“Najorpassi”

“Inuppassuit . . . angalaarumaarput, paasisimasaqarnerli annertusiartussaaq.” — DANIELI 12:4.

QANOQ AKISSAVIT?

Ullumikkut inuit sallusuissummik qanoq paasinnilerpat?

“Inuppassuit” sallusuissut qanoq upperilerpaat?

Eqqorluartumik ilisimasaqarneq qanoq ‘annertusiartorpa’?

1, 2. (a) Qanoq nalunngilarput Jiisusip ullumikkut najoraatigut siunissamilu najussagaatigut? (b) Danieli 12:4 naapertorlugu Allakkanik peqqissaartumik atuaqqissaarneq sumik kinguneqassava?

TAKORLOORIARUK paratiisimiillutit. Ullaat tamaasa itertarputit inuummarillutillu qasuersimallutit. Annerisaqanngilatit, peqqiilliuutaarusimavutillu. Isigisinnaassutsit, tusaasinnaassutsit, naamasinnaassutsit malugissutitillu tamarmik ajoquteqanngilluinnarput. Nukissaqaqaatit, pissanganartumik suliassaqarputit, ikinnguterpassuaqarputit isumakuluuteqanngivillutillu. Pilluaqqussutit tamakku Guutip naalagaaffiata aqutsinerani misigiumaarpatit. Kunngitta, Jiisusip Kristusip, inuit pilluaqqussavai Jehovalu pillugu tamaasa ilinniartissallugit.

² Taamanikkussamut Jehovap kiffani aalajaatsut silarsuaq tamakkerlugu ilinniartitsineranni najussavai. Allaammi itsarsuarli Guuti erneralu aalajaatsunik tapersersuiuartarsimapput. Jiisusip qilaliartinnani ajoqersukkani oqarfigai najussallugit. (Atuakkit Matthæusi 28:19, 20). Jiisusip neriorsuutaanik upperinninnerulerniarluta Danielip Babylonimi ukiut 2500-t sinnerlugit matuma siorna siulittuutigisimasaa sammissavarput. Nalerput pillugu ima allappoq: “Inuppassuit nalornillutik tamanut tamaanga angalaarumaarput, paasisimasaqarnerli annertusiartussaaq.” (Danieli 12:4) Oqariartaaseq “nalornillutik tamanut tamaanga angalaarumaarput” assersuutaavoq, taamaattumillu ima nutserneqarsimavoq: ‘Allakkat qupperartarumaarpaat’ (1900) imaluunniit “misissoqqissaarumaarpaat” (NW). Siulittuummit tamatumannga erserpoq Allakkanik peqqissaartumik atuaqqissaartut sallusuissut Guutip oqaasianiittoq paasissagaat. Aamma siulittuutigineqarpoq ‘paasisimasaqarneq annertusiartussasoq’. Paasinnittut taakkua sallusuissut upperilissavaat allanillu ilinniartitsilissallutik. Aamma inuit sumi tamaneersut sallusuissutinik taakkuninnga  ilinniarsinnaalissapput. Siulittuutip tamatuma eqquunnera misissorutsigu uagutsinnut erseqqilluinnassaaq Jiisusip ajoqersukkani ullumikkut najorai Jehovalu neriorsuutiminik tamanik eqquutitsisinnaasoq.

KRISTUMIUT EQQORTULIORUSUTTUT SALLUSUISSUT PAASIVAAT

3. Apustilit toqunerata kingorna qanoq pisoqarpa?

³ Apustilit toqunerata kingorna siulittuutigineqartutut tunussineqalerpoq, tamannalu innerup siaruaanneratut sukkatigisumik siaruarpoq. (Apustilit Suliaat 20:28-30; 2 Thessalonikamiut 2:1-3) Ukiuni hundredelinni arlalinni allaat kristumiuuneraraluartut sallusuissut paasinngilaat. Kristumiuunerartut siuttuisa Allakkanik upperinninneraraluarlutik salluliuutit, ‘anersaapiluit ajoqersuutaat’, Guutimut nikanarsaataasut ilinniartitsissutigisarpaat. (1 Timotheusi 4:1) Tamatuma kingunerisaanik inuit amerlanersaasa Guuti pillugu ilumoortoq naluaat. Salluliuutinillu, soorlu Guutip ataasiullunilu pingasuuneranik, tarnerup toqusuitsuuneranik tarnerillu ilaasa anniarfimmi ikualasumi naassaanngitsumik naalliutsinneqartarnerannik, ilinniartinneqartarput.

4. 1870-ikkunni kristumiut ikittunnguit sallusuissut Biibilimeersoq qanoq paasilerpaat?

⁴ 1870-ikkunnili — ‘ullut kingulliit’ aallartinnerat ukiut 40-t missiliorlugit sioqqullugu — kristumiut eqqortuliorusuttut ikittunnguit USA-mi Pennsylvaniameersut katersuuttalerput Biibili peqqissaartumik atuaqqissaarniarlugu sallusuissullu paasiniarlugu. (2 Timotheusi 3:1) Taakkulu imminnut Biibilimik Atuaqqissaartartunik taasarput. Maniguullutik uummatikkullu iluunngarlutik Guutip piumasaatut iliorusupput. Inuit taakku “ilisimasunut sianisuunullu” Jiisusip eqqartugaanut sallusuissummik paasinnissinnaanngitsunut ilaanngillat. (Matthæusi 11:25) Taakku Biibilimik atuaqqissaartarlutillu eqqarsaatiginneqqissaartarput, Guutimullu siulersoqqullutik qinusarput. Versit Biibilimiittut imminnut sanilliuttarpaat allallu taamatut Biibilimik atuaqqissaarlutik allattugaannik misissuisarlutik. Taamaalillutik Biibilimik Atuaqqissaartartut taakku sallusuissutinik ukiuni hundredelikkuutaani isertorneqarsimasunik paasisaqarnerujartorput.

5. Sooq Biibilimik Atuaqqissaartartut naqitaaqqat The Old Theology-mik qulequtallit saqqummersippaat?

⁵ Biibilimik Atuaqqissaartartut taakku paasisatik nuannaarutigingaarpaat, pingaarniartunnguutiginngilaalli. Aamma paasivaat sallusuissutit paasisatik Biibilimiittuaannartut, taamaattumillu oqanngillat oqaluussissutigisatik aatsaat oqaluussissutigineqartut. (1 Korinthimiut 8:1) Naqitaaqqalli The Old Theology-mik (Teologii pisoqaq) qulequtallit saqqummersippaat. Naqitaaqqat siulliit saqqummersinneqarnerannut siunertaavoq atuartut sallusuissutinik Biibilimeersunik paasinninnissaat taamaalillutik taakku ‘inuit ajoqersuutaanit eqqunngitsunit tamanit’ aniguisinneqarsinnaaqqullugit Jiisusillu taassumalu ajoqersugaasa ajoqersuutaannik — ‘teologiimik pisoqqamik’ — upperinnilersinnaaqqullugit. — The Old Theology, normu 1, 1889 apriilimoortoq, qupp. 32.

6, 7. (a) 1870-ikkunniilli Jehovap Nalunaajaasuisa sallusuissutit suut paasivaat? (b) Sallusuissutit paasisatit sorliit ingammik nuannaraagit?

⁶ 1870-ikkunniilli maannamut Jehovap Nalunaajaasuisa sallusuissutit nuannersorpassuit paasisimavaat. * Sallusuissutit taakku paasiuminaatsuunatillu pikkunaatsuunngillat; pissanganartuuppulli oqiliallannartuullutillu inuunermik isumaqalersitsisut, nuannaalersitsisut neriuuteqalersitsisullu. Taakku iluaqutigalugit Guuterput asannittoq, Jehova, ilisarilersinnaallugulu taassuma piumasaa paasisinnaavarput. Taamatuttaaq Jiisusi kinaanersoq, sooq nunamukarlunilu toqunersoq maannakkullu sulerinersoq paasisinnaavarput. Aammalu sallusuissutit naleqangaartut  taakku iluaqutigalugit paasisinnaavarput sooq Guutip ajussuseq akuerigaa, sooq toqusoqartartoq, qanoq qinusariaqartugut qanorlu piviusumik pilluartoqalersinnaasoq.

⁷ Siulittuutit ukiorpassuarni ‘isertuunneqartut’ ullunili kingullerni makkunani eqquuttut maannakkut paasisinnaavavut. (Danieli 12:9) Siulittuutit taakkua ilarpassui iivangkiiliuniillutillu Saqqummersitaniipput. Assersuutigalugu Jehovap pisunik uagut takusinnaanngisatsinnik — Jiisusip kunnginngorneranik, qilammi sorsunnermik Saatanillu nunarsuarmut igitaaneranik — paasinnissinnaalersippaatigut. (Saqqummersitat 12:7-12) Guutip aamma takusinnaasatsinnik paasinnissinnaalersippaatigut. Paasivarput sooq sorsuttoqarnersoq, nuna sajuttarnersoq, toqoraataasunik nappaassuaqarnersoq, kaattoqarnersoq aamma sooq inuppassuit taama ajortigisumik iliortarnersut. — 2 Timotheusi 3:1-5; Lukasi 21:10, 11.

8. Paasisavut kimut ataqqinaataatittarpavut?

⁸ Jiisusip ajoqersukkani ima oqarfigai: “Pilluarput isit ilissi takusassinnik takunnittut. Oqarfigaassimi: Pruffiitit kunngillu amerlaqisut takusarsi takorusukkaluarpaat takunaguli, tusaasarsilu tusaarusukkaluarpaat, tusaanaguli.” (Lukasi 10:23, 24) Aap, ullumikkut taamatut uagut misigivugut. ‘Takusavut’ ‘tusaasavullu’ Jehovamut ataqqinaataatittarpavut. Qujamasuutigeqaarput Guutip anersaani illernartoq ikiuisoq aallartissimammagu “sallusuissut tamaat” paasisinnaaqqullugu! (Atuakkit Johannesi 16:7, 13). Sallusuissut pingaartittuartigu allanullu oqaluussissutigiuartigu!

“INUPPASSUIT” SALLUSUISSUT UPPERILERPAAT

9. 1881-imi Watch Tower-imi apriilimoortumi qanoq kajumissaarisoqarpa?

9 1881-imi apriilimi, Watch Tower-ip (Napasuliaq Alapernaarsuiffik) normuata siulliup saqqummerneranit suli ukiut marlunngunngitsut, atuagassiaq taanna oqaluussisartunik 1000-inik pissarsiorpoq. Allaaserisami tassani piffissaq tamaat ullulluunniit affaa oqaluussisinnaasut kajumissaarneqarput kolportørinngoqqullugit, tassa pionerinngoqqullugit. Illoqarfissuarnut illoqarfeeqqanullu angalaqquneqarput kristumiunik eqqortuliorusuttunik Guutimik asannittunik eqqortumilli ilisimasaqanngitsunik ujaasiartorlutik Guutilu Biibililu pillugit ilumoortunik ilinniartitsiartorlutik.

10. Inuppassuit piffissaq tamaat oqaluussisartunngoqqusilluni kajumissaarut atuaramikku qanoq iliorusulerpat?

¹⁰ Taamatut kajumissaarisoqarneranit erserpoq Biibilimik Atuaqqissaartartut paasisimagaat kristumiut ilumoortut nutaarsiassamik nuannersumik oqaluussissutiginninnissaata pingaaruteqassusia. Taamani ataatsimiinnernut najuuttartut hundredet arlalialuinnaasarmata piffissaq tamaat oqaluussisartunik pissarsiorneq isumalluarpallaarneruvoq. Inuppassuilli atuagassiamik naqitaaqqamilluunniit ataasiinnarmik atuarsimasut paasisarpaat paasisatik sallusuissutaasut, taakkulu oqaluussissutigerusulertarpaat. Assersuutigalugu 1882-imi angut Londonimiu Watch Tower-imik atuagassiaaqqamillu Biibilimik Atuaqqissaartartunit saqqummersinneqartunik atuareerami ima allappoq: “Nassuiaatilaarsinga suna oqaluussissutigissaneringa qanorlu oqaluussissanersunga suliassaq Guutip pilluaqqusaa kissaatigisaatut naammassisinnaaqqullugu.”

11, 12. (a) Kolportørit sumik anguniagaqarpat? (b) Kolportørit ilagiit nutaat qanoq pilersittarpaat?

¹¹ 1885-imi Biibilimik Atuaqqissaartartut 300-t kolportøriupput. Piffissaq tamaat oqaluussisartut taakku ullumikkut anguniakkatta assinganik anguniagaqarput — Jiisusimut Kristusimut ajoqersuganngortitsinissamik. Periaaseqarpulli uagut periaatsitsinnit allaanerusumik. Ullumikkut inuit ataasiakkaarlugit Biibilimik atuaqqissaaqatigisarpavut. Taavalu atuaqqissaaqatigisartagarput ilagiinnut ataatsimiigiaqqullugu qaaqqusarparput.  Kolportørilli taamani inuit eqimattakkuutaarlugit atuaqqissaaqatigisarpaat. Atuakkanik tunniussisarput, soqutiginnittullu katersuuteqqusarpaat Biibilimik atuaqqissaaqatigiinniassammata. Taamaalillutik ilagiit ikittunnguakkuutaat “klassitut” taasakkatik pilersittarpaat.

¹² Assersuutigalugu 1907-imi kolportørit illoqarfik aalajangersimasoq atuakkamik Millenniets Daggry-mik (aamma Studier i Skriften-imik taaneqartartumik) pereersimasut naapinniarlugit angalaarfigaat. Kolportørit taakku soqutiginnittut ilaata angerlarsimaffianut sapaammi ataatsimiinnermut qaaqquaat. Sapaammi ulloq naallugu kolportørip Guutip inuiannut siunertaa sammivaa. Sapaammi tulliuttumi najuuttut kajumissaarpai ataatsimiittaqqullugit. 1911-mi qatanngutit periaaseq tamanna allanngortippaat. Kiffartortut angalasartut 58-it USA-mi Canadamilu tamanut ammasumik oqalugiariartoqattaartinneqarput. Qatanngutit taakku soqutiginnittut oqalugiaammik tusarnaartut atii najugaallu allattorpaat angerlarsimaffinnilu ataatsimiittarnissaannik pilersaarusiorlutik. Taamaalillutik ilagiit nutaat pilersittarpaat. 1914-imi nunarsuaq tamakkerlugu Biibilimik Atuaqqissaartartut 1200-nik ilageeqarput.

13. Ullumikkut oqaluussinermut tunngasut suut illit killinneqaatigaagit?

¹³ Ullumikkut nunarsuaq tamakkerlugu 109.400-t missiliorlugit ilageeqarpoq, qatanngutillu 895.800-t missiliorlugit pioneriupput. Inuit sallusuissummik upperinnilersut inuunerminnilu maleruaasut 8 millioningajaapput. (Atuaruk Esaja 60:22). * Amerliartorneq tamanna tupinnaqaaq Jiisusip siulittuutigimmagu ajoqersukkani atini pillugu ‘tamanit uumissorneqassasut’. Aamma oqarpoq malersorneqassasut, parnaarunneqassasut allaallu toqunneqassasut. (Lukasi 21:12-17) Jehovap innuttai Saatanimit, anersaapiluinit inuppassuarnillu akerlilersorneqaraluarlutik ajoqersuganngortitsiortornerminni siumukarput. Ullumikkut “silarsuarmi tamarmi” — kiannerpaami, issinnerpaami, qaqqani, inoqajuitsuni, illoqarfinni nunaannarmilu — oqaluussisarput. (Matthæusi 24:14) Tamakku tamarmik pisinnaanngorsimapput Guutip kiffani tapersersormagit.

‘PAASISIMASAQARNEQ ANNERTUSIARTUSSAAQ’

14. ‘Paasisimasaqarneq’ naqitat atorlugit qanoq ‘annertusiartorpa’?

¹⁴ ‘Paasisimasaqarneq annertusiartorpoq’ nutaarsiassaq nuannersoq pillugu oqaluussisartorpassuaqarmat. Aamma atuakkat atuagassiallu paasisimasaqarnermik ‘annertusiartortitseqataapput’. 1879-imi juulimi Biibilimik Atuaqqissaartartut Napasuliaq Alapernaarsuiffik siulleq, taamani Zion’s Watch Tower and Herald of Christ’s Presence-mik taaguutilik, saqqummersippaat. Normu siulleq taanna firma akilerlugu tuluttuinnaq 6000-inngorlugu naqitertinneqarpoq. Charles  Taze Russell 27-nik ukiulik aaqqissuisunngortinneqarpoq, Biibilimillu Atuaqqissaartartut anersaakkut inersimalluartut tallimat atuagassiamut ilanngutassianik allaqataasarput. Ullumikkut Napasuliaq Alapernaarsuiffik oqaatsini 195-ini saqqummersinneqartarpoq. Atuagassiaavoq silarsuarmi siaruarsimanerpaaq 42.182.000-inngorlugu naqiterneqartartoq. Atuagassiaq silarsuarmi siaruarsimanerpaap tullia tassaavoq Vågn op! oqaatsinut 84-inut 41.042.000-inngorlugu naqiterneqartartoq. Ukiut tamaasa aamma atuakkat Biibilillu 100 millionit missaat naqiterneqartarput.

15. Naqiteriveqarfiutivut qanoq aningaasalersorneqarpat?

¹⁵ Naqiteriveqarfiutivut nammineq kajumissutsimit tunissutinit aningaasalersorneqarput. (Atuaruk Matthæusi 10:8). Naqitanik nioqqutissiornermik paasisimannittut tamanna tupigusuutigisarpaat nalunnginnamikku maskiinat, pappialat, qalipaatit atortussallu allat qanoq akisutigisut. Qatanngut naqiteriviutitsinnik atortussarsiniussisartoq ima oqarpoq: “Niuertut naqiterivinnut alakkaasut tupigusuutigisarpaat naqiterutit teknikkikkut taama nutaatigisut naqiterneqartullu taama amerlatigisut nammineq kajumissutsimit tapersiissutinit aningaasalersorneqarsinnaammata. Aamma Betelimi sulisut taama inuusutsiginerat taamalu nuannaartiginerat tupigusuutigisaqaat.”

GUUTIMIK PAASISIMASAQARNERUP NUNARSUAQ TAMAKKERUMAARPAA

16. Sooq Jehovap ‘paasisimasaqarneq annertusiartortippaa’?

¹⁶ Jehovap ‘paasisimasaqarneq annertusiartortippaa’ piumasarigamiuk “inuit tamalaat annaanneqassasut sallusuissummillu eqqorluartumik ilisimasaqalissasut”. (1 Timotheusi 2:3, 4, NW) Aap, Jehovap kissaatigaa inuit sallusuissummik paasinninnissaat eqqortumik imminik pallorfiginnissinnaaniassammata pilluaqquneqarsinnaaniassammatalu. Jehovap oqaluussisitsinnermigut kristumiut tanitat aalajaatsut kinguleruttut katersorpai. Aamma ‘inuppassuit amerlangaartut’ “inuiaqatigiinnit naggueqatigiinnillu inuiannillu immikkullu oqaasilinnit tamanit pisut” nunarsuarmi naassaanngitsumik inuulernissamik neriugisallit katersorpai. — Saqqummersitat 7:9.

17. Pallorfiginnittut ilumoortut amerliartornerannit suna paasivarput?

¹⁷ Ukiut 130-t kingulliit ingerlaneranni silarsuaq tamakkerlugu pallorfiginnittut ilumoortut amerliartorsimaqaat. Tamatumannga erserpoq Jehovap taassumalu kunnginngortitaata, Jiisusip Kristusip, Jehovap kiffaanik nunarsuarmiittunik siulersuinermikkut, illersuinermikkut, aaqqissuussaasunngortitsinermikkut ilinniartitsinermikkullu taakku najoraat. Jehovap ullumikkut ‘inuppassuit’ sallusuissummik paasinnilernissaat pillugu neriorsuutini eqquutitimmagu qularutiginngilluinnarsinnaavarput aamma siunissaq pillugu neriorsuutini eqquutitikkumaarai. Taamanikkussamut “Naalakkamik ilisimasaqarnerup nuna [tamakkerumaarpaa] soorlu ermit matoqqagaat immap naqqa”. (Esaja 11:9) Eqqarsaatigeriakkit inuiaat pilluaqqussutisiasaat nuanningaartut misigiumaagaat!

[Quppernerup ataani ilanngussat]

[Atuaqqissaarnermi apeqqutit]

[Qupp. 14-mi assiliartaq]

Biibilimik Atuaqqissaartartut maniguuttuupput ilumoorlutik Guutip piumasaatut iliorusuttut

[Qupp. 15-mi assiliartaq]

Jehovap sallusuissummik ilinniartitsiniarnerit pingaartippaa