta qinnutaa Jehovap akiumaaraa. Ussatit 2:7, 8-mi allassimavoq Jehova aalajaatsunut eqqornaveeqqutitut ittoq taassumalu ‘ilumoorfiginnitsimi aqqutaat paarisarai’. Jehovap piumasaqaataanut naalanneq oqitsuinnaajuaannanngilaq. Jehovamulli naalattut naassaanngitsumik inuussapput kiffaanngissuseqavissallutillu. (Romamiut 8:21) Allatut eqqarsartunit tammartitaaqinak!

[Quppernerup ataani ilanngussat]

[Atuaqqissaarnermi apeqqutit]

[Qupp. 19-mi Assiliartat]

Ullumikkut Absalomitut ittut qanoq kinaassusersisinnaavavut qanorlu taakkunannga sunnertinnaveersaarsinnaavugut?