Naassaanngitsumik inuussutaasoq
Naassaanngitsumik inuussutaasoq
“Inuunerlu naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.” — JOHANNESI 17:3.
ILISIMASAQARAANNI inuunermik annaassisoqarsinnaavoq. Nouhou, qulinik qaammatilik, Nigerimi napparsimalermat, taassuma anaanaata — peqqissaasuusup — iliuusissani nalunngilai. Imermik minguitsumik sioraasanik taratsunillu akuukkaminik imertippaa. UNICEF naapertorlugu taanna “ingerlaannaq iliuuseqarmat najukkaminilu nakorsaatigineqarsinnaasunik peqarmat taassuma ernera peqqissipallappoq”.
Aamma Biibilimeersunik ilisimasaqaraanni inuunermik annaassisoqarsinnaavoq. Biibilimik allaqataaqqaartoq, Mosesi, ima oqarpoq: “[Oqaatsit] taakku asuliinnaanngillat, tassaappulli ilissinnut inuussutaasussat. Oqaatsit taakku tunngavigalugit . . . inuummersorumaarpusi.” (5 Mosesi 32:47) Biibili ilumut uagutsinnik inuummersortitsisinnaava? Guutip oqaasiata ‘inuussutaanera’ qanoq paasisariaqarpa?
Allaaserisanit matuma siuliinit tallimanit erserpoq Biibili allanut nallersuunneqarsinnaanngitsoq makku eqqarsaatigalugit: tamatumani siulittuutigineqartut tutsuiginartuunerat allaaserineqartullu pisimasuiullutillu ilisimatuussutsikkut paasisanut naapertuunnerat, imarisaasalu imminnut naapertuullutillu atoriaannaasuunerat. Tassa Biibili immikkorluinnaq ittuuvoq. Biibilimi allassimammat Biibili inuummersornissamut — naassaanngitsumik inuulernissamut — aqqutissaasoq, taava taanna misissorluarnerusariaqarparput, ilaa?
Kajumissaarpatsigit Biibilimik misissuineroqqullutit paasiniassagakku qamuuna eqqissinissannut pilluarnartumillu siunissaqalernissannut qanoq iluaqutigisinnaanerit. Jehovap Nalunaajaasuisa tamakku pillugit ilisimasaqalernissannut ikiorusuttorujussuuaatsit.
[Qupp. 9-mi Ungalusaq/assiliartaq]
Aamma Biibili immikkorluinnaq ittuuvoq taamaallaat tamatumani apeqqutit tunngaviusut makku naammaginartumik akineqarmata:
• Inuunerup suna siunertaraa?
• Sooq taama naalliunnartoqartigaa?
• Asasatsinnut toqukkut annaasimasatsinnut neriuutissaqarpa?
Atuakkami matumani,Biibilimi sorpiaat ajoqersuutigineqarpat?, Jehovap Nalunaajaasuinit saqqummersinneqartumi, apeqqutinut taakkununnga Biibilimi akissutigineqartut atuarsinnaavatit.