Sooq qinnutinik tusartartup naalliunnartoqarnera akueraa?

INUIT ilaasa Guutimut qinusaraluarlutik taassuma piunera qularaat. Sooq qularpat? Immaqa silarsuarmi naalliunnartorpassuit pissutigalugit. Sooq Guutip naalliunnartoqarneranik akuerinninnera eqqarsaatiginikuuiuk?

Guutip inuit maannakkutut itsillugit — naammalluinnanngitsuutillugit naalliuuteqartillugillu — ilumut pinngortippai? Guutip inunnik naalliuttoqarnissaanik siunertallip ataqqinissaa sapernartorujussuussaaq. Unali eqqarsaatigiuk: Biilip kusanartup qimerloornerani takugukku illuatungaani singarneqartoq, taava eqqarsassavit biililiortitsisup tamanna siunertarisimassagaa? Soorunami naamik! Eqqarsassagaluarputit biililiortitsisup biili ‘iluserilluinnartoq’ sanatissimassagaa, inummilli arlaannilluunniit singarneqarsimassasoq.

Taamatulli pinngortitarsuup aaqqissuullugaanera ilusilersorneqarneralu qimerlooraangatsigit inuillu ajortunnguutigisaannik peqquserluttoqarnera paatsiveerusimaartoqarneralu malugigaangatsigit qanoq isummertarpugut? Biibilimi ajoqersuutigineqarpoq Guutip inuit naammalluinnartutut pinngortikkai, kingusinnerusukkulli imminnut ajoqutaasumik iliuuseqartut. (5 Mosesi 32:4, 5) Nutaarsiassaq nuannersoq tassaavoq Guutip neriorsuutigimmagu inuit naalattut naammalluinnartunngorteqqinnerisigut ajoqusiineq aaqqiiviginiarlugu. Soormiuna suli taamaaliunngitsoq?

Sooq suli taamaaliunngila?

Tamatuma akissutaa apeqqummut allamut tunngavoq, tassa kina inunnut naalagaassanersoq. Jehovap inuit inummik naalakkersuisoqarnissaat siunertarinngisaannarpaa, nammineq taakkununnga naalakkersuinissani siunertaraa. Biibilimi ima allassimavoq: ‘Inuup ingerlavissani nammineq aalajangigassarinngilaa.’ (Jeremia 10:23) Alianaraluartumik inuit siulliit Guutip naalakkersuineranut pikitsitsipput. Inatsisinik unioqqutitsineq tamanna ajortilinnguutigaat. (1 Johannesi 3:4) Tamatuma kingunerisaanik naammalluinnartuujunnaarput tamannalu taakkununnga kinguaassaannullu ajoqutaavoq.

 Ukiuni tusindilikkuutaani Jehovap inuit naalakkersuisinnaatippai, oqaluttuarisaanerli sumik ersersitsiva? Inuit taamaaliornissaminnut piginnaaneqanngitsut. Erseqqippoq naalakkersuisut inuit pilersitaat tamarmik naalliunnartoqarneranut pissutaasut. Taakkua arlaannaataluunniit sorsunnerit, pinerluttuliornerit, naapertuilluanngitsuliornerit nappaatilluunniit atorunnaarsissinnaasimanngilaat.

Guutip ajoqusiineq qanoq aaqqissavaa?

Biibilimi neriorsorneqarpugut Guutip silarsuaq naapertuilluassuseqarfiulersissagaa. (2 Petrusi 3:13) Guutimik imminnullu asanninnermik namminneq piumassutsiminnik ersersitsisut kisimik tassani inuusinnaatitaapput. — 5 Mosesi 30:15, 16, 19, 20.

Biibilimi aamma allassimavoq “ullormi eqqartuussivissami” qanilliartorasuartumi tamatumani Guutip naalliuutit tamatumunngalu pissutaasut piiassagai. (2 Petrusi 3:7) Taava Guutip kunnginngortitaa, Jiisusi Kristusi, inunnut naalattunut naalakkersuilissaaq. (Danieli 7:13, 14) Naalakkersuinerup tamatuma suna naammassissavaa? Biibilimi ima allassimavoq: “Qanilaartut nuna kingornutissavaat pilluangaarnertillu nuannaarutigissallugu.” — Tussiaat 37:11.

Inuit Jehovamut, ‘inuunerup puilaffianut’, pikitsitsinerup kingunerisaanik ajoqusiinerit tamaasa Jehovap qilammi kunngiusoq Jiisusi aqqutigalugu aaqqissavai — soorlu nappaatit, utoqqalineq toqulu atorunnaarsillugit. (Tussiaat 36:10) Jiisusip asannittumik naalakkersuinerminut akuersisut tamaasa ajorunnaarsissavai. Taassuma naalakkersuinerani siulittuutit Biibilimeersut uku eqquutissapput:

▪ “Innuttaasoq kinaluunniit oqassanngilaq: ‘Napparsimavunga!’ Inuit tassani najugaqartut ajortiminnik isumakkeerfigineqarput.” — Esaja 33:24.

▪ “Qulliillu tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu  anniartoqarunnaassaaq siulliit peermata.” — Saqqummersitat 21:4.

Guutip naalliunnartuerutsitsiniarluni neriorsuutiminik qanittukkut piviusunngortitsinissaa nalunagu tuppallernangaarpoq, ilaa? Neriorsuutiminik piviusunngortitsinissaata tungaanut qinnutsitsinnik tusarnaartarneranik upperinnikkunnaassanngilagut naalliuutinik atuukkallartitsinera pissutigiinnarlugu.

Guuti piuvoq. Tusarnaartarpaatit, allaat anniaatitit aliasuutitillu aniatikkaangakkit tusaasarpaatit. Nalorniunnaarlutit anniaateqarunnaarlutillu inuunermik nuannaarutiginnittutit takunissaa qilanaaraa.