Allaaserisami matumani immaqa apeqqutigisarnikuusatit taakkualu akissutaat illit nammineq Biibilinni sumi takusinnaaneritit sammineqassapput. Akissutissarsiorninni Jehovap Nalunaajaasuisa ikiorusuppaatsit.

1. Inngilit pillugit sunik ilisimasaqarpugut?

Inngilit pinngortitaapput anersaajusut qilammiittut. Uumassusiliupput uagutsinnit qutsinnerusumik inissisimaffillit. Guutip ilumoortup nammineq anersaajusup nunarsuaq pinngortinngikkallaramiuk inngilit pinngortippai. (Jobi 38:4, 7; Matthæusi 18:10) Jehovap inngilit aalajaatsut millionillit najortigai. — Atuakkit Tussiaat 103:20, 21; Danieli 7:9, 10.

2. Inngilit inunnik ikiuisarpat?

Inngilit angut naapertuilluartoq Lotimik atilik ikiorpaat. Loti illoqarfimmi illoqarfiup inuisa ajussusiat pissutigalugu Guutip piuneerunniagaani najugaqarpoq. Inngilit marluk Loti ilaqutaalu mianersoqquaat qimaaqqullugillu. Ilaasa quiasaaginnarsorigamikku mianersoqqussut sumiginnarpaat. Lotili paniilu Guutip inngilit aqqutigalugit mianersoqqussutaa malillugu ilioramik aniguipput. — Atuakkit 1 Mosesi 19:1, 13-17, 26.

Biibili naapertorlugu ullumikkut inngilit inunnik ikiuisarput Guutip naalagaaffia pillugu nutaarsiassamik nuannersumik aalajaallutik oqaluussissutiginnittunik siulersuinermikkut. (Matthæusi 24:14) Nutaarsiassaq nuannersoq mianersoqqussutitaqarpoq. Taanna quiasaarutaanngilaq soorlu Lotimut mianersoqqussut quiasaarutaanngitsoq. Inngilimmi aqqutigalugit Guutimit mianersoqqussutaavoq. — Atuakkit Saqqummersitat 1:1; 14:6, 7.

Misilinneqarnitsinni Guutip inngilit atorlugit nakussatsissinnaavaatigut. Inngili atorlugu Jiisusi nakussatsippaa. — Atuakkit Lukasi 22:41-43.

Qanittukkut Guutip inngilit allatut atussavai inuit ajortut naalliutsitsisartut suujunnaarsikkunigit. Tamanna inuit ilorraallaatigissavaat. — Atuakkit 2 Thessalonikamiut 1:6-8.

  3. Anersaapiluit uagutsinnik qanoq sunniisarpat?

Nunarsuarmi inuppassuit Guutimut naalannginnermikkut ajortuliorsimanerattut inngilerpassuittaaq qilammi Guutimut pikitsitsisimapput. (2 Petrusi 2:4) Inngilit naalanngitsut anersaapilunnik taaneqartarput. Taakkua Saatani Diaavulu nuimanersaraat. Saatani anersaapiluilu inuiannik tammartitsisarput. — Atuaruk Saqqummersitat 12:9.

Saatanip inuit sunnerniarlugit Guutimillu tunussitinniarlugit niuertut peqquserluttut, naalakkersuisut inuit pilersitaat upperisarsiornerillu eqqunngitsut atortarsimavai. Taamaattumik Saatani naapertuilluanngitsuliornernut, nakuusernernut naalliuutinullu inuiaat erloqissutigisaannut pisuuvoq. — Atuaruk 1 Johannesi 5:19.

4. Anersaapiluit inunnik qanoq tammartitsisarpat?

Saatanip inuppassuit salloqittarsimavai ajoqersuummik toqusut anersaanngorlutik inunnik attaveqarfiginnissinnaanerannik. Biibilimili allassimavoq toqusimasut sumilluunniit iliuuseqarsinnaanngitsut. (Oqaluussisartup oqaasii 9:5) Anersaapiluilli inunnik salloqittaasarput asasap toqusimasup nipaanik ilaarsinermikkut. (Esaja 8:19) Anersaapiluit aamma inunnik tammartitsisarput anersaanut attaveqartartut, siulittuisartut, anersaarsiortut ullorissallu najoqqutaralugit siulittuisartut aqqutigalugit. Guutip oqaasiani tamakkununnga tunngasut uagutsinnut ingalassimalluinnaqquneqarput. Taamaattumik anersaapilunnut anersaarsiornermullu tunngasut tamaasa pigiunnaartariaqarpavut. — Atuakkit 5 Mosesi 18:10, 11; Apustilit Suliaat 19:19.

Jehova asagutsigu anersaapiluit ersigisariaqanngilavut. Guutip oqaasianik atuaqqissaartarutta ilikkakkavullu malillugit inuugutta Diaavulu akiorsinnaallugulu Guutimut qanillisinnaavugut. Jehova anersaapilunnit pissaaneqarneruvoq. Annikilliornermi taassuma inngiliisa aalajaatsut nakussatsissinnaavaatigut. — Atuakkit Tussiaat 34:8; Jaaku 4:7, 8.

Paasisaqarnerorusukkuit atuaruk kapitali 10 atuakkami uani, Biibilimi sorpiaat ajoqersuutigineqarpat? Jehovap Nalunaajaasuinit saqqummersinneqartoq.