Diaavulup napiaaniutai mianersorfigikkit!

“[Aniguigitsi] Diaavulup nigaliaanit.” — 2 TIMOTHEUSI 2:26.

QANOQ AKISSAVIT?

Allanik isornartorsiuiuaannaruit qanoq iliortariaqarpit?

Pilatusip Petrusillu nalaataat allat sunniiniarnerannut inunnullu qununermut nakkaannarnermut tunngatillugu qanoq ilinniutigisinnaavavut?

Qanoq ilillutit imminut ingasattumik eqqartuunnaveersaarsinnaavit?

1, 2. Diaavulup napiaaniutaasa ilaat suut allaaserisami matumani sammissavavut?

DIAAVULU malunnaarsaarluni Jehovap kiffaanik malersuisarpoq. Piniartutulli pisaminik toqutsisartutut periaaseqartuaannarneq ajorpoq. Diaavulup anguniagarisarpaa pisami uumatillugu pisarinissaa taassumalu pissaaneqarfigilluinnalernissaa. — Atuakkit 2 Timotheusi 2:24-26.

² Meqqulinnik uumasorniaq uumasoq uumatillugu pisariumallugu arlalinnik napiaaniuteqarsinnaavoq. Ikuallatsitsilluni uumasoq inaanit anisinniarsinnaavaa pisariuminarneruniassammat. Imaluunniit pullasiorsinnaavoq uumasup nakutitaalluni pisaritiffigisinnaasaanik. Uumasup taanna attoruniuk nakkarfigitilluni sequmilluinnassaaq. Diaavuluttaaq Guutip kiffai pisariumallugit napiaaniuteqartarpoq. Napitikkumanngikkutta Saatanip napiaaniutaasa sumiinnerannik mianersoqqussutit eqqumaffigisariaqarpavut. Allaaserisami matumani Diaavulup Guutip innuttaanut iluatsittumik napititsiniutigisarsimasaasa ilaat pingasut qanoq ililluta mianersorfigisinnaanerivut sammissavarput. Taakku tassaapput (1) eqqarsaqqaarani oqalunneq, (2) inunnut qununeq allallu sunniiniarnerat, kiisalu (3) imminut ingasattumik eqqartuunneq. Allaaserisami tulliuttumi Saatanip napiaaniutigisartagai suli allat marluk sammineqassapput.

EQQARSAQQAARANI OQALUNNEQ — INNEQ IKIKKAASOQ

3, 4. Oqqatsinnik aqutsinngikkutta qanoq pisoqarsinnaava? Assersuuteqarit.

³ Uumasut orpippassuarni inaannit aniatikkumallugit pisariuminarnerutikkumallugillu piniartoq orpeqarfiup ilaanik ikuallatsitsilaarsinnaavoq. Diaavulu ilagiinni kristumiuni ikuallattoqalersitserusupporlusooq. Taassuma iluatsitsiguni ilagiinniittut ilagiinnit isumannaatsunit qimagutitissavai, pisareriaannanngussavaalu. Uagut qanoq ililluta taanna ikiortoorsinnaavarput taamaalillutalu napiaaniutaanut napitilluta?

 ⁴ Ajoqersukkap Jaakup oqaq innermut assersuuppaa. (Atuakkit Jaaku 3:6-8). Oqarput aqunngikkutsigu ilagiinni ikuallatsitsilersinnaavugullusooq. Qanoq ililluta? Ima pisoqartoq takorlooriaruk: Ilagiit ataatsimiinneranni nalunaarutigineqarpoq qatanngut arnaq pionerinngorsimasoq. Ataatsimiinnerup kingorna oqaluussisartut marluk tamanna eqqartorpaat. Aappaata tamanna nuannaarutigaa ingerlalluarnissaalu neriuutiginerarlugu. Aappaa oqarpoq qatanngut arnaq taanna pionerinngorsimasinnaasoq ilagiinni nuimanerorusukkami. Oqaluussisartut taakkua arlaat sorleq ikinngutigerusussaviuk? Erseqqippoq sorleq oqaatsimigut ilagiinnik ajornartorsiortitsilersinnaasoq.

5. Eqqarsaqqaarata oqalunnaveersaarusukkutta susariaqarpugut?

⁵ Eqqarsaqqaarani oqalunneq innertut ikikkaasutut ittoq qanoq ililluta unitsissinnaavarput? Jiisusi ima oqarpoq: “[Uummatip] ulikkaarutaanik qaneq utsersortarpoq.” (Matthæusi 12:34) Siullermik, uummaterput misissortariaqarparput. Ineriartornanngitsunik oqalunnitsinnut pissutaasinnaasunik misigissuseqarnaveersaartariaqarpugut. Assersuutigalugu qatanngut angut ilagiinni iliuuseqarnerunissaminik ilungersuutiginnittoq tusaamagaangatsigu eqqarsartarpugut taamaaliortoq Jehova nuannaartikkumagamiuk? Imaluunniit imminuinnaq eqqarsaatigaluni taamaaliorsoraarput? Allat iliuusiinik apeqquseeqqajaasarutta pingaaruteqarpoq eqqaamassallugu Saatani Guutip kiffaata aalajaatsup Jobip pissutiginiagaanik apeqqusiisoq. (Jobi 1:9-11) Qatanngutitsinnik pasilleeqqajaanata sooq taanna isorinerlugu eqqarsaatigeqqissaartariaqarparput. Taassuma isorinissaanut ilumut pissutissaqarluarpugut? Imaluunniit silarsuarmi asanninngissuseq ulluni kingullerni makkunani sunnertissutigisimavarput? — 2 Timotheusi 3:1-4.

6, 7. (a) Allanik isornartorsiuisarnitsinnut suut pissutaasinnaappat? (b) Allat oqaasii annerigutsigit susariaqarpugut?

⁶ Allanik isornartorsiuisarnitsinnut pissutaasinnaasut allat eqqarsaatigeriakkit. Imaassinnaavoq uagut iliuutsivut allanut malunnarnerutikkusukkivut. Taava immaqa allanik isornartorsiuinitsigut allanit pitsaanerusutut misiginiarsarivugut. Imaassinnaavorluunniit iliuuserisariaqaraluakkatta iliuuserinnginnissaannut patsisissarsiortugut. Allanik isornartorsiuinerput makitallutaluunniit sinnganitsinnik pissuteqaraluarpat imminulluunniit tatiginnginnitsinnik pissuteqaraluarpat, aserorsaataangaassaaq.

⁷ Immaqa misigivugut allanik isornartorsiuinissamut pissutissaqarluarluta. Immaqa taakkua uagut pilluta oqaasii annerisimavavut. Taakkua annersissimagaluarpatigulluunniit, taakkuninnga akiniaaneq eqqortuliornerussanngilaq. Pissutsinik ajornerulersitsiinnassaaq Guutip piumasaatut iliornata Diaavulup piumasaatut iliussagatta. (2 Timotheusi 2:26) Silatusaassaagut Jiisusi ilaarutsigu. Taanna oqaasipiluunneqaraangami ‘oqaasipiluummik akissuteqarneq ajorpoq’. “Pineqarninili naapertuilluartumik eqqartuussisumut isumagisassanngortippaa.” (1 Petrusi 2:21-23) Jiisusip qularutiginngilaa  Jehovap kissaatigisamisut piffissarlu aalajangikkani nalliuppat pissutsit iliuuseqarfigiumaarai. Uaguttaaq Guuti tatigisariaqarparput. Allanut qiimmaallaataasumik oqaaseqartarutta ilagiinni eqqissinermik ataasiussusermillu siuarsaaqataassaagut. — Atuakkit Efesosimiut 4:1-3.

INUNNUT QUNUNEQ ALLALLU SUNNIINIARNERAT — NAPIANIUTAASUT

8, 9. Sooq Pilatusip Jiisusi toqumut eqqartuuppaa?

⁸ Uumasoq napiaaniummut napitissimasoq piumasamisut iliorsinnaajunnaartarpoq. Inuup qununermut allallu sunniiniarnerannut nakkaannartup inuunini ilaannakuusumik aqulertarpaa. (Atuaruk Ussatit 29:25). Angutit marluk inunnut qununermut allallu sunniiniarnerannut nakkaannartut sammeriartigit taakkualu nalaataat qanoq ilinniutigisinnaanerlutigit eqqarsaatigalugu.

⁹ Romamiut naalagaatitaata Pontiusi-Pilatusip Jiisusi pisuussuteqanngitsoq nalunngilaa, taamaattumillu ajortumik perusuppasinngilaa. Pilatusip allaat Jiisusi ‘toqumik pillarneqaataasinnaasumik iliuuseqarsimannginnerarpaa’. Taamaakkaluartorli toqumut eqqartuuppaa. Sooq? Allat sunniiniarnerannut nakkaannarami. (Lukasi 23:15, 21-25) Akerlilersuisut taakkua Pilatusi piumasamittut iliortinniarsaraat ima oqarlutik: “Taanna iperarukku kaasarimut ikinngutaassanngilatit.” (Johannesi 19:12) Pilatusip annilaangagisimasinnaavaa Kristusi iperagaatikkuniuk inissisimaffimmi annaanissaa imaluunniit allaat toqutaanissani. Allat sunniiniarnerannut nakkaannarpoq Diaavulullu piumasaatut iliorluni.

10. Sooq Petrusi Kristusimik miserratiginnippa?

¹⁰ Apustili Petrusi Jiisusip ikinngutiginerpaasaasa ilagaat. Taassuma kikkut tamarmik takkuanni Jiisusip Missiarsiunera oqaatigiumasarpaa. (Matthæusi 16:16) Petrusi ilumoorfiginnittuarpoq ajoqersukkat allat Jiisusip oqaasiinik paasinninnatik taanna qimammassuk. (Johannesi 6:66-69) Akeraasullu Jiisusi tigusariartormassuk Petrusip panalersorluni taanna illersorpaa. (Johannesi 18:10, 11) Kingusinnerusukkulli Petrusi inunnut qununermut nakkaannarpoq Jiisusimillu ilisarisimanninnini miserratigalugu. Apustili taanna inunnut qununeq napitiffigillatsiarpaa sapiillunilu iliuuseqarnissaminut akornutigilerlugu. — Matthæusi 26:74, 75.

11. Sunniiniutigineqartartut suut akiortariaqarpavut?

¹¹ Kristumiut tamarmik Guutip iluarinngisaanik iliornissamut sunnerniarneqarnerminnut akiuuttariaqarput. Sulisitsisutta allalluunniit peqquserlutsinniarlutaluunniit kinguaassiuutitigut inuunerlutsinniarsinnaavaatigut. Atuartut kristumiut inuusuttoqatiminnit misilitsinnerni peqquserlutsinniarneqarsinnaapput, pornografiimik isiginnaartinniarneqarsinnaallutik, pujortartinniarneqarsinnaallutik, ikiaroornartutortinniarneqarsinnaallutik, aalakoortinniarneqarsinnaallutik kinguaassiuutitigulluunniit inuunerluttuliortinniarneqarsinnaallutik. Taamaammat inunnut qununeq Jehovallu iluarinngisaanik iliornissamut sunnerniarneqarneq napitiffigiumanagit suut iluaqutigisinnaavavut?

12. Pilatusip Petrusillu nalaataat qanoq ilinniutigisinnaavavut?

¹² Pilatusip Petrusillu nalaataat qanoq ilinniutigisinnaavavut? Pilatusi Kristusi pillugu ilisimasakippoq. Nalunngilaali Jiisusi pinngitsuullunilu nalinginnaanngitsuusoq. Pilatusi maniguunnanilu Guutimik ilumoortumik asanninngilaq. Taamaattumik Diaavulup Pilatusip uumatillugulusooq pisarinissaa ajornartoqartinngilaa. Petrusi eqqorluartumik ilisimasaqarlunilu Guutimik asannippoq. Ilaannikkulli Petrusi anneruniartarlunilu inunnut qunusarpoq allallu sunniiniarnerannut nakkaannartarluni. Jiisusip tigusaannginnerani Petrusi ima oqarataarpoq: “Tamarmilluunniit tunukkaluarpatsit uanga taamaaliussanngilanga.” (Markusi 14:29) Petrusi tussiaasiortup pisimaneratut Guutimik tatiginnissimasuuguni misilinneqarnissaminut piareersimanerusimassagaluarpoq. Tussiaasiortoq taanna ima erinarsorpoq: “Naalakkap najormanga siooragisassaqanngilanga, inuit qanoq iliorfigisinnaagaminnga?” (Tussiaat 118:6) Jiisusip nunarsuarmi inuunermini unnummi kingullermi Petrusi apustilillu allat marluk Naatsiivimmut Getsemanemukaqatigai. Jiisusip taakku eqqumaqquai, Petrusili apustileqataalu  sinilerput. Jiisusip itersaramigit ima oqarfigai: “Eqqumagitsi, qinugitsilu usserneqaqqunasi.” (Markusi 14:38) Petrusili sinileqqittarpoq, kingusinnerusukkullu allat sunniiniarnerannut inunnullu qununermut nakkaannarpoq.

13. Eqqunngitsuliornissamut sunnerniarneqarnitsinnut nakkaannannginnissarput qanoq ililluta qulakkeersinnaavarput?

¹³ Pilatusip Petrusillu nalaataat ima ilinniutigaavut, allat sunniiniarnerannut nakkaannarumanata eqqorluartumik ilisimasaqartariaqarlutalu maniguuttuusariaqarlutalu anneruniajuitsuusariaqarlutalu Jehovamik asannillutalu mianerinnittuusariaqartugut. Uppernerput eqqorluartumik ilisimasaqarnermik tunngaveqarpat upperisatta eqqartornissaannut sapiissuseqassaagut. Tamannalu allat sunniiniarnerannut inunnullu qununermut nakkaannannginnissamut iluaqutigissavarput. Imminut nukittunerusorinngisaannartariaqarpugut. Maniguuttariaqarpugulli nakkaannarumanatalu Guutimit nakussatsinneqartariaqarnerput miserratiginagu. Jehova qinnuigisariaqarparput anersaaminik tuneqqulluta. Taassuminngalu asanninnerput kajumississutigisariaqarparput taassuma najoqqutassiaanik maleruaanissamut Jehovamillu tusaamasaanerlutsitsilersinnaasunik iliornaveersaarnissamut. Aamma sunnerniarneqannginnitsinni piareersimaniartariaqarpugut. Assersuutigalugu meeqqavut qinoqatigisariaqarlugillu piareersaqatigisariaqarpavut meeqqanit allanit eqqunngitsumik iliortinniarneqaraangamik sussanerlutik ilisimareertarniassammassuk. — 2 Korinthimiut 13:7. *

IMMINUT INGASATTUMIK EQQARTUUNNEQ — PULLAT ASERUISARTOQ

14. Siornatigut kukkussutigisimasatsinnut tunngatillugu Diaavulup qanoq isumaqalersikkusuppaatigut?

¹⁴ Ilaannikkut pullatit ilaat uumasup aqqutigisinnaasaanut ima inissinneqartarput, ujarassuaq qisussuarluunniit allunaasamik nivinngarlugu, allunaasaq uumasumit attorneqaraangat ujarassuaq qisussuarluunniit uumasumut nakkartussanngorlugu, uumasoq sequmilluinnarlugu. Imminut ingasattumik eqqartuuttarutta ujarassuarmit qisussuarmilluunniit nakkarfigitittutullusooq misigisinnaavugut. Assersuutigalugu kukkussutigisimasarput eqqarsaatigilerlugu immaqa ‘nukeeruttutut’ misigisinnaavugut. (Atuakkit Tussiaat 38:4-6, 9). Saatanip isumaqalersikkusuppaatigut iliuuserisimasavut ajorsimangaarmata Jehovamit isumakkeerfigineqarsinnaanngitsugut Guutillu najoqqutassiaanik maleruaasinnaanngitsugut.

15, 16. Qanoq ilillutit imminut ingasattumik eqqartuunnaveersaarsinnaavit?

¹⁵ Qanoq ilillutit imminut ingasattumik eqqartuunnaveersaarsinnaavit? Ingasattumik ajortuliorsimaguit Jehovamut attaveqarluaqqilerumallutit massakkut iliuuseqartariaqarputit. Utoqqaanertat saaffigikkit ikioqqullutit. (Jaaku 5:14-16) ‘Kukkunerit aaqqinniarlugu’ (NW) sapinngisat tamaat iliuuseqarit. (2 Korinthimiut 7:11) Perorsaatissinneqaruit nikalloqinak. Perorsaatissinneqarnerit Jehovamit asaneqarninnut ersiutaavoq. (Hebræerit 12:6) Ajortuliarisimasavit ajortuliareqqinnginnissaa aalajangiusimajuk ajortuliorninnillu kinguneqartunik ileqquliusseqqinnginnissat qulakkeerlugu. Allamik isumataarlutillu Guutimut saareeruit, imaluunniit Guutip iluarisaatut iliortaleqqereeruit, Jiisusip Kristusip utertitsissutitut pilliuteqarneratigut ajortuliannik isumakkeerfigineqarsinnaanerit upperisariaqarpat. — 1 Johannesi 4:9, 14.

¹⁶ Inuit ilaat isumakkeerfigineqareeraluarlutik imminut eqqartuuttuartarput. Illit taamatut imminut eqqartuuttuaruit, eqqaamajuk Jehovap Petrusi apustilillu allat isumakkeerfigigai, taakkua Jiisusi pisariaqartitsinerpaaffiani qimakkaluaraat. Jehovap allaat angut ingasattumik inuunerluttuliorsimanini pissutigalugu ilaajunnaarsitaasimasoq kingusinnerusukkulli peqqissimisoq isumakkeerfigaa. (1 Korinthimiut 5:1-5; 2 Korinthimiut 2:6-8) Biibilimi allaatigineqarput inuit ajortuliorujussuarsimasut peqqissiminertilli pissutigalugu Guutimit isumakkeerfigineqartut.  — 2 Nalunaarsuutit 33:2, 10-13; 1 Korinthimiut 6:9-11.

17. Utertitsissut tamatta immikkut qanoq iluaqutigisinnaavarput?

¹⁷ Jehovap isumakkeerfigalutillu ajortuliatit puiorumaarpai peqqissimiguit ilinnillu nallittuiumaarnera ilumut upperigukku. Illit Jiisusip utertitsissutitut pilliutaa Jehovap ajortuliannik isumakkeerfiginninnissaanut iluaqutaanngissoraajuk? Taamaassorigukku Saatanip napiaaniutaasa ilaannut napitissimassaatit. Diaavulup isumaqalersikkusuppaatit utertitsissut Jehovap ajortulianik tamanik isumakkeerfiginninnissaanut iluaqutaanngitsoq. Ajortuliorsimasulli peqqissimigunik ilumut isumakkeerfigilluinnarneqarsinnaapput. (Ussatit 24:16) Utertitsissut upperigukku imminut ingasattumik eqqartuunnaveersaarsinnaassaatit Guutimullu uummatikkut, isumakkut tarnikkullu iluunngarlutit kiffartornissamut nukissaqarsinnaassallutit. — Matthæusi 22:37.

SAATANIP NAPIAANIUTAI EQQUMAFFIGAAVUT

18. Diaavulup napiaaniutaanut qanoq ililluta napitinnaveersaarsinnaavugut?

¹⁸ Saatanip napiaaniummut sorlermut napitinnissarput soqutiginngilaa, pisarigunitigulli naammagaa. Saatanip napiaaniutai ilisimasaqarfigigatsigit taassumunnga pisaritinnaveersaarsinnaavugut. (2 Korinthimiut 2:10, 11) Misilinneqarnivut naammagalugit atorsinnaaqqullugit ilisimassuseq qinnutigisarutsigu pisaritinnavianngilagut. Ajoqersugaq Jaaku ima allappoq: “Ilisimassutsimigulli inorsartumik ilaqarussi taassuma qinnutigissavaa [qinnutigiuassavaa, NW] ilisimassuseq Guutimit avoqqaarlernani naammalluinnartunik tamanut tunisisartumit, taava piumaarpaa.” (Jaaku 1:5) Qinnutitsinnut naapertuuttumik iliuuseqartariaqarpugut nammineq atuaqqissaartuartarnitsigut najoqqutassianullu Biibilimiittunut naapertuuttumik inuunitsigut. Biibililersaarutit inussiaqatigiinnit aalajaallutillu silatuuneersut aqqutigalugit Diaavulup napiaaniutai pillugit paasisaqartarpugut taakkuninngalu ingalassimanninnissamut iluaqutissarsisarluta.

19, 20. Sooq ajortunik uumiginnittariaqarpugut?

¹⁹ Qinuneq Biibilimillu atuaqqissaarneq ajunngitsunik nuannarinninnerulernissamut iluaqutigisarpavut. Ajortunilli uumiginninnissamik ilinniarnissaq taamatulli pingaaruteqartigaaq. (Tussiaat 97:10) Namminissarsiorluta kissaatigisaqarnaveersaarsinnaavugut taamatut kissaatigisaqarnerup qanoq kingunipiloqarsinnaanera eqqarsaatigeqqissaartarutsigu. (Jaaku 1:14, 15) Ajortunik uumiginninnissaq ajunngitsunillu nuannarisaqarnissaq ilinniarutsigu Saatanip napititsiniutigisartagai ussernartorsiorfiginavianngilavut, taakkua uumigiumaaratsigit.

²⁰ Guutip Saatanimit pisarineqannginniassagatta ikiormatigut qujamasungaarpugut! Jehovap ‘ajortumit’ annaakkumalluta anersaani, Oqaatsini peqatigiissortanilu atortarpai. (Matthæusi 6:13) Allaaserisami tulliuttumi napiaaniutit allat marluk Diaavulup Guutip kiffaanik pisarinnissutigisarsimasai qanoq ililluta napitiffiginaveersaarsinnaagivut misissussavarput.

[Quppernerup ataani ilanngussaq]

[Atuaqqissaarnermi apeqqutit]

[Qupp. 24-mi assiliartaq]

Eqqarsaqqaarani oqalunneq ilagiinni ajornartorsiuterpassuaqalerneranik kinguneqarsinnaavoq

[Qupp. 27-mi assiliartaq]

Sooq imminut ingasattumik eqqartuuttariaqanngilatit?