Qanilligit qinnutinik tusartartumut

GUUTIMUT uppernerartorpassuit iluamik nassuiarsinnaanngilaat sooq uppertuunerlutik. Aamma nassuiarsinnaanngilaat sooq upperisarsiornerit ajussutsimut pissutaagajunnersut imaluunniit sooq Guutip naalliunnartoqarnera akuerineraa. Iliuuserisinnaasatuarisarpaat Guutimut paasilluanngisaminnut qinuneq.

Tamatumannga Guuti suli qaninnerulersinnaavat. Guutip qanoq ittuuneranik paasinninneq tunngavigalugu upperinnilersinnaavutit taassumannga asannilersitsillunilu pingaartitsilersitsisumik. Upperneq piviusoq uppernarsaatinik tunngaveqarpoq. (Hebræerit 11:1) Guuti pillugu ilumoortoq paasigukku ilisarisimalissavat ikinngutitullu oqaluuttalerlugu. Guutip piunera qularigaluarlugu taassumunnga qinusartut oqaluttuaat uku eqqarsaatigikkit.

▪ Patricia allaaserisami siullermi eqqaaneqartoq. “Ullut ilaanni ikinngutikka qulit ilagitillugit upperisarsiorneq eqqartulerpaat. Oqaluttuuppakka ataatama, guuteqannginneraasup, Jehovallu Nalunaajaasuisa ilaata matukkut kasuttortup oqaloqatigiinnerat tusaajumanagu anillunga. ‘Immaqa Jehovap Nalunaajaasuisa oqaasii ilumoortortaqarput,’ ikinngutima ilaat oqarpoq.

‘Soormi taamaannersoq paasiniarlugu ataatsimiinneranni alakkarutsigit?’ alla oqarpoq. Taamaaliorpugullu. Uppererpianngikkaluarlugit inussiarnisaarnerat pissutigiinnarlugu ataatsimiigiaqataasalerpugut.

Sapaatit ilaanni isummakkut allannguutigisannik tusagaqarpunga. Oqalugiartup nassuiarpaa sooq inuit naalliuuteqarnersut. Inuit aallaqqaammut naammalluinnartutut pinngortitaasimasut aamma ajorti toqulu inummit ataatsimit aallartittut inunnullu tamanut siaruaattut siornatigut paasisimanngilara. Oqalugiartup aamma nassuiarpaa sooq Jiisusi toqusariaqartoq inuup siulliup maangaannartitaa pilerseqqinniarlugu. * (Romamiut 5:12, 18, 19) Suut tamaasa paasileriataarpakka. ‘Ilumut uagutsinnik isumassuisumik Guuteqarpoq,’ eqqarsarpunga. Biibilimik atuaqqissaarnera ingerlatiinnarpara, sivitsunngitsorlu, inuuninni siullerpaamik, paasivara piviusuusumut qinusinnaallunga.”

▪ Allan aamma allaaserisami siullermi eqqaaneqartoq. “Ullut ilaanni Jehovap Nalunaajaasui uagutsinnut kasuttorput, nuliamalu isertippai nunarsuarmi naassaanngitsumik inuuneq eqqartugaat soqutigigamiuk. Paamitsappunga. Isertitai inimiitillugit nuliara igaffimmukaqatigaara  imalu oqarfigalugu: ‘Sianiillioqinak. Tamakku upperisinnaanngilatit!’

‘Taavami, iserfigalugit kukkuneri uppernarsaannassavat,’ akivoq.

Soorunami sumilluunniit uppernarsaasinnaanngilanga. Inussiarnersorujussuuppulli inuunerullu pinngortitaasimanera pinngoriartuaarsimaneraluunniit pillugu atuakkamik tunillunga. Tunngavilersorluagaallunilu allagaalluangaarmat aalajangerpunga Guuti ilisarisimanerulerniarlugu. Nalunaajaasut Biibilimik atuaqqissaaqatigisalerpakka, sivitsunngitsorlu paasivara ilikkakkakka Biibilimeersut upperisarsiorneq pillugu siornatigut isummannit allaanerujussuusut. Jehova ilisarisimanerujartortillugu qinnutikka isumaqarneruleriartorput. Pitsaavallaanngitsunik isiginnittaaseqarama Guutimut ikioqquvunga. Upperilluinnarpara Jehovap qinnutikka akisarai.”

▪ Andrew Tuluit Nunaanni najugalik. “Isumaqarfiginningaarpunga ilisimatuussuserlu soqutigingaarlugu, pinngoriartuaarsimaneraanerlu kisiat upperaara allat oqarmata taanna uppernarsarneqarsimasoq. Pisartut ajortorpassuit pissutigalugit Guuti upperisinnaanngilara.

Taamaakkaluartoq ilaannikkut ima eqqarsartarpunga: ‘Tappavani Guuteqarpat taava  inuunerup siunertaa paaserusuppara. Sooq taama pinerluttuliortoqartigalunilu sorsuttoqartigaa?’ Artorsaateqaraangama qinusarpunga, kimulli qinunerlunga nalusarpara.

Taavali nuliara naqitaaqqamik Jehovap Nalunaajaasuinit saqqummersitamik tunisippoq ima qulequtalimmik: Silarsuaq manna aniguissava? Apeqqut tamannarpiaq eqqarsaatigisarpara. Naqitaaraq pissutigalugu eqqarsaatigilerpara akissummik Biibilimeersumik misissuineq iluaqutaassanersoq. Kingusinnerusukkut feeriartillunga arlaata uannut tunniuppaa atuagaq Bibelen — Guds ord eller menneskers? * Paasilerakku Biibili ilisimatuussutsimut naapertuuttoq misigivunga Biibili pillugu ilinniarnerusariaqarlunga. Taamaattumik Jehovap Nalunaajaasuisa ilaata Biibilimik atuaqqissaaqatigisalerumammanga akuersivunga. Jehovap siunertaa paasinerujartortillugu misigivunga taanna kinaassusilivittut, qinunikkut saaffigeriaannaasattut, ilisarisimalerlugu.”

▪ Jan Londonimi naaggaartutut peroriartortoq. “Upperisarsiortut ilumoortuusaarnerat naalliuuterpassuillu pissutigalugit upperisarsiorneq soqutigiunnaarpara. Aamma ilinniarnertuunngorniarnera unitsippara aningaasarsiorniarlungalu guitariutigalunga erinarsortalerlunga. Taamanikkut Pat naapippara. Katuullitut peroriartorsimavoq uattulli aamma upperunnaarsimalluni.

Ilinniarnerminnik unitsitsisimasut allat Kangiani upperisarsiornernik soqutiginnittut illumi qimaannagaasimasumi illoqatigilerpavut. Unnuarsuarmut inuunerup siunertaa oqallisigisarparput. Uanga Patilu Guuti upperinngikkaluarlugu misigivugut nukeqarsimassasoq inuuginnartitsisumik.

Nipilersortartutut suliffissarsiorluta Tuluit Nunaata avannaanut nooreerluta ernertaarpugut. Unnuit ilaanni ernerput napparsimasoq misigilerpunga Guutimut upperinngisannut qinullunga. Tamatuma kinguninngua Patilu aappariinnerliuleratta naalungiarsuuterput tigullugu qimappara. Aammaarlunga qinuvunga, tusarnaartoqarsimasinnaammat. Sianiginngisannik Pat aamma taamaaliorsimavoq.

Ulloq taanna kingusinnerusukkut Jehovap Nalunaajaasui marluk Patimut kasuttorsimapput siunnersuutillu pitsaasut Biibilimeersut takutillugit. Patip sianerfigaanga aperalungalu Nalunaajaasut Biibilimik atuaqqissaaqatigippanni peqataarusunnersunga. Paasilertorparput Guutimit iluarisaassagutta katittariaqarluta. Attaveqatigiinnitta najummassimanartarnera eqqarsaatigalugu piumasaqaaterujussuuvoq.

Siulittuutit Biibilimeersut eqquunnissaat, sooq naalliunnartoqarnersoq Guutillu naalagaaffia suunersoq pillugit paasisaqarnerorusuppugut. Guutip ilumut soqutigigaatigut paasiartuaarparput piumasaatullu iliorusuppugut. Katippugut. Ilisimassut Guutip oqaasianeersoq iluaqutigalugu qitornavut pingasut perorsarpavut. Jehovap qinnutivut tusartarai upperilluinnarparput.”

Uppernarsaatit nammineq misissukkit

Inuit allat millionilikkuutaat assigalugit, allaaserisami matumani issuarneqartut upperisarsiornermit eqqunngitsumit uukapaatitaanngillat paasivaallu sooq Guutip naalliunnartoqarnera akuerineraa. Malugaajuk taakkua tamarmik Biibilimik eqqorluartumik aatsaat paasinnikkamik Jehovap ilumut qinnutinik tusarnaartartuunera qulariunnaaraat?

Guutip piuneranik uppernarsaatit misissorusuppigit? Jehova pillugu ilumoortumik ‘qinnutinillu tusartartumut’ qanilliniarlutit qanoq iliorsinnaaninnik paasiniaaninni Jehovap Nalunaajaasuisa ikiorusuppaatsit. — Tussiaat 65:3.

[Quppernerup ataani ilanngussat]

[Qupp. 10-mi Issuagaq]

“Jehovap siunertaa paasinerujartortillugu misigivunga taanna kinaassusilivittut, qinunikkut saaffigeriaannaasattut, ilisarisimalerlugu.”

[Qupp. 9-mi assiliartaq]

Upperneq piviusoq uppernarsaatinik Guutilu pillugu ilumoortumik ilisimasaqarusunnermik tunngaveqarpoq