Aalajaattuarit Saatanillu napiaaniutaanut napitinnaveersaarlutit!
Aalajaattuarit Saatanillu napiaaniutaanut napitinnaveersaarlutit!
“Atasinnaaqqullusi Diaavulup qoqassiniaraangasi.” — EFESOSIMIUT 6:11.
QANOQ AKISSAVIT?
Jehovamut kiffaasup pigisalerituneq qanoq ililluni napitiffiginaveersaarsinnaavaa?
Kristumiup aappallip allasiunnginnissamut suut iluaqutigisinnaavai?
Pigisaleritunermut kinguaassiuutitigullu inuunerlunnermut nakkaannanngisaannarneq sunik iluaqutissartaqarsoraajuk?
1, 2. (a) Sooq Saatanip tanitat ‘savallu allat’ uumissorpai? (b) Saatanip napiaaniutai sorliit allaaserisami matumani sammissavavut?
SAATANI inunnik, ingammik Jehovamut kiffartortunik, uumissuivoq. Allaat tanitanut suli nunarsuarmiittunut akiuuppoq. (Saqqummersitat 12:17) Kristumiut taakkua oqaluussineq sapiillutik siuttuuffigaat Saatanillu silarsuarmi matumani naalagaanera qulaarsimallugu. Diaavulup aamma ‘savat allat’, tanitanik tapersersuisut naassaanngitsumillu inuunissamik neriugisaqartut, uumissorpai. (Johannesi 10:16) Saatani naassaanngitsumik inuunissaminut periarfissaarussimavoq. Taamaattuminguna taama kamatsigisoq. Tanitaagaluarutta savanulluunniit allanut ilaagaluarutta Saatani akeraraarput. Taassuma ajoquserusuppaatigut. — 1 Petrusi 5:8.
2 Saatanip ajoquserumalluta napiaaniutit atortarpai. Inuit ‘eqqarsaataannik tappiillisitsisarpoq’ taakku nutaarsiassaq nuannersoq pillugu paasisaqannginniassammata napiaaniutiminillu takunnissinnaannginniassammata. Diaavululi aamma Guutip naalagaaffia pillugu nutaarsiassamik nuannersumik ilassinnereersimasunik pisaqartarpoq. (2 Korinthimiut 4:3, 4) Allaaserisap matuma siuliani paasivarput Saatanip napiaaniutaasa ilaat pingasut qanoq napitiffiginaveersaarsinnaagivut. Taakku tassaapput: (1) eqqarsaqqaarani oqalunneq, (2) inunnut qununeq allallu sunniiniarnerat, aamma (3) imminut ingasattumik eqqartuuttarneq. Maanna misissoriartigu Saatanip napiaaniutai allat marluk qanoq ililluta napitiffiginaveersaarsinnaagivut. Taakku tassaapput pigisalerituneq allasiornissamullu ussernartorsiorneq.
PIGISALERITUNEQ — NAPIAANIUT IPITITSISARTOQ
3, 4. Pissutsit aaqqissuussaaneranni matumani isumakuluutit qanoq ilillutik pigisalerituunnguutaasinnaappat?
3 Jiisusip assersuusiami ilaanni eqqartorpai naatsiiassat naasupiluit kapinartullit akornannut siaruarterneqartut. Nassuiaavoq inuit ilaasa Guutip naalagaaffia pillugu tusarliussaq tusartaraluaraat, ‘silarsuarmili matumani isumakuluutit pisuussutillu nakutitsisarnerisa oqaaseq ipitittaraat inerititaqanngitsoortillugu’. (Matthæusi 13:22) Pigisalerituneq akeqqatta Saatanip napiaaniutigisarpaa.
4 Assigiinngitsut marluk ataatsikkoortinneqaraangamik ‘oqaatsimik ipititsisarput’. Siulleq tassaavoq ‘silarsuarmi matumani isumakuluutit’. Ulluni makkunani ‘atugarliungaarfiusuni’ isumakuluutissarpassuaqarpoq. (2 Timotheusi 3:1) Inuuniarnerup akisunera suliffissaaleqisoqaraluttuinnarneralu pissutigalugit naammattusaarinissaq imaannaanngissinnaasarpoq. Immaqa aamma siunissaq ernumagivat eqqarsaatigalugulu sulinissannut utoqqalivallaaleruit naammattunik aningaasaateqassanerlutit. Inuit ilaat pisuunngorniarsarisarput isumaqaramik naammattorsuarnik aningaasaateqarunik toqqissisimajuassallutik.
5. Qanoq ilillutik ‘pisuussutit nakutitsisinnaappat’?
5 Jiisusip eqqaasaata aappaa tassaavoq ‘pisuussutit nakutitsisarnerat’. Pisuussutit nakutitsisarnerat isumakuluutillu pigisaleritunermut napitissutigisinnaavavut. Biibilimi allassimavoq “aningaasat illersuutaasut.” (Oqaluussisartup oqaasii 7:12, NW) Tassa imaappoq, aningaasat pisariaqartitatta pinissaannut iluaqutigisinnaavavut. Pisuunngorniarnissarli silatusaarnerunngilaq. Inuppassuit paasisimavaat pisuunngorniarnissartik ilungersuutiginerujartuinnartillugu pigisaleritunermut napitikkaluttuinnartarlutik. Ilaat allaat pigisanut inussiaatinngortarput. — Matthæusi 6:24.
6, 7. (a) Suliffimmi pissutsit qanoq ittut pigisalerituunnguutigineqarsinnaappat? (b) Kristumiup suliffimmini qaangiuttooqquneqaraangami suut eqqarsaatigisariaqarpai?
6 Sianiginagu pisuunngorusuttoqaleriartuaartoqarsinnaavoq. Assersuutigalugu ima pisoqartoq takorlooriaruk. Sulisitsisuit ima oqarfigiartorpaatit: “Nuannersunik tusarliussassaqarpunga! Suliffeqarfipput suliassarujussuaqalerpoq. Taamaattumik qaammatini tulliuttuni suligaangavit qaangiuttuukulasariaqarsinnaavutit. Kisianni akissarsingaatsiarumaarputit.” Taamatut neqeroorfigineqarnerit qanoq igissagaluarpiuk? Soorunami ilaquttavit timikkut pisariaqartitaannik isumaginninnissat akisussaaffiuvoq pingaarutilik, aammali allamik akisussaaffeqarputit. (1 Timotheusi 5:8) Allanittaaq eqqarsaatigisassaqarputit. Qanoq qaangiuttuukulatigisassavit? Suliffiit anersaakkut sammisassannut, ilaatigut ataatsimiigiarnissannut ilaqutariittullu atuaqqissaaqatigiinnissassinnut, akornutaasassava?
7 Aalajangerniarninni suna illit pingaarnerpaatissaviuk — aningaasatigut iluanaaruteqarnissat imaluunniit Jehovamut attaveqarnerit? Aningaasarsiornerorusunnerit pissutigalugu Guutip naalagaaffianut attuumassuteqartut inuuninni pingaarnerpaatikkunnaassavigit? Takusinnaaviuk pigisalerituneq sunniutipiloqarsinnaasoq, illit ilaquttavillu anersaakkut ittunik pingaartitsinersi nakussatsinniarlugu iliuuseqartanngikkuit? Anersaakkut peqqissutsit maannakkorpiaq navianartorsiorpasippat, pigisaleritunermit qanoq ilillutit ipititaanaveersaarsinnaavit? — Atuakkit 1 Timotheusi 6:9, 10.
8. Inooriaatsitsinnik eqqarsaatiginneqqissaarumalluta Biibilimi maligassiuinerluttunik kikkunnik eqqarsaatiginninnerput iluaqutigisinnaavarput?
8 Pigisaleritunermit ipititaajumanata inooriaaserput eqqarsaatigeqqissaaqqeqattaartariaqarparput. Esauitut inngisaannartariaqarpugut, taannami Jehovap neriorsuutaanik suusupaginnippoq. (1 Mosesi 25:34; Hebræerit 12:16) Aammattaaq angutitut pisuutut pigisaminik tamanik tuniniaaqquneqaraluartutut Jiisusimillu malinneqquneqaraluartutut ikkusunngilagut. Taanna kajumissaarneqarnermisut iliunngilaq. Pigisarpassuaqarami aliatsappoq qimagullunilu. (Matthæusi 19:21, 22) Taassuma pigisani napitiffigalugillusooq inuit inuusimasut pingaarnerpaartaannik malinninnermik immikkut pisinnaatitaaffik angingaartoq annaavaa! Jiisusimut Kristusimut ajoqersugaanermik immikkut pisinnaatitaaffik annaajumanagu mianersortariaqarpugut.
9, 10. Biibili naapertorlugu pigisanut qanoq isiginnittaaseqartariaqarpugut?
9 Pigisat napitiffigerusunngikkutsigit Jiisusip oqaaqqissaarutai malillugit iliortariaqarpugut. Taanna ima oqarpoq: “Isumakuluuteqassanngilasi ima aperalusi: Suna nerissavarput? Suna imissavarput imaluunniit suna atissavarput? Tamakku tamaasa Guutimik nalusut ujartarpaat, ataatassilu qilammiittup nalunngilaa tamakku tamaasa pisariaqartikkisi.” — Matthæusi 6:31, 32; Lukasi 21:34, 35.
10 Pisuussutinit nakutitaarusunngikkutta Biibilimik allaqataasutut Aguritut eqqarsartaaseqartariaqarpugut, taanna ima allakkami: “Piitsuuallaartinnangalu pisuujuallaarteqinanga. Pisariaqartitannik tuniinnannga.” (Ussatit 30:8, Contemporary English Version) Erseqqippoq Agurip paasisimagaa aningaasat illersuutaasinnaanerat, aammali pisuussutit nakutitsisarnerat ilisimaarivaa. Pingaaruteqarpoq pisuussutit nakutitsisarnerata pissutsillu aaqqissuussaaneranni matumani isumakuluutit Jehovamut attaveqarunnaarluinnassutaasinnaanerannik ilisimaarinninnissarput. Pigisanik isumakuluutiginnippallaarutta Guutip naalagaaffianut attuumassuteqartut inuunitsinni pingaarnerpaatinnissaannut piffissaarullutalu nukissaarullutalu piumassuseerussinnaavugut. Taamaattumik pigisaleritunermut napiteqqunata mianersortariaqarpugut! — Atuaruk Hebræerit 13:5.
ALLASIORNEQ — PEQQUSERSUSAARTUMIK NAKKARFISSIALIAQ
11, 12. Kristumiup allasiorneq suliffimmini qanoq napitiffigisinnaavaa?
11 Piniartut uumasunik angisuunik pisaqarusuttut ilaannikkut uumasup aqqutigisartagaani nakkarfissialiorlutik assaasarput. Nakkarfissialiartik qisuminernik taakkualu qaavisigut issumik matoortarpaat, taanna takuneqarsinnaajunnaarsillugu. Saatanip ussiiniutigisartagaasa iluatsilluarnerpaasartut ilaat napiaaniummut tamatumunnga assinguvoq. Taanna tassaavoq kinguaassiuutitigut inuunerluttuliorneq. (Ussatit 22:14; 23:27) Kristumiut ilaat tamatumunnga napitissimapput kinguaassiuutitigut inuunerluttuliornissamut ussernartorsiuleriaannaallutik nalunngikkaluarlugu iliuuseqartannginnamik. Kristumiut aappallit ilaat aapparinngisaminnik asannilersoorfiginnillutik sammisaqarnertik pissutigalugu allasiorsimapput.
12 Suliffimmi taamatut sammisaqalertoqarsinnaavoq. Apersuilluni misissuinermi paasineqarpoq arnat allasiorsimasut affaannit amerlanerusut angutillu allasiorsimasut 75 procentingajaat suleqatiminnik allasioqateqarsimasut. Illit suliffinni angutaaguit arnamik arnaaguillu angummik suleqateqartariaqarpit? Taamaappat, illit taakkununnga attaveqarnerit qanoq ippa? Attaveqatigiinnersi asannilersoornissinnik kinguneqannginniassammat killiliisarpit? Assersuutigalugu qatanngutip arnap immaqa suleqatini angut oqaloqatigigajuppaa. Immaqa suleqatini taanna ima tatigitigalugulu ikinngutigilluartigilerpaa nammineq aappanilu ajornartorsiutitik pillugit taanna oqaluttuuttalerlugu. Imaassinnaavorluunniit qatanngutip angutip suleqatini arnaq ikinngutigileraa imalu eqqarsartalerluni: “Qanoq isumaqarnera pingaartittarpaa oqaluukkaangannilu tusarnaartarluni. Aamma ataqqivaanga. Nuliara aamma taamaassagaluarami!” Kristumiut taakkua pissutsini taama ittuni qanoq allasioriaannaatigisinnaanerat erseqqingaarami, ilaa?
13. Qanoq ililluni ilagiinni naleqqutinngitsumik sammisaqalertoqarsinnaava?
13 Aamma ilagiinni naleqqutinngitsumik sammisaqalertoqarsinnaavoq. Pisimasuiit makku eqqarsaatigeriakkit. Daniel nulialu, Sarah, pioneriupput. * Daniel oqaluttuarpoq utoqqaanertaalluni ilagiinnilu imminut suliassiissutigineqartut tamaasa suliarisarlugit. Angutinik inuusuttunik tallimanik Biibilimik atuaqqissaaqateqartarpoq, taakkualu ilaat pingasut kuisipput. Qatanngutit angutit kuiserlaat taakku ikiorneqarnissaminnik assut pisariaqartitsisarput. Daniel ilagiinni ulapeqimmat Sarah-p taakku ikiortarpai. Sarah-li aamma soqutigineqarnissani pisariaqartittarpaa, Danielillu atuaqqissaaqatigisartagaasa tamanna eqqumaffigaat. Pissutsit taama ilimmata navianarsivoq. Daniel ima oqaluttuarpoq: ‘Nuliara qaammaterpassuarni nukini tamaasa atorlugit allanik ikiuisarami anersaakkut misigissutsikkullu nukeeruppoq. Tamatuma nalaani sivisuumik isumassornikuunngilara. Tamannalu ajorluinnartumik kinguneqarpoq. Nuliara angutit inuusuttut atuaqqissaaqatigisarnikuusama ilaannik allasioqateqarpoq. Ima ulapitsigivunga nuliama anersaakkut sanngiillisimanera malugisimanagu.’ Taamatut alianartumik pisoqarnissaa qanoq ililluni pinngitsoortinneqarsinnaava?
14, 15. Aappariit kristumiut allasiunnginnissaminnut suut iluaqutigisinnaavaat?
14 Allasiorneq napitiffigiumanngikkukku aapparmut ilumoorfiginninnerup qanoq paasisariaqarnera eqqarsaatigeqqissaartariaqarpat. Jiisusi ima oqarpoq: “[Guutip] ataqatigiilersitai inuup avissaartissanngilai.” (Matthæusi 19:6) Isumaqanngisaannartariaqarputit ilagiinni suliassatit illit aappannit pingaaruteqarnerusut. Aappat pingaaruteqanngitsunik pissuteqarlutit qimassimasarukku, aappariinnersi sanngiilliartulersinnaavoq allasiornissamullu ussernartorsiulersinnaallusi, tamannalu ingasattumik ajortuliornissinnik kinguneqarsinnaavoq.
15 Utoqqaanertaaguit ilagiinnik isumassueqataasussaavutit. Apustili Petrusi ima allappoq: “Guutip savaataanik ilissinniittunik paarsisuuniaritsi, paarisigit tamatumunnga pinngitsaalisaasutut pinnasi namminerli kajumissutsissinnit.” (1 Petrusi 5:2) Ilagiinniittunik sumiginnaasussaanngilatit. Imali utoqqaanertaalluarniartigissanngilatit uiulluarsinnaanak. Qatanngutinik ilagiinniittunik ima ikiuiniartigiguit nuliat anersaakkut isumaginngitsoortarlugu, aappariinnersi navianartorsiulersinnaavoq. Daniel, siusinnerusukkut eqqaaneqartoq, ima oqarpoq: ‘Sumulluunniit iluaqutaanavianngilaq akisussaaffiit ima ulapputigitigisaraanni ilaquttanut piffissaarulluni.’
16, 17. (a) Aappariit kristumiut qaninniarumaneqannginnertik tamanut ersersinniarlugu suliffimminni susinnaappat? (b) Allaaserisat atuagassiaatitsinniittut suut kristumiut allasiunnginnissaminnut iluaqutigisinnaavaat?
16 Atuagassiani Napasuliaq Alapernaarsuiffik-mi aamma Vågn op!-imi pitsaasunik siunnersuuterpassuaqarpoq aappariit kristumiut allasiunnginnissaminnut iluaqutissaannik. Napasuliaq Alapernaarsuiffik-imi 1. oktobari 2006-imoortumi ima siunnersuuteqarpoq: “Suliffimmi allamilu asannilersuussutaasinnaasut mianersorfigikkit. Assersuutigalugu arnaagaanni angummik angutaagaannilu arnamik qanimut suleqateqarluni qaangiuttoorluni sulineq, ajortumik iliornissamut ussernartorsiulernermik kinguneqarsinnaavoq. Ueqaravit imaluunniit nuliaqaravit oqaloriaatsikkut pissusilersornikkullu paasitittariaqarpat qaninniarneqarumanngilluinnarlutit. Guutimut tunniusimanermik noqqaassutiginnittuugavit, qaninniagaqarujoornikkut peqqusaarpaluttumilluunniit atisalersoriaaseqarnikkut naleqqutinngitsumik malugineqarnissat soorunalimi kissaatiginngilat. . . . Aappavit meeqqavillu assinginik suliffinniititaqarnerit ilinnut allanullu eqqaasitsissutaassapput illit ilaquttannik pingaarnerpaatitsininnik. Aapparinngisannut ajuutigeqqusaanngisaannarnissat — aapparinngisavilluunniit ilinnik ajuutiginnilluni soqutiginninneranik iluarinniinnanngisaannarnissat — aalajangiusimajuk.”
17 Allaaserisami “Troskab mellem ægtefæller — hvad det indebærer?” Vågn op!-imi apriili 2009-moortumi aapparinngisaq pillugu atoqatigiinnermut tunngasunik eqqarsaateqarnaveersaarnissaq siunnersuutigineqarpoq. Allaaserisami aamma eqqaaneqarpoq atoqatigiinnermut tunngasunik taamatut eqqarsaateqartaraanni allasiornissaq ilimanaateqarnerusartoq. (Jaaku 1:14, 15) Aappaqaruit, illit aappallu silatusaassaasi allaaserisat tamakkununnga tunngasut atuartarussigit. Jehovap aappariinneq pilersitaraa, aappariinnerlu illernartuuvoq. Illit aappallu aappariinnissinnik oqaloqatigiissutiginnittarnissassinnut piffissaqartaritsi. Taamaalillusi ersersissavarsi Guutip illernartutut isigisaanik pingaartitsillusi. — 1 Mosesi 2:21-24.
18, 19. (a) Allasiorneq ajortumik qanoq kinguneqartarpa? (b) Aapparmut ilumoorfiginninneq sunik iluaqutissartaqarpa?
18 Naleqqutinngitsumik sammisaqalernissannut ussernartorsioruit, kinguaassiuutitigut inuunerluttuliornerup allasiornerullu qanoq ajoqutaasinnaatiginerat eqqarsaatigiuk. (Ussatit 7:22, 23; Galatiamiut 6:7) Inuit kinguaassiuutitigut inuunerluttut Jehovamit iluarisaajunnaartarput, aamma aapparminnut naalliuutissiisarput imminullu naalliuutissittarlutik. (Atuakkit Malaki 2:13, 14). Aamma minguitsumik inuunerup iluaqutissartarpassui eqqarsaatigikkit. Naassaanngitsumik inuunissamik neriugisaqarputit, aamma pitsaanerpaamik inooriaaseqarputit ilerasuuteqarnallu inuullutit. — Atuakkit Ussatit 3:1, 2.
19 Tussiaasiortoq allappoq Guutip inatsisaanik nuannarinnillutillu maleruaasut ‘pilluangaarumaartut’, imaluunniit eqqissingaarumaartut, naakkiuffissaqarnavianngitsullu. (Tussiaat 119:165) Taamaattumik sallusuissut nuannariuk, kajumissaarullu una maliguk: “Sianiginiarsiuk qanoq inuunersusi, siuneqanngitsutut pinnasi, siuneqartutulli iliorlusi.” (Efesosimiut 5:15, 16) Ullumikkut Saatani assigiinngitsorpassuarnik napiaaniuteqartarpoq Guutimut kiffaasut pisariumallugit. Jehovalli ‘atasinnaajumalluta’ imminullu illersorsinnaajumalluta pisariaqartitatsinnik tamanik tuninikuuaatigut Saatanip napiaaniutaanut napitinngisaannarniassagatta. — Efesosimiut 6:11, 16.
[Quppernerup ataani ilanngussaq]
^ imm. 13 Atit allanngortitaapput.
[Atuaqqissaarnermi apeqqutit]
[Qupp. 29-mi assiliartaq]
Pigisaleritunermit ipititaaqinak, tamanna Jehovamut attaveqarluarunnaassutigisinnaagakku
[Qupp. 32-mi assiliartaq]
Qaninniarujuugaqarneq qaninniarujoorneqarnermilluunniit akuerinninneq allasiornermik kinguneqarsinnaavoq
