Qinnutinik tusartartoq kinaava?
Qinnutinik tusartartoq kinaava?
QINNUTINIK tusartoqartarpat tassaasimassaaq Pinngortitsisoq. Inuup qarasaanik pinngortitsisuunngitsup kiap allap eqqarsaativut atuarsinnaavai? Kiap allap qinnutivut akissavai, pisariaqartitatsinnillu ikiorluta? Immaqali ima eqqarsarputit: ‘Pinngortitsisoqarneranik upperinninneq silatusaarnerua?’
Inuppassuit isumaqarput Pinngortitsisoq upperissagaanni ilisimatuussutsikkut ullumikkut paasisat tamaasa itigartittariaqarlugit. Guutimilli upperinninnerup ilisimatuussutsimut akerliuneranik isuma eqqunngitsuuvoq. Una eqqarsaatigiuk:
▪ USA-mi universitetini pitsaanerpaani 21-usuni professorit ilisimatuut 1646-t qanittukkut apersorneqarnerannit paasineqarpoq taakkua pingasuugaangata ataasiinnaq imminut oqaluttuarinermini ‘Guuti upperinagu’ oqarumassasoq.
Ilisimatoorpassuit Guutip piuneranik upperinnittuusut erseqqippoq.
Pinngortitsisoqarneranut uppernarsaatit
Qinnutinik tusarnaartoqartarnera uppernarsaatissaqartinnagu akuerisariaqarparput? Arlaannik upperinnissagaanni akuerinnissagaanniluunniit takussaasumik uppernarsaateqartariaqanngilaq. Biibilimi nassuiarneqarpoq upperneq tassaasoq “takunngisamik qularuteqannginneq”. (Hebræerit 11:1) Assersuutigalugu radiup maligaasai takuneqarsinnaanngillat, mobilikkulli oqaloqateqarsinnaagatta qularutiginngilarput maligaasat nipinik aallakaatitsisinnaasut; taamaattumik maligaasat piuneri upperiuminaatsinngilarput. Guutimut, qinnutinik tusartartumut, tunngatillugu aamma taamaappoq, piunerata upperilluinnarnissaanut naammattunik uppernarsaatissaqarpugut.
Guutip piuneranut uppernarsaatit sumi nanisinnaavavut? Avatangiisivut qiviaannarsinnaavavut. Biibilimi ima tunngavilersuuteqarpoq: “Illuliat tamarmik immikkut sanasoqartarput, tamanilli sanasoq tassaavoq Guuti.” (Hebræerit 3:4) Tunngavilersuutaalluarneranut isumaqataavit? Silarsuaq qanoq aaqqissorluagaatigisoq, inuuneq qanoq pilersimanersoq inuulluunniit qarasaa tupinnangaartoq eqqarsaatigigaangakkit immaqa isummertarputit uagutsinnit annerusumik piusoqarsimassasoq. *
Guutili pillugu pinngortitarsuarmi ilinniarsinnaasavut killeqarput. Guuti pillugu uppernarsaatit pinngortitarsuarmi takuneri matup matoqqasup illuatungaani pisuppaluttumik tusaanertut ippoq. Inoqartoq nalunngilat — kinaavali? Tamanna paasiumallugu matu ammartariaqarpat. Kinaassusillip sunik tamanik pinngortitsisuusup kiunera paasiumallugu tamatumunnga assingusumik iliortariaqarpugut.
Biibili Guuti pillugu paasisaqarnissamut matutullusooq ippoq. ‘Matu’ taanna ammarlugu siulittuutit tassaniittut annikitsualuttaannut allaat eqquunneri misissorukkit Guutip piunera uppernarsaatissarsissavat. * Taakkuinnaanngillalli, Guutip inunnut iliuuserisimasarpassui pillugit oqaluttuanit qinnutinik tusartartup kinaassusia erserpoq.
Qinnutinik tusartartoq qanoq ittuua?
Biibilimi ersersinneqarpoq qinnutinik tusartartoq kinaassusiliusoq — tassa ilisarisimaneqalersinnaasoq. Soorunami kinaassusilik kisimi paasinnilluni tusarnaarsinnaavoq. Oqaatsit qiimmaallannartut uku atuarsinnaavavut: “Ilinnut qinnutitsinnik tusartartutit. Inuit tamarmik ornissavaatsit.” (Tussiaat 65:3) Guutip upperlutik imminut qinusut tusarnaartarpai, imalu ateqarpoq: Jehova, imaluunniit Biibilimik nutsikkat allat naapertorlugit Jahve. (Tussiaat 83:19) Biibilimi allassimavoq Jehova ‘inunnit iluanngitsunit ungaseqisoq, iluartulli qinnutaat tusartaraa’. — Ussatit 15:29.
Jehova misigissuseqarpoq. ‘Guutiuvoq asannittoq’ aamma ‘Guutimik pilluartumik’ taaneqartarpoq. (2 Korinthimiut 13:11; 1 Timotheusi 1:11) Biibilimi allassimavoq ajussuseqangaarnerata nalaani Guuti ‘aliasulersoq’. (1 Mosesi 6:5, 6) Guutip inuit misilinniarlugit taakkuninnga naalliutsitsineranik eqqarsaat eqqunngitsuuvoq. Biibilimi ima allassimavoq: “Guuti ajortumik iliunngisaannarpoq.” (Jobi 34:10) Immaqali ima aperivutit: ‘Guuti Ajugaqanngitsuuguni tamanik pinngortitsisoq taava sooq naalliunnartut unitsinngilai?’
Jehovap inuit piumasamittut iliorsinnaatippai, tamatumanngalu qanoq ittuunera erserpoq. Qanoq inuussanerluta nammineq aalajangiisinnaanerput pingaartipparput, ilaa? Ajoraluartumik inuppassuit kiffaanngissusertik atornerluttarpaat taamaalillutillu imminnut allanullu naalliuutissittarlutik. Apeqqulli una eqqarsaatigilluartariaqarparput: Guutip inuit kiffaanngissusiiarnagit qanoq ililluni ajussuseerutsitsisinnaava? Apeqqut tamanna allaaserisami tulliuttumi sammissavarput.
[Quppernerup ataani ilanngussat]
^ imm. 8 Guutip piunera pillugu uppernarsaatit sukumiisumik nassuiarneqarput atuagassiaaqqami Fem gode spørgsmål om livets oprindelse-mi atuakkamilu Findes der en Skaber som interesserer sig for os?-imi. Jehovap Nalunaajaasuinit saqqummersinneqartut.
^ imm. 10 Jehovap Nalunaajaasuisa atuagassiaaraq Inunnut tamanut atuagaq saqqummersippaat Biibilip Guutimit isumassarsiarititaaneranut uppernarsaatit eqqarsaatiginissaannut ikiorniarlutit.
[Qupp. 5-mi Ungalusaq
Upperisarsiornernit qulalersinneqarpit?
Alianaraluartumik upperisarsiornerit pissutigalugit inuppassuit qinnutinik tusartartumik asannittumik Guuteqarnera qularilersimavaat. Upperisarsiornerit sorsunnernut peqqarniisaarnianullu attuumassuteqarnerat meeqqanillu atornerluinernik isiginngitsuusaarinerit pillugit inuppassuit Guutimut qinusarsimasuugaluit ima oqarsimapput: “Guuteqarnera upperinngilara.”
Sooq upperisarsiornerit ajortumik sunniuteqarajuppat? Tamanna naatsumik akineqarsinnaavoq: Inuit ajortut upperisarsiornerup aqqani ajortuliortarmata. Biibilimi siulittuutigineqarpoq kristumiussuseq ajortumik siunertaqartunit tiguarneqarumaartoq. Apustili Paulusi nakkutilliisut kristumiut ima oqarfigai: “Ilissi akornassinnit saqqummersoqarumaarpoq angutinik ilumoortuunngitsumik oqaluttunik ajoqersukkat imminnut malinnaatikkumallugit.” — Apustilit Suliaat 20:29, 30.
Upperisarsiorneq eqqunngitsoq Guutip isaani maajunnartuuvoq. Guutip oqaasia, Biibili, naapertorlugu upperisarsiorneq eqqunngitsoq ‘nunarsuarmi toqutaasimasut tamarmik aavannut’ akisussaavoq. (Saqqummersitat 18:24) Upperisarsiornerit Guuti ilumoortoq, asannilluinnartuusoq, pillugu inunnik ilinniartitsinissaraluartik sumiginnarsimagamikku toqutsisuusutut Guutimit isigineqarput. — 1 Johannesi 4:8.
Guutip qinnutinik tusartartup upperisarsiornerit naqisimanninnerannik eqqugaasut misiginneqatigai. Ungasinngitsukkut Guutip, inunnik asannittup, Jiisusi aqqutigalugu upperisarsiortut ilumoortuusaartut tamaasa eqqartuutissavai. Jiisusi ima oqarpoq: “Ullussami tassani amerlasuut uannut oqarumaarput: Naalagaq, Naalagaq! Illit atikkut siulittuisarsimannginnerpugut . . .? Taava isertuarnanga nalunaarfigiumaarpakka: Ilisarisimanngisaannarpassi. Nigorsinga, ilissi inatsisinik unioqqutitsisuususi!” — Matthæusi 7:22, 23.
